Read Ȧŋlemrȧnɛ Ȧfu Mark 5 Bible Online

Mark 5 - Ȧŋlemrȧnɛ Ȧfu bible

Mark 5

¹kaŋ fəsi kȧbȧŋ mɔri, ka ȧŋthɔf ŋa aŋKarasin.

²Ma ɔ wur ka ȧŋbil-e, ka ɔlɛmp wati ulaŋgba ɔwe ba ukərəfi uləs ɔ wur ka taboma ɔ gbanɛ kɔ.

³Ɔlaŋgba ɔwe ɔ ba mayira mɔŋ kətɔŋ ka taboma, ɔwa wuni o wuni ɔ gbəli hɛ sek kɔ, hali rə tɔrɛntha,

⁴ȧtesoma-e ɛlɔkɔ ɛgbathi a seka kɔ ɛgbete yi tɔrɛntha-e, kɛrɛ ɔ piməs atɔrɛntha-e, ɔ siməth ɛgbete. Wuni o wuni ɔ ba hɛ afɔsɔ tə kətham kɔ.

⁵Lɔkɔ o lɔkɔ, tatak-o, rəyaŋ-o, ɔ yi ka tȧteŋ yi ka taboma, ɔ sɔŋkɔ, ɔ gbəkəsnɛ yi məsarȧŋ.

⁶Kɛrɛ ma ɔ nənk Yisɔs ɔbɔli poŋ, ɔ gbukɛ ɔ bȧtho kɔ,

⁷kɔ sɔŋkɔ yi rim rəbɔli rəkɔm, ɔ pa, Ko tȧy tȧŋ i ba yi munɔ-e, Yisɔs munɔ ɔWan ka Kuru ɔBɔlirəkɔm bɛ-e? Ka ȧŋes ŋa Kuru, i nɛmthɛnɛ mu kȧmȧ mə te sɔmpa mi.

⁸kotȧy-e ɔ po pa ro ŋɔŋ, Wur ka ɔlaŋgba, munɔ ɔkərəfi uləs ɔwe.

⁹kɔ yif kɔ ȧŋes ŋɔŋ, kɔ wosa, ɔ pa, Aŋes a mi aŋ yi Runia, ȧtesoma-e sa agbȧthi.

¹⁰kɔ nɛmthɛnɛ kɔ kȧmȧ ɔ te bȧl ŋa ka ȧŋthɔf.

¹¹Ȧŋlɔkɔ ŋati, kuthi kəbana ka təsɔp kə bɔ wɔnth ri ka kateŋ rayɛr.

¹²Ka aŋkərəfi aŋ nɛmthɛnɛ kɔ aŋ pa, Somra su ka tasɔp kȧmȧ sə wɔŋ ŋa.

¹³Ka Yisɔsȧŋ ɔ malanɛ. Ka aŋkərəfi aləs aŋ wur kɔ aŋ wɔŋ ka tasɔp, ka akuthi (mɔlɔ ma ɛwul yɛrəŋ) kə gbuŋklɛ ka aŋtəmp ŋa kȧbȧŋ, kaŋ po fi ro mȧnt.

¹⁴Ka ŋaŋ aŋa wɔnthər ŋa aŋ gbukɛ, aŋ kanɛ ti ro pet, yi ka ȧŋthɔf. Kaŋ der tə kəkəli ȧte po yɔnɛ.

¹⁵Maŋ der ka Yisɔs-e, kaŋ nənk ɔlaŋgba ɔwe la ba aŋkərəfi aləs-e, ɔ yirȧ, ɔ lopra, ɔwa ɔ ba ȧmerȧ akɛnɛ-e, aŋ nesa.

¹⁶Ŋaŋ aŋa nənk ti-e, aŋ tɔri ŋa ȧte yɔnɛ kɔ ɔwe la ba aŋkərəfi aləs, yi ta tasɔp.

¹⁷kaŋ wɔŋ kənɛmthɛnɛ kɔ kȧmȧ ɔ wur ka ȧŋthɔf ŋaŋ.

¹⁸Mɔ mɔ wɔŋ ro bil-e, kɔnɔ ɔwe la ba aŋkərəfi ɔ nɛmthɛnɛ kɔ kȧmȧ ɔ yi ro ŋɔŋ.

¹⁹Kɛrɛ ɔ selɔ hɛ, ɔ kanɛ kɔ, Kɔnɛ ro seth ka mu ka aŋyathki a mu, kȧmȧ mə kanɛ ŋa mȧtȧy məbana ama ɔMarki ɔ yɔna mu, ɔwa mɔ mɔ ba ȧney ta ȧtȧ mu.

²⁰kɔ kɔnɛ, ɔ təp kətaməs ro Dikapɔlis mȧtȧy məbana ama Yisɔsȧŋ ɔ po yɔna kɔ. Ka aŋfəm bɛ aŋ kabanɛ.

²¹Ma Yisɔsȧŋ ɔ bȧkȧ ka ȧŋbil ɔ kȧl fəsi romɔri-e, runiya rəbana rə thoŋklanɛ ro ŋɔŋ. Ȧŋlɔkɔ ŋati ɔ yi ro baŋ rayɛr.

