Read Ȧŋlemrȧnɛ Ȧfu Mark 3 Bible Online

Mark 3 - Ȧŋlemrȧnɛ Ȧfu bible

Mark 3

¹Ka Yisɔsȧŋ ɔ wɔŋ sɔ ka ȧŋseth agbanɛ, kɔ bəp ri ulaŋgba ɔwe ba kəta kəfi.

²Ka aŋfəm aŋ kəli kɔ təŋ, bepi ɔ tə yenkəs kɔ ka ȧŋrey ŋa aŋsabath, kȧmȧ aŋ gbəli gbȧnthir kɔ.

³kɔ pa ka ɔlaŋgba ɔwe ba kȧta kəfi, Təmȧ nɔ.

⁴kɔ yif aŋfəm, Ɔlompi ka ȧŋrey ŋa aŋsabath tə kəyɔ tȧy təfinɔ-i, thalɔm tə kəyɔ tȧy tələs-i? Tə kəkisis ŋesəm-i thalɔm tə kədif wuni-i? Kɛrɛ aŋ taŋk.

⁵Pə yi kɔ ɔnɔsinɛ ma ɔ nənk aŋ gbolŋas tabuth taŋ, kɔ kəli ŋa yi məbaŋ, kɔ pa ka ɔlaŋgba, Thanthi kȧta ka mu. Kɔ thanthi ki ka kȧta kɔŋ kə yeŋk.

⁶Ma aŋFarisi aŋ wur-e, aŋ kɔnɛ lɛmp ka aŋHerodian kȧmȧ aŋ nəŋkanɛ to mə aŋ yɔ kȧmȧ aŋ dif kɔ.

⁷Kɛrɛ Yisɔs ɔ wur ri yi aŋkarande ŋɔŋ, ka aŋ kɔnɛ ro baŋ. Ka runiya rəbana kəwur ro Kalili yi ka Yudia rə tȧŋ kɔ.

⁸Ɔwa runiya rəbana sɔ kəwur ro Yerusalɛm, ro Idɔm yi ka kȧbȧŋ ka Yɔrdan mɔri, yi ka ȧŋthɔf aŋa gbətɔ ro Tair yi ro Sidon, aŋ der ro ŋɔŋ maŋ təl ta mȧtȧy məbana ama ɔ po yɔ.

⁹Ɔ pa ka aŋkarande ŋɔŋ, ta aŋ bɛnɛnɛ kɔ abil alɔl salata ȧruniya, kȧmȧ aŋ te thiŋkanɛ kɔ,

¹⁰ȧtesoma-e ɔ po yenkəs agbȧthi. Tiyȧŋ ŋa bɛ aŋa ba tətu aŋ fumpər kɔ kȧmȧ aŋ gboŋ kɔ.

¹¹Ɔwa aŋkərəfi aləs, alɔkɔ o lɔkɔ aŋ nənk kɔ-e, aŋ gbapsa ro thɔf, aŋ woŋa, aŋ pa, ƆWan ka Kuru munɔŋ.

¹²Kɛrɛ ɔ maŋ ŋa asɔbɛ kȧmȧ aŋ te ŋaibi kɔ.

¹³kɔ gbep ka kateŋ, ɔ tela ro ŋɔŋ aŋa kɔn kɔnɔnɛ ɔ yema, kaŋ kɔnɛ ro ŋɔŋ.

¹⁴kɔ thithəs afəm tɔfɔt ŋarəŋ kȧmȧ aŋ yi ro ŋɔŋ, ɔwa kȧmȧ ɔ soməth ŋa tə kətaməs,

¹⁵yi tə kəba afɔsɔ tə kəyeŋkəs aŋtuy, dɛ yi tə kəwura akərəfi aləs.

¹⁶kɔ sɔŋ Saymɔn ȧŋes ŋa Pita;

¹⁷ɔwa Yeməs ɔwan ka Sɛbidi yi Yɔn ɔwɔnt ka Yeməs, aŋa ɔ sɔŋ mes Bowanakes, ŋə yi kəpa, aŋwuth ŋa arɛŋ.

¹⁸Andru, Filip, Barthɔlɔmiyu, Mathiu, Thɔmɔs, Yeməs ɔwan ka Alfiyɔs, Thadiyus, Saymɔn ɔwe ro Kena,

¹⁹yi Yudas Iskariyɔt ɔwe sɔnd kɔ. kaŋ wɔŋ rȧ ȧseth.

²⁰Ɔwa ȧruniya rə kȧl thoŋklanɛ sɔ, haŋ pə fɔyɛ sɔ di bɛ.

²¹Ma aŋyathki ŋɔŋ aŋ təl ti-e, aŋ wur tə kəwop kɔ, aŋ pa, Ɔ po wɔŋ məməl.

²²Aŋkarmɔkɔ aŋa wur ro Yerusalɛm-e, aŋ pa, Ɔ ba Biyɛlsibɔb, ɔwa ɔ wurɔ aŋkərəfi ka aŋfɔsɔ ŋa ɔbȧy ka aŋkərəfi.

²³kɔ tela ŋa ro ŋɔŋ, ɔ pa ro ŋaŋ rȧ ɛlomɔ, To Sethani mɔ gbəli wurɔ Sethani-e?

²⁴Bepi məputhanɛ mə wɔŋ rȧ rəbȧy, rȧbȧy rati rə gbəli hɛ won.

²⁵Bepi məputhanɛ mə wɔŋ rȧ ȧseth-e, ȧŋseth ŋati aŋ gbəli hɛ təmȧ.

²⁶Ɔwa bepi Sethani ɔ po yokar kɔn kɔnɔnɛ, ɔwa ɔ gbayanɛ, ɔ gbəli hɛ təmȧ, ɔthalnɛ wɔŋ ɔ bek.

²⁷Wuni o wuni ɔ gbəli hɛ wɔŋ ka ȧŋseth ŋa wuni ɔwe ba afɔsɔ, ɔ ləsər ɛyɛt yɔŋ, thambe ɔ mɔtha sek ɔwe ba aŋfɔsɔ. Kədarəŋ kati ɔ tə ləsər ȧŋseth ŋɔŋ.

²⁸Tɛntɛnɛ i pa ro nu, A tə tera ɛhakɛ bɛ ya aŋwuth ŋa aŋfəm, yi tȧfɔf taŋ tələs ȧte maŋ fɔf,

²⁹kɛrɛ wuni o wuni ɔwe mə fɔf ɔləs kəŋamnɛ ɔ Yina məsəm a tera hɛ kɔ ti thȧbana, ɔ ba mətheri ma ahakɛ thəbana.

³⁰Pəkasifɛ aŋ po pa, Ɔ ba ukərəfi uləs.

³¹Ɔkara kɔŋ yi aŋwɔnt ŋɔŋ aŋ der, aŋ təmȧ rokaŋ, kaŋ som kətela kɔ.

³²Ɔwa runiya rə yirȧ rə gbətɔ kɔ, aŋ pa ro ŋɔŋ, Ɔkara ka mu yi aŋwɔnt mu aŋ yi rokaŋ aŋ thɛns mu.

³³kɔ pa ro ŋaŋ, Kanɛ yi ɔkara kȧmi yi aŋwɔnt mi-e?

³⁴kɔ kəli kəli ŋa aŋa yirȧ ri, ɔ pa, Kəli ɔkara kȧmi yi aŋwɔnt mi!

³⁵Ȧtesoma-e wuni o wuni ɔwe mə yɔ mȧselɔ ma Kuru-e kɔnɔ yi ɔwɔnt mi runi, yi ɔwɔnt mi bɛra, yi ɔkara kȧmi.