Read Ȧŋlemrȧnɛ Ȧfu Yɔn 12 Bible Online

Yɔn 12 - Ȧŋlemrȧnɛ Ȧfu bible

Yɔn 12

¹Ɔwa mərey tamthərukin yeŋka amet ma kapainɛ mə bek-e, Yisɔsȧŋ ɔ der ro Bɛthani, ro Lasarɔs ɔ yi, ɔwe Yisɔs ɔ yokas ka rafi.

²Ka a bɛmpa kɔ ri da rədi; ka Martha-əŋ ɔ binya kɔ, kɛrɛ Lasarɔs-əŋ ɔ yi ukin ka ŋaŋ aŋa yirȧ ka kədi yi kɔnɔ.

³Tiyȧŋ Merɛŋ ɔ gbasi awet ŋin ŋa mȧro məsopa məfɔlfɔl, məbaki mɔlɔ, ɔ sop ȧtȧtək ta Yisɔs, kɔ nasi ȧtȧtək tɔŋ yi aŋfon ŋɔŋ: ka ȧŋseth aŋ la ȧŋbɔnt ŋa ȧmȧro.

⁴Kɛrɛ Yudas Iskariyɔtȧŋ, ukin ka aŋkarande ŋɔŋ, ɔwe mə re sɔnd kɔ, ɔ pa,

⁵To som a te thila masopa məfɔlfɔl ame ta ɛsiliŋ tɛmɛ təsas, kȧmȧ a sɔŋ yi aŋfəm amɔnɛ-e?

⁶Ɔ fɔf ȧte pə yi hɛ kəpa ɔ ba ananɛ ta ȧŋmɔnɛ, kɛrɛ pəkasifɛ ɔ yi ukei, ɔwa mɔ ɔ ba aŋgbaŋfa, ɔ kera ara a bot ri.

⁷Kɛrɛ Yisɔsȧŋ ɔ pa, Ter kɔ: ɔ bɛnɛnɛ ma ta ȧŋrey ŋa kəmȧnk mi.

⁸Ȧtesoma-e nə ba ȧŋmɔnɛ ro nu lɔkɔ o lɔkɔ, kɛrɛ minɛŋ nə ba hɛ lɔkɔ o lɔkɔ.

⁹Aŋfəm ŋa aŋYuda agbȧthi aŋ təl kəpa Yisɔsȧŋ ɔ yi ri: kaŋ der pə yi hɛ gbo salata Yisɔs son, kɛrɛ kȧmȧ aŋ gbəli sɔ nənk Lasarɔs-əŋ, ɔwe ɔ po yokas ka rəfi.

¹⁰Kɛrɛ aŋfode abana aŋ nəŋkanɛ kȧmȧ aŋ dif sɔ Lasarɔs-əŋ;

¹¹pəkasifɛ salata kɔnɔ aŋYuda agbȧthi aŋ kɔnɛ, ɔwa aŋ lanɛ Yisɔs.

¹²Ka ȧŋrey alɔm aŋfəm agbȧthi aŋa der ka amet, ma aŋ təl kəpa Yisɔsȧŋ ɔ tə der ro Yerusalɛm-e,

¹³aŋ gbasi ɛrɔŋkɔ, kaŋ wur tə kəgbans kɔ, aŋ sel ɛrɔŋ, Hosana uruba wɔŋ ɔwe mə der ka ȧŋes ŋa ɔMarki ɔBȧy ka Isrɛl.

¹⁴Ɔwa Yisɔsȧŋ, ma ɔ po sɔthɔ asofali ufɛth-e, ɔ rensa kɔ; mɔ mə a gbal ti kəpa,

¹⁵Te nesa, ɔwan ubɛra ka ro Sayɔn: kəla, ɔBȧy ka mu ɔ der, ɔ rensa rə asofali ufɛth.

¹⁶Ka ɔtɔtɔkɔ pə sɔk hɛ aŋkarande ŋɔŋ ta mȧtȧy ame: kɛrɛ ma a po yikis Yisɔsȧŋ aŋ kala ȧmerȧ kəpa a gbal mȧtȧy ame ta atɔŋ, ɔwa kəpa aŋ po yɔna kɔ mȧtȧy ame.