²²Ka ukin ka aŋkərbomp ka ȧŋseth agbanɛ ɔ der, ȧŋes ŋɔŋ ŋə yi Yairɔs. Ma ɔ nənk kɔ, ɔ fumpɔ ka ȧtȧtək tɔŋ,

²³ɔ nɛmthɛnɛ kɔ ɔthasər, ɔ pa, Ɔwan kȧmi ubɛra ɔ yema fi, ɔmari mu, der kȧmȧ mə deŋ kɔ mȧta ma mu, kȧmȧ ɔ kȧl yeŋk, ɔwa ɔ kəli.

²⁴Ka Yisɔsȧŋ ɔ paya kɔ; ka ȧruniya rəbana rə tȧŋ kɔ, rə thiŋkanɛ kɔ.

²⁵Ka wuni bom ɔwe wur mətir ka təren tɔfɔt tərəŋ,

²⁶ɔwa ɔ po thas mȧtȧy məgbȧthi ka mȧta ma aŋbolomba, ɔ po ləsər ara ɔ ba bɛ, kɛrɛ pə fisa hɛ kɔ, ɔ bȧr gbo nakasi;

²⁷ma ɔ təl ta Yisɔsȧŋ, ɔ der rodarəŋ ka ȧruniya, ɔ gboŋ aruma rɔŋ.

²⁸kotȧy-e ɔ pa, Hali gbo i gboŋ ȧsuma tɔŋ i ti yeŋk.

²⁹Ɔwa ka ɔlɛmp wati mȧtir mɔŋ mə tey kəwur, kɔ təlnɛ ka aŋdɛr ŋɔŋ kəpa ratu rɔŋ rə poŋ.

³⁰Ka ɔlɛmp wati-e, ma Yisɔsȧŋ ɔ təlnɛ kəpa aŋfɔsɔ aŋ wur kɔ, ɔ fəlɛ ka ȧruniya, kɔ pa, Kanɛ gboŋ ȧsuma ta mi-e?

³¹Ka aŋkarande ŋɔŋ aŋ pa ro ŋɔŋ, Mə nənk ȧruniya rə thiŋkanɛ mu, mə kȧl yif, Kanɛ gboŋ mi-e?

³²kɔ kəli kəli kȧmȧ ɔ nənk ɔya ɔwe po yɔ ȧte.

³³Ka ɔya ɔ nesa, ɔ yɛr ma ɔ tȧrȧ ȧtȧ a po yɔna kɔ, ɔ der, ɔ gbəpsa rodi kɔŋ, ɔ kanɛ kɔ tȧteŋ bɛ.

³⁴kɔ pa ro ŋɔŋ, Wan kȧmi ubɛra, Kȧlanɛ ka mu kə po mu yenkəs. Kɔnɛ yi məthɔfəl yi kəyeŋk ka ratu ra mu.

³⁵Ma Yisɔsȧŋ ɔ yi ras ka kəfɔf-e, afəm aŋ der kəwur ka ȧŋseth ŋa ɔwe yi rȧbomp ka ȧŋseth agbanɛ-e, aŋ pa, Ɔwan ka mu bɛra ɔ fi. Kɔyɛŋ mȧ mə sɔmpa sɔ ɔkarmɔkɔ kətiŋ-e?

³⁶Kɛrɛ Yisɔsȧŋ ma ɔ təl ȧrim ara a fɔf-e, ɔ pa ka ɔwe yi rȧbomp ka ȧŋseth agbanɛ-e, Te nesa, lanɛ gbo.

³⁷Kɛrɛ ɔ selɔ hɛ wuni o wuni ɔ paya kɔ, thambe Pitaŋ, Yeməsȧŋ yi Yɔnȧŋ, ɔwɔnt ka Yeməs.

³⁸Maŋ bek ka ȧŋseth ŋa ɔwe yi rȧbomp ka ȧŋseth agbanɛ-e, ɔ bəp asɔnkɔ ȧbana, ɔwa afəm agbȧthi aŋ bok, ɔwa aŋ kulɔ kəkulɔ kəbana.

³⁹Ma ɔ po wɔŋ-e, ɔ pa ro ŋaŋ, kɔyɛŋ mə nə woŋa-e, ɔwa nə bok-e? Ɔwath ɔ fi hɛ, ɔ dirȧ gbo.

⁴⁰kaŋ sel kɔ kəsel kəbana. Kɛrɛ ma ɔ po wurɔ ŋa bɛ-e, ɔ kera ɔkas ka ɔwath yi ɔkara kɔŋ, yi ŋaŋ aŋa paya kɔ, kȧmȧ aŋ wɔŋ ro ɔwath ɔ yi.

⁴¹kɔ wop kȧta ka ɔwath-e, kɔ pa ro ŋɔŋ, Wath bɛra, i kanɛ mu, Yokanɛ.

⁴²Ka ɔlɛmp wati ɔwath bɛra ɔ yokanɛ, ɔ kɔth, kotȧy-e ɔ ba thɔŋ təren tɔfɔt tərəŋ. Ɔwa aŋ kabanɛ kəkabanɛ kəbana.

⁴³kɔ yamari ŋa ɔbaksər kȧmȧ wuni o wuni ɔ te tȧrȧ ti. Kɔ kanɛ ŋa kȧmȧ aŋ sɔŋ kɔ da rədi.