Read Ȧŋlemrȧnɛ Ȧfu Yɔn 6 Bible Online

Yɔn 6 - Ȧŋlemrȧnɛ Ȧfu bible

Yɔn 6

¹Kədarəŋ ka mȧtȧy ame-e, Yisɔsȧŋ ɔ fəsi kȧbȧŋ ka Kalili, ȧke yi kȧbȧŋ ka Tiberias.

²Ka runiya rəbana rə tȧŋ kɔ, ȧtesoma-e aŋ nənk ɛmisali ɛyɛ ɔ yɔ ka aŋfəm atuy.

³Ka Yisɔsȧŋ ɔ gbep ka kəteŋ, ɔ yirȧ ri yi aŋkarande ŋɔŋ.

⁴Ka amet ma kapainɛ ma aŋYuda mə fat.

⁵Ma Yisɔsȧŋ ɔ nənk kəpa runiya rəbana rə der ro ŋɔŋ-e, ɔ pa ka Filip, Reke mə sə wai təbo kȧmȧ aŋe aŋ di-e?

⁶Ɔ pa ȧte kȧmȧ ɔ mɛm kɔ, kotȧy-e kɔn kɔnɔnɛ tȧrȧ ȧte ɔ ba tə kəyɔ.

⁷Filipȧŋ ɔ pa, Təbo ta mɔlɔ ma ɛpɔn tȧmthədɛrəŋ tə bek hɛ ŋa, kȧmȧ wuni o wuni ɔ sɔthɔ kəlɔl.

⁸Andrɔŋ, ukarande kɔŋ ukin, wɔnt ka Saymɔn Pita, ɔ pa ro ŋɔŋ,

⁹Wath runi ɔ yi rɛ nɔ, ɔ ba təbo təbarli tamath, yi ɛlop ŋarəŋ: kɛrɛ to ɛye ɛ yi ta aŋfəm agbȧthi aŋe-e?

¹⁰Yisɔsȧŋ ɔ pa, Yɔ aŋfəm aŋ yirȧ. Ɔwa kereŋ kəgbȧthi kə yi ka ɔdɛr wati. Ka aŋfəm aruni aŋ yirȧ, mɔlɔ ma afəm ɛwul tamath.

¹¹Ka Yisɔsȧŋ ɔ gbasi tabo; ma ɔ po muti məmə-e, ɔ sɔŋ ti ka aŋkarande, ka aŋkarande aŋ yerəs ti ka ŋaŋ aŋa yirȧ yirȧ; ya a yerəs ɛlop to aŋ yema bɛ.

¹²Maŋ po namra-e, ɔ pa ka aŋkarande ŋɔŋ, gbasi ɛyɛ tianɛ kȧmȧ rəka o rəka rə te dinɛ.

¹³kaŋ gbas gbas ti, ɔwa aŋ lasər təbəlai tɔfɔt tərəŋ yi ɛbɛm ya tabo təbarli tamath ɛyɛ tianɛ maŋ po di.

¹⁴Tiyȧŋ ma aŋfəm aŋ nənk ȧŋmisali aŋa ɔ yɔ-e, aŋ pa, Tɛntɛnɛ ɔwe ɔ yi ɔnȧbi ɔwe ba kəder ka ȧdȧru.

¹⁵Ma Yisɔsȧŋ ɔ nənk kəpa aŋ yema re gbasi kɔ rə afɔsɔ, tə kəpɔlɔ kɔ ubai-e, ɔ wur ri ɔ gbep ka kateŋ kɔn son.

¹⁶Ma rȧfɔy rə bek-e, aŋkarande ŋɔŋ aŋ kɔ ro baŋ;

¹⁷kaŋ bȧkȧ ro bil, kaŋ fəsi tə kəkɔ ro Kepaniyɔm. Ka pə biyȧ thɔŋ, ɔwa Yisɔsȧŋ ɔ tha der hɛ ro ŋaŋ.

¹⁸Ɔwa kȧbȧŋ kə bansȧ salata aŋfef abȧki aŋa sɔŋ.

