Read Ȧŋlemrȧnɛ Ȧfu Luk 21 Bible Online

Luk 21 - Ȧŋlemrȧnɛ Ȧfu bible

Luk 21

¹kɔ lafthɛ ɔ nənk aŋfəm ayola mɔ mə aŋ fak ɛboya yaŋ ka ɔdɛr ɔbɛnɛ.

²kɔ nənk sɔ ubora umɔnɛ ulɔm mɔ mɔ fak ri awankɔpɔ,

³kɔ pa, I kanɛ nu tə tɛntɛnɛ, ɔbora umɔnɛ ɔwe ɔ po fak pəthasi ŋa bɛ;

⁴ȧtesoma-e aŋfəm aŋe aŋ sɔŋ ka kaba ka ŋaŋ kəbana, kɛrɛ ɔbora ɔwe-e, ka kapaŋ kɔŋ ɔ po sɔŋ bɛ ara ɔ ba.

⁵Ma aŋfəm alɔm aŋ fɔf ta ȧŋseth ŋa Kuru, to a yesi ŋi məsar məfinɔ yi ɛboya, ɔ pa,

⁶Ta ɛyɛt ɛyɛ ɛyɛ nə nəŋk-e, mȧrey mə tə der ma a te tey nɔ ȧsar ŋin rokɔm ka alɔm, aŋa mə a te fak.

⁷kaŋ yif kɔ, Karmɔkɔ, alɔkɔ areke mȧtȧy ame mə tə yɔnɛ-e? Ɔwa ko amisali ŋə mə yi bepi ȧŋlɔkɔ ŋati aŋ fat-e?

⁸kɔ pa ro ŋaŋ, Bot ȧmerȧ kȧmȧ a te nu yɛthəs, kotȧy-e agbȧthi aŋ tə der ka ȧŋes a mi, aŋ tə pa, Minɛ yi kɔnɔ, ɔwa ȧŋlɔkɔ aŋ bek; te nu tȧŋ ŋa.

⁹Kɛrɛ ma nə təl ta tətim yi ɛtotok-e, te nu nesa, ȧtesoma-e mȧtȧy ame mə ba tə kəyi; kɛrɛ ɔthalnɛ ɔ tha bek hɛ ras.

¹⁰kɔ pa ro rɔŋaŋ, Abona aŋ tə yokar abona, rəbȧy rə tə yokar rəbȧy.

¹¹Kəyɛr kəbana ka ȧŋthɔf kə tə yi, dor yi tətu tətepər; ȧtȧy təninis yi ɛmisali ɛbana ɛ tə wur ka ȧkuru.

¹²Kɛrɛ yeŋka mȧtȧy ame bɛ mə yi, aŋ tə wop nu, aŋ tə sɔmpa nu, aŋ tə lȧnki nu ka ɛseth ɛgbanɛ yi ka ɛseth ɛtərənka, aŋ tə kȧrȧ nu rodi ka aŋbȧy yi aŋgbəka salata ȧŋes a mi.

¹³Ȧŋlɔkɔ a nu tə kəsɔŋ məseri ŋi aŋe.

¹⁴Tiyȧŋ bot ti ka ɛmerȧ ɛ nu kȧmȧ nə te gbak ȧmerȧ ta ȧtȧ mə nə gbaki,

¹⁵ȧtesoma-e i ti sɔŋ nu kəsəŋ yi kətemp ȧke aŋtheranɛ a nu bɛ aŋ te gbəli pɛnsa ɔwa aŋ te gbəli wosa.

¹⁶Kɛrɛ hali ŋaŋ aŋa kom nu, yi aŋwɔnt a nu, yi aŋfəm a nu, yi aŋyathki a nu, aŋ tə sɔnd nu; ɔwa a tə yɔ a dif alɔm kətɔŋ ka nu.

¹⁷Ɔwa afəm bɛ aŋ tə gbɛŋa nu ta salata mi.

¹⁸Kɛrɛ hali rəfon rin ra tabomp ta nu rə ba hɛ kədinɛ.

¹⁹Nə tə bɛnɛ ɛŋesəm ɛ nu ka kamuyu ka nu.

