Read Ȧŋlemrȧnɛ Ȧfu Luk 9 Bible Online

Luk 9 - Ȧŋlemrȧnɛ Ȧfu bible

Luk 9

¹Ka Yisɔs ɔ tela aŋkarande ŋɔŋ tɔfɔt ŋarəŋ, kɔ sɔŋ ŋa afɔsɔ rokɔm ka akərəfi bɛ, yi tə kədamər tətu.

²kɔ som ŋa tə kətaməs rȧbȧy ra Kuru, ɔwa, tə kəyeŋkəs aŋboma.

³kɔ pa ro ŋaŋ, Te nu kera rəka o rəka ka ȧŋbiyas a nu, kətək-o, agbaŋfa-o, kəbo-o, akala-o; ɔwa ta ukin ka nu ɔ te ba suma tərəŋ.

⁴Ɔwa rə aseth o seth nə wɔŋ-e, yianɛ ri nu haŋ nə kȧlanɛ.

⁵Ɔwa aŋfəm aŋa mə te malanɛ nu-e, ma nə wur ka kȧpet kati, koŋkoŋ nu kabof ka ȧtȧtək ta nu ta məseri ro rɔŋaŋ.

⁶kaŋ kɔnɛ, aŋ kɔth ka tapet bɛ, aŋ tɔri ȧkɛra kəfinɔ ka Kuru, kaŋ yenkəs aŋboma dɛr o dɛr.

⁷Hɛrɔdȧŋ ɔbȧy ɔ təl bɛ ȧte ɔ yɔ, ɔwa pə kɛtha kɔ pəkasifɛ afəm alɔm aŋ pa, Yɔnȧŋ ɔ po yokanɛ ka rafi.

⁸Alɔm aŋ pa, Ilaya kɔnɔ kȧl der; alɔm aŋ pa, Ukin ka aŋnabi akur ɔ kȧl yokanɛ.

⁹Hɛrɔdȧŋ ɔ pa, Yɔnȧŋ i po gbetha rȧbomp rɔŋ, kɛrɛ kanɛ ɔwe ta ɔwe mə i təl mȧtȧy məwunɔŋ-e? Kɔ fela tə kənəŋk kɔ.

¹⁰Ma aŋsom aŋ po kalanɛ-e, aŋ tɔri kɔ mȧtȧy bɛ ama aŋ po yɔ. Kɔ wur ri ɔ kera ŋa dɛr ɔyeŋ ɔfati ka kȧpet ȧke a bont ro Bɛthsayda.

¹¹Ɔwa ma aŋfəm aŋ tȧrȧ ti-e, aŋ tȧŋ kɔ. Ɔ malanɛ ŋa finɔ, kɔ kanɛ ŋa ta rȧbȧy ra Kuru, kɔ damər ŋaŋ aŋa yema kȧmȧ ɔ damər ŋa.

¹²Ma aret rə yema wɔŋ-e, aŋtɔfɔt ŋarəŋ aŋ der aŋ pa ro ŋɔŋ, Lemnɛ aŋfəm kȧmȧ aŋ kɔnɛ ka tapet yi ka ȧŋthɔf aŋa gbətɔ nɔ tə kəyianɛ dɛ yi tə kəthɛns ra rədi, kotȧy-e saŋ sə yi nɔ ka ɔdɛr ɔyeŋ.

¹³Kɛrɛ kɔnɔ ɔ pa ro rɔŋaŋ. Sɔŋ ŋa nu yɛt ɛdi. Kaŋ pa, Sə ba gbo təbo tamath yi ɛlop ŋarəŋ; thambe sə kɔ wai yɛt ɛdi ta aŋfəm aŋe bɛ.

¹⁴kotȧy-e aŋfəm aruni aŋ yi mɔlɔ ma ɛwul tamath. Kɔ pa ka aŋkarande ŋɔŋ, Yɔ ŋa aŋ yirȧ ɛniŋki mɔlɔ ma təgba tərəŋ tɔfɔt, təgba tərəŋ tɔfɔt.

¹⁵kaŋ yɔ yaŋ, aŋ yɔ ŋa bɛ aŋ yirȧ.

