Read Ȧŋlemrȧnɛ Ȧfu Luk 5 Bible Online

Luk 5 - Ȧŋlemrȧnɛ Ȧfu bible

Luk 5

¹Ka pə re yi ma aŋfəm aŋ thiŋkanɛ kɔ tə kətəl ȧrim ra Kuru-e, ɔ bɔ təmȧ rayɛr ka ȧŋbonka ŋa Kɛnɛsarɛt.

²kɔ nənk təbil tərəŋ tə təmȧ ro bonka rayɛr; aŋləm aŋ po wur ri, aŋ bɔ yak tapɛl taŋ.

³Ɔwa Yisɔsȧŋ ɔ wɔŋ ka abil ŋin aŋa yi aŋa Saymɔn, kɔ nɛmthɛnɛ kɔ tə kəwura ȧŋbil ka aŋgbaŋ ɔthan. Kɔ yirȧ ri, ɔ thəksa aŋfəm.

⁴Ma ɔ tey kəfɔf-e, ɔ pa ka Saymɔn, Wɔŋ ka ɔbɔlɔŋ kȧmȧ mə thora tapɛl ta nu tə kələm.

⁵Ka Saymɔn ɔ wosa, ɔ pa, Pa, sə sɔkɔ thɔrɔnɛ gbɛs, sə gbip hɛ koko; kɛrɛ salata ȧrim ra mu-e, i ti thora tapɛl.

⁶Maŋ po yɔ yi-e, aŋ gbip ɛlop kəgbath kəbana, haŋ tapɛl taŋ tə pimsa.

⁷kaŋ kapanɛ aŋkos ŋaŋ aŋa yi ka ȧŋbil alɔm kȧmȧ aŋ der mar ŋa. Kaŋ der, aŋ lasər tabil tərəŋ haŋ tə təp kəmɔta.

⁸Ma Saymɔn Pita ɔ nənk ȧte-e, ɔ gbəpsa ka tawu ta Yisɔs, ɔ pa, Sək ro mi ɔMarki, ȧtesoma-e minɛ wuni ka ɛhakɛ wɔŋ.

⁹Pəkasifɛ ɔ kabanɛ, yi aŋa yi yi kɔnɔ, ta kagbath ka ɛlop aŋa aŋ gbip.

¹⁰Ya pə yi sɔ Yeməsȧŋ yi Yɔnȧŋ, aŋwuth ŋa Sɛbɛdi, aŋa yi aŋkos ŋa Saymɔn. Yisɔs ɔ pa ka Saymɔn, Te nesa, kətəp ka-ake mə tə gbip afəm.

¹¹Maŋ po liŋ tabil taŋ ro gbaŋ-e aŋ tey mayɛt bɛ aŋ tȧŋ kɔ.

¹²Ka pə re yi ma ɔ yi ka kəpet kəlɔm ɔ nənk ri wuni ɔwe la arom. Ma ɔlaŋgba kati ɔ nənk Yisɔsȧŋ-e, ɔ gbəpsa, ɔ nɛmthɛnɛ kɔ, ɔ pa, Pa, bepi mə selɔ-e, mə gbəli fethər mi.

¹³Ka Yisɔsȧŋ ɔ thanthi kȧta kɔŋ, ɔ gboŋ kɔ, ɔ pa, I selɔ; yi ugbəraŋ. Ka ɔlɛmp wati aŋrom aŋ gbapɛ kɔ.

¹⁴kɔ yamari kɔ kȧmȧ ɔ te kanɛ ti wuni o wuni. Kɔnɛ gbo, tɔrinɛ ka ɔfode, kȧmȧ mə wurɔ sathka ta kafethər ka mu mɔ mə Mosis ɔ yamari, tə kəyi məseri ro rɔŋaŋ.

¹⁵Kɛrɛ tȧgbuŋ tɔŋ tə bȧr gbo gbanthɛnɛ, ka tey təbana tə thoŋklanɛ tə kətəl dɛ yi kȧmȧ ɔ damər tatu taŋ.

¹⁶Kɛrɛ Yisɔs ɔ katɛ kətɔŋ ka ŋaŋ, ɔ kɔ ro wula tə kəramnɛ.

¹⁷Ka pə re yi ka ȧŋrey alɔm-e, ma ɔ bɔ thəksa-e, aFaresi yi akarmɔkɔ ŋa aŋthɔ aŋ yirȧ rayɛr, aŋ wur ka tapet bɛ ȧte yi ro Kalili, Yudia, yi ro Yerusalɛm. Ɔwa aŋfɔsɔ ŋa Kuru aŋ yi ri tə kəyeŋkəs ŋa.

¹⁸Ɔwa kəla, aŋfəm aŋ kȧrȧ wuni ɔwe ba məthanthaŋ rə kəfənt. Kaŋ thɛns tə kəwɔŋa kɔ kȧmȧ aŋ bot kɔ rodi ka Yisɔsȧŋ.

¹⁹Maŋ te sɔthɔ roŋ tə kəwɔŋa kɔ salata ȧruniya-e, aŋ gbep ka ȧŋseth rokɔm, kaŋ sɔnthɔs kɔ ka aŋfeŋk yi kafənt kɔŋ kətɔŋ ka ȧruniya rodi ka Yisɔs.