¹⁷Tiyȧŋ ȧruniya ara yi yi kɔn ma ɔ tela Lasarɔs-əŋ tə kəwur ka kaboma-e, ɔwa ɔ kəlis kɔ kəwur ka rəfi, aŋ sɔŋ məseri.

¹⁸Ta ȧŋsabu aŋe sɔ aŋfəm aŋ kɔnɛ tə kəgbans kɔ, kotȧy-e aŋ təl kəpa ɔ po yɔ amisali aŋe.

¹⁹Tiyȧŋ aŋFarisi aŋ pa kətɔŋ ka ŋaŋ, Kəla ma nə te gbəli yɔ tȧy o tȧy, kəla ȧdȧru bɛ rə tȧŋ kɔ.

²⁰Ɔwa aKrik alɔm aŋ yi kətɔŋ ka aŋfəm aŋa der ka amet tə kəbatho.

²¹Aŋ der ka Filip, ɔwe ro Bɛthsayda ake ro Kalili, aŋ kanɛ kɔ, Pa, sə yema nənk Yisɔsȧŋ.

²²Filipȧŋ ɔ der ɔ kanɛ Andrɔŋ, ka Andrɔŋ yi Filipȧŋ aŋ kanɛ Yisɔsȧŋ.

²³Ka Yisɔsȧŋ ɔ pa ro ŋaŋ, Ȧŋlɔkɔ aŋ bek kȧmȧ a yikis ɔWan ka wuni.

²⁴I kanɛ nu tɛntɛnɛ, Bepi ȧŋluka ŋa awit aŋ fumpɔ hɛ ka ȧŋthɔf rokor aŋ fi, aŋ tiyȧ ri son: kɛrɛ bepi aŋ fi ri, aŋ tə wur məkomi məgbathi.

²⁵Wuni ɔwe bɔthər aŋesəm ŋɔŋ ɔ tə dim ŋi, kɛrɛ wuni ɔwe gbɛŋa aŋesəm ŋɔŋ ka ȧdȧru are ɔ tə bɛnɛ ŋi haŋ ka aŋesəm thəbana.

²⁶Bepi wuni ɔ yema yi ȧbɔy a mi, ta ɔ tȧŋ mi; ɔwa ro minɛ i yi, ri sɔ ȧŋbɔy a mi ɔ tə yi: bepi wuni o wuni ɔ yɔna mi, kɔnɔ ɔKas mɔ yikis.

²⁷Ka-ake ȧŋmerȧ a mi aŋ sɔmpa; ɔwa to mə i pa-e? Pa, kisis mi ka ȧŋlɔkɔ aŋe-e? Kɛrɛ ta ȧŋsabu aŋe gbeŋ tə i der ka ȧŋlɔkɔ aŋe.

²⁸Pa, yikis ȧŋes a mu. Ka rim rə wur ka ȧkȧriyana, rə pa, I pɔ yikis ŋi, ɔwa i ti kȧl sɔ yikis ŋi.

²⁹Ka aŋfəm aŋa təmȧ ri, aŋ təl ti, aŋ pa arɛŋ də gbɛŋ; alɔm aŋ pa, Umȧleka ɔ fɔfȧnɛ kɔ.

³⁰Kɛrɛ Yisɔsȧŋ ɔ pa, Ȧrim are rə de hɛ ta ȧtȧ mi, kɛrɛ ta ȧtȧ nu.

³¹Ka-ake ka pə yi kathoŋkas ka ȧdȧru are; ka-ake a tə wurɔ ɔwe yi rȧbomp ka ȧdȧru are.

³²Ɔwa minɛŋ, bepi a ŋata mi kəwur ka ȧŋthɔf i ti liŋ aŋfəm bɛ ro rɔmi.

³³Yisɔsȧŋ ɔ pa ȧte, kȧmȧ ɔ tɔri ko rəfi ɔ ba kəfi.

³⁴Ka ȧruniya rə pa, Sə po təl ka ȧŋthɔ kəpa Kraystȧŋ ɔ tiyȧ thəbana: ɔwa to munɔŋ mə pa, A ba kəŋata ɔWan ka wuni-e? Kanɛ yi ɔWan ka wuni ɔwe-e?

