Read Ȧŋlemrȧnɛ Ȧfu Mark 15 Bible Online

Mark 15 - Ȧŋlemrȧnɛ Ȧfu bible

Mark 15

¹Ma pə sɔk-e, ka ɔlɛmp wati aŋfode abana aŋ nəŋkanɛ yi aŋbȧki yi aŋkarmɔkɔ dɛ yi aŋSanhedrin bɛ, kaŋ sek Yisɔsȧŋ, aŋ kera kɔ, kaŋ lȧnki kɔ ka Paylet.

²Ka Payletȧŋ ɔ yif kɔ, Munɔ yi ɔbȧy ka aŋYuda-i? kɔ wosa kəpa, Ya mə pa.

³Ka aŋfode abana aŋ gbanthir kɔ ta mȧtȧy məgbathi, kɛrɛ ɔ wosa hɛ.

⁴Ka Paylet ɔ yif kɔ sɔ, ɔ pa, Mə gbaki hɛ-i? Kəli mȧtȧy məgbathi a gbanthir mu-a.

⁵Kɛrɛ Yisɔs ɔ wosa hɛ haŋ Paylet ɔ kabanɛ.

⁶Ɔwa ka ȧŋlɔkɔ ŋa amet ame Payletȧŋ ɔ la tera ŋa wuni utand ukin, ɔwe aŋYuda aŋ tholir kɔ.

⁷Ka ulaŋgba a bont Barabas ɔ yi utand yi ŋaŋ aŋa fak atotok, ɔwe dif wuni ka aŋtotok.

⁸Ka ȧruniya rə təp kəyif Paylet tə kəyɔ mɔ mɔ la tanɛ tə kəyɔnȧ ŋaŋ.

⁹Ka Payletȧŋ ɔ pa, Nə yema kȧmȧ i tera nu ɔbȧy ka aŋYuda-i?

¹⁰kotȧy-e ɔ tȧrȧ kəpa aŋfode abana aŋ lȧnki kɔ ta kətut.

¹¹Kɛrɛ aŋfode abana aŋ gbisəŋa ȧruniya kȧmȧ ɔ tera ŋa Barabasȧŋ.

¹²Ka Paylet ɔ pa ro ŋaŋ, To nə yema kȧmȧ i yɔna kɔ ɔwe nə bont ɔbȧy ka aŋYuda-e?

¹³kaŋ woŋa sɔ, Tȧŋ kɔ rə akənt kəpəŋkinɛ.

¹⁴Ka Payletȧŋ ɔ pa ro rɔŋaŋ, Kɔɛŋ-a? Ko ɔləs wɔŋ ɔ po yɔ-e? kaŋ bȧr woŋa kəwoŋa kəbana, Tȧŋ kɔ rə akənt kəpəŋkinɛ.

¹⁵Ɔwa Payletȧŋ, ma ɔ yema thesis ɛmerȧ ya ȧruniya-e, ɔ tera ŋa Barabas, ɔwa ma ɔ po sap Yisɔsȧŋ, ɔ lȧnki kɔ kȧmȧ a tȧŋ kɔ ka akənt kəpəŋkinɛ.

¹⁶Antim aŋ kera kɔ rokor ka ȧŋbare aŋa a bont Pritoriɔm, kaŋ tela aŋtim bɛ dɛr rɔkin.

¹⁷kaŋ wɔns kɔ ruma rəyim, kaŋ ru ȧniyɔ ŋa təbaŋk, aŋ reŋ kɔ ŋi.

¹⁸kaŋ wɔŋ kəkori kɔ aŋ pa, To pɛ, ɔbȧy ka aŋYuda-e?

¹⁹kaŋ sapa kɔ ro bomp yi kəthaŋkɛ, aŋ thufər kɔ, aŋ sɔna kɔ təwu, aŋ bȧtho kɔ.

²⁰Maŋ po sel kɔ-e, aŋ bus kɔ aruma rəyim, aŋ wɔns kɔ ȧsuma tɔŋ, kaŋ kera kɔ tə kətaŋ kɔ ka akənt kəpəŋkinɛ.

²¹Ɔwa Saymɔn ro Sirini, ɔkas ka Alɛksanda yi Rufɔs-e, ma ɔ bɔ thas ri kəwur ro gbaŋ-e, aŋ fumpər kɔ tə kəgbanɛ akənt kəpəŋkinɛ.

²²kaŋ kȧrȧ kɔ ka ɔdɛr a bont Kɔlkɔtha, ro pə yi ma a tepa, a bont ɔdɛr wa kəgbɛŋkət.

²³Aŋ sɔŋ kɔ məber məkuluŋanɛ ȧŋma, kɛrɛ ɔ mun hɛ ma.

²⁴Maŋ po tȧŋ kɔ ka akənt kəpəŋkinɛ-e, aŋ yeranɛ ȧsuma tɔŋ, aŋ fak məthəŋ ta ti, tə kətara ara wuni o wuni mɔ ba.

²⁵Ka a tȧŋ kɔ ka akənt kəpəŋkinɛ ka ȧŋlɔkɔ ŋa aŋgbeleŋ aŋa bekȧ məsas.

