Read Ȧŋlemrȧnɛ Ȧfu Luk 1 Bible Online

Luk 1 - Ȧŋlemrȧnɛ Ȧfu bible

Luk 1

¹Ma afəm agbȧthi aŋ po pai tə kəgbal mapa ama saŋ sə lanɛ tɛntɛnɛ,

²hali mɔ mə aŋ po laŋklia ma ro rɔsu, ŋaŋ gbeŋ aŋa nəŋka ti rəfɔr kȧbi ka katəp aŋa yi aŋsom ŋa ȧrim.

³Minɛ sɔ i nənk ti ɔfinɔ, ma i po sɔthɔ kətara kəfinɔ ka mȧtȧy bɛ kȧbi ka katəp-e, kȧmȧ i gbalər mu Pa Thiɔfilɔs

⁴kȧmȧ mə tȧrȧ kəpa ȧte a po thəksa mu tə yi tȧteŋ.

⁵Ka aŋyamana ŋa Hɛrɔd ɔbȧy ka ro Yudia, ufode ulɔm ɔ sa yi ri, ȧŋes ŋɔŋ ŋə yi Sakarayas, ɔ yi ka ȧŋbɔnshɔŋ ŋa Abaya, ɔrani kɔŋ ɔ yi ka aŋwuth abɛra ŋa Erɔn, ɔwa ȧŋes ŋɔŋ ŋə yi Elisabɛth.

⁶Ŋa ŋarəŋ aŋ yi alompi rodi ka Kuru, aŋ wop ɛthɔ yi magbək ma ɔMarki kəte ba məthɛkɛ.

⁷Kɛrɛ aŋ ba hɛ wan ȧtesoma-e Elisabɛth-əŋ ɔ yi ukɔŋfere, ɔwa ŋa ŋarəŋȧŋ aŋ po bȧk kəbak kəbana.

⁸Ret rin-e mɔ Sakarayas mɔ yɔ mapanth ma rafode rodi ka Kuru ka ȧŋlɔkɔ ŋɔŋ-e,

⁹mɔ mapanth ma rafode mə yi-e, kȧber kɔŋ kə yi tə kəwɔŋ ka ȧŋseth ŋa ɔMarki tə kəthɔi aŋgboŋgbo.

¹⁰Ɔwa ka ȧŋlɔkɔ ŋa kathɔi aŋgboŋgbo-e, aŋfəm bɛ aŋ ramnɛ rokaŋ.

¹¹Ka wurɔ ka Kuru ɔ tɔrinɛ ka Sakarayas ka kȧdiyɔ ka ȧŋbɛsɛ ŋa aŋgboŋgbo.

¹²Ma ɔ nənk kɔ-e, pɔ sɔkanɛ kɔ, ka rənes rə wop kɔ.

¹³Ka ɔmaleka ɔ pa ro ŋɔŋ, Te nesa Sakarayas, kotȧy-e a po təlȧ karamnɛ ka mu. Ɔrani ka mu Elisabɛth-əŋ ɔ tə koma mu wan uruni, ɔwa mə tə bont ȧŋes ŋɔŋ Yɔn.

¹⁴Munɔ mə tə sel məbɔnɛ; ɔwa pə tə bɔnɛ afəm agbȧthi ka kakom kɔŋ.

¹⁵Ȧtesoma-e ɔ tə yi ubana roder kəri ka Kurɔŋ, ɔwa ɔ yi hɛ tə kəmun məber məfɛth thalɔm məber məbaki. Ɔwa ɔYina məsəm ɔ tə la kɔ kətəp rokor ka ɔkara kɔŋ.

¹⁶Ɔ tə lȧfthi aŋwuth ŋa Isrɛl agbȧthi ka ɔMarki ɔKuru ka ŋaŋ.

¹⁷Ɔ ba kətəma kɔ kədi ka ɔYina yi aŋfɔsɔ ŋa Ilaya, tə kəlafthi ɛmerȧ ya aŋkas ka aŋwuth, yi tə kəlafthi ante təl ka kȧtemp ka aŋlompi, dɛ yi tə kətəməra ɔMarki afəm abɛnɛnɛ.

¹⁸Ka Sakarayas-əŋ ɔ yif ɔmaleka, To mə i tȧrȧ ti-e? Ma i yi uthem ubaki-e, ɔwa ɔrani kȧmi sɔ ɔ po bȧk kəbak kəbana.