¹⁹Maŋ po ŋas mɔlɔ ma ɛmail ɛsas thalɔm ɛmail yanlɛ, aŋ nənk Yisɔsȧŋ ɔ kɔth ka kȧbȧŋ rokɔm, ɔ tə fatər ȧŋbil: kaŋ nesa.

²⁰Kɛrɛ ɔ pa ro ŋaŋ, Minɛŋ; te nu nesa.

²¹kaŋ selɔ tɛn tə kəwɔŋa kɔ ka ȧŋbil; ɔwa ka ɔlɛmp wati ȧŋbil aŋ sɔ ro aŋ yema kɔ.

²²Ka ȧŋrey alɔm-e, aŋfəm aŋa tiyȧ ka kȧbȧŋ romɔri aŋ nənk kəpa abil alɔm aŋ yi hɛ ri, thambe aŋa ro aŋkarande ŋɔŋ aŋ po bȧkȧ, ɔwa aŋ tȧrȧ kəpa Yisɔsȧŋ ɔ wɔŋ hɛ yi aŋkarande ŋɔŋ, kɛrɛ ŋaŋ aŋ kɔnɛ ŋa son,

²³(kɛrɛ təbil təlɔl tə wur ro Tiberias ka ɔdɛr ro aŋ di kabo-e, kədarəŋ ka ma ɔMarki ɔ muti mɔmɔ).

²⁴Ɔwa ma aŋfəm aŋ nənk kəpa Yisɔs ɔ yi hɛ ri, thalɔm aŋkarande ŋɔŋ, ŋaŋ sɔ aŋ bȧkȧ ka təbil aŋ der ro Kepaniyɔm, tə kəthɛns Yisɔsȧŋ.

²⁵Maŋ bəp kɔ ro baŋ mɔri-e, aŋ pa ro ŋɔŋ, Karmɔkɔ, alɔkɔ areke mə der nɔ-e?

²⁶Yisɔsȧŋ ɔ pa ro ŋaŋ, Tɛntɛnɛ, nə thɛns hɛ mi pəkasifɛ nə nənk ɛmisali, kɛrɛ ta ma nə di tabo, nə namra.

²⁷Te thɔrɔ ta adarədi ara mə dinɛ, kɛrɛ thɔrɔ ta ȧdarədi ara mə tiyȧ haŋ ka aŋesəm thəbana, ara ɔWan ka wuni ɔ tə sɔŋ nu: kotȧy-e kɔnɔ Kuru ɔKas ɔ po mathlɛ.

²⁸kaŋ pa ro ŋɔŋ, To mə sə yɔ-e, kȧmȧ sə yɔ mapanth ma Kuru-e?

²⁹Yisɔsȧŋ ɔ pa ro ŋaŋ, Ȧŋpanth ŋa Kuru ŋi aŋe, kȧmȧ nə lanɛ kɔ ɔwe ɔ po som.

³⁰Tiyȧŋ aŋ pa ro ŋɔŋ, Ko amisali mȧ mə tɔri su, kȧmȧ sə nənk, ɔwa sə lanɛ mu-e? Ko mȧ mə yɔ-e?

³¹Aŋkas a su aŋ di tamana ro wula: mɔ mə a gbal kəpa, Ɔ sɔŋ ŋa kəbo kəwur ro riyana tə kədi.

³²Ka Yisɔsȧŋ ɔ pa ro ŋaŋ, I kanɛ nu tɛntɛnɛ, pə yi hɛ Mosisȧŋ ɔwe sɔŋ nu kəbo kəwur ro riyana; kɛrɛ ɔKas kȧmi ɔ sɔŋ nu kabo ka tȧteŋ kəwur ro riyana.

³³Ȧtesoma-e kabo ka Kuru kə yi kɔn ɔwe wur ro riyana, ɔwa kə sɔŋ aŋesəm ka ȧdȧru.

³⁴kaŋ pa ro ŋɔŋ, Pa, sɔŋ su kabo ake alɔkɔ o lɔkɔ.

³⁵Yisɔsȧŋ ɔ pa ro ŋaŋ, Minɛ yi kabo ka aŋesəm: ɔwe mə der ro mi dor rə ba hɛ kəwop kɔ thəbana: ɔwa ɔwe mə lanɛ mi rəmun rə bȧk hɛ kɔ sɔ.

