Read Ȧŋlemrȧnɛ Ȧfu Mark 2 Bible Online

Mark 2 - Ȧŋlemrȧnɛ Ȧfu bible

Mark 2

¹Ma mərey məlɔmanɛ mə thas-e, Yisɔsȧŋ ɔ kȧl wɔŋ ro Kepaniyɔm. Ka a tɔri ti kəpa ɔ yi ro seth.

²Ɔwa afəm agbȧthi aŋ thoŋklanɛ dɛr ɔkin haŋ dɛr ɔ yi hɛ sɔ rodi ka kadare, kɔ fɔfȧnɛ ŋa ȧrim ra Kuru.

³Ka afəm aŋ der ro ŋɔŋ, aŋ kȧrȧ kɔ wuni ɔwe ba məthanthaŋ, afəm ŋanlɛ aŋ gbanɛ kɔ.

⁴Maŋ te gbəli fat kɔ salata ȧruniya-e, aŋ səli ɔgbak wa ȧŋseth ro ɔ yi, ɔwa maŋ po buli ri-e, aŋ thora kafənt ro ɔwuni tu məthanthaŋ ɔ fənthȧ.

⁵Ma Yisɔsȧŋ ɔ nənk kȧlanɛ ka ŋaŋ-e, ɔ pa ka ɔwe ba mathanthaŋ, Wan, a po tera ɛhakɛ ɛ mu.

⁶Kɛrɛ akarmɔkɔ alɔm aŋ yirȧ ri, aŋ fɔfnɛ ka ɛmerȧ yaŋ,

⁷To som ɔlaŋgba ɔwe mə fɔf Kuru ɔləs-e? Kanɛ gbəli tera wuni ɛhakɛ thambe Kuru Məsaba son-e?

⁸Ka ɔlɛmp wati ma Yisɔs ɔ sɔthnɛ ka ȧŋmerȧ ŋɔŋ kəpa ya aŋ fɔfnɛ ka ɛmerȧ yaŋ-e, ɔ pa ro rɔŋaŋ, kɔyɛŋ mə nə nanɛ mȧtȧy ame ka ɛmerȧ ɛ nu-e?

⁹Areke tha yi atuy tȧy, tə kəpa ka ɔwe tu məthanthaŋ, A po tera mu ɛhakɛ ɛ mu-e, thalɔm tə kəpa, Yokanɛ, gbasi kafənt ka mu, mə kɔth-e?

¹⁰Kɛrɛ kȧmȧ nə tȧrȧ kəpa ɔWan ka wuni ɔ ba afɔsɔ ka ȧdȧru tə kətera wuni ɛhakɛ yɔŋ-e, ɔ pa ka ɔwe ba mathanthaŋ,

¹¹I kanɛ mu, Yokanɛ, gbasi kafənt ka mu mə kɔ ro seth ka mu.

¹²Ka ɔlɛmp wati ɔ gbasi kafənt, ɔ wur, ɔ kɔth rodi ka ŋaŋ bɛ, haŋ ŋa bɛ aŋ kabanɛ, kaŋ yikis Kurɔŋ, aŋ pa, Sə la hɛ nənk tȧy təwunɔŋ.

¹³kɔ wur, ɔ kɔnɛ sɔ ro baŋ rayɛr, ka ȧruniya bɛ rə der ro ŋɔŋ, kɔ thəksa ŋa.

¹⁴Mɔ mɔ thas ri-e, ɔ nənk Libay, ɔwan ka Alfiɔs, ɔ yirȧ ka ɔdɛr ro mə a gbasi ɛfȧk, ɔ pa ro ŋɔŋ, Tȧŋ mi. Kɔ yokanɛ ɔ tȧŋ kɔ.

¹⁵Ka pə re yi ma Yisɔsȧŋ ɔ yirȧ ka kədi ka ȧŋseth ŋa Libay-e, aŋthoŋkla ɛfȧk yi aŋfəm ŋa ɛhakɛ agbȧthi aŋ yirȧ yi Yisɔsȧŋ dɛ yi aŋkarande ŋɔŋ, kotȧy-e ŋa agbȧthi aŋa tȧŋ kɔ.