¹⁹Ka ɔmaleka ɔ lasi ɔ pa ro ŋɔŋ, Minɛ yi Kebriɛl, ɔwe mə təmȧ rodi ka Kuru; ɔwa a som mi tə kəfɔfanɛ mu yi tə kətɔri mu mapa məfinɔ ame.

²⁰Ɔwa kəla, mə tə yi kəbobo, mə gbəli hɛ fɔf haŋ ka ȧŋrey aŋa mȧtȧy ame mə tə yɔnɛ, pəkasifɛ mə lanɛ hɛ ȧsim ta mi ȧte ba kəlasər ka ȧŋlɔkɔ ŋati.

²¹Ɔwa aŋfəm aŋ bɔ kar Sakarayas-əŋ, kaŋ kabanɛ ta ma ɔ won ka ȧŋseth ŋa Kuru.

²²Ɔwa ma ɔ wur-e, ɔ gbəli hɛ sɔ fɔfȧnɛ ŋa. Ka aŋ sɔthnɛ kəpa ɔ po nənk mənəŋk ka ȧŋseth ŋa Kuru, kotȧy-e ɔ ŋakər ŋa katkat, ɔwa ɔ tiyȧ kəbobo.

²³Ka pə re yi-e, ma ɔ po lasər mȧrey ma rafode rɔŋ-e, ɔ kȧlanɛ ka ȧŋseth ŋɔŋ.

²⁴Kədarəŋ ka mȧrey ame-e, Elisabɛth ɔrani kɔŋ ɔ gbasi kor, kɔ maŋknɛ yof tamath, ɔ pa,

²⁵Ya Kuru ɔ kiranɛ mi ka mȧrey ama ɔ nanɛ mi tə kənɔi mȧlap ma mi ka aŋfəm kətɔŋ.

²⁶Ma yof tamthərukin ɛ thas-e, Kuru ɔ som Kebriɛl rə kəpet ka ro Kalili, a bont ki Nasarɛth,

²⁷ka uwath ubɛra ufanɛ, ȧŋes ŋɔŋ ŋə yi Merɛŋ, ɔwe ulaŋgba, a tela Yosɛf, kəwur ka rȧkomra ra Debid, ɔ fath.

²⁸Ɔmaleka ɔ wɔŋ ka ȧŋseth ŋa ɔwath ubɛra, kɔ pa, Kori mu-o, mun ba aboŋa abana, Kuru ɔ yi yi munɔŋ.

²⁹Ma ɔwath ubɛra ɔ nənk kɔ-e, tafɔf tɔŋ tə sɔmpa kɔ, kɔ tȧmtȧmnɛ to aŋkori aŋe aŋ yi-e.

³⁰Ka ɔmaleka ɔ pa ro ŋɔŋ, Meri, te nesa, ȧtesoma-e mə po fir aboŋa ka Kuru.

³¹Ɔwa mə tə gbasi kor, mə tə kom wath uruni, mə tə bont kɔ ŋes Yisɔs.

³²Ɔ tə yi ubana, a tə bont kɔ ɔWan ka ɔBɔli rəkɔm bɛ; ɔwa ɔMarki Kuru ɔ tə sɔŋ kɔ kawaŋ ka rȧbȧy ra ɔkas kɔŋ Debid.

³³Ɔ tə gbəka ȧŋseth ŋa Yekɔb thəbana. Ɔwa rȧbȧy rɔŋ rə ba hɛ kəpoŋ.

³⁴Merɛŋ ɔ pa ka ɔmaleka, To ȧte mə tə gbəli yɔnɛ-e ma i te tȧrȧ wan duni-e?

³⁵Ka ɔmaleka ɔ pa ro ŋɔŋ, ɔYina məsəm ɔ tə thorər mu, aŋfɔsɔ ŋa ɔBɔli rəkɔm aŋ tə gbəpər mu. Tiyȧŋ arəka rəsəm ara mə tə re kom-e, a tə bont kɔ, ɔWan ka Kuru.

³⁶Ɔwa kəla, Elisabɛth-əŋ, ɔwuni ka mu, kɔnɔ sɔ ɔ po gbasi kor ka wath uruni ka rabȧki rɔŋ; aŋe ŋə bekȧ ɛyof tȧmthərukin ta ɔwe a pa, ukɔnfere.

