Read Ȧŋlemrȧnɛ Ȧfu Luk 7 Bible Online

Luk 7 - Ȧŋlemrȧnɛ Ȧfu bible

Luk 7

¹Ma ɔ po gbanthi kəfɔfanɛ aŋfəm bɛ-e, ɔ wɔŋ ro Kepaniyɔm.

²Ka ȧŋbɔy ŋa ukaptin ulɔm, ɔwe ɔ bɔthər, ɔ tu, kɔ fənthȧ tə kəfi.

³Ɔwa ma ɔkaptin ɔ təl ta Yisɔsȧŋ, ɔ som aŋbȧki ŋa aŋYuda tə kənɛmthɛnɛ kɔ kȧmȧ ɔ der, ɔ ramər ȧŋbɔy ŋɔŋ.

⁴Ɔwa maŋ bek ka Yisɔs-e, aŋ nɛmthɛnɛ kɔ tɛntɛnɛ, kaŋ pa, Kɔn ɔ yi ubeki kȧmȧ mə yɔna kɔ ȧte,

⁵pəkasifɛ ɔ bɔthər ȧŋbona a su, ɔwa kɔn kɔnɔnɛ ɔ po təmər su aseth agbanɛ.

⁶Ka Yisɔs ɔ kɔ yi ŋaŋ. Ma ɔ fatər ȧŋseth-e, ɔkaptin ubana ɔ som ayathki ro rɔŋɔŋ kəpa, Pa, te sɔmpanɛ tə kəder; kotȧy-e i bek hɛ kȧmȧ munɔ mə wɔŋ ka ȧŋseth a mi.

⁷Tȧsom sɔ-e, i tȧmtȧmnɛ hɛ kəpa i yi min beki tə kəder ro rɔmu, kɛrɛ pa gbo ȧrim, ɔwa ȧŋbɔy a mi ɔ tə yeŋk.

⁸kotȧy-e minɛ sɔ i yi wuni ka afɔsɔ ratha, ɔwa i ba atim roratha kȧmi. I kanɛ ukin ka ŋaŋ, Kɔ, ɔwa ɔ kɔnɛ; ka ulɔm, Der, ɔwa ɔ der; ka ȧŋbɔy a mi, Yɔ ȧte, ɔwa ɔ yɔ ti.

⁹Ma Yisɔs ɔ təl mȧtȧy ame, ɔ kabanɛ, kɔ fəlɛ ka aŋfəm aŋa tȧŋ kɔ, ɔ pa ro ŋaŋ, I tha bəp hɛ kəlanɛ kəbana mɔ ake hali kətɔŋ ka aŋIsrɛl.

¹⁰Ɔwa aŋsom-e, maŋ kȧlanɛ ro seth-e, aŋ bəp ȧŋbɔy ɔ po yeŋk.

¹¹Ka pə re yi ka ȧŋrey alɔm ɔ kɔnɛ ka kȧpet ȧke a bont Nen, ka aŋkarande ŋɔŋ aŋ paya kɔ yi afəm agbȧthi.

¹²Ɔwa, ma ɔ fat ka kadare ka kapet-e, kəla, a wurɔ wuni ɔwe po fi, wan runi ukin ka ɔkara kɔŋ, ɔwa kɔnɔ ɔ yi ubora. Ka afəm agbȧthi ŋa kȧpet aŋ yi yi ɔyaŋ.

¹³Ma ɔMarki ɔ nənk ɔya-e, ɔ bana kɔ ȧney, kɔ pa ro rɔŋɔŋ, Te bok.

¹⁴Ka Yisɔsȧŋ ɔ fatər ŋa, kɔ gboŋ aŋgbatha, ka aŋfəm aŋa gbanɛ kabel aŋ təmȧ. Kɔ pa, Langba, i kanɛ mu, yokanɛ.

¹⁵Ɔwa kɔnɔ ɔwe po fi ɔ yokanɛ, ɔ təp kəfɔf. Ka Yisɔs ɔ lȧnki kɔ ka ɔkara kɔŋ.

¹⁶Ka rənes rə wop aŋfəm bɛ; ɔwa aŋ yikis Kuru, aŋ pa, Unabi ubana ɔ po yokanɛ kətɔŋ kȧsu, ɔwa Kuru ɔ pənɛ hɛ aŋfəm ŋɔŋ.

¹⁷Ɔwa mapa ame mə gbanthɛnɛ ro Yudia bɛ yi ka ȧŋthɔf aŋa gbətɔ ri.

