Read Ȧŋlemrȧnɛ Ȧfu Luk 3 Bible Online

Luk 3 - Ȧŋlemrȧnɛ Ȧfu bible

Luk 3

¹Ka karen ȧke bekȧ tɔfɔt tamath ka kagbəka ka Tibɛrias Sisar, ma Paylet ɔ gbəka ro Yudia, Hɛrɔdȧŋ ɔ gbəka ro Kalili, ɔwa ɔwɔnt kɔŋ Filip-e ɔ gbəka ro Ituriya yi ka ȧŋgbȧp ŋa ro Trakɔnitɔs, ɔwa Lisaniyasȧŋ ɔ gbəkȧ ro Abilini,

²ɔwa Anas yi Kayafas aŋ yi afode abana-e, ȧrim ra Kuru rə der ka Yɔn ɔwan ka Sakarayas ro wula.

³kɔ der ka ȧŋthɔf aŋa gbətɔ ka Yɔrdan, ɔ kawandi ȧŋbaftisəm ŋa kəthupi ta katerɔ ka ɛhakɛ;

⁴mɔ mə a gbal ka ȧkȧfȧ ka Isaya ɔnȧbi kəpa, Ȧrim rəgbaŋklo ra wuni ro wula ara pa, Bɛmpa nu aroŋ da ɔMarki, Lompəs nu asoŋ tɔŋ.

⁵A tə lasər tagboŋkəl bɛ, a tə thora tȧteŋ bɛ, təbana-o, təlɔl-o, Asoŋ təkənə a tə lompəs ti, ɔwa a tə thənəpəs asoŋ təgbopɛ gbopɛ.

⁶Ɔwa afəm sɛŋk aŋ tə nənk kakisi ka Kuru.

⁷Ɔwa Yɔn ɔ pa ka ȧsuniya ȧte wur kȧmȧ ɔ baftays ŋa, Naŋ rəkomra ra ɛgbɔrɔ, kanɛ maŋ nu kȧmȧ nə gbukɛ rabaŋ ara mə der-e?

⁸Wurɔ nu məkomi ama bek ta kəthupi, ɔwa te nu təp kəpa ka ɛmerȧ ɛ nu, Sə ba Ebraham ta ɔkas kȧsu, kotȧy-e i kanɛ nu kəpa, Kuru ɔ gbəli yɔ awuth aŋ wur ka masar ame ta Ebraham.

⁹Ɔwa ka-ake a po bot kabap ka ɛthəŋk ya ɛyint. Tiyȧŋ ŋənt o ŋənt aŋa mə te wurɔ məkomi məfinɔ a tə tap ŋi, ɔwa a tə fitha ŋi ro nȧnt.

¹⁰Ka aŋfəm aŋ yif kɔ, aŋ pa, To mə sə yɔ-e?

¹¹kɔ wosȧnɛ ŋa ɔ pa, Kɔnɔ ɔwe ba suma tərəŋ, ta ɔ sɔŋ ɔwe te ba-e, ɔwa kɔnɔ ɔwe ba ra rədi ta ɔ tansanɛ yi.

¹²Ka aŋthoŋkla ɛfȧk aŋ der kȧmȧ ɔ baftays ŋa sɔ, aŋ pa ro ŋɔŋ, Pa, saŋ, to mə sə yɔ-e?

¹³kɔ pa ro ŋaŋ, Te nu yɔ a fak pəthas amɔlɔ ama a bonta nu.

¹⁴Ka aŋtim sɔ aŋ yif kɔ, aŋ pa, Ɔwa saŋ-e, to mə sə yɔ-e? kɔ pa ro ŋaŋ, Te nu sɔmpa wuni o wuni, te nu yɔ wuni o wuni yaŋfa, ɔwa ta ȧŋrȧm a nu aŋ bek nu.

¹⁵Ma aŋfəm aŋ kar yi ɛmerȧ ɛgbasa-e, ɔwa maŋ yi bɛ aŋ tȧmtȧmnɛ ka ɛmerȧ yaŋ ta Yɔnȧŋ bepi ɔ yi ɔKraist-e, Yɔn ɔ lasi ɔ pa ro ŋaŋ,

¹⁶Minɛ i baftays nu yi mȧnt, kɛrɛ kɔnɔ ɔwe mə der ɔ thasi mi afɔsɔ, i yi hɛ ubeki tə kəsəli nabeŋa na ɛkɔftha yɔŋ. Kɔnɔ tə baftays nu yi ɔYina məsəm yi nȧnt.