³⁷kotȧy-e, koko bɛ rə thamrɔnɛ hɛ ka Kuru.

³⁸Ɔwa Meri ɔ pa, Kəli mi ȧŋbɔy ubɛra ŋa Kuru Məsaba, ta pə yi mɔ pa-e. Ka ɔmaleka ɔ tey kɔ.

³⁹Ɔwa Merɛŋ ka ȧŋlɔkɔ ŋati ɔ yokanɛ, kɔ kɔnɛ ka ȧŋthɔf ŋa tȧteŋ yi kəgbukɛŋ, rə kəpet ka ro Yuda.

⁴⁰kɔ wɔŋ ka ȧŋset ŋa Sakarayas, kɔ kori Elisabɛth-əŋ.

⁴¹Ka pə re yi ma Elisabɛth ɔ təlȧ aŋkori ŋa Meri-e, kalɛnth ɔ pai rokor kɔŋ, ka ɔYina məsəm ɔ lasər Elisabɛth-əŋ,

⁴²ɔwa ɔ fɔf rə rim rəbana, ɔ pa, Mə ba aruba kətɔŋ ka bom-ŋaŋ, ɔwa aruba aŋ yi sə ka ȧŋkomi ŋa ȧŋpɔru a mu.

⁴³Reke ȧte tə wurər mi-e, soma ɔkara ka ɔMarki kȧmi mɔ der ro rɔmi-e?

⁴⁴kotȧy-e ma ȧrim ra aŋkori a mu rə wɔŋ ka ɛləns ɛ mi-e, kalɛnth ɔ pai rokor kȧmi yi məbɔnɛ.

⁴⁵Ɔwa ɔwe lanɛ ɔ ba aruba, ȧtesoma-e ȧtȧy ȧte ɔMarki ɔ kanɛ kɔ tə tə lasər.

⁴⁶Ɔwa Merɛŋ ɔ pa, Ɔfəm ɔka mi ɔ bondəs ɔMarki,

⁴⁷Ɔwa aŋyina a mi aŋ yasanɛ yi məbɔnɛ ta Kuru ɔKisis kȧmi,

⁴⁸kotȧy-e ɔ po nanɛ ȧŋbɔy ŋɔŋ ubɛra ka mayira mɔŋ məthoranɛ.

⁴⁹Ȧtesoma-e ɔwe ba aŋfɔsɔ bɛ-e ɔ po yɔna mi tȧy təbana; Aŋes ŋɔŋ aŋ yi ɔSəm.

⁵⁰Aŋney ŋɔŋ aŋ yi ka ŋaŋ aŋa nesa kɔ, Kəwur ka rəkomra kəkɔ ka rəkomra.

⁵¹Ɔ po tɔrinɛ afɔsɔ abana yi ȧŋlonk ŋɔŋ. Ɔ po sakthi aŋbonɛ tȧy ka ɛnanɛ ya ɛmerȧ yaŋ.

⁵²Ɔ po thora abȧy kəwur ka tawaŋ taŋ; Ɔ ŋata aŋfəm amɔnɛ.

⁵³Ɔ po namsir aŋfəm ador yi yɛt ɛfinɔ, Kɛrɛ aŋyola-e, ɔ bȧl ŋa afoth.

⁵⁴Ɔ po mar ȧŋbɔy ŋɔŋ Isrɛl salata aŋnei ŋɔŋ,

⁵⁵Kama ɔ lasər ɛlahiri yɔŋ ka aŋbemba a su, Ka Ebraham, yi ka rȧkomra rɔŋ thəbana.

⁵⁶Merɛŋ ɔ yianɛ yi Elisabɛth-ȧŋ mɔlɔ ma yof ɛsas, kɔ kȧlanɛ ka ȧŋseth ŋɔŋ.

⁵⁷Ɔwa ȧŋlɔkɔ aŋ lasər ta Elisabɛth tə kəkom, kɔ kom wath uruni.

⁵⁸Aŋfatanɛ ŋɔŋ yi aŋfəm ŋɔŋ aŋ təl kəpa Kurɔŋ ɔ po tɔri kɔ aŋnei ŋɔŋ abana, kaŋ yɔ məbɔnɛ yi kɔnɔŋ.

