Read Ȧŋlemrȧnɛ Ȧfu Yɔn 13 Bible Online

Yɔn 13 - Ȧŋlemrȧnɛ Ȧfu bible

Yɔn 13

¹Ɔwa yeŋka amet ma kapainɛ mə bek-e, ma Yisɔs ɔ tȧrȧ kəpa ȧŋlɔkɔ ŋɔŋ aŋ bek tə kəwur ka ȧdȧru are tə kəkɔnɛ ka ɔKas, ma ɔ po bɔthər aŋɔŋ aŋa yi ka ȧdȧru, ɔ bɔthər ŋa haŋ ka ɔthalnɛ.

²Maŋ yi ka kədi, Sethanɛŋ ɔ po thɔ bot ti ka ȧŋmerȧ ŋa Yudas Iskariyɔt, ɔwan ka Saymɔn, tə kəsɔnd kɔ.

³Ka Yisɔsȧŋ ma ɔ tȧrȧ kəpa ɔKas ɔ po sɔŋ mȧtȧy bɛ ka mȧta mɔŋ, ɔwa ɔ wur ka Kuru, ɔwa ɔ tə kȧl ka Kuru;

⁴ɔ yokanɛ ka kədi, ɔ bot ȧsuma tɔŋ rayɛr; ɔ gbasi kotha kənasianɛ, kɔ senɛ ki.

⁵Kədarəŋ kati ɔ kus mȧnt ka abɔl, kɔ təp kəyak ȧtȧtək ta aŋkarande, ɔwa ɔ nasi ti yi akotha kənasianɛ ȧke ɔ senɛ.

⁶Ma ɔ der ka Saymɔn Pitar-e ɔ pa ro ŋɔŋ, Pa, munɔ mə yak ȧtȧtək ta mi-i?

⁷Yisɔs ɔ pa ro ŋɔŋ, Mə tɛ hɛ ȧte i yɔ ka-ake; kɛrɛ mə tə ləpsɔ tȧrȧ ti.

⁸Pitaŋ ɔ pa ro ŋɔŋ, Mə yak hɛ ȧtȧtək ta mi thȧnkȧŋ. Yisɔsȧŋ ɔ pa ro ŋɔŋ, Bepi i yak hɛ mu-e, mə ba hɛ ȧgbȧp ro mi.

⁹Saymɔn Pitaŋ ɔ pa ro ŋɔŋ, Pa, pə yi hɛ ȧtȧtək ta mi son, kɛrɛ mȧta ma mi sɔ, yi rȧbomp ra mi.

¹⁰Yisɔsȧŋ ɔ pa ro ŋɔŋ, Ɔwe po bukɔ ɔ ba gbo tə kəyak ȧtȧtək tɔŋ, ɔwa ɔ yi ugbəraŋ: ɔwa naŋ nə yi agbəraŋ, kɛrɛ nia bɛ tha.

¹¹Ȧtesoma-e, ɔ tȧrȧ ɔwuni ɔwe mə sɔnd kɔ; tiyȧŋ ɔ pa, Nia bɛ tha yi agbəraŋ.

¹²Ma ɔ po yak ȧtȧtək ta ŋaŋ-e, ɔ kȧl gbasi ȧsuma tɔŋ, ɔ yirȧ, ɔ pa ro ŋaŋ, Nə tȧrȧ ȧte i po yɔ nu-i?

¹³Nə bontəs mi Karmɔkɔ yi Mariki; ɔwa nə pa ɔfinɔ: ȧtesoma-e ya i yi.

¹⁴Ɔwa bepi minɛŋ, ɔMarki yi ɔKarmɔkɔ ka nu, i po yak ȧtȧtək ta nu, nia sɔ nə yi tə kəyakəsanɛ ȧtȧtək ta nu.

¹⁵Ȧtesoma-e i po sɔŋ nu amɔl, kȧmȧ nia sɔ nə yɔ mɔ minɛŋ i yɔna nu.

¹⁶I kanɛ nu tɛntɛnɛ, Ȧŋbɔy ɔ thas hɛ ɔmarki kɔŋ; thalɔm ɔsom ɔ thas hɛ ɔwe som kɔ.

¹⁷Bepi nə tȧrȧ mȧtȧy ame, nə ba aruba bepi nə yɔ ma.

¹⁸I fɔf hɛ ta ȧtȧ nu bɛ; i tȧrȧ ŋaŋ aŋa i po thith: kɛrɛ mȧtȧy ame mə yi kȧmȧ mȧgbal mə lasər, ama pa, Ɔwuni ɔwe mə di kabo ka mi-e ɔ ŋata rabəthka rɔŋ kəŋamnɛ mi.

¹⁹Kətəp ka-ake i tɔri nu mɔth pə yɔnɛ, kȧmȧ bepi pə yɔnɛ-e, nə tə lanɛ kəpa minɛ yi kɔnɔŋ.

