Read Ȧŋlemrȧnɛ Ȧfu Yɔn 7 Bible Online

Yɔn 7 - Ȧŋlemrȧnɛ Ȧfu bible

Yɔn 7

¹Kədarəŋ ka mȧtȧy ame-e, Yisɔsȧŋ ɔ kɔth kɔth ro Kalili; ȧtesoma-e ɔ yema hɛ kɔth kɔth ro Yudia, pəkasifɛ aŋYuda aŋ thɛns tə kədif kɔ.

²Ka amet ma aŋYuda, amet ma ɛgbɔm mə fat.

³Tiyȧŋ aŋwɔnt aruni ŋa Yisɔs aŋ pa ro ŋɔŋ, Wur nɔ, ɔwa kɔnɛ ro Yudia, kȧmȧ aŋkarande a mu sɔ aŋ gbəli nənk mȧyɔs ama mə yɔ-e.

⁴kotȧy-e wuni o wuni ɔ yɔ hɛ tȧy ro maŋknɛ, ma kɔn kɔnɔnɛ ɔ yema kȧmȧ a tȧrȧ kɔ gbafəth. Bepi mə yɔ mȧtȧy ame, tɔrinɛ ka ȧdȧru.

⁵Ȧtesoma-e hali aŋwɔnt ŋɔŋ aruni aŋ lanɛ hɛ kɔ.

⁶Ka Yisɔsȧŋ ɔ pa ro ŋaŋ, Ȧŋlɔkɔ a mi aŋ tha bek hɛ, kɛrɛ ȧŋlɔkɔ a nu aŋ yi abɛnɛnɛ lɔkɔ o lɔkɔ.

⁷Raru rə gbəli hɛ gbɛŋa nu; kɛrɛ rə gbɛŋa mi, pəkasifɛ i gbaki ta ti kəpa mȧyɔs mati mə yi mələs.

⁸Kɔnɛ nu ka amet; minɛŋ i tha kɔ hɛ ka-ake, ȧtesoma-e ȧŋlɔkɔ a mi aŋ tha lasər hɛ.

⁹Ma ɔ po pa ȧte ro ŋaŋ ɔ yirȧ ras ro Kalili.

¹⁰Kɛrɛ ma aŋwɔnt ŋɔŋ aruni aŋ po kɔnɛ ka amet-e, kɔnɔŋ sɔ ɔ kɔnɛ pə yi hɛ gbafəth, kɛrɛ pə yi gbo sɔy.

¹¹Ka aŋYuda aŋ thɛns kɔ ka amet, aŋ pa, Kɔn-a?

¹²Ka ȧsuniya aŋ fɔfəthanɛ ɔgbȧthi ta atɔŋ: alɔm aŋ pa, Ɔ yi wuni finɔ; alɔm aŋ pa, Pə yi hɛ yi, ɔ pəŋis gbo afəm.

¹³Kɛrɛ aŋfəm aŋ fɔf hɛ gbafəth ta atɔŋ ta rənes ra aŋYuda-e.

¹⁴Kɛrɛ ma amet mə bek ratɔŋ-e, Yisɔsȧŋ ɔ kɔnɛ ka ȧŋseth ŋa Kuru, ɔ thəksa ŋa.

¹⁵Ka aŋYuda aŋ kabanɛ, aŋ pa, To ɔwuni ɔwe ɔ sɔthɔ kətara, kədarəŋ kɔ kɔ hɛ rə kəkaraŋ-e?

¹⁶Yisɔsȧŋ ɔ pa ro ŋaŋ, Kathəksa kȧmi min tha ba ki, kɛrɛ kə wur ka kɔnɔ ɔwe som mi.

¹⁷Bepi wuni o wuni ɔ selɔ tə kəyɔ mȧselɔ mɔŋ-e, ɔ tə tȧrȧ ta kathəksa, bepi kə wur ka Kuru, thalɔm bepi i fɔf kəwur ka ȧŋmerȧ a mi son.