⁵⁹Ka ȧŋrey aŋa bekȧ tamthərɛsas-e, aŋ der tə kəbirons ɔwath, kaŋ yema bont kɔ Sakarayas, kətəmərnɛ ɔkas kɔŋ.

⁶⁰Kɛrɛ ɔkara kɔŋ ɔ pa, Yi thahɔ, thambe a bont kɔ Yɔn.

⁶¹kaŋ pa ro ŋɔŋ, Wuni ba ȧŋes aŋe ɔ yi hɛ ka rȧkomra ra mu bɛ.

⁶²kaŋ yif ɔkas kɔŋ yi kəŋakər, ȧŋes areke ɔ yema a bont kɔ.

⁶³kɔ yif ta awalka, kɔ gbal kəpa, Aŋes ŋɔŋ ŋə yi Yɔn. Ka ŋa bɛ aŋ kabanɛ.

⁶⁴Ɔlɛmp wati kȧsəŋ kɔŋ kə kanthɛ, ramer rɔŋ rə səlɛ, kɔ fɔf, ɔ thɔkəs Kurɔŋ.

⁶⁵Ka rənes rə wop aŋfəm bɛ aŋa yirȧ ɔfati; ka mapa ame bɛ mə gbanthɛnɛ ka ȧŋthɔf ŋa tȧteŋ ŋa ro Yudia bɛ.

⁶⁶Ka aŋfəm bɛ aŋa təl ti-e, aŋ bot ti ka ɛmerȧ yaŋ, aŋ yif. To ɔwath ɔwe mɔ re yi-e? Ɔwa kȧta ka Kuru kə yi yi kɔnɔŋȧŋ.

⁶⁷Ɔkas kɔŋ Sakarayaŋ ɔ la yi ɔYina məsəm, ɔ pa,

⁶⁸Ta ɔMarki ɔKuru ka Isrɛl ɔ ba aruba, Pəkasifɛ ɔ po nanɛ afəm ŋɔŋ, ɔ bani ŋa.

⁶⁹Ɔ po sɔŋ uKisis ubana ta ȧtȧ su Ka ȧŋseth ŋa Debid ȧŋbɔy ŋɔŋ.

⁷⁰Mɔ mɔ fɔf ka tasəŋ ta aŋnabi ŋɔŋ asəm, kȧbi ka thəpaŋ.

⁷¹Kama ɔ kisis su ka aŋtheranɛ a su, Yi ka kȧta ka ŋaŋ aŋa gbɛŋa su bɛ.

⁷²Kama ɔ tɔri ȧney ka aŋkas a su, Kama ɔ nanɛ aŋlemranɛ ŋɔŋ asəm.

⁷³Aŋgbiŋ aŋa ɔ gbiŋ ka Ebraham ɔkas kȧsu,

⁷⁴kəpa, Bepi ɔ po wurɔ su ka mȧta ma aŋtheranɛ a su-e, Sə tə bȧtho kɔ rə kəte ba rənes,

⁷⁵Rə məsəm yi məlompi roder kɔŋ kədi ka mȧrey ma su bɛ.

⁷⁶Ɔwa munɔŋ, wath, a tə tela mu unabi ka ɔBɔli rəkɔm, Ȧtesoma-e mə tə təmȧ ɔMarki kədi tə kəbɛmpa asoŋ tɔŋ;

⁷⁷Tə kəsɔŋ aŋfəm ŋɔŋ kȧtȧrȧ ka kəkisi, Ka katerɔ ka ɛhakɛ yaŋ;

⁷⁸Salata ȧŋney abana ŋa ɔKuru kȧsu, Soma rasɔk ra rokɔm rə der ro rɔsu.

⁷⁹Tə kəsɔŋ kəwalɛ ka ŋaŋ aŋa yirȧ ka ȧŋsum yi ka aŋfɔyr ŋa rəfi, Tə kəkora ȧtȧtək ta su ka aroŋ ra məthɔfəl.

⁸⁰Ɔwa ɔwath ɔ tɛŋa, ɔ bȧk ka aŋyina, kɔ yi ro wula haŋ ka ȧŋrey aŋa ɔ tɔrinɛ ka Isrɛl.