Read Ȧŋlemrȧnɛ Ȧfu Yɔn 9 Bible Online

Yɔn 9 - Ȧŋlemrȧnɛ Ȧfu bible

Yɔn 9

¹Ɔwa ma Yisɔsȧŋ ɔ bɔ thas-e, ɔ nənk ulaŋgba ufith kȧbi ma a kom kɔ.

²Ka aŋkarande ŋɔŋ aŋ yif kɔ, aŋ pa, Karmɔkɔ, kanɛ yɔ ahakɛ-e, ta ma a kom kɔ ufith-e, ɔwe-o, thalɔm aŋa kom kɔ-e?

³Ka Yisɔsȧŋ ɔ pa ro ŋaŋ, Ɔwuni ɔwe ɔ yɔ hɛ ahakɛ, thalɔm aŋa kom kɔ: kɛrɛ a kom kɔ ufith kȧmȧ mȧyɔs ma Kuru mə tɔrinɛ ro ŋɔŋ.

⁴I ba kəyɔ mapanth ma kɔnɔ ɔwe som mi, ma pə yi ras rəyaŋ: rȧtȧtȧk rə tə der, ma pə yi wuni o wuni ɔ gbəli hɛ yɔ məpanth.

⁵Ma i yi nɔru, minɛ yi ȧŋmothȧ ŋa ȧdȧru.

⁶Ma ɔ po pa yaŋ-e, ɔ thuf ro thɔf, kɔ yɔ ȧmȧntəs yɔftha, kɔ sop yi ka ɛfɔr ya ɔwuni fith.

⁷kɔ pa ro ŋɔŋ, Kɔnɛ, mə wufnɛ ka ȧŋbunth aSilɔm (aŋa a tepa kəpa, Som). Kɔ kɔnɛ, ɔ wufnɛ, kɔ kȧlanɛ ukəli.

⁸Aŋfatanɛ yi ŋaŋ aŋa tȧrȧ kəpa ɔ la yi ufith, aŋ pa, Ɔwuni ɔwe mə la yirȧ tə kəthola kɔn tha ɔwe-i?

⁹Alɔm aŋ pa, Kɔnɔŋ, alɔm aŋ pa, Kɔn thahɔ, ɔ bȧlȧnɛ kɔ gbo: kɛrɛ kɔnɔ ɔ pa, Minɛŋ gbeŋ.

¹⁰Tiyȧŋ aŋ pa ro ŋɔŋ, To pə təp a kanthi ɛfɔr ɛ mu-e?

¹¹Ɔ pa, Ɔwuni ɔwe a bont Yisɔs ɔ yɔ ɛyɔftha, kɔ sop ɛfɔr ɛ mi, ɔ pa, Kɔnɛ wufnɛ ka ȧŋbunth aSilɔm, ka i kɔnɛ wufnɛ ka i sɔthɔ kəkəli.

¹²kaŋ yif kɔ, Reke ɔ yi-e? Kɛrɛ ɔlaŋgba ɔ pa, I tɛ hɛ.

¹³Ka aŋfəm aŋ kȧrȧ ɔwuni ɔwe la yi ufith ka aŋFarisi.

¹⁴Ɔwa pə yi aŋsabath ma Yisɔsȧŋ ɔ yɔ ɛyɔftha, ɔwa ɔ kanthi ɛfɔr yɔŋ.

¹⁵AŋFarisi aŋ yif kɔ sɔ to ɔ sɔthɔ kakəli kɔŋ. Ɔ pa ro ŋaŋ, Ɔ bot ɛyɔftha ka ɛfɔr ɛ mi, ka i wufnɛ, ɔwa i nənk.

¹⁶Tiyȧŋ aFaresi alɔm aŋ pa, Ɔwuni ɔwe ɔ wur hɛ ka Kuru, pəkasifɛ ɔ wop hɛ aŋsabath. Alɔm aŋ pa, To wuni ka ahakɛ mɔ gbəli yɔ ɛmisali ɛwunɔŋ-e? Məgbayanɛ mə wɔŋ kətɔŋ ka ŋaŋ.

¹⁷kaŋ kȧl pa ka ɔlaŋgba, To munɔŋ mə pa ta atɔŋ-e, ma ɔ po kanthi ɛfɔr ɛ mu-e? Ɔ pa, Unabi wɔŋ.

¹⁸Kɛrɛ aŋYuda aŋ lanɛ hɛ kəpa ɔ la yi ufith, ɔwa ɔ sɔthɔ kəkəli, haŋ aŋ tela aŋa kom ɔwe sɔthɔ kakəli kɔŋ.

¹⁹kaŋ yif ŋa aŋ pa, Ɔwan ka nu kɔnɔ ɔwe-i, ɔwe nə pa a kom kɔ ufith-i, to pə som thɔŋ ɔ kəli ka-ake-e?

