Read Ȧŋlemrȧnɛ Ȧfu Mark 10 Bible Online

Mark 10 - Ȧŋlemrȧnɛ Ȧfu bible

Mark 10

¹kɔ wur ri-e, ɔ der ka manəŋkəra ma ro Yudia ro Yɔrdan mɔri. Ka afəm agbȧthi aŋ thoŋklanɛ ro ŋɔŋ sɔ, kɔ thəksa ŋa mɔ mɔ la yɔ.

²Ka aŋFarisi aŋ der ro ŋɔŋ, aŋ yif kɔ rə athɛnsanɛ, Pə yi ti ɔlompi ta wan duni tə kəter ɔrani kɔŋ-i?

³kɔ gbaki ɔ pa ro ŋaŋ, To Mosisȧŋ ɔ yamari nu-e?

⁴kaŋ pa, Mosisȧŋ ɔ tɔri tə kəgbal areka ŋa kəsakanɛ, ɔwa tə kəter kɔ kɔnɛ.

⁵Ka Yisɔsȧŋ ɔ pa ro ŋaŋ, Ta kabak ka nu ɛmerȧ tə ɔ gbala nu aŋyamari aŋe.

⁶Kɛrɛ kȧbi ka ɔtəpɛr wa ȧdȧru-e Kurɔŋ ɔ bɛmpa ŋa, uruni yi ubɛra.

⁷Ka ȧŋsabu aŋe, wan duni ɔ tə tey ɔkas kɔŋ yi ɔkara kɔŋ, ɔ tə gbapsa ɔrani kɔŋ;

⁸ɔwa ŋa ŋarəŋȧŋ aŋ tə səkɛ mədɛr min.

⁹Tiyȧŋ ara Kurɔŋ ɔ pant dɛr rɔkin, ta wuni ɔ te ri gbaski.

¹⁰Maŋ wɔŋ ro seth-e, aŋkarande ŋɔŋ aŋ yif kɔ ta ȧŋpa aŋe.

¹¹kɔ pa ro ŋaŋ, Wuni o wuni ɔwe ter ɔrani kɔŋ, ɔ nȧntȧ ulɔm-e, ɔ yɔ kərəp, ɔ pɔnthnɛ ɔrani kɔŋ.

¹²Bepi wuni bom ɔ ter ɔwos kɔŋ-e, ɔ balȧ rə ulɔm-e, ɔ yɔ kərəp.

¹³kaŋ kȧrȧ afɛth agbət ro ŋɔŋ, kȧmȧ ɔ gboŋ ŋa, kɛrɛ aŋkarande ŋɔŋ aŋ ŋal ŋa.

¹⁴Kɛrɛ ma Yisɔsȧŋ ɔ nənk ti-e, ɔ bansȧ, ɔ pa ro ŋaŋ, Ter aŋfɛth agbət kȧmȧ aŋ der ro mi; te nu bɛnt ŋa, ȧtesoma-e, ka awunɔŋ rȧbȧy ra Kuru rə yi.

¹⁵Tɛntɛnɛ i kanɛ nu, Wuni o wuni ɔwe mə te malanɛ rȧbȧy ra Kuru mɔ uwath-e, ɔgbəli hɛ wɔŋ ri.

¹⁶kɔ mampəlanɛ ŋa, ɔ ruba ŋa ukin kin, kɔ reŋ ŋa mȧta mɔŋ.

¹⁷Ma ɔ wur tə kəkɔ ka ȧŋbiyas ŋɔŋ-e, wuni kin ɔ der ro ŋɔŋ kəgbukɛŋ, ɔ sɔ təwu, ɔ yif kɔ, Karmɔkɔ ufinɔ, to mə i yɔ kȧmȧ i sɔthɔ aŋesəm thəbana-e?

¹⁸Ka Yisɔsȧŋ ɔ pa ro ŋɔŋ, kɔyɛŋ mə bont mi ufinɔ-e? Wuni o wuni ɔ yi hɛ ufinɔ thambe ukin gbɛt, kɔnɔ yi Kurɔŋ.

¹⁹Mə tȧrȧ ɛthɔ, Te yɔ kərəp, te dif wuni, te keya, te sɔŋ məseri ma rəyem, te tɔns wuni, yikis ɔkas ka mu yi ɔkara ka mu.

²⁰kɔ pa, Karmɔkɔ, mȧtȧy ame bɛ i po wop kȧbi ka rafɛth ra mi.

