Read Ȧŋlemrȧnɛ Ȧfu Mathiu 9 Bible Online

Mathiu 9 - Ȧŋlemrȧnɛ Ȧfu bible

Mathiu 9

¹kɔ bȧkȧ ka abil, ɔ fǝsi romɔri, kɔ der ka kȧpet kɔŋ.

²Kaŋ kȧrȧ ulaŋgba ro ŋɔŋ ugbɛthkɛ ɔ fǝntha rǝ kǝfǝnt. Ma Yisɔs ɔ nənk kȧlanɛ ka ŋaŋ-e, ɔ pa ka ɔlaŋgba, Wan, bȧk kǝbuth. A po tera mu ɛhakɛ ɛ mu.

³Ka aŋkarmɔkɔ alɔm aŋ pa ka ɛmerȧ yaŋ, Ɔlaŋgba ɔwe ɔ thunthǝra Kuru.

⁴Ma Yisɔsȧŋ ɔ tȧrȧ ɛnanɛ yaŋ-e, ɔ pa, To pǝ som mǝ nǝ nanɛ ɔlǝs ka ɛmerȧ ɛ nu-e?

⁵Rǝ reke tha yi rǝfɔi tai-e, tǝ kǝpa, A po tera mu ɛhakɛ ɛ mu, thalɔm tǝ kǝpa, Yokanɛ, mǝ kɔth-e?

⁶Kɛrɛ kȧmȧ nǝ tȧrȧ kǝpa ɔWan ka wuni ɔ ba afɔsɔ nɔru tǝ kǝtera wuni ɛhakɛ-e, (kɔ pa ka ɔwe po gbɛthǝkɛ-e) Yokanɛ, mǝ gbasi kafǝnt ka mu, mǝ kɔ ro seth ka mu.

⁷kɔ yokanɛ, ɔ kɔnɛ ro seth kɔŋ.

⁸Kɛrɛ ma ȧsuniya aŋ nənk ti-e, aŋ kabanɛ, kaŋ yikis Kuruȧŋ ɔwe po sɔŋ afɔsɔ awunɔŋ ka afǝm.

⁹Ɔwa ma Yisɔsȧŋ ɔ wur ri-e, ɔ nənk wuni ɔwe a bont Mathiu, ɔ yirȧ ka ɔdɛr ro mǝ a gbasi ɛfȧk. Kɔ pa ro rɔŋɔŋ, Taŋ mi. Kɔ yokanɛ, ɔ tȧŋ kɔ.

¹⁰Ka pǝ re yi ma Yisɔsȧŋ ɔ yirȧ ka kǝdi ro seth-e, afǝm aŋa gbasi ɛfȧk yi afǝm ŋa ɛhakɛ agbȧthi aŋ der aŋ yirȧ yi kɔn dɛ yi aŋkarande ŋɔŋ.

¹¹Ma aŋFarisi aŋ nənk ti-e, aŋ pa ka aŋkarande ŋɔŋ, To pǝ som ɔkarmɔkɔ ka nu mǝ ɔ di yi ŋaŋ aŋa gbasi ɛfȧk dɛ yi afǝm ŋa ɛhakɛ-e?

¹²Ma Yisɔsȧŋ ɔ tǝl ti-e, ɔ pa, Ŋaŋ aŋa yi ayenki mǝdɛr aŋ yema hɛ udamǝr, kɛrɛ aŋtui ŋa yema udamǝr.

¹³Kɛrɛ kɔnɛ nu kȧmȧ nǝ kɔ thǝkǝs ȧte, I yema ȧney, sathka thahɔ; ȧtesoma-e i der hɛ tǝ kǝmuti aŋlompi-e, kɛrɛ i der tǝ kǝmuti aŋfǝm ŋa ɛhakɛ tǝ kǝthupi.

¹⁴Ka ȧŋlɔkɔ ŋati aŋkarande ŋa Yɔn aŋ der ro ŋɔŋ, aŋ pa, To som saŋ yi aŋFarisi sǝ wop asum katkat, kɛrɛ aŋkarande a mu aŋ wop hɛ asum-e?

¹⁵Ka Yisɔsȧŋ ɔ pa ro ŋaŋ, Aŋyathki ŋa ɔnȧntȧ aŋ gbǝli saŋ amɔl ma ɔnȧntȧ ɔ yi ras yi ŋaŋ-i? Kɛrɛ mȧrey mǝ tǝ der ma mǝ a nɔy ŋa ɔnȧntȧ, ɔwa ka ȧŋlɔkɔ ŋati aŋ tǝ wop asum.

¹⁶Wuni ɔ gbap hɛ arombo ŋa kotha kǝfu rǝ ruma rǝkur, kotȧy-e ȧŋrombo ŋati aŋ tǝ pim aruma, ɔwa ɔpima ɔ tǝ bȧr gbo lǝsǝ.

¹⁷Ɔwa a bot hɛ mǝwain mǝfɛth rǝ tǝbos tǝkur; bepi pǝ yi ti-e, tabos tǝ tǝ puta, ɔwa mawain mǝ tǝ loŋa, dɛ yi tabos tǝ tǝ lǝsǝ; kɛrɛ a bot mǝwain mǝfɛth rǝ tǝbos tǝfu, ɔwa yi yɛrǝŋ ɛ tǝ won.

