Read Ȧŋlemrȧnɛ Ȧfu Luk 6 Bible Online

Luk 6 - Ȧŋlemrȧnɛ Ȧfu bible

Luk 6

¹Ka pə re yi ka asabath alɔm ma ɔ thas ka atɔr-e, aŋkarande ŋɔŋ aŋ siməth magbas, aŋ nɔtha ma ka mȧta maŋ, kaŋ di ma.

²Kɛrɛ aŋFarisi alɔm aŋ pa, kɔyɛŋ mə nə yɔ ȧte aŋthɔ aŋ bɛnt tə kəyɔ ka ȧŋrey ŋa aŋsabath-e?

³Ɔwa Yisɔsȧŋ ɔ gbakia ŋa, ɔ pa, Nə la hɛ karaŋ ȧte Debid ɔ yɔ ma dor rə wop kɔ yi aŋa paya kɔ-i?

⁴Ɔ wɔŋ ka ȧŋseth ŋa Kuru, kɔ gbasi, ɔ di tabo təsəm ȧte aŋfode, ŋa gbo son aŋ ba mamari tə kədi, ɔwa ɔ di ti kɔ sɔŋ sɔ aŋfəm aŋa yi yi kɔnɔ.

⁵Ɔ pa sɔ ro ŋaŋ, ɔWan ka wuni ɔ yi ɔMarki ka aŋsabath sɔ.

⁶Ka pə kȧl sɔ yi ka aŋsabath alɔm-e, ɔ wɔŋ ka ȧŋseth agbanɛ, kɔ thəksa aŋfəm. Ka wuni ɔ yi ri ɔwe pə yi-e, kȧta kɔŋ kədiɔ kə yi kəfi.

⁷Ɔwa aŋkarmɔkɔ yi aŋFarisi aŋ kəli kɔ, bepi ɔ tə gbəli yenkəs kɔ ka aŋsabath, kȧmȧ aŋ gbəli fir roŋ tə kəgbanthir kɔ.

⁸Kɛrɛ Yisɔs ɔ tȧrȧ ɛnanɛ yaŋ, kɔ pa ka ɔwuni ɔwe ba kȧta kəfi, Yokanɛ, mə təmȧ su ratɔŋ. Kɔ yokanɛ, ɔ təmȧ.

⁹Ka Yisɔsȧŋ ɔ pa ro ŋaŋ, I yif nu, ɔlompi tə kəyɔ ɔfinɔ ka ȧŋsabath-i, thalɔm ɔləs-i? Tə kəkisis aŋesəm-i, thalɔm tə kələsər ŋi-e?

¹⁰Ma ɔ po kəli ŋa bɛ-e, ɔ pa ka ɔlaŋgba. Thanthi kȧta ka mu. Kɔ yɔ ti, ɔwa kȧta kɔŋ kə kȧl yeŋk.

¹¹Kɛrɛ aŋkarmɔkɔ yi aŋFarisi aŋ la məbaŋ, ka aŋ nəŋkanɛ ta ȧte aŋ gbəli yɔ Yisɔsȧŋ.

¹²Ka pə re yi ka mȧrey mati-e, ɔ kɔ ka kateŋ tə kəramnɛ. Ɔwa ɔ sɔkɔ ramnɛ ka Kuru gbɛs.

¹³Ma pə sɔk-e, ɔ tela aŋkarande ŋɔŋ, kɔ thith tɔfɔt ŋarəŋ kətɔŋ ka ŋaŋ, kɔ bont ŋa asom.

¹⁴Saymɔnȧŋ, (ɔwe a bont Pita) Andrɔŋ, ɔwɔnt kɔŋ uruni, Yeməsȧŋ yi Yɔnȧŋ, Filipȧŋ yi Barthɔlɔmiyuȧŋ,

¹⁵Mathiu dɛ yi Thɔmɔsȧŋ, Yeməsȧŋ ɔwan uruni ka Alfiɔs, Saymɔnȧŋ ɔwe a bont Selɔt,

¹⁶Yudasȧŋ ɔwan uruni ka Yeməs, yi Yudas Iskariyɔt ɔwe sɔnd Yisɔs.

