Read Ȧŋlemrȧnɛ Ȧfu Luk 12 Bible Online

Luk 12 - Ȧŋlemrȧnɛ Ȧfu bible

Luk 12

¹Ka ȧŋlɔkɔ ŋati, ma afəm ɛwul ɛgbathȧ aŋ thoŋklanɛ rɔkin haŋ aŋ nasanɛ, Yisɔsȧŋ ɔ mɔtha təp tə kəfɔfanɛ aŋkarande ŋɔŋ, ɔ pa, Botnɛ nu ta ɛgbith ya aŋFarisi, ɛyɛ yi rəmunafaki

²kotȧy-e tȧy təgbəpər tə yi hɛ ȧte mə a te ŋaibi, thalɔm tȧy təmaŋknɛ ȧte mə a te tȧrȧ.

³Tiyȧŋ tȧy o tȧy ȧte nə po pa ka ȧŋsum a tə təl ti ka ɔwaŋ. Ɔwa ȧte mə nə fɔfla ro ləns ka tȧkonko-e, a tə taməs ti ka ɛseth rokɔm.

⁴Ɔwa i kanɛ nu aŋyathki a mi, Te nu nesa ŋa aŋa gbəli dif aŋdɛr, kɛrɛ kədarəŋ kati aŋ gbəli hɛ yɔ koko.

⁵Kɛrɛ i ti maŋ nu ɔwe mə nə nesa. Nesa kɔ nu ɔwe, ma a po dif-e, kədarəŋ kati ɔ ba aŋfɔsɔ tə kəfitha ro yahanama. Aŋko, i kanɛ nu, nesa kɔ nu.

⁶A thila hɛ ɛgbaŋa tamath ta afokɔpɔ-i? Ɔwa Kurɔŋ ɔ pənɛ hɛ hali ukin ka ŋaŋ.

⁷Kɛrɛ hali aŋfon ŋa tabomp ta nu a po lɔm. Tiyȧŋ te nu nesa. Naŋ nə yi abȧki mɔlɔ pəthasi ɛgbaŋa alai.

⁸I kanɛ nu sɔ, wuni o wuni ɔwe gbithanɛ mi rodi ka aŋfəm, kɔnɔ sɔ, ɔWan ka wuni ɔ tə gbithanɛ kɔ rodi ka aŋmȧleka ŋa Kuru,

⁹kɛrɛ ɔwe mə pɛnsa mi rodi ka aŋfəm, a tə pɛnsa kɔ rodi ka aŋmȧleka ŋa Kuru.

¹⁰Bepi wuni o wuni ɔ fɔf ɔləs ta ɔWan ka wuni-e, a tə tera kɔ ti, kɛrɛ bepi wuni ɔ ŋamnɛ ɔYina məsəm-e a tera hɛ kɔ ti thəbana.

¹¹Ɔwa maŋ kȧrȧ nu rodi ka aŋfəm abana ka ɛseth ɛgbanɛ yi rodi ka ŋatəbomp-e, yi rodi ka aŋbȧy-e, te ba asoli ta ȧte nə ba kəgbaki, yi ta ȧte nə ba kəpa;

¹²kotȧy-e ɔYina məsəm ɔ tə tɔri nu ka ȧŋlɔkɔ ŋati gbeŋ ȧte nə yi tə kəpa.

¹³Ka ukin ka ȧruniya ɔ pa ro ŋɔŋ, Karmɔkɔ, kanɛ ɔwɔnt mi kȧmȧ ɔ yer akɛŋ yi minɛŋ.

¹⁴kɔ pa ro ŋɔŋ, Wan, kanɛ bot mi tə kəyi ugbəka yi uyerəs rokɔm ka nu-e?

¹⁵kɔ pa ro ŋaŋ, Botnɛ nu, ɔwa bumnɛ nu ta ɛfɔr ɛyamari, ȧtesoma-e aŋesəm ŋa wuni aŋ yi hɛ ka mȧyɛt məgbathi ama ɔ ba.