¹⁸Ma ɔ kanɛ ŋa mȧtȧy ame-e, ugbǝka ulɔm ɔ der, ɔ sɔna kɔ tǝwu, ɔ pa, Ɔwan kȧmi ubɛra ɔ fi ka-ake, kɛrɛ der reŋ kɔ kȧta kȧmu kȧmȧ ɔ tǝ kǝli.

¹⁹Ka Yisɔsȧŋ yi aŋkarande ŋɔŋ aŋ yokanɛ, aŋ tȧŋ kɔ.

²⁰Ka wuni bom ulɔm ǝŋbɔwurnɛ mǝtir ta tǝren tɔfɔt tǝrǝŋ-e, ɔ der rodarǝŋ kɔŋ, ɔ gboŋ amɛsɛ ma aruma rɔŋ.

²¹kotȧy-e ɔ pa ka ȧŋmerȧ ŋɔŋ, Bepi i gboŋ gbo aruma rɔŋ-e, i ti yeŋk.

²²Ma Yisɔs ɔ fǝlɛ ɔ nənk kɔ-e, ɔ, pa, Wan ka mi ubɛra, bȧk kǝbuth. Kȧlanɛ kȧmu kǝ po mu yeŋkǝs. Ka ɔwuni bom ɔ yeŋk ka ȧŋlɔkɔ ŋati gbeŋ.

²³Ma Yisɔsȧŋ ɔ bek ka ȧŋseth ŋa ɔgbǝka-e, ɔ nənk aŋfɛŋ tulɛŋ yi ȧruniya aŋ bok,

²⁴kɔ pa ro ŋaŋ, Wur nu kotȧy-e ɔwath ubɛra ɔ fi hɛ, ɔ dirȧ gbo. Kaŋ sel kɔ bɛ.

²⁵Kɛrɛ ma a po wurɔ aŋfǝm-e, ɔ wɔŋ, kɔ wop kȧta ka ɔwath ubɛra, kɔ yokanɛ.

²⁶Ka tȧgbuŋ tati tǝ gbanthɛnɛ ka ȧŋthɔf ŋati bɛ.

²⁷Ɔwa ma Yisɔs ɔ wur ri-e, alaŋgba afith ŋarǝŋ aŋ tȧŋ kɔ, aŋ sel ɛrɔŋ kaŋ pa, Munɔ ɔwan ka Debid, ba su ȧney.

²⁸Ma Yisɔsȧŋ ɔ po wɔŋ ro seth-e, aŋlaŋgba afith aŋ der ro ŋɔŋ. Ka Yisɔs ɔ pa ro ŋaŋ, Nǝ lanɛ kǝpa i gbǝli yɔ ȧte-i? kaŋ wosȧnɛ kɔ, aŋ pa, Yao Pa.

²⁹kɔ gboŋ ɛfɔr yaŋ, ɔ pa, Ta pǝ yi nu mɔ mǝ kȧlanɛ ka nu kǝ yi.

³⁰Ka ɛfɔr yaŋ ɛ kanthɛ. Ka Yisɔsȧŋ ɔ maŋ ŋa kiriŋ kiriŋ kȧmȧ aŋ te ti tɔri wuni o wuni.

³¹Kɛrɛ maŋ wur-e, aŋ gbanthɛnɛ ȧŋes ŋɔŋ ka ȧŋthɔf ŋati bɛ.

³²Ɔwa maŋ wur ri-e, a kȧrȧ ulaŋgba kǝbobo ro ŋɔŋ ɔwe ba ukǝrǝfi.

³³Ma ɔ wurɔ ɔkǝrǝfi-e, kabobo ɔ fɔf, ka ȧruniya rǝ kabanɛ, rǝ pa, Thȧnkȧŋ a tha nənk hɛ tȧy tǝwunɔŋ kǝtɔŋ ka aŋIsrɛl.

³⁴Kɛrɛ aŋFarisi aŋ pa, Ɔ wurɔ akǝrǝfi ka kȧta ka ɔbȧy ka aŋkǝrǝfi.

³⁵Ka Yisɔs ɔ kɔth kɔth ka tapet yi ka tagbɔm bɛ, ɔ thǝksa aŋfǝm ka ɛseth yaŋ ɛgbanɛ, kɔ tamǝs ȧkɛra kǝfinɔ ka rȧbȧy, ɔ yeŋkǝs rǝtu o rǝtu ara yi kǝtɔŋ ka ŋaŋ.

³⁶Kɛrɛ ma ɔ nənk ȧsuniya-e, ȧney aŋ wop kɔ ta ȧtǝ ŋaŋ, pǝkasifɛ aŋ sɔmpanɛ, ɔwa aŋ sakanɛ mɔ tǝlɔmɛ aŋa te ba utɔl.

³⁷kɔ pa ka aŋkarande ŋɔŋ, Tǝ tɛntɛnɛ karɔk kǝ yi kǝbana, kɛrɛ aŋrɔk a than.

³⁸Tiyȧŋ nɛmthɛnɛ nu ɔMarki ka karɔk, kȧmȧ ɔ somra akump ka karɔk kɔŋ.