¹⁸Wuni ɔwe mə fɔf ka ȧŋmerȧ ŋɔŋ-e, ɔ thɛns gbo aŋyiki ŋɔŋ: kɛrɛ kɔnɔŋ ɔwe mə thɛns aŋyiki ŋa ɔwe po som kɔ-e, kɔnɔ kati ɔ yi təteŋ, ɔwa ɔ ba hɛ məkənə.

¹⁹Mosisȧŋ kɔn tha sɔŋ nu anthɔ-i? Kɛrɛ wuni o wuni ka nu ɔ wop hɛ ȧŋthɔ. To som nə thɛns tə kədif mi-e?

²⁰Aŋfəm aŋ pa, Munɔ mə ba ukərəfi; kanɛ mə thɛns tə kədif mu-e?

²¹Yisɔsȧŋ ɔ wosa, ɔ pa ro ŋaŋ, I po yɔ apanth ŋin, ka na bɛ nə kabanɛ.

²²Mosisȧŋ ɔ sɔŋ nu kəbirons [pə yi hɛ kəpa kə wur ka Mosisȧŋ, kɛrɛ kə wur ka aŋkas] ɔwa nə birons wuni ka aŋsabath.

²³Bepi a birons wuni ka aŋsabath, kȧmȧ a te ləsər ȧŋthɔ ŋa Mosis-e, naŋ nə tə bansər mi, ta ma i po yenkəs wuni ka ȧŋsabath-i?

²⁴Te thonkas ta məkəli, kɛrɛ thonkas kəthoŋkas kəlompi.

²⁵Aŋfəm alɔm ro Yerusalɛm aŋ pa, Kɔn tha ɔwe ɔwe ma thɛns tə kədif-i?

²⁶Kəla ɔ fɔf gbafəth, ɔwa aŋ pa hɛ koko ro ŋɔŋ. Pə gbəli yi aŋgbəka aŋ tȧrȧ ɔwe ɔ yi ɔKrayst tɛntɛnɛ-i?

²⁷Kɛrɛ ɔwuni ɔwe sə tȧrȧ ro ɔ wur; kɛrɛ bepi ɔKrayst ɔ der, wuni o wuni ɔ gbəli hɛ tȧrȧ ro mɔ wur.

²⁸Tiyȧŋ ma Yisɔsȧŋ ɔ thəksa ka ȧŋseth ŋa Kuru ɔ ŋata ȧrim rɔŋ, ɔ pa, Nə tȧrȧ mi, nə tȧrȧ sɔ ro i wur: ɔwa i der hɛ ka aŋfɔsɔ a mi, kɛrɛ kɔnɔ ɔwe som mi-e ɔ yi tȧteŋ, ɔwe nə te tȧrȧ.

²⁹Kɛrɛ minɛŋ i tȧrȧ kɔ, ȧtesoma-e i wur ro ŋɔŋ, ɔwa kɔnɔ som mi.

³⁰kaŋ yema wop kɔ: kɛrɛ wuni o wuni ɔ gboŋ hɛ kɔ kəta, pəkasifɛ ȧŋlɔkɔ ŋɔŋ aŋ tha bek hɛ.

³¹Agbathi kətɔŋ ka ȧruniya aŋ lanɛ kɔ, aŋ pa, Ma ɔKrayst ɔ der ɔ tə yɔ ɛmisali ɛgbathi ɛ thasi ɛyɛ ɔwuni ɔwe ɔ po yɔ-i?

³²AŋFarisi aŋ təl mɔ mə aŋfəm aŋ fɔfəthanɛ mȧtȧy ame ta atɔŋ; ka aŋFarisi yi aŋfode abana aŋ som asom tə kəwop kɔ.

³³Ka Yisɔsȧŋ ɔ pa ro ŋaŋ, Alɔkɔ agbut i yi ras rɛ naŋ, kədarəŋ kati i ti kɔnɛ ka ɔwe som mi.

