Read Ȧŋlemrȧnɛ Ȧfu Yɔn 20 Bible Online

Yɔn 20 - Ȧŋlemrȧnɛ Ȧfu bible

Yɔn 20

¹Ka ȧŋrey ȧtɔtɔkɔ ŋa ȧŋyik Meri ɔwe ro Makdala ɔ der ka kȧboma pə re sɔk, ɔ nənk kəpa a tɔŋa aŋsar ka kȧboma.

²Tiyȧŋ ɔ gbukɛ, ɔ der ka Saymɔn Pita, yi ka ɔkarande ulɔm, ɔwe Yisɔsȧŋ ɔ bɔthər, ɔ pa ro ŋaŋ, Aŋ po wurɔ ɔMarki ka kȧboma, ɔwa sə tɛ hɛ ro a bot kɔ.

³Pitaŋ ɔ wur, yi ɔkarande ulɔm, kaŋ kɔnɛ ka kȧboma.

⁴Ŋa ŋarəŋȧŋ aŋ gbukɛ rɔkin; kɛrɛ ɔkarande ulɔm ɔ gbukɛ lɛmp ɔ thas Pitaŋ, ɔwa ɔ mɔtha bek ka kȧboma.

⁵kɔ sanɛ-e, ɔ kəli ri, ɔ nənk akasaŋke kə fənthȧ; kɛrɛ ɔ wɔŋ hɛ ri.

⁶Saymɔn Pita sɔ ɔ der ɔ tȧŋ kɔ, ɔ wɔŋ ka kȧboma; ɔ nənk akasaŋke kə fənthȧ ri,

⁷ɔwa aŋgbasa aŋa a rapər rȧbomp rɔŋ, aŋ fənthȧ hɛ yi akasaŋke, kɛrɛ a kump ŋi thɔkɔ.

⁸Ka ɔkarande ulɔm ɔwe mɔtha bek ka kȧboma ɔ wɔŋ sɔ, kɔ nənk, ɔwa ɔ lanɛ.

⁹kotȧy-e, aŋ tha tɛ hɛ ȧte mȧgbal mə pa, kəpa ɔ ba tə kəkal yokanɛ ka rafi.

¹⁰Ka aŋkarande aŋ kȧlanɛ ka ɛseth yaŋ.

¹¹Kɛrɛ Merɛŋ ɔ təmȧ ka kȧboma rokaŋ ɔ bok: ma ɔ bok-e, ɔ sanɛ ɔ kəli ka kȧboma;

¹²kɔ nənk amaleka ŋarəŋ aŋ wɔŋ yɛt ɛlopra ɛfera aŋ yirȧ, ukin ka rȧbomp, ɔwa ukin ka ȧtȧtək, ro kabel ka Yisɔs kə la fənthȧ.

¹³kaŋ pa ro ŋɔŋ, Bithaŋ, to som mȧ mə bok-e? Ɔ pa ro ŋaŋ, Pəkasifɛ a po kera ɔMarki kȧmi, ɔwa i tɛ hɛ ro a bot kɔ-e.

¹⁴Ma ɔ po pa ȧte, ɔ fəlɛ rodarəŋ, ɔ nənk Yisɔsȧŋ ɔ təmȧ, ɔwa ɔ tɛ hɛ ti kəpa Yisɔsȧŋ kɔnɔŋ.

¹⁵Yisɔsȧŋ ɔ pa ro ŋɔŋ, Bithaŋ, to som mȧ mə bok-e? kanɛ mȧ mə thɛns-e? Ɔbɛra, ma ɔ nanɛ kəpa ɔ yi ɔbumər ka katɛl, ɔ pa ro ŋɔŋ, Pa, bepi munɔ mə po wurɔ kɔ anɔ-e, kanɛ mi ro mə po bot kɔ, ka minɛ i ti gbasi kɔ.

¹⁶Yisɔs ɔ pa ro ŋɔŋ, Meri. Ɔwa ɔ fəlɛ, kɔ pa ro ŋɔŋ, Rabɔni; ara a tepa kəpa, Karmɔkɔ.

¹⁷Yisɔsȧŋ ɔ pa ro ŋɔŋ, Te gboŋ mi; ȧtesoma-e, i tha ŋat hɛ ka ɔKas: kɔnɛ gbo ka aŋwɔnt a mi, mə pa ro ŋaŋ, I ŋat ka ɔKas kȧmi yi ɔKas ka nu; yi ka ɔKuru kȧmi, yi ɔKuru ka nu.