²⁰Aŋa kom kɔ aŋ pa, Sə tȧrȧ kəpa ɔwan kȧsu kɔnɔŋ ɔwe ɔwa kəpa a kom kɔ ufith:

²¹kɛrɛ ara yɔ ɔ kəli ka-ake, saŋ sə tɛ hɛ ri: ɔwa sə tɛ hɛ ɔwe kanthi ɛfɔr yɔŋ-e: ɔ po tɛŋa, yif kɔ nu; ɔ tə gbakiɛnɛ.

²²Aŋ wosa yaŋ-e, pəkasifɛ aŋ nesa aŋYuda: kotȧy-e aŋYuda aŋ po lemranɛ kəpa, bepi wuni o wuni ɔ gbithanɛ kəpa Yisɔsȧŋ ɔ yi ɔKraist-e aŋ tə wurɔ kɔ ka ȧŋseth agbanɛ.

²³Tiyȧŋ aŋa kom kɔ aŋ pa, Ɔ po tɛŋa: yif kɔ nu.

²⁴AŋFarisi aŋ kȧl tela ɔlaŋgba ɔwe la yi ufith, aŋ pa ro ŋɔŋ, Yikis Kuru: sə tȧrȧ kəpa ɔwuni ɔwe ɔ yi wuni ka ahakɛ.

²⁵Ɔ wosa kəpa, Bepi ɔ yi wuni ləs-e, minɛŋ i tɛ hɛ, kɛrɛ tȧy tin i tȧrȧ, i la yi ufith kɛrɛ ka-ake i nənk.

²⁶kaŋ kȧl yif, To ɔ yɔna mu-e, to ɔ kanthi ɛfɔr ɛ mu-e?

²⁷kɔ pa, I po kanɛ nu ti, kɛrɛ nə təlȧ hɛ mi: kɔyɛŋ nə yema təl ti sɔ-e, naŋ nə yema səkɛ akarande ŋɔŋ-i?

²⁸kaŋ nal kɔ, aŋ pa, Munɔ yi ukarande kɔŋ, kɛrɛ saŋ sə yi akarande ŋa Mosis.

²⁹Sə tȧrȧ kəpa Kurɔŋ ɔ fɔfȧnɛ Mosisȧŋ, kɛrɛ ta ɔwuni ɔwe, sə tɛ hɛ ro ɔ wur.

³⁰Ɔlaŋgba ɔ pa, Kəla, tȧy təkabanɛ tȧŋ, ma nə te tȧrȧ ro ɔ wur, kɛrɛ ɔ po kanthi ɛfɔr ɛ mi.

³¹Ɔwa sə tȧrȧ kəpa Kurɔŋ ɔ təlȧ hɛ wuni ka ahakɛ; kɛrɛ bepi wuni o wuni ɔ bȧtho Kuru-e, ɔ yɔ mȧselɔ mɔŋ, kɔnɔ mɔ təlȧ.

³²Kəbi ka katəp ka ȧdȧru a tha təl hɛ kəpa wuni ɔ kanthi ɛfɔr ya wuni ɔwe a kom ufith.

³³Bepi ɔwuni ɔwe ɔ wur hɛ ka Kuru-e, ɔ gbəli hɛ yɔ tȧy o tȧy.

³⁴Aŋ pa ro ŋɔŋ, Munɔŋ gbeŋ a kom mu ka ɛhakɛ, ɔwa mə yema thəksa su-i? kaŋ wurɔ kɔ.

³⁵Yisɔsȧŋ ɔ təl kəpa a po wurɔ kɔ: ɔwa ma ɔ fir kɔ-e, ɔ pa, Munɔ mə lanɛ ka ɔWan ka Kuru-i?

³⁶kɔ pa, Pa, kɔn kanɛ-e, kȧmȧ i lanɛ kɔ-e?

³⁷Yisɔs ɔ pa ro ŋɔŋ, Mə po nənk kɔ, ɔwa kɔnɔŋ ɔwe mə fɔfȧnɛ mu.

³⁸kɔ pa, Pa, i lanɛ. Kɔ bȧtho kɔ.

³⁹Yisɔsȧŋ ɔ pa, Ta kathoŋkas tə i der ka ȧdȧru are, kȧmȧ aŋfəm aŋa te nənk aŋ nənk; ɔwa kȧmȧ ŋaŋ aŋa nənk aŋ fitha.

⁴⁰AŋFarisi alɔm aŋa təl mɔ mɔ fɔf mȧtȧy ame, aŋ pa ro ŋɔŋ, Saŋ sɔ sə yi afith-i?

⁴¹Yisɔsȧŋ ɔ pa ro ŋaŋ, Bepi nə yi afith-e, nə ba hɛ naŋ ahakɛ; kɛrɛ ka-ake nə pa, Sə nənk; tiyȧŋ aŋhakɛ a nu aŋ bȧkər.