²⁰Kɛrɛ ma nə nənk səfa tə gbətɔr ro Yerusalɛm-e, nə tə tȧrȧ kəpa kadinɛ kati kə fat.

²¹Ȧŋlɔkɔ ŋati ŋaŋ aŋa yi ro Yudiya-e, ta aŋ gbukɛ ka tȧteŋ; ŋaŋ aŋa yi ka kȧpet kati-e, ta aŋ wur, yi ŋaŋ aŋa yi ro gbaŋ ta aŋ te sɔ wɔŋ ri,

²²ȧtesoma-e ame mə yi mȧrey ma kakala, kȧmȧ mȧtȧy bɛ ama a gbal mə po lasər.

²³Mɔnɛ ro ŋaŋ aŋa yi ator yi ŋaŋ aŋa mə masər afɛth ka mȧrey mati! kotȧy-e asɔmpanɛ abana aŋ tə yi ka ȧŋthɔf, yi rəbaŋ ka aŋfəm aŋe.

²⁴Ɔwa a tə fumpɔ ka ȧran ra aŋgbathɔ, a tə kera ŋa tɛndɛbira ka tȧbona bɛ, ɔwa tȧbona təlɔm tə tə nas Yerusalɛm haŋ ȧŋlɔkɔ ŋa tȧbona təlɔm aŋ la.

²⁵Ɛmisali ɛ tə yi ka aret, yi aŋof, yi ka atɔs; ɔwa ka ȧdȧru ɛsoli yi ɛkɛthanɛ ɛ tə yi ka təbona salata kȧbansȧ ka kȧbȧŋ yi ɛmunkəl.

²⁶Ɛmerȧ ya aŋfəm ɛ gbɔgbəthȧ rə rənes yi kəkəlȧnɛ ta mȧtȧy ama mə thorər ȧdȧru, ȧtesoma-e a tə yiŋktha ɛfɔsɔ ya ȧkuru.

²⁷Ȧŋlɔkɔ ŋati aŋ tə nənk ɔWan ka wuni ɔ der ka karənt rə afɔsɔ yi ayiki abana.

²⁸Kɛrɛ bepi mȧtȧy ame mə təp kəyɔnɛ-e, lakthɛ nu, ɔwa ŋata tabomp ta nu, kotȧy-e kabani ka nu kə po fat.

²⁹kɔ fɔfȧnɛ ŋa alomɔ, Kəli nu aŋgbɔnɔ, yi ɛyint bɛ;

³⁰bepi ɛ po put-e, nə tȧrȧ kəpa rəwok rəfɛth rə po fat.

³¹Ya pə yi sɔ naŋ, ma nə nənk mȧtȧy ame mə yɔnɛ, tȧrȧ ti nu kəpa rȧbȧy ra Kuru rə po fat.

³²I kanɛ nu tɛntɛnɛ, Rakomra are rə thas hɛ haŋ mȧtȧy ame bɛ mə po yɔnɛ.

³³Ȧkuru yi ȧdȧru ɛ tə thas kɛrɛ ȧsim ta mi tə thas hɛ.

³⁴Botnɛ nu ɛmerȧ ɛ nu kȧmȧ amet, yi kətis, yi ɛsoli ya ȧdȧru are ɛ te yɔ ɛmerȧ ɛ nu ɛ fi, kȧmȧ ȧŋrey ŋati aŋ thorər nu kəthɛna mɔ məgbət.

³⁵kotȧy-e, aŋ tə der mɔ məgbət ka ŋaŋ bɛ aŋa yirȧ ka ȧdȧru.

³⁶Tiyȧŋ kəlɛnɛ nu, ɔwa ramnɛ nu lɔkɔ o lɔkɔ kȧmȧ nə yi abeki tə kəfisȧ ka mȧtȧy ame bɛ ama ba kəyi, yi tə kətəma rodi ka ɔWan ka wuni.

³⁷Ɔwa ȧrey o rei ɔ bɔ thəksa ka ȧŋseth ŋa Kuru, ka tȧtȧk ɔ wur ɔ kɔnɛ ka kateŋ a bont Ɔlif.

³⁸Ɔwa aŋfəm bɛ aŋ der ro ŋɔŋ bəth bəth ka ȧŋseth ŋa Kuru kȧmȧ aŋ təlȧ kɔ.