¹⁶kɔ fɔf alomɔ ro ŋaŋ, ɔ pa, Akɔr ka uyola ulɔm kə wur ŋani ɔgbȧthi.

¹⁷kɔ pa ka ȧŋmerȧ ŋɔŋ, To mə i yɔ-e? kotȧy-e i ba hɛ dɛr ɔbeki tə kəbot mȧkomi ma mi.

¹⁸kɔ pa, Ȧte tə mə i yɔ; i ti yɛksi tȧfunk ta mi, i ti kȧl təmər təbana təthasi ȧte, ro mə i bot ȧpəla yi ɛyɛt ɛ mi bɛ.

¹⁹Ɔwa i ti pa ka ȧŋmerȧ mi, Ȧŋmerȧ mi, fothanɛ thɔŋ, di, mun, yɔ məbɔnɛ, kotȧy-e mə ba ɛyɛt ɛgbathi ta təren ǝgbathi.

²⁰Kɛrɛ Kurɔŋ ɔ pa ro ŋɔŋ, Munɔ wuni pəŋk, thani tȧtȧk a tə fak aŋsar a mu. Ɔwa ɛyɛt ɛyɛ mə po bɛnɛnɛ, kanɛ mə ba yi-e?

²¹Ya ɔwuni ɔ yi ɔwe mə bɛnɛnɛ ɛyɛt ɛkɛŋ ta kɔn kɔnɔnɛ, ɔwa ɔ yi hɛ uyola ka ȧŋgbȧp ŋa Kuru.

²²kɔ pa ka aŋkarande ŋɔŋ, I kanɛ nu, te nu ba asoli ta ɛŋesəm ɛ nu, ta ɛyɛ mə nə di, yi ta madɛr ma nu ta ɛyɛ mə nə wɔŋ.

²³Pəkasifɛ aŋesəm aŋ thasi yɛt ɛdi, ɔwa aŋdɛr aŋ thasi yɛt ɛlopra.

²⁴Tȧmtȧmnɛ ɛwendema, aŋ sak hɛ, aŋ rɔk hɛ, aŋ ba hɛ dɛr ɔbɛnɛnɛ, aŋ ba hɛ təfuŋk, kɛrɛ Kuru ɔ wɔnthər ŋa. Thamsinɛ naŋ nə yi abȧki mɔlɔ pəthasi ɛbȧmp!

²⁵Wuni reke ka nu ɔwe mə gbəli bȧr hali mɔlɔ ma aloŋk ŋin ka kasaŋa kɔŋ-e?

²⁶Ɔwa bepi mə gbəli hɛ yɔ ȧte yi təlɔl-e, kɔyɛŋ mə nə soli ta mȧtȧy məlɔm-e?

²⁷Tȧmtȧmnɛ tȧyaba ta ro lal mɔ mə ɛ lɔkɔ, ɛ yɔ hɛ məpanth, ɛ sərəm hɛ, kɛrɛ i kanɛ nu, hali Sɔlɔmɔn ka aŋyiki ŋɔŋ bɛ ɔ lopra hɛ mɔ ŋin ŋa ɛye.

²⁸Bepi Kuru ɔ lonsər naŋ akereŋ ȧke yi thonɔŋ, kɛrɛ ninaŋ a thɔi ki-e, pɔ tha gbethi ɔ tə lonsər nu, nia ŋa kəlanɛ kəthan!

²⁹Te nu thɛns ara mə nə di, yi ara mə nə mun, ɔwa te sikɛ ka ɛmerȧ ɛ nu,

³⁰kotȧy-e tȧbona ta ȧdȧru tə thɛns ɛyɛt ɛye bɛ; kɛrɛ ɔKas ka nu ɔ tȧrȧ kəpa nə yema ɛyɛt ɛye.