¹⁸Aŋkarande ŋa Yɔn aŋ tɔri kɔ mȧtȧy ame bɛ.

¹⁹Ka Yɔnȧŋ ɔ tela akarande ŋɔŋ ŋarəŋ ɔ som ŋa ka Yisɔs tə kəyif, Munɔ yi kɔnɔ ɔwe yi tə kəder-i, thalɔm sə kəlianɛ ulɔm-i?

²⁰Ma aŋlaŋgba aŋ bek ro ŋɔŋ, aŋ pa, Yɔn ɔbaptist ɔ som su ro rɔmu, ɔ pa, Munɔ yi kɔnɔ ɔwe yi tə kəder-i, thalɔm sə kəlianɛ ulɔm-i?

²¹Ka ȧŋlɔkɔ ŋati gbeŋ Yisɔs ɔ ramər afəm agbȧthi aŋa ba tətu-o, ɛsɔmpanɛ ɛbaŋ-o, yi akərəfi aləs, ɔwa ɔ sɔŋ kəkəli ka afith agbȧthi.

²²Ka Yisɔs ɔ wosȧnɛ ŋa ɔ pa, Kɔnɛ nu, ɔwa tɔri Yɔn mȧtȧy ama nə po nənk yi ama nə po təl; aŋfith aŋ sɔthɔ kakəli ka ŋaŋ, aŋgbɛthkɛ aŋ kɔth, aŋa ba arom a fethər ŋa, aŋtȧŋȧ aŋ təl, aŋfi aŋ kȧl yi akəli, ɔwa a tɔri ȧkɛra kəfinɔ ka Kuru ka ȧŋmɔnɛ.

²³Ɔwa wuni ka aruba wɔŋ ɔwe te fir asabu ŋa kəpənthbəla ro rɔmi.

²⁴Ma aŋsom ŋa Yɔn aŋ kɔnɛ-e, Yisɔs ɔ təp kəfɔfanɛ aŋfəm ta Yɔn, kɔ pa, Ko tȧy tȧŋ nə kɔ ro wula tə kəkəli-e? Kəthaŋkɛ ȧke aŋfef aŋ yiŋktha-i?

²⁵Ko tȧy tȧŋ nə wur tə kəkəli-e? Wuni ɔ lopra ɛlopra ɛnɔfthɔ-i? Aŋfəm aŋa wɔŋ ɛlopra ɛnɔfthɔ yi aŋa mə di ɛdi ɛtȧk-e aŋ yi ka ȧtama ta aŋbȧy.

²⁶Ko tȧy tȧŋ nə wur tə kəkəli-e? Unabi-i? Yao, i kanɛ nu, uthasi unabi.

²⁷Kɔnɔ ɔwe ta ɔwe a gbal kəpa, I som ɔsom kȧmi rodi ka mu, ɔwe mə bɛmpa aroŋ da mu rodi ka mu.

²⁸I kanɛ nu, kətɔŋ ka ŋaŋ aŋa afəm abom aŋ kom-e, ubana uthasi Yɔn ɔ yi hɛ; kɛrɛ kɔn ɔwe yi ulɔl thɔŋ bɛ ka rȧbȧy ra Kuru-e, ɔ yi ubana uthasi kɔ.

²⁹Aŋfəm bɛ yi aŋthoŋkla ɛfȧk maŋ təl-e, aŋ wosa ta mȧlompi ma Kuru, maŋ po malanɛ ȧŋbaftisəm ŋa Yɔn.

³⁰Kɛrɛ aŋFarisi yi aŋtara aŋthɔ aŋ pɛnsa tə kəwop ȧmȧŋ ŋa Kuru ta ȧte ŋaŋ, maŋ kasi ȧŋbaftisəm ŋa Yɔn.

³¹ƆMariki ɔ pa, Ko rəka raŋ mə i lomɔ aŋfəm ŋa rȧkomra are, mba, ko rəka raŋ mə aŋ bȧlȧnɛ-e?

³²Aŋ yi mɔ afɛth aŋa yirȧ ka ɔdɛr ɔthila, aŋ mutianɛ, kaŋ pa, Sə po fɛŋa nu atuleŋ, nə thɔmɔ hɛ; sə po bok, nə kulɔ hɛ.

³³Yɔn ɔbaptist ɔ der ɔ di hɛ kəbo, ɔ mun hɛ məber, ka nə pa, Ɔ ba ukərəfi.

³⁴ƆWan ka wuni ɔ der yi kədi dɛ yi kəmunȧŋ, ɔwa nə pa, Kəli, wuni wɔnthi wɔŋ, ɔ ba kəmun kəbana, ɔwa ɔ yi uyathki ka aŋthoŋkla ɛfȧk yi aŋfəm ŋa ɛhakɛ!

