Read Ȧŋlemrȧnɛ Ȧfu Luk 17 Bible Online

Luk 17 - Ȧŋlemrȧnɛ Ȧfu bible

Luk 17

¹kɔ pa ka aŋkarande ŋɔŋ, Pə gbəli hɛ yi thambe ɛsabu ya kəpənthbəla ɛ der, kɛrɛ mɔnɛ ka ɔwuni ɔwe mə kȧrȧ yi!

²Pə tə yi kɔ fisa bepi a gbak kɔ ȧsar ȧgbɔlȧ ka kalim kɔŋ, a fitha kɔ ro baŋ pəthasi bepi ɔ yɔ ukin ka aŋlɔl aŋe ɔ pənthbəla.

³Naŋ-e, botnɛ nu; bepi ɔwɔnt a mu ɔ yɔ ahakɛ, ŋal kɔ; bepi ɔ thupi, tera kɔ ti.

⁴Ɔwa bepi ɔ yɔ mu ahakɛ ɛlɔkɔ tȧmthədɛrəŋ ta pali-e, ɔwa ɔ kȧl fəlɛ ro rɔmu ɛlɔkɔ tȧmthədɛrəŋ, ɔ pa, I thupi, mə yi tə kətera kɔ ti.

⁵Aŋsom aŋ pa ka ɔMarki, Bȧr kȧlanɛ kȧsu.

⁶Ka ɔMarki ɔ pa, Bepi nə ba kəlanɛ mɔ aluka ŋa amustard-e, nə tə pa ka aŋənt aŋe, Tusinɛ, mə tɛpnɛ ro baŋ, aŋ tə wop ȧrim ra mu.

⁷Wuni reke ka mu ɔwe ba ȧbɔy ɔwe mə kutha ro kɔr, thalɔm ɔwe mə tɔl təlɔmɛ, bepi ɔ wur ro kɔr, ɔ pa ro ŋɔŋ, Der thɔŋ, yirȧ ka kədi,

⁸mɔ te mɔtha pa, Bɛnɛnɛ ta kadi kȧmi, ɔwa senɛ sɔ kȧmȧ mə taka mi ara mə i di haŋ i po di, i mun. Kədarəŋ kati, mə tə di, ɔwa mə tə mun-i?

⁹Ɔ tə mɔmɔ ȧŋbɔy pəkasifɛ ɔ po yɔ ȧte a yamari kɔ-i?

¹⁰Ya pə yi sɔ naŋ, ma nə po yɔ ȧtȧy bɛ ȧte a yamari nu-e, pa gbo, Saŋ sə yi ɛbɔy ɛte wur ŋani, sə po gbo yɔ ȧte sə yi tə kəyɔ.

¹¹Ma ɔ yi ro roŋ tə kəkɔ ro Yerusalɛm-e, ɔ thas ro Samaria yi ro Kalili.

¹²Ma ɔ wɔŋ ka kagbɔm kəlɔm-e, alaŋgba tɔfɔt aŋa ba arom aŋ gbanɛ kɔ, aŋ təmȧ ɔbɔli poŋ.

¹³kaŋ ŋata ȧsim taŋ gbanklo, aŋ pa, Yisɔs, Mariki, ba su ȧney.

¹⁴Ma ɔ nənk ŋa-e, ɔ pa ro ŋaŋ, Kɔnɛ nu nə kɔ tɔrinɛ ka aŋfode. Ɔwa mɔ mə aŋ kɔnɛ-e, aŋ sɔthɔ kəfethər.

¹⁵Ka ukin ka ŋaŋ ma ɔ nənk kəpa a po yenkəs kɔ-e, ɔ kȧlanɛ, ɔ thɔkəs Kuru rə rim rəbana,

¹⁶kɔ fumpɔ ka ȧtȧtək tɔŋ, ɔ mɔmɔ kɔ. Ɔwuni ɔwe ɔ yi uSamaria.

¹⁷Ka Yisɔsȧŋ ɔ pa, A fethər hɛ aŋtɔfɔt-i? Kɛrɛ aŋtamthərɛŋanlɛ reke aŋ yi-e?

