Read Ȧŋlemrȧnɛ Ȧfu Mathiu 8 Bible Online

Mathiu 8 - Ȧŋlemrȧnɛ Ȧfu bible

Mathiu 8

¹Ɔwa ma ɔ thor ka kateŋ-e, suniya tǝbana tǝ tan kɔ.

²Ka wuni ka rǝlel ɔ der ro ŋɔŋ, ɔ sɔna kɔ tǝwu, kɔ pa, Pa, bepi mǝ selɔ-e, mǝ gbǝli fethǝr mi.

³Ka Yisɔsȧŋ ɔ thanthi kȧta kɔŋ, ɔ gboŋ kɔ, kɔ pa, I selɔ. Yi mun gbǝraŋ. Ka ɔlɛmp wati ralel rǝ pond kɔ.

⁴Ka Yisɔsȧŋ ɔ pa ro rɔŋɔŋ, Botnɛ kȧmȧ mǝ te kanɛ ti wuni o wuni, kɛrɛ kɔnɛ mǝ tɔrinɛ ka aŋfode, kȧmȧ mǝ wurɔ asathka ȧte Mosisȧŋ ɔ yamari tǝ kǝyi mǝseri ro ŋaŋ.

⁵Ɔwa ma ɔ wɔŋ ro Kapǝrneɔm-e, ukaptin ɔ der ro ŋɔŋ, kɔ nɛmthɛnɛ kɔ, ɔ pa,

⁶Pa, ȧŋbɔy a mi ɔ fǝntha ro seth kȧmi, ɔ po gbɛthkɛ, ɔwa ɔ nakasi ɔthasǝr.

⁷Ka Yisɔsȧŋ ɔ pa ro ŋɔŋ, I ti der yeŋkǝs kɔ.

⁸Ka ɔkaptin ɔ pa, Pa, i bek hɛ kǝpa munɔ mǝ wɔŋ ka ȧŋseth a mi. Pa gbo ȧrim, ɔwa ȧŋbɔy a mi ɔ tǝ yeŋk.

⁹kotȧy-e minɛ sɔ i yi wuni ka afɔsɔ ratha, i ba aturgba roratha kȧmi. Ma i pa ka ɔkin ɔwe, Kɔnɛ, ɔwa ɔ tǝ kɔ. Ka ɔlɔm, Der, ɔwa ɔ tǝ der. Ka ȧŋbɔy a mi, Yɔ ȧte, ɔwa ɔ tǝ yɔ ti.

¹⁰Ma Yisɔs ɔ tǝl ȧte, ɔ kabanɛ, kɔ pa ka ŋaŋ aŋa tȧŋ kɔ-e, Tǝ tɛntɛnɛ i pa ro rɔnu, i tha bǝp hɛ kǝlanɛ kǝbana kǝwunɔŋ, hali kǝtɔŋ ka aŋIsrɛl bɛ.

¹¹Ɔwa i kanɛ nu, agbȧthi aŋ tǝ wur ro thɔrɔŋ yi ro pil, aŋ tǝ yirȧ yi Ebraham, yi Aysak dɛ yi Yekɔb ka rȧbȧy ra ro riyana,

¹²kɛrɛ a tǝ fitha aŋwuth ŋa rȧbȧy ka ȧŋsum rokaŋ, ro kǝkulɔ yi kȧŋȧkŋȧk ɛsek kǝ yi.

¹³Ka ȧŋbɔy ŋɔŋ ɔ yeŋk ka ȧŋlɔkɔ ŋati gbeŋ.

¹⁴Ma Yisɔsȧŋ ɔ wɔŋ ka ȧŋseth ŋa Pitar-e, ɔ nənk ɔniŋkara kɔŋ ɔ fǝntha, ɔ tu mǝdɛr mǝgbipanɛ.

¹⁵kɔ gboŋ kȧta kɔŋ, ka madɛr mǝgbipanɛ mǝ ter kɔ, kɔ yokanɛ, ɔ yɔna kɔ.

¹⁶Ma rȧfɔy rǝ bek-e, a kȧrȧ kɔ afǝm agbȧthi aŋa ba akǝrǝfi. Kɔ wurɔ aŋkǝrǝfi rǝ rim, ɔ kȧl yeŋkǝs aŋa yi aboma bɛ;

¹⁷kȧmȧ ȧte Isaya ɔnȧbi ɔ pa tǝ lasǝr, kǝpa, Kɔn kɔnɔnɛ ɔ gbasi mȧrȧnt ma su, ɔwa ɔ sara tatu ta su.

