Read Ȧŋlemrȧnɛ Ȧfu Luk 13 Bible Online

Luk 13 - Ȧŋlemrȧnɛ Ȧfu bible

Luk 13

¹Alɔm aŋ bəpər ka ȧŋlɔkɔ ŋati aŋa kanɛ kɔ ta aŋKalili aŋa Paylet ɔ kuluŋ mȧtir maŋ yi asathka ta ŋaŋ.

²Ka Yisɔsȧŋ ɔ lasia ŋa ɔ pa, Nə nanɛ aŋKalili aŋe aŋ yi aləs pəthasi aŋKalili bɛ-i pəkasifɛ aŋ nakasi mȧtȧy ame-i?

³I kanɛ nu, sako, kɛrɛ thambe nə thupi-e, naŋ bɛ nə tə dinɛ yaŋ.

⁴Ɔwa aŋtɔfɔt tamthərɛsas, aŋa ȧŋseth abɔli rəkɔm ro Silɔm aŋ fumpər ŋa, aŋ dif ŋa, nə nanɛ kəpa aŋ yi aləs pəthasi aŋfəm alɔm bɛ aŋa yirȧ ro Yerusalɛm-i?

⁵I kanɛ nu, sako, kɛrɛ thambe nə thupi-e, naŋ bɛ nə tə dinɛ yaŋ.

⁶Ɔ fɔf sɔ aŋlomɔ aŋe, Wuni lɔm ɔ ba ŋənt ŋa aŋgbɔnɔ ro kuŋk kɔŋ, kɔ der tə kəthɛns məkomi kɛrɛ ɔ fir hɛ ma.

⁷kɔ pa ka ȧŋbɔy ŋɔŋ, Kəla, təren təsas i der tə kəthɛns məkomi ka aŋənt aŋe kɛrɛ i fir hɛ ma. Tap ŋi. To pə som aŋ ləsər sɔ aŋthɔf-e?

⁸kɔ lasianɛ kɔ ɔ pa, Pa, ter ŋi kəren ake sɔ, ɔwa i ti bɛsər ŋi, i ti bɛmpar ŋi finɔ.

⁹Bepi aŋ kom məkomi kətəp ka ȧŋlɔkɔ ŋati, ɔfinɔ. Bepi mən aŋ kom hɛ-e, mə gbəli tap ŋi.

¹⁰Ɔwa ɔ bɔ thəksa ka aseth agbanɛ alɔm ka ȧŋrey ŋa aŋsabath.

¹¹Ɔwa kəla, wuni bom ɔ yi ri ɔwe ba rətu təren tɔfɔt tamthərɛsas. Ɔ po nuthnɛ bɛ, ɔ gbəli hɛ sɔ təmȧ toloŋ.

¹²Ɔwa ma Yisɔs ɔ nənk kɔ, ɔ tela kɔ ro rɔŋɔŋ, kɔ pa, Ya, a po səli mu ka ratu ra mu.

¹³kɔ reŋ kɔ mȧta mɔŋ, ɔwa ɔlɛmp wati ɔya ɔ təmȧ toloŋ, ɔ thɔkəs Kuru.

¹⁴Ɔwa rȧbomp ka ȧŋseth agbanɛ ɔ bansȧ pəkasifɛ Yisɔsȧŋ ɔ po yenkəs ɔya ka aŋsabath, kɔ pa ka aŋfəm, Mərey tamthərukin mə yi ta afəm tə kəyɔ məpanth; tiyȧŋ der ka mȧrey mati kȧmȧ a ramər nu, kɛrɛ ka aŋsabath thahɔ.

¹⁵Ka ɔMarki ɔ lasia kɔ ɔ pa, Naŋ amunafaki, wuni o wuni ka nu ɔ səli hɛ ɔna yi aŋsofali ŋɔŋ ka ȧŋsabath-i, ɔ kera kɔ tə kəmun-i?

¹⁶Ɔwa ɔwuni bom ɔwe, ma ɔ yi wan ubɛra ka Ebraham-e, ɔwe Sethani ɔ po sek ta təren tɔfɔt tamthərɛsas-e, pə mar hɛ tə kəsəli kɔ ka ȧŋsabath-i?

¹⁷Ma Yisɔs ɔ fɔf mȧtȧy ame-e, aŋtheranɛ ŋɔŋ bɛ aŋ lap. Ɔwa aŋfəm alɔm bɛ aŋ ba məbɔnɛ ta mȧtȧy məkabanɛ ama ɔ yɔ.

¹⁸Ka Yisɔs ɔ pa, Ko rəka rȧbȧy ra Kuru rə bȧlȧnɛ-e? Ɔwa ko rəka rə i gbəli lomɔ ri-e?