¹⁸Meri ɔwe ro Makdala ɔ der ɔ kanɛ aŋkarande kəpa ɔ po nənk ɔMarki, ɔwa ɔ po kanɛ kɔ mȧtȧy ame.

¹⁹Ɔwa ma rȧfɔy rə bek ka ȧŋrey ŋati, ȧŋrey ȧtɔtɔkɔ ŋa aŋyik-e, aŋkarande aŋ po tȧŋ tadare ro aŋ yi ta ranes ra aŋYuda. Ka Yisɔsȧŋ ɔ der ɔ təmȧ kətɔŋ ka ŋaŋ, ɔ pa ro ŋaŋ, Ta məthɔfəl mə yi ro nu.

²⁰Ma ɔ po pa ȧte, ɔ tɔri ŋa mȧta mɔŋ yi aŋfuthəl ŋɔŋ. Ɔwa, maŋ po nənk ɔMariki-e, aŋkarande aŋ ba məbɔnɛ.

²¹Ka Yisɔsȧŋ ɔ kȧl pa ro ŋaŋ, Ta məthɔfəl mə yi ro nu: mɔ mə ɔKas ɔ po som mi, yaŋ minɛ sɔ i som nu.

²²Ma ɔ po pa ȧte, ɔ ŋesmər ŋa, kɔ pa ro ŋaŋ, Malanɛ nu ɔYina məsəm:

²³wuni o wuni ɔwe nə tera ɛhakɛ yɔŋ-e, a tera kɔ, ɔwa wuni o wuni ɔwe nə te tera ɛhakɛ yɔŋ-e, a tera hɛ kɔ.

²⁴Kɛrɛ Thɔmɔsȧŋ ukin ka antɔfɔt ŋarəŋ, ɔwe a bont Didimɔs, ɔ yi hɛ yi ŋaŋ ma Yisɔsȧŋ ɔ der.

²⁵Ka aŋkarande alɔm aŋ pa ro ŋɔŋ, Sə po nənk ɔMarki. Kɛrɛ kɔnɔ ɔ pa ro ŋaŋ, Thambe i nənk kabur ka marɔntima ka mȧta mɔŋ, ɔwa i gboŋ aŋsəl a mi ka kabur ka marɔntima, ɔwa i gboŋ kȧta kȧmi ka aŋfuthəl ŋɔŋ, i gbəli hɛ lanɛ.

²⁶Kədarəŋ ka mərey tamthərɛsas-e aŋkarande aŋ kȧl sɔ yi ka ȧŋseth, ɔwa Thɔmɔsȧŋ ɔ yi yi ŋaŋ: ka Yisɔsȧŋ ɔ der, hali ma tadare tə yi tətaŋ, ɔ təmȧ ŋa kətɔŋ, ɔ pa, Ta məthɔfəl mə yi ro nu.

²⁷Ɔ pa ka Thɔmɔs, Bot aŋsəl a mu nɔ, ɔwa kəli mȧta ma mi; ɔwa fata kȧta ka mu, mə bot ki ka aŋfuthəl a mi: te yi wuni ɔwe te lanɛ, kɛrɛ yi wuni ɔwe lanɛ.

²⁸Thɔmɔsȧŋ ɔ pa ro ŋɔŋ, ƆMariki kȧmi yi ɔKuru kȧmi.

²⁹Yisɔsȧŋ ɔ pa ro ŋɔŋ, Thɔmɔs pəkasifɛ mə po nənk mi, mə po lanɛ; aruba aŋ yi ka ŋaŋ aŋa te tha nənk, kɛrɛ aŋ lanɛ.

³⁰Ka Yisɔsȧŋ ɔ yɔ ɛmisali ɛlɔm ɛgbathi ka kabəpər ka aŋkarande, ɛyɛ a te gbal ka ȧkȧfȧ ake:

³¹kɛrɛ a gbal ɛye, kȧmȧ nə lanɛ kəpa Yisɔsȧŋ ɔ yi ɔKrayst, ɔWan ka Kuru, ɔwa kȧmȧ bepi nə lanɛ-e, nə tə ba aŋesəm ka ȧŋes ŋɔŋ.