Read Ȧŋlemrȧnɛ Ȧfu Mȧyɔs ma aŋsom 11 Bible Online

Mȧyɔs ma aŋsom 11 - Ȧŋlemrȧnɛ Ȧfu bible

Mȧyɔs ma aŋsom 11

¹Ka aŋsom yi aŋwɔnt ro Yudia aŋ təl kəpa tȧbona təlɔm sɔ tə po malanɛ ȧrim ra Kuru.

²Ɔwa ma Pitaŋ ɔ bek ro Yerusalɛm-e, ŋaŋ aŋa yi asema aŋ thɛkɛ kɔ,

³kaŋ pa, Mə wɔŋ ka aŋfəm aruni aŋbilakoro, mə kȧl di yi ŋaŋ.

⁴Ka Pitaŋ ɔ təp kətɔri ŋa ȧŋpa kətəp ka ɔtəpɛr, ɔ pa,

⁵I yi ka kȧpet ka ro Yɔpa, i ramnɛ; ɔwa ka marey i nənk mənəŋk, rəka rəlɔm rə thor kəwur ka ȧkȧriyana mɔ abɛla abana aŋa a kotər ka ɛkoŋ yanlɛ, ka aŋ der ro rɔmi.

⁶Ma i kəli ŋi təŋ-e, i nənk ɛsɛm aŋa ba tatək tanlɛ ma raru-o, ɛsɛm ya ro kȧnth-o, ɛyɛt ɛwɔrkȧ-o, yi ɛbȧmp ya ȧŋfena.

⁷Kȧ i təl ȧrim ara kanɛ mi, Pita yokanɛ, fai kȧmȧ mə di.

⁸Kɛrɛ i pa, Sako Pa, kotȧy-e rəka o rəka ara te yi rəsəm thalɔm ara yi rəyifa rə tha wɔŋ hɛ ka kȧsəŋ kȧmi.

⁹Kɛrɛ ȧrim rə kȧl sɔ kanɛ mi kəwur ka ȧkȧriyana, Ara Kuru ɔ po fethər-e, te bont ri rəyifa.

¹⁰Ka a yɔ ȧte haŋ məsas, ka a kȧl liŋ ŋi bɛ ka ȧkȧriyana.

¹¹Ɔwa kəla, ka ɔlɛmp wati afəm asas aŋ der ka ȧŋseth ro sə yi, a som ŋa ro rɔmi kəwur ro Sisaria.

¹²Ka ɔYina ɔ kanɛ mi tə kəkɔ yi ŋaŋ kəte ba asikɛ. Ɔwa pə thas ri aŋwɔnt tamthərukin aŋe aŋ paya mi, ka sə wɔŋ ka ȧŋseth ŋa ɔthem.

¹³kɔ kanɛ su to ɔ po nənk ɔmaleka ɔ təmȧ ka ȧŋseth ŋɔŋ, ɔ pa, Som ro Yɔpa kətela Saymɔn ɔwe ba ȧŋgbȧnthir ŋa Pita;

¹⁴ɔ tə kanɛ mu sim ka ȧtȧ mȧ mə kisi, munɔ yi kabɔr ka mu bɛ.

¹⁵Ɔwa, ma i təp kəfɔf-e, ɔYina məsəm ɔ thorər ŋa hali mɔ ro rɔsu ka katəp.

¹⁶Ka i kȧl nanɛ ȧrim ra ɔMarki ma ɔ pa, Tɛntɛnɛ Yɔnȧŋ ɔ baftays yi mȧnt, kɛrɛ a tə baftays nu yi ɔYina məsəm.

¹⁷Tiyȧŋ ma Kuru ɔ sɔŋ ŋa ȧŋboya ŋin mɔ mɔ sɔŋ su ma sə lanɛ ka ɔMarki Yisɔs Kraist-e, min kanɛ kəpa i gbəli timanɛ Kuru-i?

¹⁸Maŋ təl mȧtȧy ame-e, aŋ taŋk, kaŋ yikis Kuru, aŋ pa, Ɔwa Kuru ɔ po sɔŋ tȧbona təlɔm sɔ kathupi ka aŋesəm.

¹⁹Tiyȧŋ ŋaŋ aŋa sakanɛ salata ȧŋsɔmpanɛŋ aŋa yokanɛ ta Stifɛn-əŋ aŋ kɔth haŋ kəkɔ ro Finisia, ro Saiprɔs yi ro Antiɔk, aŋ fɔf hɛ ȧrim ka wuni o wuni thambe aŋ Yuda gbo.

²⁰Kɛrɛ aŋlɔm kətɔŋ ka ŋaŋ aŋ yi afəm aruni ŋa ro Saiprɔs yi ro Sirini. Aŋe, maŋ bek ro Antiɔk-e, aŋ fɔfȧnɛ aŋKrik sɔ, aŋ fɔf ta ɔMarki Yisɔs.

²¹Ka kȧta ka ɔMarki kə yi yi ŋaŋ, ka afəm agbȧthi aŋ lanɛ aŋ lafthɛ ka ɔMarki.

²²Ka tȧgbuŋ taŋ tə bek ka ɛləns ya aŋchɔch ro Yerusalɛm, kaŋ som Barnabas kȧmȧ ɔ kɔ haŋ ro Antiɔk.

²³Ɔwa kɔnɔ ma ɔ bek-e, ɔwa ɔ nənk ȧŋboŋa ŋa Kuru-e, pə bɔnɛ kɔ. Kɔ maŋ ŋa bɛ tə kəgbȧpsȧ ɔMarki rə məbotəs ma ȧmerȧ.

²⁴kotȧy-e ɔ yi wuni finɔ, ɔ la ɔYina məsəm yi kəlanɛ; ka afəm agbȧthi aŋ bȧrnɛ ka ɔMarki.

²⁵Kədarəŋ kati ɔ kɔnɛ ro Tarsɔs tə kəthɛns Sɔl-əŋ.

²⁶Ɔwa ma ɔ po fir kɔ-e ɔ kȧrȧ kɔ ro Antiɔk. Ka pə re yi ka kəren kəlolok aŋ gbanɛ yi aŋchɔch, aŋ thəksa afəm agbȧthi. Ɔwa ro Antiɔk, rə a mɔtha bont aŋkarande aKristiɛn.

²⁷Ɔwa ka marey ame anȧbi aŋ thor ro Antiɔk kəwur ro Yerusalɛm.

²⁸Ka ukin ka ŋaŋ ɔwe a bont Akabɔs, ɔ təmȧ, kɔ tɔri ŋa ka aŋfɔsɔ ŋa ɔYina kəpa dor rəbana rə tə yi ka ȧdȧru bɛ; are rə yɔnɛ ka marey ma Klɔdiɔs.

²⁹Ka aŋkarande, ukin o kin mɔ kagbəli kɔŋ kə yi, aŋ botəs tə kəsomra kəmar ka aŋwɔnt aŋa yi ro Yudia.

³⁰Ȧte aŋ yɔ, kaŋ somra ki ka aŋbȧki ka mȧta ma Barnabas yi Sɔl.