²⁰Ma ɔ nənk kȧlanɛ ka ŋaŋ-e, ɔ pa, Langba, a po tera mu ɛhakɛ ɛ mu.

²¹Aŋkarmɔkɔ yi aŋFarisi aŋ təp kəfɔflanɛ, aŋ pa, Kanɛ ɔwe-e, ɔwe mə ŋamnɛ Kuru-e? Kanɛ gbəli tera wuni ɛhakɛ thambe Kuru son-e?

²²Ma Yisɔs ɔ tȧrȧ kəpa aŋ fɔflanɛ-e, ɔ wosa ɔ pa ro ŋaŋ, Ko mə nə tȧmtȧmnɛ ka ɛmerȧ ɛ nu-e?

²³Areke tha yi ȧfɔy tȧy tə kəpa-e, A po tera mu ɛhakɛ ɛ mu-o, thalɔm kəpa-e, Yokanɛ mə kɔth-o?

²⁴Kɛrɛ kȧmȧ nə tȧrȧ kəpa ɔWan ka wuni ɔ ba afɔsɔ ka ȧdȧru tə kətera ɛhakɛ-e, ɔ pa ka ɔwe ba mathanthaŋ, I kanɛ mu, yokanɛ, mə gbasi kafənt ka mu, mə kȧlanɛ ro seth ka mu.

²⁵Ka ɔlɛmp wati ɔ yokanɛ rodi ka ŋaŋ, ɔ gbasi kafənt, ɔ kɔnɛ ro seth kɔŋ rə kəthɔkəs Kuru.

²⁶Ɔwa ŋa bɛ aŋ kabanɛ, aŋ thɔkəs Kuru, ka rənes rə wop ŋa, aŋ pa, Sə po nənk mȧtȧy məkabanɛ thonɔŋ.

²⁷Kədarəŋ ka mȧtȧy ame-e, ɔ wur ri, kɔ nənk uthoŋkla ɛfȧk, ȧŋes ŋɔŋ ŋə yi Libay, ɔ yirȧ ka ɔdɛr rə mə a ram ɛfȧk. Kɔ pa ro ŋɔŋ, Tȧŋ mi.

²⁸kɔ tey mayɛt bɛ, ɔ yokanɛ, kɔ tȧŋ kɔ.

²⁹Ɔwa Lifayȧŋ ɔ bɛnɛnɛ kɔ afantha abana ka ȧŋseth ŋɔŋ gbeŋ, ɔwa aŋfəm aŋa thoŋkla ɛfȧk yi afəm alɔm aŋ yirȧ yi ŋaŋ ka kadi.

³⁰Kɛrɛ aŋFarisi yi aŋkarmɔkɔ aŋa yi yi ŋaŋ aŋ fɔfəthanɛ ka aŋkarande ŋɔŋ, aŋ pa, To som mə nə di, ɔwa nə mun yi aŋthoŋkla ɛfȧk-e, yi aŋfəm ŋa ɛhakɛ-e?

³¹Ka Yisɔs ɔ wosa, ɔ pa ro rɔŋaŋ, Ŋaŋ aŋa yi ayenki mədɛr aŋ yema hɛ ubolomba, ante yeŋki mədɛr ŋa gbo ŋa yema ubolomba.

³²I de hɛ tə kəmuti aŋlompi, i re muti aŋfəm ŋa ɛhakɛ kȧmȧ aŋ thupi.

³³kaŋ pa ro rɔŋɔŋ, Aŋkarande ŋa Yɔn aŋ wop asum katkat, aŋ ramnɛ, ya pə yi sɔ yi aŋkarande ŋa aŋFarisi, kɛrɛ aŋa mu aŋ di ɔwa aŋ mun.

³⁴Ka Yisɔs ɔ pa ro ŋaŋ, Nə gbəli yɔ aŋyathki ŋa ɔnantə aŋ wop asum ma ɔnantə ɔ yi yi ŋaŋ-i?

³⁵Kɛrɛ mȧrey mə tə der ma a tə nɔy ŋa ɔnantə, ɔwa ka mȧrey mati aŋ tə wop asum.

³⁶Ɔwa ɔ tɔri ŋa sɔ alomɔ, kɔ pa, Wuni ɔ gbari hɛ ka ruma rəfu tə kəgbȧp arombo ka ruma rəkur; bepi ɔ yɔ yi-e, ɔ gbari gbo rafu, ɔwa arombo afu aŋ mar hɛ aruma rəkur.

³⁷Ɔwa wuni ɔ bot hɛ məber məfɛth ka təbos təkur, ta thani maber məfɛth mə gbai tabos, ɔwa maber mə loŋa, dɛ yi tabos tə ləsə,

³⁸kɛrɛ a yi tə kəbot məber məfɛth ka təbos təfu.

³⁹Ɔwa ɔwuni ɔ yi hɛ ɔwe po mun məber məkur, ɔ yema sɔ məfɛth; kotȧy-e ɔ pa, makur mə tha yi məfinɔ.