Read Ȧŋlemrȧnɛ Ȧfu Luk 24 Bible Online

Luk 24 - Ȧŋlemrȧnɛ Ȧfu bible

Luk 24

¹Ɔwa ka ȧŋrey ȧtɔtɔkɔ ŋa ȧŋyik, ma pə yema sɔk-e, aŋfəm abom aŋ der ka ȧŋpȧli, aŋ kȧrȧ ɛyɛt ɛfɔlfɔl ɛyɛ aŋ po bɛnɛnɛ.

²kaŋ bəp a po bənkli aŋsar kəwur ka ȧŋpȧli.

³Maŋ wɔŋ ri-e, aŋ bəp hɛ kabel ka ɔMarki Yisɔs.

⁴Ka pə re yi-e, ma pə sɔkanɛ ŋa ta ti-e, kəla afəm aruni ŋarəŋ aŋ təmȧ rayɛr ka ŋaŋ rə suma təgbɛntha.

⁵Ɔwa ma rənes rə wop ŋa-e aŋ saŋ aser taŋ ro thɔf, aŋ pa ro ŋaŋ, To som mə nə thɛns ɔkəli kətɔŋ ka aŋfi-e?

⁶Ɔ yi hɛ nɔ, ɔ po yokanɛ. Kala nu ɛmerȧ ta ȧte ɔ kanɛ nu ma ɔ yi ras ro Kalili,

⁷kəpa a ba kəlaŋkli ɔWan ka wuni ka mȧta ma aŋfəm aləs, a tə tȧŋ kɔ ka akənt kəpəŋkinɛ, ɔwa ɔ tə kȧl yokanɛ ka ȧŋrey aŋa bekȧ məsas.

⁸kaŋ kala ɛmerȧ ka ȧsim tɔŋ,

⁹ɔwa aŋ kȧlanɛ kəwur ka ȧŋpȧli, aŋ kanɛ mȧtȧy ame bɛ ka aŋkarande tɔfɔt ukin yi ka aŋlɔm bɛ.

¹⁰Ɔwa aŋ yi Meri ɔwe ro Makdala, Yoana, yi Meri ɔkara ka Yeməs; ŋaŋ yi aŋfəm abom alɔm aŋ kanɛ mȧtȧy ame ka aŋsom.

¹¹Ɔwa aŋ nənk ȧsim ȧte mɔ məgbati; aŋ lanɛ hɛ ti.

¹²Ka Pita ɔ yokanɛ, ɔ gbukɛ, ɔ bȧlər ȧŋpȧli. Kɔ sanɛ ɔ kəli rokor, ɔ nənk atotha təfera tə fənthȧ thɔkɔ, kɔ kȧlanɛ, ɔ kabanɛ ta ȧte po yɔnɛ.

¹³Ɔwa kəla, ka ȧŋrey ŋati gbeŋ afəm ŋarəŋ aŋ bɔ kɔ rə kəgbɔm a bont ki Emeus, kə yi ɛmail tȧmthədɛrəŋ kəwur ro Yerusalɛm.

¹⁴Aŋ fɔfȧnɛ ta mȧtȧy ame ama po yɔnɛ.

¹⁵Ka pə re yi, mɔ mə aŋ fɔfȧnɛ-e, ɔwa aŋ yifəthanɛ-e, Yisɔsȧŋ, kɔn kɔnɔnɛ ɔ fat ŋa.

¹⁶Kɛrɛ a wop ɛfɔr yaŋ kȧmȧ aŋ te tȧrȧ kɔ.

¹⁷kɔ pa ro ŋɔŋ, Ko məfɔf maŋ ama nə ba ukin yi ulɔm mɔ mə nə kɔth-e? kaŋ təmȧ son, aŋ kəli ɔnɔsinɛ.