¹⁷Ɔ thor yi ŋaŋ ka abɛthkɔ, kɔ bəp ȧruniya ra aŋkarande ŋɔŋ yi afəm agbȧthi aŋa wur ro Yudia bɛ yi ro Yerusalɛm, yi ka ȧŋthɔf ŋa ro Tair yi ro Sidon, aŋa der tə kətəla kɔ, ɔwa kȧmȧ ɔ damər tatu taŋ.

¹⁸kɔ yenkəs aŋfəm aŋa akərəfi aləs aŋ sɔmpa-e.

¹⁹Ɔwa aŋfəm bɛ aŋ mɛm tə kəgboŋ kɔ, pəkasifɛ afɔsɔ aŋ wur kɔ, aŋ yenkəs ŋa bɛ.

²⁰kɔ ŋata ɛfɔr yɔŋ ka aŋkarande ŋɔŋ, ɔ pa, Naŋ amɔnɛ nə ba aruba, kotȧy-e na ba rȧbȧy ra Kuru.

²¹Naŋ aŋa yi ador ka-ake nə ba aruba, kotȧy-e nə ba kənamra. Naŋ aŋa kulɔ ka-ake nə ba aruba, kotȧy-e nə ba kəsel.

²²Na aruba, ma afəm aŋ gbɛŋa nu, ɔwa maŋ gbaskinɛ nu, ɔwa aŋ sambos nu, aŋ wurɔ ames ma nu mɔ tȧy tələs salata ɔWan ka wuni.

²³Tə pə bɔnɛ nu ka ȧŋrey ŋati, ɔwa pais nu yi məbɔnɛ; ȧtesoma-e ȧŋrȧm a nu aŋ yi abana ro riyana. Kotȧy-e ya aŋkas a ŋaŋ aŋ yɔ aŋnabi.

²⁴Kɛrɛ mɔnɛ ro nu na yi ayola, kotȧy-e nə po thɔŋ sɔthɔ kȧbɛfəth ka nu.

²⁵Mɔnɛ ro nu aŋa namra ka-ake, kotȧy-e dor rə tə wop nu. Mɔnɛ ro nu aŋa sel ka-ake, kotȧy-e nə tə saŋ amɔl, ɔwa nə tə kulɔ.

²⁶Mɔnɛ ro nu ma afəm bɛ aŋ fɔf nu ɔfinɔ, kotȧy-e ya aŋkas a ŋaŋ aŋ yɔ aŋnabi ayem.

²⁷Kɛrɛ ka ŋaŋ aŋa təl i pa, Bɔthər aŋtheranɛ a nu, yɔ ɔfinɔ ka ŋaŋ aŋa mə gbɛŋa nu,

²⁸ruba ŋaŋ aŋa mə nal nu, ramnɛ nu ta ŋaŋ aŋa mə yɔ nu ɔləs.

²⁹Ma wuni ɔ gbantha mu ka aŋkos ŋin-e, laŋklia kɔ sɔ aŋlɔm; ɔwa ɔwe mə nɔy aruma ra mu rəbana-e, te bɛnt kɔ aruma ra mu rəratha sɔ.

³⁰Sɔŋ wuni o wuni ɔwe tholir mu, ɔwa ma wuni o wuni ɔ nɔy ɛyɛt ɛ mu-e, te yif kɔ ti sɔ.

³¹Mɔ mȧ nə yema aŋfəm aŋ yɔ nu yaŋ sɔ mə nə yɔ ŋa.

³²Bepi nə bɔthər gbo ŋaŋ aŋa bɔthər nu-e, ko mɔmɔ mȧ nə ba-e? kotȧy-e hali aŋfəm aləs aŋ bɔthər ŋaŋ aŋa mə bɔthər ŋa.

³³Ɔwa bepi nə yɔ ɔfinɔ gbo ka ŋaŋ aŋa mə yɔ nu ɔfinɔ-e, ko mɔmɔ mə nə ba-e? Hali aŋfəm aləs aŋ yɔ yi.

³⁴Bepi nə bɔ yɛt ka ŋaŋ gbo aŋa əŋ nanɛ tə kəkal sɔthɔ yi sɔ-e, ko mɔmɔ mə nə ba-e? Hali aŋfəm aləs aŋ bɔ afəm aləs, tə kəkal sɔthɔ amɔlɔ mati sɔ.

