Read Ȧŋlemrȧnɛ Ȧfu Mark 16 Bible Online

Mark 16 - Ȧŋlemrȧnɛ Ȧfu bible

Mark 16

¹Ma aŋsabath aŋ thas-e, Meri ɔwe ro Makdala yi Meri ɔkara ka Yeməs yi Salome, aŋ wais məpos məfɔlfɔl tə kəsopa Yisɔsȧŋ.

²Ɔwa ka bəth bəth ka ȧŋrey ȧtɔtɔkɔ ŋa ȧŋyik, aŋ der ka kȧboma ma aret rə put.

³Aŋ fɔfȧnɛ aŋ pa, Kanɛ mə bənklɛ su ȧŋsar ka kadare ka kaboma-e?

⁴Kɛrɛ maŋ kəli-e, aŋ nənk kəpa a po bənkli aŋsar; ȧtesoma-e aŋ yi abana ɔthasər.

⁵Maŋ wɔŋ ka kaboma-e, aŋ nənk ulaŋgba ɔ yirȧ ka ȧŋgbȧp ȧdiyɔ, ɔ wɔŋ ruma rəfera rəbɔli, kaŋ nesa.

⁶kɔ pa ro rɔŋaŋ, Te nu nesa; nə thɛns Yisɔs ɔwe ro Nasarɛth, ɔwe a tȧŋ ka akənt kəpəŋkinɛ. Ɔ po yokanɛ; ɔ yi hɛ nɔ. Kəli ɔdɛr ro a bot kɔ.

⁷Kɛrɛ kɔnɛ nu, kanɛ aŋkarande ŋɔŋ yi Pitaŋ kəpa ɔ təmȧ nu kədi ro Kalili, rə mə nə nənk kɔ mɔ mɔ kanɛ nu.

⁸kaŋ wur lɛmp ka kȧboma aŋ gbukɛ, ȧtesoma-e kəyɛr yi akɔnthɔfəli aŋ derər ŋa, ɔwa aŋ pa hɛ tȧy o tȧy ka wuni o wuni ȧtesoma-e rənes rə wop ŋa.

⁹Ma Yisɔsȧŋ ɔ bɔra yokanɛ ka ȧŋrey ȧtɔtɔkɔ ŋa aŋyik-e, ɔ mɔtha tɔrinɛ ka Meri ɔwe ro Makdala, ka ɔwe ɔ wurɔ akərəfi tȧmthədɛrəŋ.

¹⁰kɔ kɔnɛ ɔ kanɛ ŋa aŋa la yi yi kɔnɔ maŋ nimisa ɔwa aŋ bok.

¹¹Ŋaŋ, maŋ təl kəpa ɔ kəli-e, ɔwa kəpa ɔya ɔ nənk kɔ-e aŋ lanɛ hɛ ti.

¹²Kədarəŋ ka mȧtȧy ame ɔ tɔrinɛ rə məyi məlɔm ka akarande ŋarəŋ ka ȧŋbiyas ŋaŋ kəkɔ ro gbaŋ.

¹³kaŋ kɔnɛ aŋ kanɛ ti ka aŋlɔm, kɛrɛ aŋ lanɛ hɛ ŋa sɔ.

¹⁴Kədarəŋ kati ɔ tɔrinɛ sɔ ka aŋtɔfɔt ukin ma aŋ yirȧ ka kədi, kɔ fɔfər ŋa ta kate lanɛ ka ŋaŋ yi kagbolŋanɛ ka ɛmerȧ yaŋ pəkasifɛ aŋ lanɛ hɛ ŋa aŋa po nənk kɔ kədarəŋ ka kȧyokanɛ kɔŋ ka rafi.

¹⁵kɔ pa ro ŋaŋ, Kɔnɛ nu ka ȧdȧru bɛ, ɔwa taməs nu ȧkɛra kəfinɔ ka Kuru ka wuni o wuni.

¹⁶Kɔnɔ ɔwe mə lanɛ, ɔwa a baftays kɔ-e, ɔ tə kisi, kɛrɛ kɔnɔ ɔwe mə te lanɛ-e, ɔ ba mətheri.

¹⁷Ɔwa ɛmisali ɛye ɛ tə tȧŋ ŋa aŋa lanɛ; aŋ tə wurɔ akərəfi ka ȧŋes a mi; aŋ tə fɔf tənt təfu;

¹⁸aŋ tə gbasi ɛbok; ɔwa bepi aŋ mun məkɔn o kɔn-e, mə ba hɛ tə kəyɔ ŋa ɔbaŋ; aŋ ba kəreŋ aŋtui məta, ɔwa aŋ tə yeŋk.

¹⁹Ɔwa kədarəŋ ka ɔMarki Yisɔsȧŋ ɔ po fɔfȧnɛ ŋa-e, a ŋata kɔ rokɔm ro riyana, kɔ yirȧ ka kȧta kədiɔ ka Kuru.

²⁰kaŋ kɔnɛ, aŋ taməs ȧkɛra kəfinɔ ka Kuru dɛr o dɛr, ka ɔMarki ɔ mar ŋa, ɔwa ɔ bȧksər ȧrim yi ɛmisali ɛyɛ tanda. Amina.