Read Ȧŋlemrȧnɛ Ȧfu Mark 7 Bible Online

Mark 7 - Ȧŋlemrȧnɛ Ȧfu bible

Mark 7

¹Ka aŋFarisi yi aŋkarmɔkɔ alɔm aŋa wur ro Yerusalɛm aŋ thoŋklanɛ dɛr rɔkin ka Yisɔsȧŋ,

²aŋ po nənk aŋkarande ŋɔŋ alɔm aŋ di ɛdi yaŋ kəte yak mȧta maŋ, aŋ thɛkɛ ŋa.

³kotȧy-e aŋFarisi yi aŋYuda bɛ aŋ wop ɛmaŋ ya aŋbȧki, aŋ di hɛ thambe aŋ yak mȧta maŋ finɔ.

⁴Ɔwa, maŋ wur ka ɔdɛr ɔthila-e, aŋ di hɛ thambe aŋ bukɔ, ɔwa mȧtȧy məgbathi məlɔm mə yi ama aŋ selɔ wop, mɔ kayakəs ɛpɔthi, ɛfȧt yi ɛyɛt ɛkɛm.

⁵Ka aŋFarisi yi aŋkarmɔkɔ aŋ yif kɔ, To som aŋkarande a mu aŋ te tȧŋ makur ma aŋbȧki-e, kɛrɛ aŋ di ɛdi yaŋ yi məta mənɔkɔ-e?

⁶kɔ pa ro ŋaŋ, Ka tȧteŋ Isaya ɔ nȧbi ta na amunafaki ma ɔ gbal kəpa, Aŋfəm aŋe aŋ yikis mi yi tasəŋ taŋ, Kɛrɛ ɛmerȧ yaŋ ɛ bɔlȧnɛ mi;

⁷Kɛrɛ aŋ bȧtho mi kətiŋ, Maŋ thəksa mathəksa ma aŋyamari ŋa afəm.

⁸Nə tey aŋyamari ŋa Kuru, nə wop makur ma afəm ɔbaki mədɛr.

⁹kɔ pa ro ŋaŋ, Nə kasi aŋyamari ŋa Kuru kȧmȧ nə wop makur ma nu.

¹⁰kotȧy-e Mosisȧŋ ɔ po pa, Yikis ɔkas ka mu yi ɔkara ka mu, dɛ yi, Kɔnɔ ɔwe mə fɔf ɔkas yi ɔkara ɔləs-e, ta ɔ fi rafi,

¹¹kɛrɛ naŋ nə pa, Bepi wuni ɔ pa ka ɔkas kɔŋ thalɔm ka ɔkara kɔŋ, Arəka ra mi ara mə naŋfas mu-e rə yi Kɔrban, (rə yi tə kəpa-e, Sɔnd ka Kuru)

¹²ɔ ba hɛ sɔ tə kəyɔ koko ta ɔkas kɔŋ thalɔm ta ɔkara kɔŋ.

¹³Nə dim ȧrim ra Kuru salata mȧkur ma nu ama nə po bot. Ɔwa tȧy təgbȧthi təwunɔŋ tə mə nə yɔ sɔ.

¹⁴kɔ kȧl tela aŋfəm ro ŋɔŋ sɔ, ɔ pa ro ŋaŋ, Təla mi nu na bɛ, ɔwa ta pə sɔk nu.

¹⁵Rəka o rəka rə yi hɛ ara yi rokaŋ ka wuni ara pə yi-e, bepi rə wɔŋ kɔ rokor-e, rə nɔkɔs kɔ; kɛrɛ ɛyɛt ɛyɛ mə wur ka ɔwuni-e, yə yi ɛyɛ mə nɔkɔs kɔ.

¹⁶Bepi wuni o wuni ɔ ba ɛləns-e, ta ɔ təl.

¹⁷Ma ɔ wur ka aŋfəm-e, ɔ kɔnɛ ka ȧŋseth, aŋkarande ŋɔŋ aŋ yif kɔ ta aŋlomɔ.

¹⁸kɔ pa ro ŋaŋ, Naŋ sɔ nə ba hɛ kəsɔthnɛ-i? Nə tɛ hɛ kəpa rəka o rəka ara yi rokaŋ ka wuni rə gbəli hɛ nɔkɔs kɔ-i bepi rə wɔŋ kɔ rokor-i?