¹⁸Wuni ɔ yi hɛ ɔwe kȧlanɛ tə kəsɔŋ Kuru yiki thambe ɔtik ɔwe-i?

¹⁹kɔ pa ro ŋɔŋ, Yokanɛ, kɔnɛ ro rɔmu. Kȧlanɛ ka mu kə po mu yenkəs.

²⁰Ma aŋFarisi aŋ yif ȧŋlɔkɔ areke rȧbȧy ra Kuru rə tə der-e, ɔ lasia ŋa ɔ pa, Rȧbȧy ra Kuru rə de hɛ kȧmȧ a nənk ri.

²¹Aŋ gbəli hɛ pa, Kəli nɔ! Thalɔm, Kəli ro! kotȧy-e rȧbȧy ra Kuru rə yi kətɔŋ ka nu.

²²Yisɔs ɔ pa ka aŋkarande, Mȧrey mə tə der ma nə yema nənk ŋin ŋa mȧrey ma ɔWan ka wuni, kɛrɛ nə gbəli hɛ nənk ŋi.

²³Ɔwa a tə kanɛ nu, kəli nɔ; kəli ro. Ɔwa te nu kɔ, thalɔm te tȧŋ ŋa,

²⁴ȧtesoma-e mɔ mə pə nakthinɛ ka ȧŋgbȧp ŋin ka ȧkuru, ɔwa pə gbɛntha ka ȧŋgbȧp alɔm; yaŋ sɔ ɔWan ka wuni mɔ yi ka ȧŋrey ŋɔŋ.

²⁵Kɛrɛ ɔ ba ras kənakasi rə mȧtȧy məgbathi, ɔwa rȧkomra are rə tə kasi kɔ.

²⁶Ɔwa mɔ mə pə sa yi ka mȧrey ma Noa-e, ya mə pə re yi sɔ ka mȧrey ma ɔWan ka wuni.

²⁷Aŋfəm aŋ di, aŋ mun, aŋ nȧntȧ, aŋ baləs haŋ ȧŋrey gbeŋ aŋa Noa ɔ wɔŋ ka ȧŋbil, ɔwa ȧmȧnt məfɔl mə der mə dim ŋa bɛ.

²⁸Ɔwa mɔ mə pə sa yi sɔ ka mȧrey ma Lot-əŋ; aŋ di, aŋ mun, aŋ wai, aŋ thila, aŋ tɛp, aŋ seth.

²⁹Kɛrɛ ka ȧŋrey gbeŋ aŋa Lot-əŋ ɔ wur ro Sɔdɔm-e, kɔm ka məsar mənȧnt nə thor kəwur ro Kuru, nə dim ŋa bɛ.

³⁰Ya pə tə yi sɔ ka ȧŋrey aŋa ɔWan ka wuni ɔ tɔrinɛ.

³¹Ka ȧŋrey ŋati, bepi wuni ɔ yi ka ȧŋseth rokɔm-e, ɔwa ɛyɛt yɔŋ ɛ yi ro seth rokor, ta ɔ te thor tə kəkera yi dɛr; ɔwa kɔnɔ ɔwe yi ro kɔr-e, ta ɔ te kȧlanɛ.

³²Nanɛ ɔrani ka Lot-əŋ.

³³Wuni o wuni ɔwe mə thɛns tə kəbɛnɛ aŋesəm ŋɔŋ ɔ tə dim ŋi; kɛrɛ wuni o wuni ɔwe mə dim ŋi ɔ tə kisis ŋi.

³⁴I kanɛ nu, ka ratatək rati afəm aruni ŋarəŋ aŋ tə yi rə kəfənt kin; a tə gbasi ukin, a tə tey ɔlɔm.

³⁵Afəm abom ŋarəŋ aŋ tə tɔ dɛr rɔkin; a tə gbasi ukin, a tə tey ɔlɔm.

³⁶Afəm aruni ŋarəŋ aŋ tə yi ro kɔr; a tə gbasi ukin, a tə tey ɔlɔm.

³⁷Aŋ yif kɔ, Mariki, reke-e? kɔ pa ro ŋaŋ, Ro kabel ɔ yi-e, rə ɛyiba mə aŋ thoŋklanɛ dɛr rɔkin.