Read Ȧŋlemrȧnɛ Ȧfu Mȧyɔs ma aŋsom 14 Bible Online

Mȧyɔs ma aŋsom 14 - Ȧŋlemrȧnɛ Ȧfu bible

Mȧyɔs ma aŋsom 14

¹Ka pə re yi ro Ikoniɔm, kəpa ŋa ŋarəŋ aŋ wɔŋ ka ȧŋseth agbanɛ ŋa aŋYuda, ɔwa ka aŋYuda-o yi aŋKrik-o, ȧruniya rəbana rə lanɛ ta ȧŋsabu ŋa kafɔf ka ŋaŋ.

²Kɛrɛ aŋYuda aŋa te lanɛ aŋ pər ɛmerȧ ya tȧbona təlɔm, kaŋ ləsər ɛmerȧ yaŋ ta aŋwɔnt.

³Tiyȧŋ Pɔlȧŋ yi Banabasȧŋ aŋ wɔŋ ri, aŋ fɔf yi kəmintha ta ɔMarki ɔwe sɔŋ məseri ta ȧrim ra ȧŋboŋa ŋɔŋ, ɔ yɔ ɛmisali yi mȧtȧy məkabanɛ mə yɔnɛ ka mȧta maŋ.

⁴Kɛrɛ ȧruniya ra kȧpet rə gbayanɛ; alɔm aŋ yi ka ȧŋgbȧp ŋa aŋYuda, aŋlɔm ka ȧŋgbȧp ŋa aŋsom.

⁵Ɔwa ma tȧbona təlɔm yi aŋYuda yi aŋgbəka ŋaŋ aŋ ba ȧmerȧ ŋin tə kəyɔ ŋa ɔləs-e, dɛ yi tə kələməs ŋa məsar-e,

⁶Maŋ sɔthnɛ ti, kaŋ gbukɛ ro Listra yi ro Dabi, təpet ta ro Lekonia, yi ka ȧŋthɔf aŋa gbətɔnɛ ri.

⁷kaŋ tɔri ri ȧkɛra kəfinɔ.

⁸Ɔwa wuni lɔm ɔ yi ro Listra, ɔ ba hɛ afɔsɔ ka ȧtȧtək tɔŋ, ugbɛba wɔŋ kȧbi ka akor ka ɔkara kɔŋ, ɔ la hɛ kɔth bɛ.

⁹Kɔnɔ kati ɔ təlȧ Pɔlȧŋ mɔ mɔ fɔf; ɔwe kəli kɔ təŋ, ɔ nənk kəpa ɔ ba kəlanɛ tə kəsɔthɔ kəyeŋk mədɛr,

¹⁰kɔ pa rə rim rəbana, Təmȧ toloŋ ka ȧtȧtək ta mu. Kɔ pai, ɔ kɔth.

¹¹Ɔwa ma ȧruniya rə nənk ȧtȧ Pɔlȧŋ ɔ po yɔ-e, aŋ ŋata ȧsim taŋ, aŋ fɔf ka akənt ka ro Lekonia, Aturu aŋ po thor ro rɔsu rə mȧbȧlȧnɛ ma afəm.

¹²kaŋ bont Banabasȧŋ Yupita, ɔwa Pɔlȧŋ Mərkuri, ȧtesoma-e kɔnɔ təmȧ kədi ka kafɔf.

¹³Ka ɔfode ka Yupita ɔwe ba ȧŋseth ŋɔŋ abȧtho ka kȧpet rodi, ɔ kȧrȧ ɛthura yi məlɛŋi məbɔthi kəli ka tarare kȧmȧ kɔnɔ dɛ yi aŋfəm aŋ wurɔ ŋa sathka.

¹⁴Ma aŋsom Barnabas yi Pɔl aŋ təl ti-e, aŋ piməs ȧsuma taŋ, kaŋ wɔŋ lɛmp kətɔŋ ka aŋfəm, aŋ pa lɛɔ,

¹⁵Pa-ŋaŋ, kɔyɛŋ mə nə yɔ mȧtȧy ame-e? Saŋ sɔ sə yi afəm mɔ naŋ, sə kȧrȧ nu kɛra kəfinɔ kȧmȧ nə tey mȧtȧy məyai ame tə kəlafthɛ ka ɔKuru ukəli ɔwe bɛmpa akuru-o, anthɔf-o, kȧbȧŋ-o yi koko ara yi ri.

¹⁶Ɔwe pə yi, ka ɛlɔkɔ ɛyɛ po thas ɔ ter tȧbona bɛ tə kəkɔth ka asoŋ taŋ.

¹⁷Kɛrɛ ɔ tey hɛ ŋa kəte ba məseri ta atɔŋ, ma ɔ yɔ nu ɔfinɔ, ɔ sɔŋ nu tɔm kəwur ka ȧkuru yi ɛlɔkɔ ɛkoməs ɛgbathi, kɔ lasər ɛmerȧ ɛ nu yi ɛwɔnth yi məbɔnɛ.

¹⁸Kɛrɛ hali ka ȧsim ȧte aŋ bun thamrɔ tə kəbɛnt aŋfəm kȧmȧ aŋ te wurɔ sathka ro rɔŋaŋ.

¹⁹Kɛrɛ aŋYuda alɔm aŋ der kəwur ro Antiɔk yi ro Ikoniɔm; ɔwa maŋ po pər aŋfəm-e, aŋ ləməs Pɔlȧŋ məsar, kaŋ liŋ kɔ aŋ wurɔ kɔ ro pet, aŋ nanɛ kəpa ɔ po fi.

²⁰Kɛrɛ ma aŋkarande aŋ gbətɔ kɔ-e, ɔ yokanɛ, kɔ wɔŋ ro pet. Ka ȧŋrey alɔm-e, kɔnɔ yi Banabasȧŋ aŋ kɔnɛ ro Dabi.

²¹Ɔwa maŋ po tɔri ȧkɛra kəfinɔ ka kȧpet kati, ka aŋ po səki afəm agbȧthi akarande-e, aŋ kȧlanɛ ro Listra, ro Ikoniɔm yi ro Antiɔk.

²²kaŋ bȧksər ɛmerȧ ya aŋkarande, aŋ maŋ ŋa tə kəbasər ka kȧlanɛ, ɔwa aŋ kanɛ ŋa sɔ kəpa, ka ɛsɔmpanɛ ɛgbathi sə tə wɔŋ ka rȧbȧy ra Kuru.

²³lƆwa maŋ po thithəsȧ ŋa abȧki rə ȧchɔch o chɔch-e, ɔwa maŋ po ramnɛ yi kəwop asum-e, aŋ maŋkər ŋa ka ɔMarki ka ɔwe aŋ po lanɛ.

²⁴kaŋ thas ro Pisidiya, aŋ der ro Pamfiliya.

²⁵Ɔwa maŋ po kanɛ ȧrim ro Paka-e aŋ thor ro Ataliya.

²⁶kaŋ bȧkȧ ri rə abil, aŋ kɔnɛ ro Antiɔk ro a po maŋkər ŋa ka ȧŋboŋa ŋa Kuru ta mapanth ama aŋ po gbenthis.

²⁷Ɔwa maŋ bek-e, aŋ thoŋkla aŋchɔch dɛr rɔkin, aŋ lɔma ŋa mȧtȧy bɛ ama Kuru ɔ yɔ ka mȧta maŋ, yi to ɔ po kanthi karare ka kȧlanɛ ka tȧbona təlɔm.

²⁸Ɔwa aŋ bora kəwon ro Antiɔk yi aŋkarande.