²⁶Ka a gbal mȧtȧy ama a gbanthir kɔ rokɔm kɔŋ kəpa, ƆBȦY KA AŊYUDA.

²⁷kaŋ tȧŋ sɔ afəm akey ŋarəŋ rə tənt təpəŋkinɛ; ukin ka kȧdiyɔ kɔŋ, ɔwa ukin ka kȧmɛrɔ kɔŋ.

²⁸Ɔwa a lasər mȧgbal ama pa, A kuluŋ kɔ ka aŋfəm aləs.

²⁹Ɔwa aŋfəm aŋa thas ri-e, aŋ nal kɔ, aŋ fil fil tabomp taŋ, aŋ pa, Yɔ! Munɔ mə ləsər ȧŋseth ŋa Kuru, mə kȧl təmər ŋi rə mərey məsas,

³⁰kisisnɛ kȧmȧ mə thor ka akənt kəpəŋkinɛ.

³¹Aŋfode abana sɔ yi aŋkarmɔkɔ aŋ sel kɔ, aŋ pa ukin ka ulɔm, Ɔ la kisis alɔm, kɛrɛ ɔ gbəli hɛ kisisnɛ.

³²Ta ɔKrayst ɔbȧy ka aŋIsrɛl ɔ thor ka-ake ka akənt kəpəŋkinɛ kȧmȧ sə nənk, sə lanɛ. Hali aŋa a tȧŋ yi kɔnɔ rə tənt təpəŋkinɛ aŋ sambos kɔ.

³³Ma aŋgbeleŋ aŋa bekȧ tamthərukin aŋ bek-e, asum aŋ wɔŋ ka ȧŋthɔf bɛ, haŋ ka aŋgbeleŋ aŋa bekȧ tȧmthərɛŋanlɛ.

³⁴Ɔwa ka aŋgbeleŋ aŋa bekȧ tamthərɛŋanlɛ-e, Yisɔsȧŋ ɔ sel ɛrɔŋ lɛɔ, ɔ pa, Ilɔi, Ilɔi, lama Sabakthani? Ȧtȧ a tepa kəpa, ƆKuru kȧmi, ɔKuru kȧmi, kɔyɛŋ mə ter mi-e?

³⁵Aŋlɔm aŋa təmȧ ri maŋ təl ti-e, aŋ pa, Kəli, ɔ tela Ilaya.

³⁶Ka wuni kin ɔ gbukɛ ɔ lasər asponge yi afinika, ɔ bot ŋi rə kəthaŋkɛ, ɔ sɔŋ kɔ tə kəmun, ɔ pa, Kar, ta sə kəli bepi Ilayaŋ ɔ tə der thora kɔ.

³⁷Kɛrɛ Yisɔsȧŋ ɔ wurɔ rim rəbɔli rəkɔm, kɔ ternɛ.

³⁸Ka ȧŋkunklanɛ ŋa ȧŋseth ŋa Kuru aŋ gbayanɛ ratɔŋ kətəp rokɔm haŋ roratha.

³⁹Ma ɔkurgba ɔwe təmȧ ɔ lomanɛ kɔ ɔ nənk kəpa ɔ po ternɛ-e, ɔ pa, Tɛntɛnɛ ɔlaŋgba ɔwe ɔ yi ɔWan ka Kuru.

⁴⁰Afəm abom sɔ aŋ təmȧ ɔbɔli poŋ, aŋ kəli; Meri ɔwe ro Makdala, Meri ɔkara ka Yeməs ɔfɛth yi Yoses, yi Salome, aŋ yi kətɔŋ ka ŋaŋ;

⁴¹maŋ yi ro Kalili-e, aŋ tȧŋ kɔ aŋ yɔna kɔ. Ka afəm abom alɔm sɔ aŋ paya kɔ haŋ aŋ bek ro Yerusalɛm.

⁴²Ma rȧfɔy rə po bek-e, maŋ yi ȧŋrey ŋa kabɛnɛnɛ, ȧŋrey aŋa təmȧ aŋsabath kədi-e,

⁴³Yosɛf ɔwe ro Arimathia, wuni ka aŋSanhedrin ɔwe a wop yiki, ɔwa kɔn kɔnɔnɛ ɔ kəlɛnɛ rȧbȧy ra Kuru, ɔ der, ɔwa ɔ wɔŋ yi kəmintha ka Paylet kȧmȧ ɔ thola kabel ka Yisɔs.

⁴⁴Kɛrɛ Payletȧŋ ɔ kabanɛ ma ɔ təl kəpa ɔ po thɔŋ fi. Kɔ tela ɔkurgba ɔ yif kɔ bepi ɔ po fi ɔwoni.

⁴⁵Ma ɔ təl ti ka ɔkurgba-e, ɔ sɔŋ kabel ka Yosɛf.

⁴⁶kɔ wai kotha kəlinɛn, ɔ thora kɔ, kɔ rapər kɔ ka akotha kəlinɛn, ɔ bot kɔ ka kəboma ȧke a bɛs rə ȧsar, kɔ bənkli ȧsar ka kadare ka kȧboma.

⁴⁷Ka Meri ɔwe ro Makdala yi Meri ɔkara ka Yoses aŋ nənk ro a bot kɔ.