¹⁹Pəkasifɛ rə wɔŋ hɛ ka ȧŋmerȧ ŋɔŋ, kɛrɛ ka akor kɔŋ, ɔwa rə ləpsɔ wur kɔ. Ɔ pa ȧte tə kəfethər ɛyɛt ɛdi bɛ.

²⁰kɔ kȧl pa, Arəka ara mə wur ka wuni-e, rə mə nɔkɔs kɔ.

²¹kotȧy-e, kəwur rokor-e, kəwur ka ɛmerȧ ya aŋfəm-e, ɛnanɛ ɛləs-o, kəba ɛpure-o, kȧrəp-o,

²²tȧkey-o, afela ŋa yɛt ya wuni lɔm-o, məkar mələs-o, kȧtut-o, ɛyanfa-o, ɛfɔr ɛmara-o, tȧfɔf tələs-o, kȧbonɛ tȧy-o, yi ȧŋpənk-o;

²³mȧtȧy mələs ame bɛ mə wur ka ȧŋmerȧ, ɔwa mȧ mə nɔkɔs wuni.

²⁴Kədarəŋ kati ɔ yokanɛ kɔ wur ri, ɔ kɔnɛ ka manəŋkəra ma ro Tair yi ro Sidon. Kɔ wɔŋ rə aseth, ɔ yema hɛ wuni o wuni ɔ tȧrȧ ti, kɛrɛ ɔ gbəli hɛ maŋknɛ.

²⁵kotȧy-e ka ɔlɛmp wati wuni bom ulɔm-e, ɔ ba wath bɛra ɔwe ba ukərəfi uləs, ma ɔ təl ta atɔŋ-e, ɔ der, ɔ fumpɔ ka ȧtȧtək tɔŋ.

²⁶Ɔwuni bom ɔwe ɔ yi uKrik, ȧŋbona ŋɔŋ ŋə yi uSairofinisiyan; kɔ nɛmthɛnɛ Yisɔsȧŋ kȧmȧ ɔ wurɔ ɔkərəfi ka ɔwan kɔŋ ubɛra.

²⁷Kɛrɛ Yisɔsȧŋ ɔ pa ro ŋɔŋ, Ta aŋfɛth aŋ mɔtha ras namra, kotȧy-e pə lomp hɛ tə kəgbasi ɛdi ya aŋfɛth tə kəfaka ɛtən.

²⁸Ɔya ɔ wosa ɔ pa ro ŋɔŋ, Tȧteŋ Pa, kɛrɛ hali ras ɛtən ka aŋthebəl roratha aŋ di atɔmp ta aŋfɛth.

²⁹kɔ pa ka ɔya, Ta ȧte mə pa-e, kɔnɛ, ɔkərəfi ɔ po wur ka ɔwan ka mu ubɛra.

³⁰Ɔwa ma ɔ kȧl ka ȧŋseth ŋɔŋ, ɔ bəp ɔwath ɔ fənthȧ ro fənt, ɔkərəfi ɔ po wur kɔ.

³¹Ma Yisɔsȧŋ ɔ wur ka ȧŋgbȧp ŋa ro Tair-e, ɔ thas ro Sidon tə kəkɔ ka kȧbȧŋ ka ro Kalili, ɔ gbəkinɛ manəŋkəra ma ro Dikapɔlis.

³²Ka a kȧrȧ kɔ ri wuni taŋa, ɔ kȧl ba təbɛthɛ; ka aŋ nɛmthɛnɛ kɔ tə kədeŋ kɔ kȧta kɔŋ.

³³kɔ kera kɔ rayɛr kəwur ka ȧruniya datɔŋ, kɔ wɔŋȧ mȧsəl mɔŋ ka ɛləns yɔŋ, ɔ thuf, kɔ gboŋ ramer rɔŋ.

³⁴Ɔ kəli ka ȧkȧriyana, ɔ laŋ, ɔ pa ro ŋɔŋ, Ɛfatha, pə yi mɔ, Kanthɛ.

³⁵Ka ɛləns yɔŋ ɛ kanthɛ, ɔwa ramer rɔŋ rə səlɛ, kɔ fɔf gbəraŋ.

³⁶kɔ ma ŋa kȧmȧ aŋ te kanɛ ti wuni o wuni, kɛrɛ ma ɔ bȧr maŋ ŋa, ya aŋ bȧr taməs ti.

³⁷Aŋ kabanɛ ɔthasar aŋ pa, Ɔ pons mȧtȧy bɛ ɔfinɔ, ɔ yɔ hali aŋtȧŋȧ aŋ təl, ɔwa tabobo aŋ fɔf.