Read Ȧŋlemrȧnɛ Ȧfu Mȧyɔs ma aŋsom 15 Bible Online

Mȧyɔs ma aŋsom 15 - Ȧŋlemrȧnɛ Ȧfu bible

Mȧyɔs ma aŋsom 15

¹Ɔwa afəm aruni alɔm aŋ der kəwur ro Yudia, ka aŋ thəksa aŋwɔnt, aŋ pa, Nə gbəli hɛ kisi thambe a birons nu ka matanɛ ma Mosis.

²Ɔwa ma Pɔlȧŋ yi Banabasȧŋ aŋ ba məputhanɛ məbana yi kəthoŋka dɛ yi aŋfəm aŋe-e, a botəs kəpa, Pɔl yi Barnabas dɛ yi ŋaŋ alɔm, aŋ yi tə kəkɔ ro Yerusalɛm ka aŋsom yi aŋbȧki ta ȧŋpa aŋe.

³Ŋaŋ mən, ma aŋchɔch aŋ paya ŋa ɔthan ro roŋ-e, aŋ thas ro Finisia yi ro Samaria, aŋ tɔri kəpa tȧbona təlɔm tə səkɛ alanɛ. Ka aŋwɔnt bɛ aŋ ba məbɔnɛ məbana.

⁴Ɔwa maŋ bek ro Yerusalɛm-e, aŋchɔch-o, aŋsom-o yi aŋbȧki aŋ malanɛ ŋa, kaŋ kanɛ mȧtȧy bɛ ama Kuru ɔ po yɔ ka mȧta maŋ.

⁵Kɛrɛ aŋlɔm ka kagbanth ka aŋFarisi aŋa lanɛ aŋ yokanɛ aŋ pa, A yi tə kəbirons ŋa, dɛ yi tə kəyamari ŋa tə kəwop ȧŋthɔ ŋa Mosis.

⁶Ka aŋsom yi aŋbȧki aŋ gbanɛ rɔkin tə kətȧmtȧmnɛ ȧŋpa aŋe.

⁷Ɔwa maŋ po ba ɛpɛnsanɛ ɛbana-e, Pitaŋ ɔ yokanɛ, ɔ pa ro rɔŋaŋ, Aŋwɔnt a mi, nə tȧrȧ kəpa ka ɔwoni Kuru ɔ thith kətɔŋ kȧsu kȧmȧ ka kȧsəŋ kȧmi tȧbona təlɔm tə ba kətəl ȧrim ra ȧkɛra kəfinