Read Ȧŋlemrȧnɛ Ȧfu Mark 14 Bible Online

Mark 14 - Ȧŋlemrȧnɛ Ȧfu bible

Mark 14

¹Kədarəŋ ka mərey mȧrəŋ amet ma kapainɛ yi kabo kəpaŋi ɛgbith mə yi, ka aŋfode abana yi aŋkarmɔkɔ aŋ thɛns roŋ rə məsɔth tə kəwop, ɔwa tə kədif kɔ;

²kɛrɛ aŋ pa, Ta pə te yi ka ȧŋlɔkɔ ŋa amet ta kəthɛna məgboŋktha mə yi ka aŋfəm kətɔŋ.

³Ma Yisɔs ɔ yi ro Bɛthani ka ȧŋseth ŋa Saymɔn ɔwe ba arom-e, ma ɔ yirȧ tə kədi-e, wuni bom ɔ der ɔ ba kəbos ka mȧro məsopa məbaki mɔlɔ. Ɔ sunti kȧbos, kɔ lond ma ka rȧbomp rɔŋ.

⁴Kɛrɛ alɔm ri-e, pə bansȧnɛ ŋa, aŋ pa, kɔyɛŋ mɔ ləsər ȧmȧro ame-e?

⁵kotȧy-e a gbəli naŋ thila ȧmȧro ame ta akala athasi ɛsiliŋ tɛmɛ təsas, a sɔŋ ma ka ȧŋmɔnɛ. Kaŋ bansər ɔbɔrkɔ.

⁶Ka Yisɔsȧŋ ɔ pa, Tey kɔ nu. Kɔyɛŋ mə kira kɔ-e? Ɔ po yɔ məyɔs məfinɔ ro rɔmi.

⁷Aŋmɔnɛ aŋ yi yi naŋȧŋ alɔkɔ o lɔkɔ, ɔwa alɔkɔ bɛ ma nə yema nə gbəli yɔ ŋa ɔfinɔ. Kɛrɛ minɛŋ i yi hɛ yi naŋȧŋ lɔkɔ o lɔkɔ.

⁸Ɔ po yɔ ȧte ɔ gbəli; ɔ po sop aŋdɛr a mi tə kəmȧnk mi.

⁹Tɛntɛnɛ i kanɛ nu, Dɛr o dɛr ro mə a taməs ȧkɛra kəfinɔ ka Kuru ka ȧdȧru bɛ-e, ȧte ɔya ɔ po yɔ-e, a ba kəfɔf ti sɔ tə kənanɛ kɔ.

¹⁰Ka Yudas Iskariyɔtȧŋ, ukin ka aŋtɔfɔt ŋarəŋ, ɔ kɔnɛ ka aŋfode abana kȧmȧ ɔ lȧnki kɔ ro rɔŋaŋ.

¹¹Maŋ təl ti-e, pə bɔnɛ ŋa, kaŋ lahiri tə kəsɔŋ kɔ akala. Kɔ thɛns roŋ dəfɔy tȧy tə kəlaŋkli kɔ ro ŋaŋ.

¹²Ka ȧŋrey ȧtɔtɔkɔ ŋa kabo kəpaŋi ɛgbith-e, maŋ fai kalɔmɛ ka kapainɛ-e, aŋkarande ŋɔŋ aŋ pa ro ŋɔŋ, Reke mə yema sə kɔ bɛnɛnɛ kȧmȧ mə di kapainɛ-e?

¹³kɔ som akarande ŋɔŋ ŋarəŋ, ɔ pa ro rɔŋaŋ, Kɔnɛ nu ro pet, ɔwa nə tə gbanɛ ulaŋgba ɔ gbanɛ ȧbɔl ȧkuthȧ aŋ la mȧnt; tȧŋ kɔ nu.

¹⁴Dɛr o dɛr ɔ wɔŋ, pa ka ɔkas ka ȧŋseth, Ɔkarmɔkɔ ɔ pa, Areke yi ȧŋkonko ŋa aŋtik-a, ro mə i di kapainɛ yi aŋkarande a mi-e?

¹⁵Ɔwa kɔn kɔnɔnɛ ɔ tə tɔri nu ȧkonko abana rokɔm aŋa a po yesi ro mə nə bɛnɛnɛ ta ȧtȧ su.

¹⁶Ka aŋkarande aŋ kɔnɛ aŋ der ro pet, kaŋ bəp ti mɔ mɔ pa, kaŋ bɛnɛnɛ kapainɛ.

¹⁷Ma rȧfɔy rə bek-e, ɔ der yi aŋtɔfɔt ŋarəŋ.

¹⁸Maŋ yirȧ ka kədi-e, Yisɔsȧŋ ɔ pa, Tə tɛntɛnɛ i kanɛ nu, ukin kətɔŋ ka nu ka kadi ake-e ɔ tə sɔnd mi.

¹⁹Animisa aŋ təp kəwop ŋa, kaŋ yif kɔ ukin kin, Minɛŋ-i?

²⁰kɔ wosa ɔ pa ro rɔŋaŋ, Ukin ka na atɔfɔt ŋarəŋ, ɔwe mə tɔka kȧta kɔŋ ka ȧŋbɔl yi minɛŋ.

²¹Ȧtesoma-e ɔWan ka wuni ɔ kɔ mɔ mə a po gbal ta atɔŋ; kɛrɛ mɔnɛ ka ɔwuni ɔwe mə sɔnd ɔWan ka wuni! Pə tə yi ɔfinɔ ta ɔwuni kati bepi a kom hɛ kɔ naŋ.

²²Mɔ mə aŋ di-e, ɔ gbasi kabo, ɔwa ma ɔ po ruba ki-e, ɔ siməth ki, kɔ sɔŋ ki ro rɔŋaŋ, ɔ pa, Gbasi nu ake, nə di. Ake kə yi aŋdɛr a mi.

²³kɔ gbasi ampɔthi, ɔwa ma ɔ po sɔŋ məmə-e, ɔ sɔŋ ŋi ro ŋaŋ, ka ŋa bɛ aŋ muna ri.

²⁴kɔ pa ro ŋaŋ, Ame mə yi mȧtir ma mi ma aŋlemranɛ afu ama a loŋ ta afəm alai.

²⁵Tɛntɛnɛ i kanɛ nu, i ba hɛ sɔ kəmun mȧkomi ma ralek haŋ ka ȧŋrey ŋati aŋa mə i mun ma ɔfu ka rȧbȧy ra Kuru.

²⁶Maŋ po leŋ aleŋ-e, aŋ wur aŋ kɔnɛ ka kateŋ ka Ɔlif.

²⁷Ka Yisɔsȧŋ ɔ pa ro ŋaŋ, Naŋ bɛ nə tə pənthbəla salata mi rȧfɔy are; kotȧy-e a gbal ti kəpa, I ti gbantha ɔtɔl, ɔwa talɔmɛ aŋ tə sakanɛ.

²⁸Kɛrɛ ma i po yokanɛ ka rafi-e, i ti təmȧ nu kədi ro Kalili.

²⁹Pitaŋ ɔ pa ro ŋɔŋ, Hali ŋa bɛ aŋ pənthbəla-e, kɛrɛ minɛ tha.

³⁰Ka Yisɔs ɔ pa ro ŋɔŋ, I kanɛ mu tə tɛntɛnɛ, thonɔŋ, hali ka rȧtȧtȧk are-e, munɔ mə tə pɛnsanɛ mi məsas, yeŋka katəpi ɔ tam mȧrəŋ.

³¹Kɛrɛ Pitaŋ ɔ pa asɔbɛ, Hali i ba tə kəfi yi munɔŋ, i gbəli hɛ pɛnsanɛ mu. Ya aŋkarande bɛ aŋ pa sɔ.

³²kaŋ der ka ɔdɛr ro a bont Kɛthsɛmanɛ; kɔ pa ka aŋkarande ŋɔŋ, Yirȧ nu nɔ ma mə i ramnɛ.

³³Ɔ banɛnɛ Pitaŋ, Yeməs yi Yɔnȧŋ kɔ təp kəsaŋ amɔl, ɔwa ȧŋmerȧ ŋɔŋ aŋ lela kɔ.

³⁴kɔ pa ro ŋaŋ, Ȧŋmerȧ a mi aŋ ba ɔnɔsinɛ ɔbana haŋ ka rəfi. Bȧkər nu nɔ, ɔwa kəlɛnɛ nu.

³⁵kɔ kɔ rodi ɔthan, kɔ gbəpsa, ɔ ramnɛ kəpa bepi naŋ pə gbəli yi-e ta ȧŋlɔkɔ aŋe aŋ painɛ kɔ.

³⁶kɔ pa Aba, Pa, ro rɔmu mȧtȧy bɛ mə selɔnɛ. Tɔŋa ampɔthi ŋa ȧŋsɔmpanɛŋ aŋe ro mi, kɛrɛ ta pə te yi ka mayema ma mi, ta pə yi mɔ mə munɔ mə yema.

³⁷kɔ der ɔ bəp ŋa aŋ dirȧ, kɔ pa ka Pitaŋ, Saymɔn, mə dira-i, mə gbəli hɛ kəlɛnɛ ta alɔkɔ ŋin-i?

³⁸Kəlȧnɛ nu ɔwa nə ramnɛ kȧmȧ nə te wɔŋ rə tȧy təgbɔns. Tɛntɛnɛ ȧŋmerȧ aŋ selɔ kɛrɛ aŋdɛr a rant.

³⁹kɔ kȧl kɔnɛ ɔ ramnɛ, ɔ pa ȧsim tati sɔ.

⁴⁰kɔ kȧl sɔ der, ɔ bəp ŋa aŋ dirȧ, kotȧy-e ɛfɔr yaŋ ɛ lel; ɔwa aŋ tɛ hɛ ȧte mə aŋ wosȧnɛ kɔ.

⁴¹kɔ kȧl der kəbeka məsas, ɔ pa ro ŋaŋ, Dira nu thɔŋ ka-ake, nə fothanɛ. Ɔbeki, ȧŋlɔkɔ aŋ bek. Kəla, a po sɔnd ɔWan ka wuni ka mȧta ma afəm aləs.

⁴²Yokanɛ nu kȧmȧ sə kɔnɛ. Kəli, ɔwe mə sɔnd mi ɔ bek.

⁴³Ka ɔlɛmp wati, ma ɔ bɔ fɔf-e, Yudasȧŋ, ukin ka aŋtɔfɔt ŋarəŋ-e, ɔ der yi runiya rəbana, aŋ ba ɛgbathɔ yi təgbeŋgbeŋ, aŋ wur ka aŋfode abana, aŋkarmɔkɔ yi aŋbȧki.

⁴⁴Kɔn ɔwe mə sɔnd Yisɔsȧŋ ɔ po sɔŋ ŋa alomar, ɔ pa, Ɔwe mə i muməl-e, kɔnɔ yi ɔkin kati. Wop kɔ nu, nə kera kɔ ɔthɔfəl.

⁴⁵Ma ɔ bek-e, ka ɔlɛmp wati ɔ der ro ŋɔŋ ɔ pa, Karmɔkɔ, Karmɔkɔ; kɔ muməl kɔ.

⁴⁶kaŋ wop kɔ yi tȧmthədɛrəŋ maŋ, aŋ kera kɔ.

⁴⁷Ka ukin ka ŋaŋ aŋa təmȧ rayɛr ɔ tali aŋgbathɔ ŋɔŋ, ɔ tap ȧŋbɔy ŋa ɔfode ubana, ɔ gbək aŋləns ŋɔŋ.

⁴⁸Ka Yisɔs ɔ pa ro ŋaŋ, Nə po der yi ɛgbathɔ dɛ yi təgbeŋgbeŋ tə kəwop mi mɔ wuni key-i?

⁴⁹I yi yi naŋȧŋ ȧrey o rei ka ȧŋseth ŋa Kuru, i thəksa, kɛrɛ nə wop hɛ mi. Kɛrɛ ȧte tə yɔnɛ kȧmȧ mȧgbal mə lasər.

⁵⁰Ka ŋa bɛ aŋ tey kɔ, aŋ gbukɛ.

⁵¹Ka ulaŋgba ulɔm ɔ taŋanɛ kɔ, ɔ gbaŋkthanɛ kotha kəlinɛn ka aŋdɛr ŋɔŋ, ka a wop kɔ.

⁵²Kɛrɛ ɔ tey akotha kəlinɛn, ɔ gbukɛ kətiŋ.

⁵³kaŋ kera Yisɔsȧŋ ka ɔfode ubana. Ka aŋkərbomp ka aŋfode, aŋbȧki yi aŋkarmɔkɔ aŋ thoŋklanɛ dɛr rɔkin yi kɔnɔ.

⁵⁴Ɔwa Pitaŋ ɔ tȧŋ kɔ ɔbɔli poŋ haŋ ka ȧŋbare ŋa ɔfode ubana. Kɔ yirȧ yi ɛbɔy, ɔ saya.