³¹Kɛrɛ thɛns nu rȧbȧy ra Kuru, ɔwa a tə bȧrȧ nu ɛyɛt ɛye bɛ.

³²Kuthi kəlɔl, te nu nesa; pəkasifɛ pə thesis ɔKas ka nu tə kəsɔŋ nu rȧbȧy.

³³Thila ɛyɛ nə ba, ɔwa sɔŋ ɛboya ka ȧŋmɔnɛ, bɛmpanɛ nu ɛbuthu ɛyɛ mə te kura, kɛŋ ka ro riyana ȧke mə te poŋ ro ukei ɔ te fat ɔwa amɔrka aŋ te ləsər.

³⁴Ȧtesoma-e ro akɛŋ ka nu kə yi-e, rə ɛmerȧ ɛ nu ɛ yi sɔ.

³⁵Ta nə yi na asenɛ, ɔwa ta ɛmothȧ ɛ nu ɛ mara;

³⁶ɔwa yi nu mɔ afəm aŋa mə kar ɔMarki ka ŋaŋ, ma ɔ tə kȧlanɛ kəwur ka amet ma kənantə, kȧmȧ ma ɔ bek, ɔ gbȧtgbȧt-e, a kanthɛ kɔ lɛmp.

³⁷Ɛbɔy ŋati aŋ ba ȧruba aŋa ɔMarki ɔ bəp ŋa aŋ yi akəli ma ɔ bek. Tɛntɛnɛ i kanɛ nu, ɔ tə bɛnɛnɛ, ɔ tə yɔ ŋa aŋ yirȧ tə kədi, ɔwa kɔn kɔnɔnɛ ɔ tə yɔna ŋa.

³⁸Bepi ɔ bek ka kəren datɔŋ-e, thalɔm ma rasɔk rə bek-e, ɔ bəp ŋa yaŋ, ɛbɔy ŋati aŋ ba aruba.

³⁹Tara nu kəpa bepi kɔn ɔwe ba ȧŋseth ɔ tȧrȧ ȧŋlɔkɔ aŋa ɔkei mɔ der-e, ɔ tə sɔkɔ naŋ, ɔwa ɔ selɔ hɛ naŋ kəpa a bɛs ȧŋseth ŋɔŋ.

⁴⁰Ɔwa yi nu abɛnɛnɛ kotȧy-e ka ȧŋlɔkɔ aŋa nə te lanɛ ɔWan ka wuni ɔ tə der.

⁴¹Pita ɔ pa ro ŋɔŋ, Pa, saŋ mə fɔfȧnɛ aŋlomɔ aŋe-i, thalɔm ka afəm bɛ-i?

⁴²ƆMariki ɔ pa, Kanɛ yi thɔŋ ȧŋbɔy ubɔthi lanɛ ɔwa utempi-e, ɔwe ɔMarki kɔŋ ɔ tə bot rokɔm ka kabɔr kɔŋ-e, tə kəsɔŋ ŋa ɛyɛt yaŋ ɛdi ka ȧŋlɔkɔ alompi-e?

⁴³Ȧŋbɔy ŋati uruba wɔŋ ɔwe ɔMarki kɔŋ ɔ bəp kɔ ɔ yɔ yaŋ.

⁴⁴I kanɛ nu ka tȧteŋ, ɔ tə bot kɔ rokɔm ka ɛyɛt bɛ ɛyɛ ɔ ba.

⁴⁵Kɛrɛ bepi ȧŋbɔy ŋati ɔ pa ka ȧŋmerȧ nɔŋ, Pa-əŋ ɔ gbəli hɛ yeŋk der; ɔwa ɔ təp kəsap ɛbɔy aruni yi ɛbɔy abɛra, ɔwa ɔ di, ɔ mun, ɔ tis,

⁴⁶ɔMarki ka ȧŋbɔy ŋati ɔ tə der ka ȧŋrey aŋa ɔ te nanɛ kɔ, ka ȧŋlɔkɔ aŋa ɔ te tȧrȧ, ɔwa ɔ tə sap kɔ ɔləs, ɔwa ɔ tə botȧ kɔ ani ka ante lanɛ.