³⁴Nə tə thɛns mi, kɛrɛ nə gbəli hɛ fir mi: ɔwa ro i yi, nə gbəli hɛ bek ri.

³⁵AŋYuda aŋ yifəthanɛ, aŋ pa, Reke ɔwuni ɔwe ɔ tə kɔ-e, kȧmȧ sə te fir kɔ-e, ɔ tə kɔ kaŋ sakanɛ kətɔŋ ka tȧbona təlɔm, tə kəthəksa tȧbona təlɔm-i?

³⁶Ko apa aŋe aŋa ɔ fɔf, Nə tə thɛns mi kɛrɛ nə ba hɛ kənəŋk mi: ɔwa ro i yi, nə gbəli hɛ bek ri-e?

³⁷Ka ȧŋrey aləpsɔ, ȧŋrey abana ŋa amet, Yisɔsȧŋ ɔ təmȧ ɔ ŋata ȧrim rɔŋ, ɔ pa, Bepi ramun rə bȧk wuni o wuni, ta ɔ der ro mi ɔ mun.

³⁸Kɔnɔ ɔwe mə lanɛ mi-e, mɔ mə mȧgbal mə pa, təbaŋ ta mȧnt ma aŋesəm tə tə wur ka akor kɔŋ.

³⁹Ɔ pa ȧte ta ɔYina, ɔwe ŋaŋ aŋa lanɛ kɔ aŋ yi tə kəsɔthɔ: ȧtesoma-e a tha sɔŋ hɛ ɔYina, pəkasifɛ a tha yikis hɛ Yisɔsȧŋ.

⁴⁰Tiyȧŋ afəm agbȧthi maŋ po təl mapa mɔŋ-e, aŋ pa, Ka tȧteŋ ɔwe ɔ yi ɔnȧbi.

⁴¹Afəm alɔm aŋ pa, Ɔ yi ɔKrayst. Kɛrɛ alɔm aŋ pa, Hɔ, ɔKrayst ɔ tə wur ro Kalili-i?

⁴²Magbal mə tɔri hɛ su kəpa ɔKrayst ɔ tə wur ka rȧkomra ra Debid, yi ka kȧpet ka ro Bɛthlihɛm, ro Debid ɔ la yi-i?

⁴³Ka məgbayanɛ mə wɔŋ kətɔŋ ka aŋfəm salata kɔnɔŋ.

⁴⁴Afəm alɔm aŋ yema wop kɔ; kɛrɛ wuni o wuni ɔ gboŋ hɛ kɔ kəta.

⁴⁵Tiyȧŋ asom aŋ der ka aŋfode abana yi aŋFarisi. Ɔwa aŋfode abana yi aŋFarisi aŋ pa ro ŋaŋ, kɔyɛŋ nə te kȧrȧ kɔ-e?

⁴⁶Aŋsom aŋ wosa aŋ pa, Wuni kəpet ɔ tha fɔf hɛ mɔ ɔwuni ɔwe.

⁴⁷Ka aŋFarisi aŋ pa, A po pəŋis nu sɔ-i?

⁴⁸Agbəka alɔm thalɔm aŋFarisi aŋ po lanɛ kɔ-i?

⁴⁹Kɛrɛ aŋfəm aŋe aŋa te tȧrȧ ȧŋthɔ, ȧranka aŋ wop ŋa.

⁵⁰Ɔwa Nikodimɔs ɔwe sa der ka Yisɔs tȧtȧk kɔnɔ yi ukin ka ŋaŋ,

⁵¹kɔ pa ro ŋaŋ, Ȧŋthɔ a su aŋ tə thonkas wuni kəte təlȧ kɔ-i, ɔwa kəte tȧrȧ ȧte ɔ yɔ-i?

⁵²Aŋ pa ro ŋɔŋ, Munɔ sɔ mə wur ro Kalili-i? Thɛns thɛns ti, mə tə fir kəpa unabi ɔ wur hɛ ro Kalili.

⁵³Ka wuni o wuni ɔ kɔnɛ ro seth kɔŋ.