⁵⁵Ka aŋfode abana yi aŋSanhedrin bɛ aŋ thɛns aseri ta Yisɔsȧŋ tə kədif kɔ kɛrɛ aŋ fir hɛ kɔ.

⁵⁶Agbathi aŋ sɔŋ məseri ma rəyem, kɛrɛ mə bɛŋȧnɛ hɛ.

⁵⁷Ɔwa alɔm aŋ təmȧ aŋ seri rəyem ta atɔŋ,

⁵⁸aŋ pa, Sə təlȧ kɔ ɔ pa, I ti sakthi ȧŋseth ŋa Kuru aŋe aŋa a bɛmpanɛ məta, ɔwa ka mərey məsas i ti kȧl təmər alɔm aŋa a te bɛmpanɛ məta.

⁵⁹Kɛrɛ maseri maŋ mə bɛŋȧnɛ hɛ sɔ.

⁶⁰Ka ɔfode ubana ɔ yokanɛ kətɔŋ ka ŋaŋ, ɔ yif Yisɔsȧŋ, ɔ pa, Mə gbaki hɛ bɛ-i? Ko tȧy ȧte ȧtȧ aŋ seri ta ȧtȧ mu-e?

⁶¹Kɛrɛ ɔ taŋk thəm, ɔ gbaki hɛ. Ka ɔfode ubana ɔ yif kɔ sɔ, ɔ pa, Munɔ yi ɔKraist-i, ɔWan ka ɔRuba-i?

⁶²Ka Yisɔs ɔ pa, Minɛŋ, ɔwa nə tə nənk ɔWan ka wuni ɔ yirȧ ka kȧta kədiɔ ka afɔsɔ, ɔ tə der ka tarənt təfera ta ȧkuru.

⁶³Ka ɔfode ubana ɔ piməs ȧsuma tɔŋ, ɔ pa, Ko məseri məlɔm mə sə yema sɔ-e?

⁶⁴Na bɛ nə po təl ma ɔ ŋamnɛ Kurɔŋ. To nə nanɛ-e? Ka ŋa bɛ aŋ sɔŋ kɔ mətheri tə kəfi.

⁶⁵Alɔm aŋ thufər kɔ, kaŋ gbəpər ader rɔŋ, aŋ tuns kɔ, aŋ pa ro ŋɔŋ, Tɔri su ɔwuni bepi mə yi unȧbi. Ka ɛbɔy aŋ nȧpəs kɔ yi mȧta maŋ.

⁶⁶Ma Pitaŋ ɔ yi ro bare-e, ukin ka ɛbɔy abɛra ŋa ɔfode ubana ɔ der.

⁶⁷Ma ɔ nənk Pitaŋ ɔ saya-e, ɔ kəli kɔ kɔ pa, Munɔ sɔ mə sa yi yi Yisɔsȧŋ ɔwe ro Nasarɛth.

⁶⁸Kɛrɛ ɔ pɛnsa ɔ pa, I tɛ hɛ, ɔwa ȧte mə pa tə sɔk hɛ mi. Kɔ wur ro gbənthəŋ, ka katəpi ɔ tam.

⁶⁹Ka ȧbɔy ubɛra ɔ nənk kɔ sɔ, kɔ kȧl təp kəpa ka ŋaŋ aŋa təmȧ rayɛr, Ukin ka ŋaŋ kɔnɔ ɔwe.

⁷⁰Kɛrɛ ɔ pɛnsa sɔ. Kədarəŋ kati ŋaŋ aŋa təmȧ rayɛr aŋ pa ka Pita, Ka təteŋ munɔ yi ukin ka ŋaŋ, mə yi uKalili, mafɔf ma mu mə tɔri ti.

⁷¹Ɔ təp kənal yi kəgbiŋ, ɔ pa, I tɛ hɛ ɔlaŋgba ɔwe mə nə bont.

⁷²Ka ɔlɛmp wati katəpi ɔ tam kəbeka mȧrəŋ. Ka Pita ɔ kala ȧmerȧ ka ȧrim ara Yisɔs ɔ pa ro rɔŋɔŋ, Yeŋka katəpi ɔ tam marəŋ-e, mə tə pɛnsa mi məsas. Ma ɔ tȧmtȧmnɛ ti-e, ɔ bok.