³⁶Kɛrɛ i kanɛ nu, Nə po mi nənk, kɛrɛ halisa nə lanɛ hɛ.

³⁷Ŋaŋ bɛ aŋa ɔKas ɔ sɔŋ mi aŋ tə der ro mi; ɔwa kɔnɔ ɔwe mə der ro mi i bȧl hɛ kɔ rokaŋ hali.

³⁸Ȧtesoma-e i po thor kəwur ro riyana, pə yi hɛ tə kəyɔ mȧselɔ ma mi gbeŋ, kɛrɛ tə kəyɔ mȧselɔ ma ɔwe som mi.

³⁹Ɔwa mȧselɔ ma ɔKas ɔwe som mi mi ame, kəpa i te dim hali ukin ka ŋa bɛ aŋa ɔ po sɔŋ mi, kɛrɛ kȧmȧ i yokas ŋa ka ȧŋrey aləpsɔ.

⁴⁰kotȧy-e mȧselɔ ma ɔwe som mi mi ame, kəpa wuni o wuni ɔwe mə nənk ɔWan, ɔwa ɔ lanɛ kɔ, ɔ tə sɔthɔ aŋesəm thəbana, ɔwa i ti yokas kɔ ka ȧŋrey aləpsɔ.

⁴¹Ka aŋYuda aŋ fɔfəthanɛ ta atɔŋ, pəkasifɛ ɔ pa, Minɛ yi kabo ȧke wur ro riyana.

⁴²kaŋ pa, Yisɔsȧŋ kɔn tha ɔwe, ɔwan ka Yosɛf-əŋ, ɔkas kɔŋ yi ɔkara kɔŋ sə tara-e, to som mɔ pa ka-ake, Minɛŋ i wur ro riana-e?

⁴³Tiyȧŋ Yisɔsȧŋ ɔ pa ro ŋaŋ, Te nu fɔfəthanɛ.

⁴⁴Wuni o wuni ɔ gbəli hɛ der ro mi, thambe ɔKas ɔwe som mi ɔ liŋ kɔ; ɔwa minɛŋ i ti yokas kɔ ka ȧŋrey aləpsɔ.

⁴⁵A po gbal ka mȧgbal ma Aŋnȧbi kəpa, Kurɔŋ ɔ tə thəksa ŋa bɛ. Wuni o wuni ɔwe po təlȧ ɔKas, ɔwa ɔ thəkəs ro ŋɔŋ, ɔ tə der ro mi.

⁴⁶Pə yi hɛ kəpa wuni o wuni ɔ po nənk ɔKas, thambe kɔnɔ ɔwe wur ka Kuru, kɔnɔ ɔ po nənk ɔKas.

⁴⁷I kanɛ nu tɛntɛnɛ, Ɔwe lanɛ mi ɔ ba aŋesəm thəbana.

⁴⁸Minɛ yi kabo ka aŋesəm.

⁴⁹Aŋkas a nu aŋ po di tamana ro wula, ɔwa aŋ po fi.

⁵⁰Ake ka yi kabo ȧke wur ro riyana, ȧke be wuni ɔ di ki, ɔ ba hɛ kəfi.

⁵¹Minɛ yi kabo kəkəli ȧke wur ro riyana; bepi wuni o wuni ɔ di kabo ake, ɔ tə kəli thəbana: ɔwa kabo ȧke mə i sɔŋ kə yi aŋdɛr a mi, ta aŋesəm ŋa ȧdȧru.

⁵²Tiyȧŋ aŋYuda aŋ gbal kətɔŋ ka ŋaŋ, aŋ pa, To ɔwuni ɔwe ɔ gbəli sɔŋ su aŋdɛr ŋɔŋ tə kədi-e?

⁵³Ka Yisɔsȧŋ ɔ pa ro ŋaŋ, I kanɛ nu tɛntɛnɛ, Thambe nə di aŋdɛr ŋa ɔWan ka wuni, ɔwa nə mun mȧtir mɔŋ-e, nə ba hɛ aŋesəm rokor ka nu.