²¹Ma Yisɔsȧŋ ɔ kəli kɔ-e, ɔ bɔthər kɔ-e, kɔ pa ro ŋɔŋ, Tȧy tin tə mə paŋ; kɔnɛ, thila rəka o rəka ara mə ba, mə sɔŋ ka ȧŋmɔnɛ, ɔwa mə tə ba kɛŋ ro riyana; ɔwa der, tȧŋ mi.

²²Ma ɔ po təl mapa ame-e, ɔ saŋ amɔl, ɔ kɔnɛ yi ɔnɔsinɛ, kotȧy-e wuni wɔŋ ɔwe ba kɛŋ kəbana.

²³Ka Yisɔsȧŋ ɔ kəli kəli, ɔ pa ka aŋkarande ŋɔŋ, Ɔbaki ta ȧtȧ ŋaŋ aŋa ba rəyola tə kəwɔŋ ka rȧbȧy ra Kuru!

²⁴Ka aŋkarande aŋ kabanɛ ȧsim tɔŋ. Ka Yisɔsȧŋ ɔ pa ro ŋaŋ, Awuth, ɔbaki ka ŋaŋ aŋa ba rəyola tə kəwɔŋ ka rȧbȧy ra Kuru!

²⁵Ɔyay ta ȧyɔkmɛ tə kəsɔnthɔs rafɔr ra asɛni, pəthasi ta wuni yola tə kəwɔŋ ka rȧbȧy ra Kuru!

²⁶kaŋ kabanɛ ɔthasər, aŋ pa ro ŋɔŋ, Kanɛ thɔŋ mə gbəli kisi-e?

²⁷Ma Yisɔsȧŋ ɔ kəli ŋa ɔ pa, Ka aŋfəm pə fɔyɛ tȧy, kɛrɛ pə tui hɛ tȧy ta Kuru, kotȧy-e Kurɔŋ ɔ gbəli yɔ tȧy o tȧy.

²⁸Pitaŋ ɔ təp kəpa ro ŋɔŋ, Saŋ sə po tey bɛ, ɔwa sə po tȧŋ mu.

²⁹Yisɔsȧŋ ɔ pa, Tɛntɛnɛ i kanɛ nu, Wuni o wuni ɔ yi hɛ ɔwe po tey mayira mɔŋ-o, awɔnt ŋɔŋ aruni-o, awɔnt ŋɔŋ abɛra-o, ɔkas kɔŋ-o, ɔkara kɔŋ-o, ɔrani kɔŋ-o, awuth ŋɔŋ-o, yi tȧkay tɔŋ-o, salata mi, yi ȧkɛra kəfinɔ ka Kuru,

³⁰kɛrɛ ɔ tə sɔthɔ ka koko bɛ kɛmɛ kin kin ka ȧŋlɔkɔ aŋe, ɛseth-o, awɔnt aruni-o, awɔnt abɛra-o, akara-o, awuth-o, yi təkai, yi ɛsɔmpanɛ; yi aŋesəm thəbana ka ȧdȧru ara mə der-e.

³¹Kɛrɛ agbȧthi aŋa yi aŋtɔtɔkɔ aŋ tə yi aləpsɔ, ɔwa aŋləpsɔ aŋ tə yi ȧtɔtɔkɔ.

³²Maŋ yi ro roŋ kəkɔ ro Yerusalɛm-e, Yisɔsȧŋ ɔ təmȧ ŋa kədi; kaŋ kabanɛ, ɔwa aŋa tȧŋ kɔ aŋ wɔŋ rənes. Kɔ gbasi sɔ aŋtɔfɔt ŋarəŋ, kɔ təp kəkanɛ ŋa mȧtȧy ama ba kəbəp kɔ,

³³ɔ pa, Kəli, sə kɔ ro Yerusalɛm, ɔwa ɔWan ka wuni, a tə lȧnki kɔ ka aŋfode abana yi aŋkarmɔkɔ; aŋ tə sɔŋ kɔ mətheri tə kəfi, ɔwa aŋ tə lȧnki kɔ ka tȧbona təlɔm.

³⁴Ɔwa aŋ tə sel kɔ, aŋ tə sapəth kɔ, aŋ tə thufər kɔ, ɔwa aŋ tə dif kɔ. Kɛrɛ kədarəŋ ka mərey məsas ɔ tə kȧl yokanɛ ka rafi.

³⁵Ka Yeməsȧŋ yi Yɔnȧŋ, aŋwuth ŋa Sɛbidi, aŋ der ro ŋɔŋ, aŋ pa, Karmɔkɔ, sə yema mə yɔna su tȧy o tȧy ȧte sə yif mu.