¹⁶Ma aŋkarmɔkɔ yi aŋFarisi aŋ nənk kəpa ɔ di yi aŋfəm ŋa ɛhakɛ yi aŋthoŋkla ɛfȧk-e, aŋ pa ka aŋkarande ŋɔŋ, To som mɔ di ɔwa ɔ mun yi aŋthoŋkla ɛfȧk yi aŋfəm ŋa ɛhakɛ-e?

¹⁷Ma Yisɔs ɔ təl ti-e, ɔ pa ro ŋaŋ, Ŋaŋ aŋa yi ayenki mədɛr aŋ yema hɛ ubolomba, kɛrɛ ante yeŋki mədɛr, ŋa yema ubolomba. I der hɛ tə kəmuti aŋlompi, kɛrɛ i der tə kəmuti aŋfəm aləs tə kəthupi.

¹⁸Aŋkarande ŋa Yɔn yi aŋFarisi aŋ wop asum, kaŋ der ka Yisɔs, aŋ pa ro ŋɔŋ, To som aŋkarande ŋa Yɔn yi aŋa aŋFarisi aŋ wop asum, kɛrɛ aŋkarande a mu aŋ wop hɛ-e?

¹⁹Ka Yisɔsȧŋ ɔ pa ro ŋaŋ, Aŋyathki ŋa amet ma kanantə aŋ gbəli wop asum-i ma ɔnantə ɔ yi yi ŋaŋ-i? Fani ɔruni ɔwe ba kanantə ɔ yi yi ŋaŋ-e aŋ gbəli hɛ wop asum.

²⁰Kɛrɛ mȧrey mə tə der ma a ba kənɔi ŋa ɔnantə, ɔwa aŋ tə wop asum ka mȧrey mati.

²¹Wuni ɔ gbap hɛ arombo ŋa kotha kəfu rə ruma rəkur. Bepi pə yi yi-e, ȧŋrombo aŋ tə pim aruma, ɔwa ɔpima ɔ bȧr gbo ləsȧ.

²²Wuni ɔ bot hɛ məber məfɛth rə təbos təkur. Bepi pə yi yi-e, maber mə tə gbai tabos, ɔwa maber mə tə kasara yi tabos. Tiyȧŋ məber məfɛth mə mar gbo təbos təfu.

²³Ka pə re yi Yisɔsȧŋ ɔ bɔ gbəkinɛ atɔr ka ȧŋrey ŋa aŋsabath-e. Ɔwa aŋkarande ŋɔŋ maŋ kɔ-e, aŋ təp kəsiməth məgbas.

²⁴Ka aŋFarisi aŋ pa ro ŋɔŋ, Kəla, kɔyɛŋ mə aŋ yɔ ȧte te yi təlompi ka ȧŋrey ŋa aŋsabath-e?

²⁵Ka Yisɔs ɔ pa ro ŋaŋ, Nə tha karaŋ hɛ ȧte Debid ɔ yɔ-i, ma ɔ paŋ rəka, ɔwa dor rə wop kɔ yi ŋaŋ aŋa yi dɛ yi kɔnɔ-i?

²⁶Mɔ ɔ wɔŋ ka ȧŋseth ŋa Kuru ka ȧŋlɔkɔ ŋa Abiyathar ɔfode ubana, kɔ di kabo kəsəm ȧke te mar di thambe aŋfode gbo-i, ɔwa ɔ kȧl sɔ sɔŋ aŋa yi yi kɔnɔ-i?

²⁷kɔ pa ro ŋaŋ, A bɛmpa aŋsabath ta wuni kəpet, pə yi hɛ wuni kəpet ta aŋsabath.

²⁸Tiyȧŋ ɔWan ka wuni ɔ yi sɔ ɔMarki ka aŋsabath.