¹⁶kɔ gbasi tabo tamath yi ɛlop ŋarəŋ, kɔ lakthi ɛfɔr ka Kuru, ɔ ruba ti, kɔ siməth ti, ɔ sɔŋ ti ka aŋkarande tə kəbot ti rodi ka aŋfəm.

¹⁷Ɔwa aŋ di, ka ŋa bɛ aŋ namra. Ka a gbas ɛbɛm ɛyɛ tianɛ, a lasər təbəlai tɔfɔt tərəŋ.

¹⁸Ka pə re yi ma ɔ ramnɛ kɔn son-e, aŋkarande ŋɔŋ aŋ der ro ŋɔŋ, kɔ yif ŋa, ɔ pa, Kanɛ aŋfəm mə aŋ pa minɛ i yi-e?

¹⁹kaŋ lasianɛ kɔ, aŋ pa, Yɔn ɔbaptist, kɛrɛ alɔm aŋ pa, Ilaya; ɔwa alɔm aŋ pa, Ukin ka aŋnabi akur ɔ yokanɛ.

²⁰kɔ pa ro rɔŋaŋ, Kɛrɛ naŋ, kanɛ nə pa minɛ i yi-e? Ka Pitaŋ ma ɔ lasianɛ kɔ ɔ pa, ƆKrayst ka Kuru.

²¹kɔ maŋ ŋa, ɔ yamari ŋa kȧmȧ aŋ te kanɛ wuni o wuni;

²²ɔ tɔri ŋa kəpa ɔWan ka wuni ɔ ba tə kənakasi mȧtȧy məlai, aŋbȧki yi aŋfode yi aŋkarmɔkɔ aŋ tə kasi kɔ, ɔwa a tə dif kɔ. Ka ȧŋrey aŋa bekȧ məsas-e ɔ ba tə kəkal yokanɛ.

²³Ka Yisɔs ɔ pa ka ŋa bɛ, Bepi wuni o wuni ɔ yema tȧŋ mi-e, ta ɔ kasisnɛ, ɔ gbasi akənt kɔŋ kəpəŋkinɛ ȧrey o rei, ɔ tȧŋ mi.

²⁴kotȧy-e wuni o wuni ɔwe yema kisis aŋesəm ŋɔŋ, ɔ tə dim ŋi; kɛrɛ wuni o wuni ɔwe mə dim aŋesəm ŋɔŋ salata minɛ, ɔkati ɔ tə kisis ŋi.

²⁵Ko ŋani aŋ yi ta wuni bepi ɔ sɔthɔ ȧdȧru bɛ, ɔwa ɔ dim thalɔm ɔ sɔnd aŋesəm ŋɔŋ-e?

²⁶Tiyȧŋ wuni o wuni ɔwe mə lap mi yi ȧsim ta mi-e, ɔWan ka wuni ɔ tə lap kɔ ma mɔ der ka aŋyiki ŋɔŋ, yi aŋa ɔKas kɔŋ, yi aŋa aŋmȧleka asəm.

²⁷Kɛrɛ i kanɛ nu təteŋ, afəm alɔm aŋ təmȧ nɔ, aŋ ba hɛ kətham rəfi haŋ aŋ nənk rȧbȧy ra Kuru.

²⁸Ka pə re yi mɔlɔ ma mərey tamthərɛsas kədarəŋ ka mapa ame, ɔ kɔnɛ ka kateŋ tə kəramnɛ, ɔwa ɔ ba Pitaŋ, Yɔnȧŋ yi Yeməsȧŋ.

²⁹Ɔwa ma ɔ ramnɛ-e, ader rɔŋ rə lafthɛ, ɔwa ȧsuma tɔŋ tə səkɛ təfera təgbɛntha.

³⁰Ɔwa kəla, afəm ŋarəŋ aŋ fɔfȧnɛ kɔ, aŋ yi Mosisȧŋ yi Ilayaŋ.

³¹Aŋ tɔrinɛ yi ayiki, aŋ fɔf ta rafi rɔŋ ara ɔ ba tə kəfi ro Yerusalɛm.

