Read Ȧŋlemrȧnɛ Ȧfu Mark 8 Bible Online

Mark 8 - Ȧŋlemrȧnɛ Ȧfu bible

Mark 8

¹Ka mȧrey mati ma runiya rəbana rə yi sɔ-e, ɔwa aŋ te ba da rədi-e, Yisɔsȧŋ ɔ tela aŋkarande ŋɔŋ, ɔ pa ro ŋaŋ,

²I ba ȧney ta ȧruniya ȧtesoma-e aŋ yi thɔŋ yi minɛ ta mərey məsas, ɔwa aŋ ba hɛ da rədi.

³Ɔwa bepi i ter ŋa aŋ kɔnɛ ka mayira maŋ yi dor-e, aŋ tə pika ro roŋ, ɔwa aŋlɔm aŋ wur ɔbɔli.

⁴Ka aŋkarande ŋɔŋ aŋ pa, Reke sə gbəli sɔthɔ təbo təbeki tə kənȧmsir aŋfəm ka ɔdɛr ɔyeŋ ɔwe-e?

⁵kɔ yif ŋa, Mɔlɔ təbo nə ba-a? kaŋ pa, Tȧmthədɛrəŋ.

⁶kɔ yamari aŋfəm kȧmȧ aŋ yirȧ ro thɔf, kɔ gbasi tȧbo tȧmthədɛrəŋ, ɔwa ma ɔ po muti məmə-e, ɔ siməth ti, kɔ sɔŋ ti ka aŋkarande ŋɔŋ kȧmȧ aŋ botəs ti rodi ka ŋaŋ; kaŋ botəs ti rodi ka aŋfəm.

⁷Ɔwa aŋ ba ɛlop ɛthan. Ma ɔ po ruba ŋa-e, ɔ yamari kȧmȧ aŋ botəs aŋe sɔ rodi ka aŋfəm.

⁸kaŋ di, aŋ namra; kaŋ gbas ɛbɛm ɛyɛ tiyȧ təbəlai tȧmthədɛrəŋ.

⁹Ɔwa aŋfəm aŋa po di-e aŋ yi ɛwul yanlɛ. Kɔ yɔ ŋa aŋ kɔnɛ.

¹⁰Ka ɔlɛmp wati ɔ bȧkȧ ka ȧŋbil yi aŋkarande ŋɔŋ kaŋ der ka ɛgbap ya ro Dalmanutha.

¹¹Ka aŋFarisi aŋ der, aŋ təp kəyifȧnɛ kɔ, aŋ thɛns amisali kəwur ro ŋɔŋ kəwur ro riyana, aŋ gbɔns kɔ.

¹²Ɔ laŋ ka ȧŋmerȧ ŋɔŋ ɔ pa, To som rȧkomra are rə thɛns amisali-e? Tɛntɛnɛ i kanɛ nu, a ba hɛ kəsɔŋ amisali ka rȧkomra are.

¹³kɔ tey ŋa ɔwa ɔ kȧl bȧkȧ ro bil ɔ fəsi romɔri.

¹⁴kaŋ pənɛ tə kəkeranɛ təbo; ɔwa aŋ ba hɛ pəthas kəbo kin gbɛt ro bil.

¹⁵kɔ maŋ ŋa kȧmȧ aŋ botnɛ, ɔ pa, Pɛndaf nu ɛgbith ya aŋFarisi yi ɛgbith ya Hɛrɔd.

¹⁶kaŋ fɔflanɛ, aŋ pa, Ma sə te ba kəbo, tesom.

¹⁷Ma Yisɔsȧŋ ɔ sɔthnɛ ti-e, ɔ pa ro ŋaŋ, kɔyɛŋ mə nə fɔflanɛ-e? Ȧtesoma-e nə ba hɛ kəbo-i? Naŋ nə tha nənk hɛ-i, thalɔm nə tha sɔthnɛ hɛ-i? Ɛmerȧ ɛ nu ɛ gbolŋanɛ-i?

¹⁸Ma nə ba ɛfɔr nə gbəli hɛ nəŋk-i? Ma nə ba ɛləns nə gbəli hɛ təl-i? Nə kala hɛ amera-i?

¹⁹Ma i siməth tabo tamath kətɔŋ ka ɛwul tamath-e, amɔlɔ təbəlai təlȧ ta ɛbɛm nə gbasi-a? Aŋ pa ro ŋɔŋ, Tɔfɔt tərəŋ.

²⁰Ma i siməth tabo tȧmthədɛrəŋ kətɔŋ ka ɛwul yanlɛ-e, amɔlɔ təbəlai təlȧ ta ɛbɛm nə gbasi-a? Aŋ pa ro ŋɔŋ, Tȧmthədɛrəŋ.