¹⁹Rə bȧlȧnɛ aluka ŋa amustard aŋa wuni ɔ gbasi ɔ tɛp ŋi ro kuŋk kɔŋ, kaŋ lɔkɔ, aŋ səkɛ ŋənt. Ɔwa ɛbȧmp aŋ der yirȧ ka mara mati.

²⁰Yisɔs ɔ pa sɔ, Ko rəka rə mə i lomɔ rȧbȧy ra Kuru-e?

²¹Rə bȧlȧnɛ mɔ ɛgbith ɛyɛ wuni bom ɔ gbasi ɔ maŋk yi ka arɛkɛ ɛthunth ɛsas, haŋ ɛgbith ɛ kuf ti bɛ.

²²kɔ thas ka təpet yi təgbɔm, ɔ thəksa mɔ mə ɔ kɔth kɔth kəkɔ ro Yerusalɛm.

²³Ka wuni lɔm ɔ pa ro ŋɔŋ, Pa, afəm athȧn gbo ŋa mə kisi-i?

²⁴kɔ pa ro ŋaŋ, Timnɛ nu tə kəwɔŋ ka kadare kəthiŋkanɛ, ȧtesoma-e i kanɛ nu, agbȧthi aŋ tə thɛns aroŋ tə kəwɔŋ ri, kɛrɛ aŋ gbəli hɛ.

²⁵Ma ɔthem ka ȧŋseth ɔ po yokanɛ-e, ɔ po kantha kadare-e, ɔwa nə təp kətəma rokaŋ, nə gbȧtgbȧt ka kadare, nə pa, Pa, kanthɛ su; ɔ tə wosȧnɛ nu kəpa, I tɛ hɛ nu. Nia tha yi aŋyathki a mi.

²⁶Ka mə nə təp kəpa, Saŋ sə la di, sə la mun ro der ka mu kədi, ɔwa munɔ mə la thəksa ka takaŋ ta su.

²⁷Kɛrɛ ɔ tə pa, I kanɛ nu, i tɛ hɛ ro nə wur; tɔnɛ mi raŋ, naŋ aŋyɔ məkənȧ.

²⁸Kəkulɔ yi kəŋȧkŋȧk ɛsek kə tə yi ma mə nə nənk Ebraham, Aysak, Yekɔb, yi aŋnabi bɛ ka rȧbȧy ra Kuru, ɔwa naŋ a fitha nu rokaŋ.

²⁹Aŋ tə wur ro thɔrɔŋ yi ro pil, yi ka aŋdiɔ yi ka ȧŋmɛrɔ, aŋ tə yirȧ ka rȧbȧy ra Kuru.

³⁰Ɔwa, kəla, aŋləpsɔ aŋ yi aŋa mə re yi aŋtɔtɔkɔ, ɔwa aŋtɔtɔkɔ aŋ yi aŋa mə re yi aŋləpsɔ.

³¹Ka ȧŋlɔkɔ ŋati gbeŋ aFaresi alɔm aŋ der aŋ pa ro ŋɔŋ, Wur, mə wur nɔ; kotȧy-e Hɛrɔdȧŋ ɔ yema dif mu.

³²kɔ pa ro ŋaŋ, Kɔnɛ nu, nə kanɛ aŋgbogboro ŋati kəpa, kəla, minɛŋ i wurɔ akərəfi, i ramər tətu thonɔŋ yi ninaŋ, ɔwa ka ȧŋrey aŋa bekȧ məsas-e, i ti gbenthis mapanth ma mi.

³³Kɛrɛ i ba tə kəkɔnɛ thonɔŋ, ninaŋ yi rəsɔkɔŋ; kotȧy-e pə gbəli hɛ yi kəpa unabi ɔ fi thambe ro Yerusalɛm.

³⁴O Yerusalɛm, Yerusalɛm, munɔ ɔwe mə dif aŋnabi, ɔwe mə ləmər ŋa məsar aŋa a som ro rɔmu; ɛlɔkɔ ɛgbathi i yema naŋ thoŋkla aŋwuth a mu rɔkin, mɔ kȧbɛt mɔ thoŋkla aŋfɛth ŋɔŋ ka ɛkufna yɔŋ roratha, kɛrɛ nə selɔ hɛ.

³⁵Ɔwa a tey ȧŋseth a mu yeŋ; ɔwa i kanɛ mu, mə ba hɛ kənəŋk mi haŋ mə pa, Uruba wɔŋ ɔwe mə der ka ȧŋes ŋa ɔMarki.