⁴⁷Ȧŋbɔy ŋati ɔwe tȧrȧ mȧselɔ ma ɔMarki kɔŋ, kɛrɛ ɔ bɛnɛnɛ hɛ, ɔ yɔ hɛ mȧselɔ mɔŋ, a tə sap kɔ ɔgbȧthi;

⁴⁸kɛrɛ ɔwe te tȧrȧ, kɛrɛ ɔ yɔ mȧtȧy məbeki tə kəsɔthɔ kəsap, a tə sap kɔ ɔthan. Kotȧy-e rə wuni o wuni ɔwe a sɔŋ ɔgbȧthi a tə yemar kɔ ɔgbȧthi; ɔwa ka ɔwe a maŋkər ɔgbȧthi a tə yif ɔthasər.

⁴⁹I der tə kəfak nȧnt ka ȧdȧru; ɔwa i fela naŋ kȧmȧ nə po mara thɔŋ.

⁵⁰Kɛrɛ i ba ȧbaftisəm aŋa a ba tə kəbaftaysȧ mi; ɔwa ȧŋsɔmpanɛŋ a mi a bana haŋ aŋ poŋ!

⁵¹Nə nanɛ kəpa i der tə kəsɔŋ məthɔfəl ka raru-i? I kanɛ nu, yi thahɔ, i der tə kəsɔŋ məputhanɛ.

⁵²Kətəp ka ȧŋlɔkɔ aŋe afəm tamath aŋ tə yi ka ȧŋseth ŋin, aŋsas aŋ tə puthanɛ yi aŋarəŋ, ɔwa aŋarəŋ aŋ tə puthanɛ yi aŋsas.

⁵³Aŋ tə gbayanɛ, ɔkas ɔ tə puthanɛ yi ɔwan kɔŋ uruni, ɔwa ɔwan uruni ɔ tə puthanɛ yi ɔkas; ɔwa ɔwan ubɛra ɔ tə puthanɛ yi ɔkara, ɔwa ɔkara ɔ tə puthanɛ yi ɔwan ubɛra; ɔniŋkara yi ɔwe balȧ ka ɔwan kɔŋ uruni, ɔwa ɔwe balȧ ka ɔwan kɔŋ uruni yi ɔniŋkara.

⁵⁴kɔ pa sɔ ka ȧsuniya, Ma nə nənk kərənt kȧbi kə ŋat ro pil, lɛmp nə pa, Kɔm kə tə der; ɔwa ya pə yɔnɛ.

⁵⁵Bepi aŋfef ŋa kȧdiyɔ aŋ fɛŋ-e, nə pa, Pə tə yi ɔwon ɔthasər, ɔwa ya pə yɔnɛ.

⁵⁶Naŋ amunafaki, nə tȧrȧ gbɛlɛŋ ȧŋthɔf yi ȧkuru, kɛrɛ to som naŋ nə te tȧrȧ tə kəgbɛlɛŋ ȧŋlɔkɔ aŋe-e?

⁵⁷Ɔwa to som naŋ nə te gbək ȧtȧ yi təlompi-e?

⁵⁸kotȧy-e mɔ mə nə taŋanɛ yi ɔtheranɛ ka mu tə kəkɔ rodi ka ɔgbək ɛpa, ma nə yi ras ro roŋ, mɛm kȧmȧ ɔ tera mu; ta thani ɔ liŋ mu ka ɔgbəka, ɔwa ɔgbəka ɔ lȧnki mu ka ȧŋbɔy, ɔwa ɔ bot mu ka ȧŋseth ŋa tərəŋka.

⁵⁹I kanɛ mu mə wur hɛ ri rə roŋ o roŋ haŋ mə po ram ȧŋkɔpɔ aləpsɔ.