Read Ȧŋlemrȧnɛ Ȧfu Yɔn 18 Bible Online

Yɔn 18 - Ȧŋlemrȧnɛ Ȧfu bible

Yɔn 18

¹Ma Yisɔsȧŋ ɔ po fɔf ȧsim ȧte-e, ɔ wur yi aŋkarande ŋɔŋ, aŋ fəsi kabath Kidrɔn ro ȧkunk aŋ yi, ɔ wɔŋ ri yi aŋkarande ŋɔŋ.

²Ɔwa Yudasȧŋ ɔwe sɔnd kɔ, ɔ tȧrȧ ɔdɛr wati, kotȧy-e Yisɔsȧŋ yi aŋkarande ŋɔŋ aŋ sa kɔ ri katkat.

³Yudasȧŋ ȧŋlɔkɔ ŋati, ma ɔ po sɔthɔ atim yi aturgba ka aŋbȧki ŋa aŋfode yi aŋFarisi-e, ɔ der ri yi ɛlamp yi tulɛ yi ɛyɛt ɛtimȧ.

⁴Kɛrɛ Yisɔsȧŋ ma ɔ tȧrȧ mȧtȧy bɛ ama mə derər kɔ-e, ɔ wur, kɔ pa, Kanɛ mə nə thɛns-e?

⁵Aŋ wosa, Yisɔsȧŋ ɔwe ro Nasarɛth. Ka Yisɔs ɔ pa ro ŋaŋ. Minɛ ɔwe. Ka Yudasȧŋ sɔ ɔwe sɔnd kɔ-e, ɔ təmȧ yi ŋaŋ.

⁶Ma Yisɔsȧŋ ɔ pa ro ŋaŋ, Minɛ ɔwe, aŋ kala kəmuth, aŋ fumpɔ ro thɔf.

⁷kɔ yif ŋa sɔ, Kanɛ mə nə thɛns-e? Aŋ pa, Yisɔsȧŋ ɔwe ro Nasarɛth.

⁸Yisɔsȧŋ ɔ wosa kəpa, I po kanɛ nu kəpa minɛ ɔwe: bepi minɛ mə nə thɛns-e, ter nu aŋfəm aŋe aŋ kɔnɛ:

⁹kȧmȧ ȧrim rə lasər ara ɔ fɔf kəpa, Ka ŋaŋ aŋa mə po sɔŋ mi i tha dim hɛ ukin.

¹⁰Ɔwa Saymɔn Pitaŋ ma ɔ ba agbathɔ-e, ɔ tali ŋi, ɔ tap ȧŋbɔy ŋa ɔfode ubana, kɔ gbək aŋləns ŋɔŋ ȧdiyɔ. Aŋes ŋa ȧŋbɔy ŋə yi Malkɔs.

¹¹Ka Yisɔsȧŋ pa ka Pita, Wɔŋȧ aŋgbathɔ a mu ka aŋbom ŋati. I gbəli pɛnsa ampɔthi aŋa ɔKas ɔ sɔŋ mi tə kəmun-i?

¹²Ka antim yi anturgba, yi aŋsom ŋa aŋYuda aŋ wop Yisɔsȧŋ, aŋ sek kɔ,

¹³kaŋ mɔtha kera kɔ ka Anas; kotȧy-e kɔnɔ yi ɔkomanɛ ka Kayafas, ɔwe yi ɔfode ubana ka karen kati.

¹⁴Kayafas kɔnɔ yi ɔwe tɔri aŋYuda kəpa, pə tə yi ɔfisa bepi wuni kin ɔ fi ta aŋfəm.

¹⁵Ka Saymɔn Pitaŋ ɔ tȧŋ Yisɔsȧŋ, yi ukarande ulɔm sɔ. Ɔwa ma ɔfode ubana ɔ tȧrȧ ɔkarande kati, ɔ wɔŋ ro bare ka ɔfode ubana yi Yisɔsȧŋ;

¹⁶kɛrɛ Pita ɔ təmȧ ka kadare rokaŋ. Ka ɔkarande ulɔm ɔwe ɔfode ubana ɔ tȧrȧ, ɔ wur, ɔ fɔfȧnɛ ɔbɛra ɔwe mə bumər kadare, ɔ wɔŋȧ Pitaŋ.

¹⁷Tiyȧŋ ɔbɔrkɔ ɔwe mə bumər kadare ɔ pa ka Pita, Munɔ sɔ mə yi ukin ka aŋkarande ŋa ɔlangba ɔwe-i? Ɔ pa, I yi hɛ yi.

¹⁸Ɔwa ɛbɔy yi anturgba aŋ po lap nȧnt; ȧtesoma-e ɔ taŋk: ɔwa aŋ təmȧ ri aŋ bɔ saya: ɔwa Pita sɔ ɔ təmȧ yi ŋaŋ, ɔ saya.

¹⁹Ka ɔfode ubana ɔ yifəth Yisɔs ta aŋkarande ŋɔŋ, yi ta mathəksa mɔŋ.

²⁰Yisɔsȧŋ ɔ wosa, I po fɔf gbafəth ka ȧdȧru: i thəksa ka ɛseth ɛgbanɛ, yi ka ȧŋseth ŋa Kuru, ro aŋYuda bɛ aŋ gbanɛ, ɔwa i pa hɛ tȧy o tȧy rə ɔmaŋknɛ.

²¹To som mȧ mə yifəth mi-e? Yif ŋa aŋa təl ȧte i pa ro ŋaŋ: aŋ tȧrȧ ȧte i pa.

²²Ma ɔ pa ȧte ukin ka anturgba ɔwe təmȧ rayɛr kɔŋ ɔ gbantha Yisɔs yi kȧta kɔŋ, ɔ pa, Yaŋ mȧ mə wosȧnɛ ɔfode ubana-i?

²³Yisɔs ɔ pa, Bepi i po fɔf ɔləs-e, seri ta taləs tati, kɛrɛ bepi ɔlompi-e, kɔyɛŋ mȧ gbantha mi-a?

²⁴Ka Anas ɔ somrȧ kɔ usek ka Kayafas ɔfode ubana.

²⁵Saymɔn Pitaŋ ɔ təmȧ ɔ tə saya. Kaŋ pa ro ŋɔŋ, Mə yi sɔ ukin ka aŋkarande ŋɔŋ-i? Ɔ pɛnsa, ɔ pa, I yi hɛ yi.

²⁶Ukin ka ɛbɔy ya ɔfode ubana, ɔwe aŋ yi kor kin yi ɔwe Pita ɔ gbək aŋləns ŋɔŋ-e, ɔ pa, I nənk hɛ mu ka ȧŋkunk yi kɔnɔŋ-i?

²⁷Pitaŋ ɔ pɛnsa sɔ; ɔwa ka ɔlɛmp wati katəpi ɔ tam.

²⁸kaŋ wurɔ Yisɔsȧŋ ka Kayafas, aŋ wɔŋȧ kɔ ro bare ka Paylet: ɔwa pə yi bəth bəth; kɛrɛ ŋaŋ gbeŋ aŋ wɔŋ hɛ ro bare, kȧmȧ aŋ te yifasnɛ, kȧmȧ aŋ gbəli di kapainɛ.

²⁹Tiyȧŋ Payletȧŋ ɔ wur ro ŋaŋ, ɔ yif, Ko agbanthir nə gbanthir ɔlaŋgba ɔwe-e?

³⁰Aŋ wosa kəpa, Bepi ɔ yi hɛ wuni ləs-e, sə gbəli hɛ lȧnki kɔ ro mu.

³¹Payletȧŋ ɔ pa ro ŋaŋ, Gbasi kɔ nu, nə thonkas kɔ ka ȧŋthɔ a nu. AŋYuda aŋ pa, Sə ba hɛ məmari tə kədif wuni o wuni:

³²kȧmȧ ȧrim ra Yisɔs rə lasər, ara ɔ pa kətɔri ko rəfi ara ɔ ba tə kəfi.

³³Tiyȧŋ Payletȧŋ ɔ kȧl wɔŋ ro bare, ɔ tela Yisɔsȧŋ, kɔ pa ro ŋɔŋ, Munɔ yi ɔBȧy ka aŋYuda-i?

³⁴Yisɔsȧŋ ɔ wɔsa, Mə pa ȧte ka ȧŋmerȧ a mu, thalɔm alɔm aŋ kanɛ mu ta ȧtȧ mi-i?

³⁵Payletȧŋ ɔ pa, Minɛŋ i yi uYuda-i? Aŋbona a mu yi aŋfode abana aŋ lȧnki mu ro rɔmi; ko mə po yɔ-e?

³⁶Yisɔsȧŋ ɔ wosa, Rȧbȧy ra mi rə yi hɛ ka ȧdȧru are: bepi rȧbȧy ra mi rə yi ka ȧdȧru are, ɛbɔy ɛ mi aŋ tə tim naŋ kȧmȧ a te lȧnki mi ka aŋYuda: kɛrɛ rȧbȧy ra mi rə yi hɛ nɔ.

³⁷Payletȧŋ pa ro ŋɔŋ, Mə yi mən ubai-i? Yisɔsȧŋ ɔ pa Aŋko, mə pa tȧteŋ, i yi ubȧy. Ta ȧte tə a kom mi, ɔwa ta ȧŋsabu aŋe tə i der ka ȧdȧru, kȧmȧ i gbaki ta tȧteŋ. Wuni o wuni ɔwe yi ka tȧteŋ ɔ təl ȧrim ra mi.

³⁸Payletȧŋ ɔ pa, Ko yi tateŋ-e? Ma Payletȧŋ ɔ po pa ȧte, ɔ kȧl wur ka aŋYuda, ɔ pa ro ŋaŋ, I tha fir hɛ tȧy o tȧy tələs ro ŋɔŋ.

³⁹Kɛrɛ naŋ nə ba mətanɛ, kȧmȧ i tera nu wuni kin ka amet ma kapainɛ; tiyȧŋ nə yema i tera nu ɔBȧy ka aŋYuda-i?

⁴⁰kaŋ kȧl sɔŋkɔ, aŋ pa, Ɔlaŋgba ɔwe thahɔ, kɛrɛ Barabas. Ɔwa Barabas ukei ubana wɔŋ.