³⁶kɔ pa ro ŋaŋ, Ko nə yema i yɔna nu-e?

³⁷kaŋ pa ro ŋɔŋ, Yɔ su sə yirȧ, ukin ka kȧta ka mu kədiɔ, ɔwa ulɔm ka kȧta ka mu kəmɛrɔ ka aŋyiki a mu.

³⁸Kɛrɛ Yisɔsȧŋ ɔ pa ro ŋaŋ, Nə tɛ hɛ ȧte mə nə yif. Nə gbəli mun ka ampɔthi aŋa mə i muna-i? Thalɔm tə kəbaptais nu yi ȧŋbaftisəm aŋa a baftaysȧ mi-i?

³⁹kaŋ pa ro ŋɔŋ, Sə gbəli. Ka Yisɔsȧŋ ɔ pa ro ŋaŋ, Tɛntɛnɛ nə tə mun ka ampɔthi aŋa mə i muna; ɔwa yi ȧŋbaftisəm aŋa a baftaysȧ mi-e a tə baftaysȧ nu ŋi.

⁴⁰Kɛrɛ tə kəyira ka kȧta kȧmi kədiɔ, thalɔm ka kȧta kȧmi kəmɛrɔ-e, tȧy ta mi thahɔ tə kəsɔŋ, kɛrɛ tə yi ta ȧtȧ ŋaŋ aŋa a bɛnɛnɛ ti.

⁴¹Ma aŋtɔfɔt aŋ təl ti-e, aŋ wɔŋ kəbansa ta Yeməsȧŋ yi Yɔnȧŋ.

⁴²Ka Yisɔsȧŋ ɔ tela ŋa ro ŋɔŋ, ɔ pa, Nə tȧrȧ kəpa aŋa a bot tə kəgbəka tȧbona təlɔm, aŋ gbəka ŋa rə afɔsɔ, ɔwa aŋfəm abana aŋ yɔ ŋa kȧmȧ aŋ tȧrȧ aŋfɔsɔ ŋaŋ;

⁴³kɛrɛ pə yi hɛ yi kətɔŋ ka nu. Wuni o wuni ɔwe yi ubana kətɔŋ ka nu, ɔ tə yi ȧŋbɔy a nu,

⁴⁴ɔwa wuni o wuni ɔwe yema yi utɔtɔkɔ kətɔŋ ka nu, ɔ tə yi ȧbɔy a nu bɛ.

⁴⁵Ȧtesoma-e ɔWan ka wuni ɔ der hɛ kȧmȧ a yɔna kɔ, ɔ der tə kəyɔna, ɔwa tə kəsɔŋ aŋesəm ŋɔŋ tə kəbani afəm agbȧthi.

⁴⁶kaŋ der ro Yɛriko. Ɔwa ma ɔ wur ro Yɛriko yi aŋkarande ŋɔŋ yi ȧruniya rəbana, Bartimiyɔsȧŋ, ɔwan ka Timiyɔs, uthola ufith, ɔ yirȧ ro roŋ dayɛr.

⁴⁷Ɔwa ma ɔ təl kəpa Yisɔsȧŋ ɔwe ro Nasarɛth kɔnɔŋ, ɔ təp kəsel ɛrɔŋ, ɔ pa, Yisɔs, munɔ ɔwan ka Debid, ba mi aney.

⁴⁸Ɔwa agbath aŋ ŋal kɔ kȧmȧ ɔ taŋk, kɛrɛ ɔ bȧr gbo sel ɛrɔŋ, Munɔ ɔwan ka Debid, ba mi ȧney.

⁴⁹Ka Yisɔsȧŋ ɔ təmȧ, ɔ yamari kȧmȧ aŋ tela kɔ. Kaŋ tela ɔwuni ufith, aŋ pa ro ŋɔŋ, Bȧk kəbuth, yokanɛ, ɔ tela mu.

⁵⁰kɔ fitha aruma rɔŋ, ɔ yokanɛ, ɔ der ka Yisɔs.

⁵¹Yisɔsȧŋ ɔ yif kɔ, Ko mə yema i yɔna mu-e? Ka ɔwuni ufith ɔ pa, Karmɔkɔ, ta i sɔthɔ kakəli kȧmi.

⁵²Ka Yisɔsȧŋ ɔ pa ro ŋɔŋ, Kɔnɛ, kȧlanɛ ka mu kə po mu yenkəs. Ka ɔlɛmp wati ɔ sɔthɔ kakəli kɔŋ, kɔ tȧŋ Yisɔsȧŋ ro roŋ.