³²Kɛrɛ mərey mə bȧk Pitaŋ yi aŋa yi yi kɔnɔ; kɛrɛ maŋ po thəmɛ-e, aŋ nənk aŋyiki ŋɔŋ yi aŋfəm ŋarəŋ aŋa təmȧ yi kɔnɔŋ-e.

³³Ka pə re yi maŋ bɔ kɔnɛ-e Pita ɔ pa ka Yisɔsȧŋ, Pa, pə yi ɔfinɔ ta ȧtȧ su tə kəyi nɔ; ta sə bɛmpa ɛgbɔm ɛsas, ŋin ta ȧtȧ mu, ŋin ta Mosis, ɔwa ŋin ta Ilaya; ɔ tɛ hɛ ȧte ɔ pa.

³⁴Mɔ mɔ fɔf mȧtȧy ame-e, kərənt kə thor, kə gbəpər ŋa, kaŋ nesa maŋ wɔŋ ka karənt.

³⁵Ka rim rə wur ka karənt, rə pa, ƆWan kȧmi kɔnɔ ɔwe, ɔthith kȧmi. Təla kɔ nu.

³⁶Ma ȧrim rə thas-e, Yisɔsȧŋ ɔ tiyȧ kɔn son. Ka aŋ taŋk, aŋ kanɛ hɛ wuni o wuni ka mȧrey mati ta ȧtȧy ȧte aŋ po nənk.

³⁷Ka pə re yi ka ȧŋrey aŋa tanda-e, maŋ thor ka kateŋ-e, afəm agbȧthi aŋ bəp kɔ.

³⁸Ɔwa kəla, ulaŋgba kətɔŋ ka ȧruniya ɔ ŋata rim, ɔ pa, Karmɔkɔ, ɔmari mu kəli ɔwan uruni kȧmi; kotȧy-e kɔnɔ yi ɔwan kȧmi gbo son.

³⁹Ɔwa kəla, ukərəfi ɔ tə wop kɔ, ɔwa ka ɔlɛmp wati ɔ tə sel ɛrɔŋ; ɔ tə gbɔsi gbɔsi kɔ haŋ ɔ wur kəfoth, ɔwa kəter kɔ pə yi ɔbaki mədɛr thas gbo ɔ po yɔ kɔ ɔbaŋ sɔbɛ.

⁴⁰Ɔwa i nɛmthɛnɛ aŋkarande a mu tə kəwura kɔ, kɛrɛ aŋ gbəli hɛ.

⁴¹Ɔwa Yisɔs ɔ pa, O rəkomra rələs rəte ba kȧlanɛ, to mɛ i ba kəwon yi naŋ-e, ɔwa i muyu nu-e? Kara ɔwan ka mu nɔ.

⁴²Ma ɔ yi ras ka kəder-e, ɔkərəfi ɔ napanɛ kɔ ro thɔf, ɔ yɔ kɔ ɔbaŋ. Ɔwa Yisɔs ɔ ŋal ɔkərəfi uləs, kɔ yenkəs ɔwath uruni, kɔ kȧl lȧnki kɔ ka ɔkas kɔŋ.

⁴³Ɔwa afəm bɛ aŋ kabanɛ aŋfɔsɔ abana ŋa Kuru. Kɛrɛ ma ŋa bɛ aŋ kabanɛ ka mȧtȧy ama Yisɔs ɔ po yɔ, ɔ pa ka aŋkarande ŋɔŋ,

⁴⁴Yɔ ȧsim ȧte tə wɔŋ ka ɛləns ɛ nu, pəkasifɛ a tə lȧnki ɔWan ka wuni ka mȧta ma aŋfəm.

⁴⁵Kɛrɛ pə sɔk hɛ ŋa ta ȧŋpa aŋe, a maŋk ŋa ŋi kȧmȧ aŋ te ŋi tȧrȧ. Kaŋ nesa tə kəyif kɔ ta ȧŋpa aŋe.

⁴⁶Ɔwa ȧthonka aŋ bɔ yi kətɔŋ ka ŋaŋ ta ɔwe yi ubana uthasi bɛ.