³⁵Yisɔsȧŋ ɔ pa ro ŋaŋ, Alɔkɔ agbut gbo thɔŋ ta ȧŋmothȧ kəyi ro nu. Kɔth nu ka ȧŋlɔkɔ nə ba ȧŋmothȧ, kȧmȧ ȧŋsum aŋ te nu wop: kotȧy-e ɔwe mə kɔth ka ȧŋsum-e, ɔ tɛ hɛ ro mɔ kɔ-e.

³⁶Ma nə ba ras ȧŋmothȧ-e, lanɛ nu ȧŋmothȧ kȧmȧ nə yi awuth ŋa ȧŋmothȧ. Ma Yisɔsȧŋ ɔ pa ȧte, ɔ kɔnɛ, ɔ maŋknɛ ŋa.

³⁷Kɛrɛ hali ma ɔ po tɔri ŋa ɛmisali ɛgbathi, aŋ lanɛ hɛ kɔ:

³⁸kȧmȧ ȧrim ra Isaya ɔnȧbi rə lasər, ara pa, Pa, kanɛ po lanɛ aŋkanɛ a su-e? Ɔwa ka kanɛ a ŋaibi ȧŋlonk ŋa ɔMarki e?

³⁹Ta ȧŋsabu aŋe aŋ te gbəli lanɛ, pəkasifɛ Aysayaŋ ɔ pa sɔ,

⁴⁰Ɔ po fithəs ɛfɔr yaŋ, ɔwa ɔ gbolŋas ɛmerȧ yaŋ; Thani aŋ nənk yi ɛfɔr yaŋ, ɔwa aŋ sɔthnɛ yi ɛmerȧ yaŋ, Ɔwa aŋ lafthɛ, Ɔwa i damər ŋa.

⁴¹Aysaya ɔ fɔf mȧtȧy ame ma ɔ nənk aŋyiki ŋɔŋ, ɔwa ɔ fɔf ta atɔŋ.

⁴²Halisa agbəka agbȧthi aŋ lanɛ kɔ: kɛrɛ salata aŋFarisi aŋ gbithanɛ hɛ ti, kȧmȧ a te wurɔ ŋa ka ȧŋseth agbanɛ:

⁴³kotȧy-e aŋ bɔthər aŋyiki ŋa aŋfəm pəthasi aŋyiki ŋa Kuru.

⁴⁴Yisɔsȧŋ ɔ ŋata ȧrim rɔŋ, ɔ pa, Ɔwe lanɛ mi-e, ɔ lanɛ hɛ minɛŋ, kɛrɛ kɔnɔ ɔwe som mi.

⁴⁵Ɔwa ɔwe nənk mi-e, ɔ nənk sɔ kɔnɔ ɔwe som mi.

⁴⁶I der mɔ amotha ka ȧdȧru, kȧmȧ wuni o wuni ɔwe mə lanɛ mi-e, ɔ ba hɛ tə kətia ka ȧŋsum.

⁴⁷Ɔwa bepi wuni o wuni ɔ təl ȧsim ta mi, kɛrɛ ɔ wop hɛ ti-e, i thonkas hɛ kɔ: ȧtesoma-e i de hɛ tə kəthoŋkas ȧdȧru, i der tə kəkisis ȧdȧru.

⁴⁸Ɔwuni ɔwe mə pɛnsa mi, ɔwa ɔ malanɛ hɛ ȧsim ta mi, ɔ ba ukin ɔwe mə thonkas kɔ; ȧrim ara i po fɔf, rə mə thonkas kɔ ka ȧŋrey aləpsɔ.

⁴⁹Ȧtesoma-e, i fɔf hɛ kəwur ka ȧŋmerȧ a mi; kɛrɛ ɔKas ɔwe som mi, ɔ po yamari mi ȧte mə i pa, yi ȧte mə i fɔf.

⁵⁰Ɔwa i tȧrȧ kəpa aŋyamari ŋɔŋ aŋ yi aŋesəm thəbana; tiyȧŋ ȧte mə i fɔf, i fɔf gbo mɔ mə ɔKas ɔ kanɛ mi.