Read Ȧŋlemrȧnɛ Ȧfu Mark 4 Bible Online

Mark 4 - Ȧŋlemrȧnɛ Ȧfu bible

Mark 4

¹Ka Yisɔsȧŋ ɔ təp sɔ kəthəksa ro baŋ rayɛr. Ka runiya rəbana rə thoŋklanɛ ro ŋɔŋ, kɔ wɔŋ ka abil alɔl, ɔ yirȧ ri ro baŋ ka aŋfəm bɛ aŋ yirȧ ro gbaŋ ka kȧbȧŋ dayɛr.

²kɔ thəksa ŋa mȧtȧy məgbathi rə ɛlomɔ, kɔ pa ro rɔŋaŋ ka kathəksa kɔŋ,

³Su nu ɛləns. Kəla, usak ɔ wur tə kəsak,

⁴ka pə re yi, mɔ mɔ sak-e, məter məlɔm mə fumpɔ ro roŋ dayɛr, ka ɛbȧmp aŋ der aŋ gbaməs ma.

⁵Ɔwa məlɔm mə fumpɔ rə agbalaŋ aŋa te ba ɛthɔf ɛgbathi. Ɔlɛmp wati mə lɔkɔ, ma mə te ba ɛthɔf ɛbɔlɔŋ-e,

⁶kɛrɛ ma aret rə put-e, mə fianɛ, ɔwa mə wela ma mə te ba ɛthəŋk.

⁷Məlɔm mə fumpɔ rə təbaŋk, ɔwa ma tabaŋk tə lɔkɔ-e, tə thiŋkanɛ ma haŋ mə kom hɛ məkomi.

⁸Ka məlɔm mə fumpɔ rə athɔf afinɔ, ka mə kom məkomi, mə bȧk, mə fui. Məlɔm mə kom məkomi mɔlɔ ma kəgba tɔfɔt, məlɔm təgba təsas, məlɔm kɛmɛ kin.

⁹kɔ pa ro ŋaŋ, Ɔwe ba ɛləns ta ɔ təl.

¹⁰Ɔwa ma Yisɔsȧŋ ɔ tiyȧ kɔn son-e, aŋtɔfɔt ŋarəŋ yi aŋa yi yi ŋaŋ-e, aŋ yif kɔ tə kəlokthia ŋa aŋlomɔ.

¹¹kɔ pa ro ŋaŋ, A sɔŋ nu tə kətara aŋgbundu ŋa rȧbȧy ra Kuru, kɛrɛ ka ŋaŋ aŋa yi rokaŋ-e, mȧtȧy ame bɛ mə yɔnɛ rə ɛlomɔ,

¹²kȧmȧ bepi aŋ kəli-e aŋ nənk kɛrɛ aŋ sɔthnɛ hɛ. Ɔwa kətəl aŋ tə təl kɛrɛ pə sɔk hɛ ŋa; ta thani aŋ kȧl lafthɛ, ɔwa a tera ŋa ɛhakɛ yaŋ.

¹³kɔ pa ro ŋaŋ, Nə tɛ hɛ aŋlomɔ aŋe-i? Ɔwa to mə nə yɔ nə tȧrȧ ɛlomɔ bɛ-a?

¹⁴Ɔsak ɔ sak ȧrim.

¹⁵Aŋa yi ro roŋ dayɛr ro a sak ȧrim, ŋa yi aŋa bepi aŋ po təl-e, Sethani ɔ der ɔlɛmp wati ɔ nɔy ȧrim ara a sak ro rɔŋaŋ.

¹⁶Ya pə yi sɔ mɔ aŋlɔm aŋa a sak ka aŋgbalaŋ-e, maŋ təl ȧrim, ka ɔlɛmp wati aŋ malanɛ ri yi məbɔnɛ,

¹⁷kɛrɛ maŋ te ba ɛthəŋk rokor ka ŋaŋ-e, aŋ muyu ɔthan gbo; kədarəŋ kati bepi mɔnɛ-e, thalɔm asɔmpanɛ aŋ der salata ȧrim, ka ɔlɛmp wati aŋ tə pənthbəla.

¹⁸Alɔm-e, a sak ŋa ka tabaŋk. Ŋaŋ ŋa yi aŋa təl ȧrim,

¹⁹kɛrɛ ɛsoli ya ȧdȧru, yi matɔns ma rəyola, ɔwa mafela ma mȧtȧy məlɔm mə der-e, mə thiŋkanɛ ȧrim, ɔwa rə ba hɛ məkomi.

²⁰Ɔwa aŋa a sak ka ȧŋthɔf afinɔ, maŋ təl ȧrim aŋ malanɛ ri, ɔwa aŋ kom məkomi mɔlɔ ma kəgba tɔfɔt, məlɔm təgba təsas, məlɔm kɛmɛ kin.

