Read Ȧŋlemrȧnɛ Ȧfu Luk 18 Bible Online

Luk 18 - Ȧŋlemrȧnɛ Ȧfu bible

Luk 18

¹kɔ fɔf rə alomɔ ka aŋkarande ŋɔŋ kȧmȧ aŋ tȧrȧ kəpa aŋ yi tə kəramnɛ lɔkɔ o lɔkɔ, ɔwa kȧmȧ pə te bȧk ŋa.

²kɔ pa, Uthoŋkas ɔ la yi rə kəpet, ɔ nesa hɛ Kuru, ɔ kəli hɛ ader ra wuni.

³Ɔwa ubora ɔ yi ka kȧpet kati, kɔ kɔ kȧtkȧt ka ɔthonkas ɔwe, ɔ pa, Thonkas ȧŋpa aŋa sə ba yi ɔtheranɛ kȧmi.

⁴Kɛrɛ ɔ yenk hɛ selɔ. Kədarəŋ kati ɔ pa ka ȧŋmerȧ ŋɔŋ, Hali ma i te nesa Kuru-e, thalɔm i te kolo wuni-e,

⁵ma ɔbora ɔwe ɔ sɔmpa mi-e, i ti thonkas ȧŋpa ŋɔŋ, pəkasifɛ kȧder kɔŋ katkat kə tə lela mi.

⁶Ka ɔMarki ɔ pa, Təl nu ȧte ɔthoŋkas ukənə ɔ pa.

⁷Ɔwa Kuru mɔ thonkas hɛ aŋthith ŋɔŋ aŋa mə kulir kɔ pali gbɛs hali ɔ muyu ŋa haŋ-i?

⁸I kanɛ nu ɔ tə thonkas ŋa lɛmp. Kɛrɛ ma ɔWan ka wuni ɔ der-e, ɔ tə bəp kəlanɛ ka raru-i?

⁹kɔ fɔf aŋlomɔ aŋe ka aŋfəm aŋa lanɛ aŋ yi alompi, ɔwa aŋ sai sai afəm alɔm bɛ.

¹⁰Afəm ŋarəŋ aŋ kɔ ka ȧŋseth ŋa Kuru tə kəramnɛ. Ukin ɔ yi uFarisi, ɔlɔm-e, uthoŋkla ɛfȧk.

¹¹ƆFaresi ɔ təmȧ ɔ ramnɛ yaŋ ka aŋyɛthɛ ŋɔŋ, Kuru i mɔmɔ mu ma i te yi mɔ afəm alɔm, i ba hɛ kansoŋ, i ba hɛ məkənə, i yɔ hɛ kərəp, hali ɔthoŋkla ɛfȧk ɔwe-e, i yi hɛ mɔ kɔnɔ.

¹²Ayik o yik i wop asum mȧrəŋ, i sɔŋ ɛyaka ka ɛyɛt mi bɛ.

¹³Kɛrɛ ɔthoŋkla ɛfȧk ɔ təmȧ ɔbɔli poŋ, ɔ selɔ hɛ tə kəlȧkthi ɛfɔr yɔŋ ka ȧriyana, ɔ nap aŋkəpət ŋɔŋ, kɔ pa, Kuru ba mi ȧney, minɛ i yi wuni ləs.

¹⁴I kanɛ nu ɔwuni ɔwe ɔ kɔ ka ȧŋseth ŋɔŋ, ɔ po sɔthɔ məmari pəthasi ɔlɔm; kotȧy-e wuni o wuni ɔwe ŋatanɛ a tə thora kɔ, kɛrɛ ɔwe thoranɛ, a tə ŋata kɔ.

¹⁵Ka aŋfəm aŋ kȧrȧ sɔ talɛnth taŋ ka Yisɔs kȧmȧ ɔ gboŋ ŋa, kɛrɛ ma aŋkarande ŋɔŋ aŋ nənk ti-e, aŋ ŋal ŋa.

¹⁶Kɛrɛ Yisɔsȧŋ ɔ tela ŋa ro ŋɔŋ, ɔ pa, Te bɛnt aŋfɛth tɔ kəder ro mi, kotȧy-e awunɔŋ ŋa ba rȧbȧy ra Kuru.

¹⁷Tɛntɛnɛ i pa ro nu, wuni o wuni ɔwe te malanɛ rȧbȧy ra Kuru mɔ wath ufɛth ɔ gbəli hɛ wɔŋ ri.

¹⁸Ɔwa urəbomp ulɔm ɔ yif kɔ, ɔ pa, Karmɔkɔ uthɔth, to mə i yɔ kȧmȧ i sɔthɔ aŋesəm thəbana-e?

¹⁹Ka Yisɔs ɔ pa ro ŋɔŋ, kɔyɛŋ mȧ mə bont mi uthɔth-e? Uthɔth ulɔm ɔ yi hɛ thambe Kuru.

²⁰Mə tata ɛyamari, Te yɔ kərəp, te dif, te keya, te sɔŋ məseri ma rəyem, yikis ɔkas ka mu yi ɔkara ka mu.