¹⁸Ka ukin ka ŋaŋ ɔwe a bont Kleopasȧŋ, ɔ lasia kɔ, ɔ pa, Mun utik ro Yerusalɛm-i? Mə tɛ hɛ ȧte po yɔnɛ ri ka mȧrey ame-i?

¹⁹Ɔ pa ro ŋaŋ, Ko tai-e? kaŋ pa ro ŋɔŋ, Mȧtȧy salata Yisɔs ɔwe ro Nasarɛth, ɔwe la yi unabi uba afɔsɔ ka məyɔs yi təfɔf rodi ka Kuru yi ka aŋfəm bɛ:

²⁰Ɔwa aŋfode abana yi aŋgbəka a su aŋ lȧnki kɔ kȧmȧ a dif kɔ, ɔwa a po tȧŋ kɔ ka akənt kəpəŋkinɛ.

²¹Kɛrɛ saŋ sə gbak ȧmerȧ naŋ kəpa kɔnɔ yi ɔwe mə bani Isrɛl, ɔwa ma pə thas ri-e, aŋe ŋə yi ȧŋrey aŋa bekȧ məsas kȧbi ma mȧtȧy ame mə po yɔnɛ.

²²Ma pə kȧl thas ri-e, afəm abom alɔm ka aŋniŋki a su aŋ yɔ su sə kabanɛ. Maŋ bɔra kɔnɛ ka ȧŋpȧli-e,

²³maŋ te nənk kabel kɔŋ-e, aŋ der, aŋ pa aŋ po nənk amaleka rə mənəŋk aŋa pa ɔ yi ukəli.

²⁴Ɔwa aŋfəm a su alɔm aŋ kɔnɛ ka ȧŋpȧli, kaŋ bəp ti mɔ mə aŋfəm abom aŋ pa, kɛrɛ aŋ nənk hɛ kɔ.

²⁵Ka Yisɔs ɔ pa ro rɔŋaŋ, O naŋ apənk, nə ba ɛmerȧ ɛlel tə kəlanɛ bɛ ȧte aŋnabi aŋ po pa.

²⁶ƆKrayst ɔ mar hɛ tə kənakasi mȧtȧy ame dɛ yi tə kəwɔŋ ka aŋyiki ŋɔŋ-i?

²⁷Ɔwa, kətəp ka Mosis yi aŋnabi bɛ, ɔ sɔkəs ɛmerȧ yaŋ ka mȧgbal bɛ ama a gbal ta atɔŋ.

²⁸Maŋ fatər ka aŋgbɔm ro mə aŋ kɔ-e, Yisɔs ɔ yɔ mɔ ɔ yema thas rodi

²⁹kɛrɛ aŋ thɔnthɔ kɔ, aŋ pa, Yirȧ ras ro rɔsu, ȧtesoma-e ȧŋsum aŋ yema wɔŋ, ɔwa ȧŋrey aŋ bora kəpoŋ. Kɔ wɔŋ tə kəyianɛ yi ŋaŋ.

³⁰Ka pə re yi ma ɔ yirȧ yi ŋaŋ tə kədi-e, ɔ gbasi kəbo, ɔ ruba ki, ɔ sim ki, kɔ yerəs ŋa.

³¹Ka a kanthi ɛfɔr yaŋ, kaŋ tȧrȧ kɔ; kɛrɛ ɔ dinɛ ŋa.

³²kaŋ pa ukin ka ɔlɔm, Tabuth ta su tə mara hɛ rokor kȧsu ma ɔ bɔ fɔfȧnɛ su ro roŋ-i, ɔwa ma ɔ tɔri su mȧgbal-i?

³³Ka ɔlɛmp wati aŋ yokanɛ aŋ kȧlanɛ ro Yerusalɛm, kaŋ bəp aŋsom tɔfɔt ukin yi aŋkos ŋaŋ dɛr rɔkin,

³⁴kaŋ pa, ƆMariki ɔ po yokanɛ tɛntɛnɛ, ɔ po tɔrinɛ ka Saymɔn.