²¹kɔ pa ro rɔŋaŋ, A kȧrȧ kəmulɛ tə kəbot ki ka ȧthunthȧ roratha ba, thalɔm ka kəfənt roratha-i, a kȧrȧ hɛ ki tə kəbot ki ka ɔtəmər wati-i?

²²kotȧy-e koko ara a maŋk rə yi hɛ ara mə a te ba kəwur gbafəth; amurare aŋ yi hɛ aŋa mə a te ba kətara.

²³Bepi wuni o wuni ɔ ba ɛləns-e, ta ɔ təl.

²⁴kɔ pa ro ŋaŋ, Bot nu rə ȧmerȧ ȧte nə təl. Anthuntha aŋa nə thunth-e, ŋə mə a thuntha nu. Ɔwa a tə kȧl bȧrȧ nu sɔ.

²⁵Ȧtesoma-e kɔnɔ ɔwe ba-e, ɔ tə bȧr sɔthɔ, ɔwa kɔnɔ ɔwe te ba-e, a tə nɔy kɔ ara ɔ ba.

²⁶kɔ pa sɔ, Rȧbȧy ra Kuru rə yi mɔ ulaŋgba mɔ ɔ sak məter ka ȧŋthɔf.

²⁷Ɔwuni ɔ dirȧ, ɔ thəmɛ tȧtȧk yi rəyaŋ, ɔwa ma mater mə lɔkɔ, ɔwa mə bȧk-e, ɔ tɛ hɛ aroŋ dati.

²⁸Aŋthɔf gbeŋ aŋ wur məkomi; kətɔtɔkɔ kȧpotoŋ. Kədarəŋ kati mȧkomi, kədarəŋ kati mȧkomi məbaki.

²⁹Kɛrɛ bepi mȧkomi mə bȧk-e, ka ɔlɛmp wati ɔ kȧrȧ aŋthis arɔka, pəkasifɛ ȧŋlɔkɔ ŋa karɔk aŋ bek.

³⁰kɔ pa, Ko rəka raŋ mə sə bȧlȧnɛ rȧbȧy ra Kuru-e? Thalɔm ko alomɔ mə sə lomɔ ri-e?

³¹Rə yi mɔ aluka ŋa amustard, aŋa pə yi bepi a tɛp ŋi ka aŋthɔf-e, hali maŋ yi alɔl athasi maluka bɛ ka ȧdȧru-e

³²kɛrɛ ma a tɛp ŋi-e, aŋ lɔkɔ-e, aŋ səkɛ ȧbana pəthasi ɛbuma bɛ, aŋ wur məra məbana, haŋ ɛbȧmp ya aŋfena aŋ gbəli yianɛ roratha ka ȧŋfɔyr ŋati.

³³Ɔwa ɔ fɔfȧnɛ ŋa ȧrim rə ɛlomɔ ɛgbathi ɛwunɔŋ, mɔ mə aŋ gbəli təl.

³⁴Ɔ fɔfȧnɛ hɛ ŋa thambe rə alomɔ, kɛrɛ ka aŋkarande ŋɔŋ ɔ yɛksi mȧtȧy bɛ, maŋ tiyȧ ŋa son.

³⁵Ka ȧŋrey ŋati ma rȧfɔy rə po bek-e, ɔ pa ro ŋaŋ, Maŋ fəsi nu romɔri ka ȧŋgbȧp alɔm.

³⁶Maŋ po tey ȧruniya-e aŋ keranɛ kɔ ka ȧŋbil mɔ ɔ yi. Ka təbil təlɔm tə kɔ yi kɔnɔ.

³⁷Ka kəŋkəl kəbana kə yokanɛ, ɛmunkəl ɛ wɔŋ ka ȧŋbil, ka ȧŋbil aŋ yema la mȧnt.

³⁸Kɛrɛ kɔnɔ ɔ yi rodarəŋ ka ȧŋbil-e, ɔ dirȧ ka ȧŋpila, kaŋ thəmi kɔ, aŋ pa ro ŋɔŋ, Karmɔkɔ, tə ba hɛ mu tȧy bepi sə dinɛ-i?

³⁹kɔ thəmɛ, ɔ ŋal aŋfef, ɔ pa ka kȧbȧŋ, Taŋk, thɔfəla thɔŋ. Ka aŋfef aŋ poŋ, ka pə kȧl yi ɔthɔfəl bɛm.

⁴⁰kɔ pa ro ŋaŋ, kɔyɛŋ nə nesa-e? Nə tha ba hɛ kəlanɛ-i?

⁴¹kaŋ nesa haŋ aŋ pa ukin yi ulɔm, Kanɛ yi ɔwe-e, ɔwe pə yi hali aŋfef yi kȧbȧŋ, ɛ təlȧ kɔ-e?