⁵⁴Kɔnɔ ɔwe mə di aŋdɛr a mi, ɔwa ɔ mun mȧtir ma mi, ɔ ba aŋesəm thəbana, ɔwa i ti yokas kɔ ka ȧŋrey aləpsɔ.

⁵⁵kotȧy-e aŋdɛr a mi aŋ yi da rədi tɛntɛnɛ, ɔwa mȧtir ma mi mə yi da rəmun tɛntɛnɛ.

⁵⁶Ɔwe mə di aŋdɛr a mi, ɔwa ɔwe mə mun mȧtir ma mi, ɔ tiyȧ rokor kȧmi, ɔwa minɛŋ i ti tiyȧ rokor kɔŋ.

⁵⁷Mɔ mə ɔKas ukəli ɔ som mi, ɔwa i ŋesəm salata ɔKas, ya pə yi sɔ kɔn ɔwe mə di mi, kɔnɔ sɔ ɔ tə ŋesəm salata mi.

⁵⁸Kabo ȧke wur ro riyana ki ake: kə yi hɛ mɔ ȧke aŋkas a nu aŋ di, ɔwa aŋ fi: ɔwe mə di kabo ake ɔ tə ŋesəm thəbana.

⁵⁹Mȧtȧy ame Yisɔsȧŋ ɔ fɔf ka ȧŋseth agbanɛ, mɔ mɔ thəksa ro Kepaniyɔm.

⁶⁰Tiyȧŋ aŋkarande ŋɔŋ agbȧthi, maŋ təl ȧte, aŋ pa, Ȧŋpa aŋe a bȧk mədɛr, kanɛ gbəli sɔthnɛ ŋi-e?

⁶¹Ɔwa ma Yisɔsȧŋ ɔ tȧrȧ ka ȧŋmerȧ ŋɔŋ kəpa aŋkarande ŋɔŋ aŋ fɔfəthanɛ ta ti-e, ɔ pa ro ŋaŋ, Ȧte tə yɔ nu nə pənthbəla-i?

⁶²To mə pə yi bepi nə nənk ɔWan ka wuni ɔ ŋat ka ɔdɛr ro ɔ la yi thəpaŋ-e?

⁶³Aŋyina kɔnɔ mə sɔŋ aŋesəm; madɛr mə yi hɛ koko: ȧsim ȧte i po kanɛ nu, tə yi ayina, yi ŋesəm.

⁶⁴Kɛrɛ alɔm kətɔŋ ka nu aŋ lanɛ hɛ. Kotȧy-e Yisɔsȧŋ ɔ tȧrȧ kȧbi ka katəp ŋaŋ aŋa te lanɛ, ɔwa ɔwe mə sɔnd kɔ.

⁶⁵kɔ pa, Ta ȧte i po kanɛ nu, wuni o wuni ɔ gbəli hɛ der ro mi, thambe ɔKas ɔ lemnɛ ti.

⁶⁶Ka ȧŋlɔkɔ ŋati aŋkarande ŋa Yisɔs agbȧthi aŋ wur ro ŋɔŋ, aŋ kɔth hɛ sɔ yi kɔnɔŋ.

⁶⁷Ka Yisɔsȧŋ ɔ pa ka aŋtɔfɔt ŋarəŋ, Nia sɔ nə tə kɔnɛ-i?

⁶⁸Saymɔn Pita ɔ wosa, ɔ pa, Pa ka kanɛ mə sə kɔ-e? Munɔ mə ba ȧsim ta aŋesəm thəbana.

⁶⁹Ɔwa sə po lanɛ ɔwa sə tȧrȧ kəpa munɔŋ mə yi ɔSəm ka Kuru.

⁷⁰Yisɔsȧŋ ɔ pa ro ŋaŋ, Minɛŋ i thith hɛ nu tɔfɔt ŋarəŋ, ɔwa ukin ka nu ɔ ba Sethani-i?

⁷¹Ka-ake ɔ fɔf ta Yudas Iskariyɔt ɔwan ka Saymɔn: ȧtesoma-e, kɔnɔ yi ɔwe mə sɔnd kɔ, ɔ yi ukin ka antɔfɔt ŋarəŋ.