²¹kɔ pa ro ŋaŋ, Pə tha sɔk hɛ nu-i?

²²kaŋ bek ro Bɛthsayda. Kaŋ kȧrȧ ro ŋɔŋ ulaŋgba ufith, ɔwa aŋ nɛmthɛnɛ kɔ kȧmȧ ɔ gboŋ kɔ.

²³kɔ wop kȧta ka ɔwuni fith, ɔ wurɔ kɔ ro pet. Ma ɔ po thufər ɛfɔr yɔŋ-e, ɔ gboŋ kɔ mȧta mɔŋ, ɔ yif kɔ, Mə nənk rəka-i?

²⁴kɔ lakthɛ, ɔ pa, I nənk afəm kɛrɛ aŋ yi mɔ yint, aŋ kɔth kɔth.

²⁵kɔ kȧl bot mȧta mɔŋ ka ɛfɔr yɔŋ, ka ɔlaŋgba ɔ kəli təŋ, ɔwa ɔ yeŋk, ɔ nənk ɛyɛt bɛ gbəraŋ.

²⁶kɔ ter kɔ ɔ kɔnɛ ro seth kɔŋ, ɔ pa, Te ras wɔŋ ro pet.

²⁷Ka Yisɔsȧŋ yi aŋkarande ŋɔŋ aŋ kɔ ka kȧpet ta ro Sisiriya Filipay; ɔwa maŋ yi ro roŋ-e, ɔ yif aŋkarande ŋɔŋ, ɔ pa, Kanɛ aŋfəm aŋ pa minɛŋ i yi-e?

²⁸kaŋ wosa aŋ pa, Yɔnȧŋ, ɔBaftays, alɔm aŋ pa, Ilayaŋ, kɛrɛ aŋlɔm aŋ pa ukin ka aŋnabi.

²⁹kɔ yif ŋa, Kɛrɛ naŋ-e, kanɛ nə pa minɛŋ i yi-e? Ka Pitaŋ ɔ wosa ɔ pa, Munɔ mə yi ɔKrayst.

³⁰kɔ maŋ ŋa kȧmȧ aŋ te kanɛ wuni o wuni ta atɔŋ.

³¹kɔ təp kəthəksa ŋa kəpa ɔ Wan ka wuni ɔ ba kənakasi mȧtȧy məgbathi; aŋbȧki aŋ tə pɛnsa kɔ, yi aŋkərbomp ka aŋfode, yi aŋkarmɔkɔ sɔ, ɔwa aŋ tə dif kɔ, kədarəŋ ka mərey məsas ɔ tə kȧl yokanɛ.

³²Ɔ fɔf ȧŋpa aŋe gbafəth. Ka Pitaŋ ɔ gbipnɛ kɔ, ɔ təp kəŋȧl kɔ.

³³Kɛrɛ ma ɔ fəlɛ ka aŋkarande ŋɔŋ-e, ɔ ŋal Pitaŋ ɔ pa, Kɔnɛ rodarəŋ kȧmi Sethani; kotȧy-e aŋnanɛ a mu aŋ yi hɛ aŋnanɛ ŋa Kuru, aŋ yi gbo aŋnanɛ ŋa wuni kəpet.

³⁴Ɔwa ma ɔ po tela ȧruniya yi aŋkarande ŋɔŋ-e, ɔ pa ro ŋaŋ, Bepi wuni o wuni ɔ yema tȧŋ mi-e, ta ɔ kasisnɛ, kȧmȧ ɔ gbasi akənt kɔŋ kəpəŋkinɛ, ɔ tȧŋ mi.

³⁵kotȧy-e wuni o wuni ɔwe yema kisis aŋesəm ŋɔŋ, ɔ tə dim ŋi, kɛrɛ wuni o wuni ɔwe mə dim aŋesəm ŋɔŋ salata mi yi salata ȧkɛra kəfinɔ ka Kuru-e, ɔ tə kisis ŋi.

³⁶To mə pə munafa wuni bepi ɔ sɔthɔ ȧdȧru bɛ-e, kɛrɛ ɔ dim aŋesəm ŋɔŋ-a?

³⁷kotȧy-e ko wuni mɔ gbəli sɔŋ tə kəsiŋkar ta ȧŋesəm ŋɔŋ-a?

³⁸Ȧtesoma-e wuni o wuni ɔwe mə lap mi yi ȧsim ta mi-e, ka rȧkomra rərəpi are yi ɛhakɛ ɛye-e; ɔWan ka wuni ɔ tə lap kɔ sɔ, ka ȧŋlɔkɔ ma ɔ der ka aŋyiki ŋa ɔKas kɔŋ yi aŋmȧleka asəm.