²¹kɔ pa, I po wop mȧtȧy ame bɛ kȧbi ka rafɛth ra mi.

²²Ɔwa ma Yisɔs ɔ təl ti-e, ɔ pa ro ŋɔŋ, Tȧy tin tȧ mə paŋ ras; thila ɛyɛt bɛ ɛyɛ mə ba, mə yerəs yi ka aŋfəm amɔnɛ, ɔwa mə tə sɔthɔ kɛŋ ro riyana. Ɔwa der, mə tȧŋ mi.

²³Kɛrɛ ma ɔ təl mȧtȧy ame-e, ɔ saŋ amɔl abana, kotȧy-e uyola ubana wɔŋ.

²⁴Ma Yisɔs ɔ nənk ȧte-e, ɔ pa, Pə tə yi ɔbaki mədɛr ta ŋaŋ aŋa ba tɛŋ təbana tə kəwɔŋ ka rȧbȧy ra Kuru!

²⁵Ȧtesoma-e pə tha yi ɔfɔy tȧy ta ȧyɔkmɛ tə kəsɔnthɔs aŋfeŋk ŋa asɛni, pəthasi wuni yola tə kəwɔŋ ka rȧbȧy ra Kuru.

²⁶Ɔwa ŋaŋ aŋa təl ti aŋ pa, Kanɛ mən mə gbəli kisi-e?

²⁷Kɛrɛ kɔnɔ ɔ pa, Mȧtȧy ama thas aŋfɔsɔ ŋa afəm mə thas hɛ aŋfɔsɔ ŋa Kuru.

²⁸Ka Pita ɔ pa, Kəla, saŋ sə po tey ɛyɛt ɛ su bɛ, sə tȧŋ mu.

²⁹kɔ pa ro ŋaŋ, Tɛntɛnɛ i kanɛ nu kəpa, wuni ɔ yi hɛ ɔwe po tey aseth-o, urani-o, uwɔnt-o, aŋa kom kɔ-o, thalɔm awuth salata rȧbȧy ra Kuru-e,

³⁰ɔwe mə te sɔthɔ ɔgbȧthi ka ȧŋlɔkɔ aŋe yi aŋesəm thɔbana ka ȧdȧru ara mə der.

³¹kɔ gbasi aŋtɔfɔt ŋarəŋ, ɔ pa ro ŋaŋ, Kəla, sə kɔ ro Yerusalɛm, ɔwa mȧtȧy bɛ ama aŋnabi aŋ gbal ta ɔWan uruni ka wuni mə tə lasər.

³²kotȧy-e a tə lȧnki kɔ ka tȧbona təlɔm, ɔwa a tə sel kɔ, a tə yɔ kɔ ɔləs, a tə thufər kɔ,

³³aŋ tə sȧpȧ kɔ rəkɛt, aŋ tə dif kɔ; ɔwa ka ȧŋrey aŋa bekȧ məsas ɔ tə kȧl yokanɛ.

³⁴Kɛrɛ pə sɔk hɛ ŋa ta mȧtȧy ame; ȧŋpa aŋe aŋ maŋknɛ ŋa, aŋ sɔthnɛ hɛ ȧte ɔ pa.

³⁵Ka pə re yi, mɔ mɔ fat ro Yɛriko-e, wuni fith ulɔm ɔ yirȧ ro roŋ rayɛr, ɔ tə thola.

³⁶Ɔwa ma ɔ təlȧ ȧruniya ara thas-e, ɔ yif aŋkolo ŋati.

³⁷kaŋ kanɛ kɔ kəpa Yisɔs ɔwe ro Nasarɛth-e, kɔnɔ mə thas.

³⁸kɔ sel ɛrɔŋ, ɔ pa, Yisɔs, munɔ wan ka Debid, ba mi ȧney.

³⁹Aŋfəm aŋa təmȧ rodi aŋ ŋal kɔ kȧmȧ ɔ taŋk, kɛrɛ ɔ bȧr gbo sel ɛrɔŋ, Munɔ wan ka Debid, ba mi ȧney.

⁴⁰Ka Yisɔsȧŋ ɔ təmȧ, ɔ yamari kȧmȧ a kȧrȧ kɔ ro ŋɔŋ. Ɔwa ma ɔ po fat-e, ɔ yif kɔ,

⁴¹Ko mə yema i yɔna mu-e? Ɔ pa, Pa, kȧmȧ i sɔthɔ kakəli kȧmi.

⁴²Ka Yisɔsȧŋ ɔ pa ro ŋɔŋ, Sɔthɔ kakəli ka mu. Kȧlanɛ ka mu kə po mu yenkəs.

⁴³Ka ɔlɛmp wati ɔ sɔthɔ kakəli kɔŋ, kɔ tȧŋ kɔ rə kəthɔkəs Kurɔŋ; ɔwa aŋfəm bɛ maŋ nənk ti-e, aŋ yikis Kuru.