²⁰I kanɛ nu tɛntɛnɛ, Ɔwuni ɔwe malanɛ wuni o wuni ɔwe i som-e, ɔ malanɛ minɛŋ; ɔwa ɔwuni ɔwe malanɛ mi-e, ɔ malanɛ kɔnɔŋ ɔwe som mi.

²¹Ma Yisɔsȧŋ ɔ po fɔf yaŋ-e, pə kɛtha kɔ rə ȧmerȧ, kɔ pa yi asɔbɛ, I kanɛ nu tɛntɛnɛ kəpa ukin ka nu ɔ tə sɔnd mi.

²²Aŋkarande aŋ kəlianɛ, pə sɔk hɛ ŋa ta ɔwe ɔ fɔf.

²³Ukarande ukin ɔwe Yisɔsȧŋ ɔ bɔthər, ɔ sɛlinɛ ka aŋkəpət ŋa Yisɔs, ka ȧŋthebul.

²⁴Tiyȧŋ Saymɔn Pitaŋ ɔ kapanɛ kɔ, kȧmȧ ɔ yif ta ɔwe ɔ fɔf.

²⁵Ɔwa kɔnɔ ma ɔ sɛlinɛ ka aŋkəpət ŋa Yisɔs, ɔ pa ro ŋɔŋ, Pa, kanɛ ɔ yi-e?

²⁶Yisɔsȧŋ ɔ pa, Kɔn kɔnɔŋ, ka ɔwe mə i sɔŋ abɛm ma i po məth ŋi. Ma ɔ po məth ȧŋbɛm-e ɔ sɔŋ ŋi ka Yudas Iskariyɔt, ɔwan ka Saymɔn.

²⁷Kədarəŋ ka ma ɔ sɔthɔ ȧŋbɛm-e, Sethani ɔ wɔŋ kɔ, ka Yisɔsȧŋ ɔ pa ro ŋɔŋ, Ȧtȧ mȧ mə yɔ-e, yɔ ti lɛmp lɛmp.

²⁸Kɛrɛ wuni o wuni ka ȧŋthebul ɔ tɛ hɛ atəsom ɔ pa ȧte.

²⁹Aŋkarande alɔm aŋ nanɛ kəpa ma Yudasȧŋ ɔ ba aŋgbaŋfa, Yisɔsȧŋ ɔ kanɛ kɔ, Way ɛyɛt ɛyɛ sə yema ta amet; thalɔm kȧmȧ ɔ sɔŋ rəka ka ȧŋmɔnɛ.

³⁰Ma Yudasȧŋ ɔ po nɔy ȧŋbɛm-e ɔ wur rokaŋ ɔlɛmp wati; ɔwa tȧtȧk wɔŋ.

³¹Tiyȧŋ ma ɔ po wur rokaŋ-e, Yisɔsȧŋ ɔ pa, Ka-ake a yikis ɔWan ka wuni, ka Kurɔŋ ɔ sɔthɔ ayiki ro ŋɔŋ;

³²ɔwa Kurɔŋ ɔ tə yikis kɔ ka kɔn kɔnɔnɛ, ɔwa ɔ tə yikis kɔ ka ka-ake.

³³Aŋfɛth a mi, i yi gbo ro nu ta alɔkɔ agbut. Nə tə thɛns mi; pə tə yi mɔ mə i kanɛ aŋYuda, Ro mə i kɔ-e nia nə gbəli hɛ der, ya i pa ro nu ka-ake.

³⁴Ayamari afu i sɔŋ nu, kȧmȧ nə bɔthərȧnɛ; mɔ mə minɛŋ i po bɔthər nu, ya nia sɔ nə yi tə kəbɔthəranɛ.

³⁵Ka ȧte afəm bɛ aŋ tə tȧrȧ nə yi aŋkarande a mi, bepi nə bɔthərȧnɛ.

³⁶Saymɔn Pitaŋ ɔ pa ro ŋɔŋ, Pa, reke mȧŋ kɔ-e? Yisɔsȧŋ ɔ pa, Ro i kɔ-e, mə gbəli hɛ tȧŋ mi ka-ake: kɛrɛ kədarəŋ kati mə tə tȧŋ mi.

³⁷Pitaŋ ɔ pa ro ŋɔŋ, Pa, to som mə i te gbəli tȧŋ mu ka-ake-e? I ti sɔnd aŋesəm a mi ta ȧte mu.

³⁸Yisɔsȧŋ ɔ pa ro ŋɔŋ, Mə pa mə tə sɔnd aŋesəm a mu ta ȧtȧ mi-i? I kanɛ mu tɛntɛnɛ, katəpi ɔ ba hɛ kətam, haŋ mə po pɛnsa katəma məsas kəpa mə tɛ hɛ mi.