³⁵Tiyȧŋ bɔthər aŋtheranɛ a nu, yɔ ŋa ɔfinɔ, bɔ ŋa kate gbak ȧmerȧ tə kəkal sɔthɔ; ɔwa ȧŋrȧm a nu aŋ tə yi abana, ɔwa nə tə yi aŋwuth ŋa ɔBɔli rəkɔm. Kotȧy-e ɔ yɔ ɔfinɔ ka aŋfisrəwali yi aŋləs.

³⁶Ba ȧney mɔ mə ɔKas ka nu ɔ ba ȧney.

³⁷Te nu thonkas apa, ɔwa a ba hɛ tə kəthoŋkas nu. Te sɔŋ wuni mətheri. Ɔwa a ba hɛ tə kəsɔŋ nu mətheri. Tera, ɔwa a tə tera nu.

³⁸Sɔŋ, ɔwa a tə sɔŋ nu, kəthunth kəfinɔ, kəthiŋkər, kəyinktha, kəloŋ, a tə sɔŋ yi ka mȧta mȧnu. Kotȧy-e, ka aŋthuntha aŋa mə nə thunth-e, ŋa mə a kȧl thuntha nu.

³⁹kɔ fɔf alomɔ ro ŋaŋ, ɔ pa, Ɔfith ɔ gbəli kɔtha ufith-i? Ŋa ŋarəŋ aŋ fumpɔ hɛ ro fo-i?

⁴⁰Ukarande ɔ thas hɛ ɔkarmɔkɔ kɔŋ, kɛrɛ wuni o wuni ɔwe pons kətara, ɔ tə yi mɔ ɔkarmɔkɔ kɔŋ.

⁴¹Ɔwa to som mə nə nənk ȧŋpol aŋa yi ka rafɔr ra ɔwɔnt mu-e, kɛrɛ mə nənk hɛ kagboŋ ȧke yi ka rafɔr ra mu-e?

⁴²To mə gbəli pa ka ɔwɔnt mu, Wɔnt mi, yɔ kȧmȧ i wurɔ ȧŋpol ka rafɔr ra mu, ma mə te nənk kagboŋ ȧke yi ka rafɔr ra mu-e? Mun munafaki, mɔtha wurɔ kagboŋ ka rafɔr ra mu, ɔwa mə tə nənk gbəraŋ tə kəwura ȧŋpol aŋa yi ka rafɔr ra ɔwɔnt mu.

⁴³kotȧy-e, ŋənt ȧfinɔ aŋ kom hɛ məkomi mələs, thalɔm ŋənt ələs aŋ kom hɛ məkomi məfinɔ.

⁴⁴Ɔwa a tȧrȧ ŋənt o ŋənt ka mȧkomi mati. Afəm aŋ pim hɛ məgbɔnɔ rə təbaŋk, ɔwa mətiti rə təsenduku.

⁴⁵Wuni finɔ ka ɛbɛnɛ ɛfinɔ ya ȧŋmerȧ ŋɔŋ ɔ wurɔ ȧte yi təfinɔ; ɔwa wuni ləs ka ɛbɛnɛ ɛləs ya ȧŋmerȧ ŋɔŋ ɔ wurɔ ȧte yi tələs. Kotȧy-e ka kala ka ȧŋmerȧ kȧsəŋ kɔŋ kə tə fɔf.

⁴⁶To som nə bont mi, Pa, Pa, kədarəŋ ka nə yɔ hɛ ȧte i kanɛ nu-e?

⁴⁷Wuni o wuni ɔwe der ro rɔmi, ɔ təl ȧsim ta mi, ɔ wop ti, i ti tɔri nu ɔwe ɔ bȧlȧnɛ.

⁴⁸Ɔ yi mɔ wuni ɔwe mə təmər aseth. Ɔ bɛs ɔbɔlɔŋ, ɔ raf ɔtəmər wa ȧŋseth rə agbalaŋ. Ma ȧmȧnt məfɔl mə der-e, mə sap ȧŋseth ŋati, kɛrɛ mə gbəli hɛ yiŋktha ŋi, ȧtesoma-e a po təmər ŋi ɔfinɔ.

⁴⁹Kɛrɛ kɔnɔ ɔwe mə təl, ɔ wop hɛ, ɔ yi mɔ wuni ɔwe təmər aseth ka ȧŋthɔf kəte bɛs. Ma ȧmȧnt məfɔl mə sap ŋi-e, ka ɔlɛmp wati aŋ fumpɔ, ɔwa kafumpɔ ka ȧŋseth ŋati kə yi kəbana.