³⁵kaŋ kanɛ ŋa mȧtȧy ama yɔnɛ ro roŋ, ɔwa to aŋ peski kɔ-e ka kasiməth kabo.

³⁶Ɔwa mɔ mə aŋ fɔf mȧtȧy ame-e, Yisɔsȧŋ kɔn kɔnɔnɛ ɔ təmȧ kətɔŋ ka ŋaŋ, kɔ pa ro rɔŋaŋ, Ta məthɔfəl mə yi ro rɔnu.

³⁷Kɛrɛ aŋ nesa yi rənes rəbana, aŋ nanɛ kəpa aŋ nənk amɔmpila.

³⁸kɔ pa ro ŋaŋ, kɔyɛŋ mə nə sɔmpanɛ-e? To som ɛsikɛ ɛ der ka ɛmerȧ ɛ nu-e?

³⁹Kəli mȧta ma mi yi ȧtȧtək ta mi kȧmȧ mə tȧrȧ ti minɛŋ! Gboŋ mi nu, ɔwa kəli mi nu, ȧtesoma-e amɔmpila aŋ ba hɛ adɛr yi təbȧnth mɔ mə nə nənk minɛ i ba.

⁴⁰Ma ɔ po pa ȧte-e, ɔ tori ŋa mȧta mɔŋ yi ȧtȧtək tɔŋ.

⁴¹Ɔwa maŋ kabanɛ, aŋ gbəli hɛ lanɛ ras hali təsalata mȧbɔnɛ, ɔ yif ŋa, Nə ba hɛ nɔ da rədi-i?

⁴²kaŋ sɔŋ kɔ kəlop kəthɔyis.

⁴³kɔ gbasi kɔ ɔ di kɔ rodi ka ŋaŋ.

⁴⁴kɔ pa ro rɔŋaŋ, Ȧsim ta mi ti ȧte, ȧte i la kanɛ nu ka ȧŋlɔkɔ aŋa i yi ras yi naŋȧŋ kəpa mȧtȧy bɛ mə ba tə kəlasər ama a gbal ta ȧtȧ mi ka aŋthɔ ŋa Mosis, yi ka aŋnabi, yi ka ȧŋSams.

⁴⁵kɔ kanthi ɛmerȧ yaŋ kȧmȧ mȧgbal mə sɔk ŋa.

⁴⁶Ɔwa ɔ pa ro ŋaŋ, Ya a po gbal kəpa ɔKrayst ɔ yi tə kənakasi dɛ yi tə kəkal yokanɛ ka rəfi ka ȧŋrey aŋa bekȧ məsas,

⁴⁷kȧmȧ a taməs kathupi yi katerɔ ka ɛhakɛ ka ȧŋes ŋɔŋ ka tȧbona bɛ, kətəp ro Yerusalɛm.

⁴⁸Naŋ nə yi məseri ta mȧtȧy ame.

⁴⁹Ɔwa kəla, i som ro rɔnu aŋlahiri ŋa ɔKas kȧmi, kɛrɛ te nu bɔnɛ ro pet haŋ a lonsər nu afɔsɔ kəwur rokɔm.

⁵⁰Ɔwa Yisɔsȧŋ ɔ kera ŋa haŋ aŋ lomanɛ ro Bɛthani, kɔ ŋata mȧta mɔŋ, ɔ ruba ŋa.

⁵¹Ka pə re yi-e, ma ɔ yi ka karuba ŋa-e, ɔ tey ŋa, a ŋata kɔ rokɔm ro riyana.

⁵²kaŋ bȧtho kɔ, ɔwa aŋ kȧlanɛ ro Yerusalɛm yi məbɔnɛ məbana.

⁵³Ɔwa aŋ yi ka ȧŋseth ŋa Kuru alɔkɔ o lɔkɔ, aŋ thɔkəs Kuru Məsaba.