¹⁸Ɔwa, ma Yisɔs ɔ nənk suniya tǝbana tǝ gbǝtɔsnɛ kɔ-e, ɔ yamari tǝ kǝfǝsi romɔri.

¹⁹Ka ukarmɔkɔ ulɔm ɔ der, ɔ pa ro ŋɔŋ, Karmɔkɔ i ti tȧŋ mu dɛr o dɛr ro maŋ kɔ.

²⁰Ka Yisɔsȧŋ ɔ pa ro rɔŋɔŋ hɔ, Ɛgbogboro aŋ ba tǝyaŋka-e, ɛbȧmp ya aŋfena aŋ ba ɛseth. Kɛrɛ ɔWan ka wuni ɔ ba hɛ dɛr ro mǝ ɔ bot rȧbomp rɔŋ.

²¹Ka ulɔm ka aŋkarande ɔ pa ro ŋɔŋ, Pa, ter mi kȧmȧ i mɔtha kɔ maŋk ɔkas kȧmi.

²²Kɛrɛ Yisɔs ɔ pa ro ŋɔŋ, Tȧŋ mi, ɔwa tey aŋfi kȧmȧ aŋ kɔ maŋk aŋfi ŋaŋ.

²³Ɔwa ma ɔ po bȧkȧ rǝ abil-e, aŋkarande ŋɔŋ aŋ tȧŋ kɔ.

²⁴Kɛrɛ ka ɔlɛmp wati kǝnkǝl kǝbana kǝ yokanɛ ro baŋ, haŋ ɛmuŋkǝl ɛ gbǝpǝr ȧŋbil: kɛrɛ Yisɔsȧŋ ɔ bɔ dirȧ.

²⁵kaŋ kɔ thǝmi kɔ, aŋ pa, Pa, kisis su, sǝ dinɛ.

²⁶Kɔ pa ro ŋaŋ, kɔyɛŋ mǝ nǝ nesa-e, naŋ aŋa ba kǝlanɛ kǝthan-e? Kɔ yokanɛ, ɔ ŋal aŋfef yi kȧbȧŋ. Ka pǝ re yi ɔthɔfǝl bɛm.

²⁷Ka aŋfǝm aŋ kabanɛ, aŋ pa, Ko wuni wɔŋ ɔwe-e, ɔwe pǝ yi hali aŋfef yi kȧbȧŋ aŋ tǝla kɔ-e?

²⁸Ma ɔ po fǝsi romɔri ka ȧŋthɔf ŋa aŋKadarin-e, afǝm ŋarǝŋ aŋa ba akǝrǝfi aŋ wur ka taboma, aŋ gbanɛ kɔ. Aŋ yi aninis ɔthasǝr, ɔwa wuni o wuni ɔ gbǝli hɛ thas ka aroŋ dati.

²⁹kaŋ sel ɛrɔŋ, aŋ pa, Ko tȧy tȧŋ saŋ sǝ ba yi munɔȧŋ-e, munɔ Yisɔs ɔWan ka Kuru-e? Mǝ po der nɔ tǝ kǝsɔmpa su yeŋka ȧŋlɔkɔ aŋ bek-i?

³⁰Ɔwa kuthi ka tǝsɔp agbȧthi kǝ yi ri, kǝ bɔ wɔnth dɛr ɔbɔlanɛ poŋ.

³¹Ka aŋkǝrǝfi aŋ nɛmthɛnɛ kɔ aŋ pa, Bepi mǝ wurɔ su-e, ter su kȧmȧ sǝ kɔ wɔŋ ka akuthi ka tǝsɔp.

³²kɔ pa ro ŋaŋ, Kɔnɛ. Kaŋ wur, kaŋ wɔŋ ka tǝsɔp. Ɔwa akuthi ka tǝsop kǝ gbuŋklɛ kǝder ka aŋtǝmp ŋa ro baŋ, kaŋ dinɛ ro mȧnt.

³³Ka ŋa aŋa bumǝr ŋa-e aŋ gbukɛ aŋ kɔ ro pet, aŋ tɔri koko bɛ, dɛ yi ȧte yɔnɛ ŋaŋ aŋa la ba aŋkǝrǝfi.

³⁴Ka aŋfǝm bɛ ro pet aŋ wur tǝ kǝgbans Yisɔsȧŋ. Maŋ nənk kɔ-e, aŋ nɛmthɛnɛ kɔ kȧmȧ ɔ wur ka ȧŋthɔf ŋaŋ.