⁴⁷Kɛrɛ ma Yisɔsȧŋ ɔ tȧrȧ ɛnanɛ ya ɛmerȧ yaŋ-e, ɔ gbasi wath ufɛth, kɔ təmər kɔ rayɛr kɔŋ,

⁴⁸ɔ pa ro rɔŋaŋ, Wuni o wuni ɔwe malanɛ ɔwath ufɛth ɔwe ka ȧŋes a mi, minɛŋ ɔ malanɛ; ɔwa wuni o wuni ɔwe mə malanɛ mi ɔ malanɛ kɔn ɔwe som mi, kotȧy-e ɔwe tha yi ulɔl bɛ kətɔŋ ka nu, kɔnɔ yi ubana.

⁴⁹Ka Yɔnȧŋ ɔ lasi ɔ pa, Pa, sə nənk ulɔm ɔ wurɔ akərəfi ka ȧŋes a mu, ɔwa sə ŋal kɔ kotȧy-e ɔ tȧŋ hɛ su.

⁵⁰Ka Yisɔsȧŋ ɔ pa ro ŋɔŋ, Te ŋal kɔ, kotȧy-e wuni ɔwe te su ŋamnɛ, ɔ yi ta ȧtȧ su.

⁵¹Ka pə re yi ma ȧŋlɔkɔ aŋ po fat kȧmȧ a malanɛ kɔ rokɔm, ɔ bȧksər tə kəkɔ ro Yerusalɛm.

⁵²kɔ som asom tə kətəma kɔ kədi, kaŋ kɔnɛ, aŋ wɔŋ rə kəpet ka aŋSameriya tə kəbɛnɛnɛ ta atɔŋ.

⁵³Kɛrɛ aŋ malanɛ hɛ kɔ ȧtesoma-e ader rɔŋ rə lomanɛ ro Yerusalɛm.

⁵⁴Ma aŋkarande ŋɔŋ Yeməsȧŋ yi Yɔnȧŋ aŋ nənk ti-e, aŋ pa, Pa, mə yema sə yamari nȧnt nə thor kəwur ka ȧkuru tə kədim ŋa ri-i?

⁵⁵kɔ fəlɛ ɔ ŋal ŋa, ɔ pa, Nə tɛ hɛ ko ayina nə ba,

⁵⁶kotȧy-e ɔWan ka wuni ɔ der hɛ tə kədim afəm kɛrɛ tə kəkisis ŋa. Kaŋ kɔnɛ rə kəpet kəlɔm.

⁵⁷Ka pə re yi maŋ yi ro roŋ-e, wuni lɔm ɔ pa ro ŋɔŋ, Pa, i ti tȧŋ mu dɛr o dɛr mȧ mə kɔ.

⁵⁸Yisɔsȧŋ ɔ pa ro ŋɔŋ, Ɛgbogboro aŋ ba təyaŋka, ɛbȧmp ya aŋfena aŋ ba ɛseth, kɛrɛ ɔWan ka wuni ɔ ba hɛ dɛr ro mɔ bot rȧbomp rɔŋ.

⁵⁹kɔ pa ka ulɔm, Tȧŋ mi, kɛrɛ ɔ pa, Pa, ter mi kȧmȧ i mɔtha kɔ maŋk ɔkas kȧmi.

⁶⁰Yisɔsȧŋ ɔ pa ro ŋɔŋ, Tey aŋfi tə kəmȧnk ȧŋfi ŋaŋ, kɛrɛ munɔŋ, kɔnɛ mə kɔ taməs rȧbȧy ra Kuru.

⁶¹Ulɔm sɔ ɔ pa, Pa, minɛ i ti tȧŋ mu, kɛrɛ ter mi ras kȧmȧ i kɔ lemnɛ ŋaŋ aŋa yi ro seth kȧmi.

⁶²Yisɔsȧŋ ɔ pa ro ŋɔŋ, Wuni o wuni ɔwe mə kəli rarəŋ ma ɔ po bot kȧta kɔŋ ka katala-e, ɔ bek hɛ ta rȧbȧy ra Kuru.