³⁵Kɛrɛ kətemp kə sɔthɔ məmari ka aŋwuth ŋɔŋ bɛ.

³⁶Ka ukin ka aŋFarisi ɔ muti Yisɔs tə kədi yi kɔnɔ, kɔ wɔŋ ka ȧŋseth ŋa ɔFaresi, ɔ yirȧ tə kədi.

³⁷Ɔwa kəla, wuni bom ɔ yi ka kȧpet, ɔ yi wuni ləs. Ma ɔ tȧrȧ kəpa Yisɔs ɔ yirȧ tə kədi ka ȧŋseth ŋa ɔFarisi-e, ɔ kȧrȧ ȧbithərȧ ŋȧ məsopa məfɔlfɔl,

³⁸kɔ təmȧ rodarəŋ ka ȧtȧtək tɔŋ, ɔ bok, kɔ təp kəbɔyis ȧtȧtək tɔŋ yi ȧmȧntər mɔŋ, ɔ nasi ti yi aŋfon ŋa rȧbomp rɔŋ, ɔ muməl ȧtȧtək tɔŋ, kɔ sop ti masopa məfɔlfɔl ame.

³⁹Ma ɔFaresi ɔwe muti kɔ ɔ nənk ti-e, ɔ fɔfnɛ ka ȧŋmerȧ ŋɔŋ kəpa, Bepi ɔwuni ɔwe ɔ yi unabi-e, ɔ tə tȧrȧ naŋ ko wuni ɔwuni bom ɔwe ɔ yi ɔwe gboŋ kɔ; ɔ tə tȧrȧ kəpa ɔ yi wuni ka ɛhakɛ.

⁴⁰Ka Yisɔsȧŋ ɔ wosȧnɛ kɔ ɔ pa, Saymɔn, i ba tȧy tə kəkanɛ mu. Kɔ pa, Pa, fɔf gbo.

⁴¹Afəm ŋarəŋ aŋ ba təbey ka wuni lɔm; ɔkin ɔ ba kəram kɔ ɛpɔn tɔfɔt tȧmthədɛrəŋ, ɔwa ɔlɔm ɔ ba kəram kɔ apɔn ŋin ɛsiliŋ tɔfɔt tamath.

⁴²Maŋ te ba rəka tə kərȧm-e, ɔ tera ŋa ŋarəŋȧŋ. Kanɛ mi ureke ka ŋa ŋarəŋȧŋ mə tha bɔthər kɔ-e?

⁴³Ka Saymɔn ɔ lasi ɔ pa, I nanɛ kɔn ɔwe ɔ tha tera ɔgbthi. Ka Yisɔs ɔ pa, Mə po gbək ɔlompi.

⁴⁴kɔ fəlɛ ka ɔya ɔ pa, Saymɔn, mə nənk ɔya ɔwe-i? I wɔŋ ka ȧŋseth a mu; mə sɔŋ hɛ mi mȧnt ta ȧtȧtək ta mi, kɛrɛ kɔnɔ ɔ po bɔyis ȧtȧtək ta mi yi mantər, ɔ nasi ti yi aŋfon ŋɔŋ.

⁴⁵Mə muməl hɛ mi, kɛrɛ kɔnɔ kȧbi ma i wɔŋ nɔ-əŋ, ɔ tey hɛ kəmuməl ȧtȧtək ta mi.

⁴⁶Mə sop hɛ rȧbomp ra mi mȧro, kɛrɛ ɔya ɔwe ɔ po sop ȧtȧtək ta mi yi məsopa məfɔlfɔl.

⁴⁷Tiyȧŋ i kanɛ mu, ɛhakɛ yɔŋ ɛyɛ yi ɛgbathi, a po kɔ yi tera, kotȧy-e ɔ bɔthər ɔbana; kɛrɛ ɔwe a tera ɔthan, kɔnɔ bɔthər ɔthan.

⁴⁸kɔ pa ka ɔya, A tera mu ɛhakɛ ɛ mu.

⁴⁹Ka ŋaŋ aŋa yirȧ ka kadi yi kɔnɔ aŋ təp kəpa ka ɛmerȧ yaŋ, Kanɛ yi ɔwe ɔwe mə tera ɛhakɛ sɔ-e?

⁵⁰Ɔwa ɔ pa ka ɔya, Kɔnɛ yi məthɔfəl; kȧlanɛ ka mu kə po mu kisis.