¹⁷Kathɛmɛ kɔŋ kə yi ka kȧta kɔŋ, ɔwa ɔ tə fuŋa aŋgbethe ŋɔŋ gbəraŋ, ɔ tə thoŋkla ȧpəla ro fuŋk kɔŋ, kɛrɛ ɔ tə thɔi ɛgbəftha rə nȧnt ana mə te dimsɛ.

¹⁸Ɔwa Yɔnȧŋ ɔ kawandi ȧkɛra kəfinɔ ka aŋfəm, yi ɛmaŋ ɛlɔm ɛgbathi.

¹⁹Kɛrɛ ma Yɔnȧŋ ɔ ŋal Hɛrɔdȧŋ ɔbȧy salata Herodias ɔrani ka ɔwɔnt kɔŋ-e, yi ta mȧtȧy mələs bɛ ama ɔ po yɔ,

²⁰ɔ kȧl bȧr ȧte sɔ ka maləs mɔŋ, ma ɔ bot Yɔn ka ȧŋseth ŋa tərəŋka.

²¹Ɔwa ma ɔ baftays aŋfəm bɛ-e, ka pə re yi a baftays Yisɔs sɔ. Ɔwa ma ɔ yi ras ka kəramnɛ-e, ȧkȧriyana kə kanthɛ,

²²ka ɔYina məsəm ɔ thor ɔ ba adɛr mɔ kəpərəm, kɔ rensa kɔ, ɔwa rim rə wur ka ȧkuru ara pa, Munɔ yi ɔWan kȧmi ubɔthər; mə thesis ȧŋmerȧ a mi finɔ.

²³Ma Yisɔs kɔn kɔnɔnɛ ɔ təp mapanth mɔŋ ɔ ba təren kəgba tɔfɔt; aŋfəm aŋ nanɛ ɔ yi ɔwan ka Yosɛf ɔwe yi ɔwan ka Heli,

²⁴ɔwan ka Mathat, ɔwan ka Lifay, ɔwan ka Meliki, ɔwan ka Yanay, ɔwan ka Yosɛf,

²⁵ɔwan ka Mathathayas, ɔwan ka Emɔs, ɔwan ka Nahum, ɔwan ka Esli, ɔwan ka Nȧkay,

²⁶ɔwan ka Mȧyath, ɔwan ka Mathathayas, ɔwan ka Semein, ɔwan ka Yosɛf, ɔwan ka Yoda,

²⁷ɔwan ka Yoanan, ɔwan ka Resa, ɔwan ka Serobabɛl, ɔwan ka Sialthiɛl, ɔwan ka Neri.

²⁸ɔwan ka Mɛlki, ɔwan ka Adi, ɔwan ka Kosam, ɔwan ka Elmadam, ɔwan ka Er,

²⁹ɔwan ka Yisa, ɔwan ka Eliyesa, ɔwan ka Yorim, ɔwan ka Mathat, ɔwan ka Libay,

³⁰ɔwan ka Simiyɔn, ɔwan ka Yuda, ɔwan ka Yosɛf, ɔwan ka Yonan, ɔwan ka Eliakim,

³¹ɔwan ka Milia, ɔwan ka Menan, ɔwan ka Mȧthatha, ɔwan ka Nethan, ɔwan ka Debid,

³²ɔwan ka Yɛsi, ɔwan ka Obed, ɔwan ka Bowas, ɔwan ka Salmon, ɔwan ka Neson,

³³ɔwan ka Aminadab, ɔwan ka Aram, ɔwan ka Hɛsrɔn, ɔwan ka Fares, ɔwan ka Yuda,

³⁴ɔwan ka Yekɔb, ɔwan ka Aysak, ɔwan ka Ebraham, ɔwan ka Tera, ɔwan ka Nahor,

³⁵ɔwan ka Seruk, ɔwan ka Reu, ɔwan ka Pilɛk, ɔwan ka Heba, ɔwan ka Sela,

³⁶ɔwan ka Kenan, ɔwan ka Arfaksad, ɔwan ka Sɛm, ɔwan ka Noa, ɔwan ka Lemek,

³⁷ɔwan ka Mɛthusala, ɔwan ka Inɔk, ɔwan ka Yerɛd, ɔwan ka Malɛl, ɔwan ka Kenan,

³⁸ɔwan ka Enos, ɔwan ka Seth, ɔwan ka Adȧm, ɔwan ka Kuru Məsaba.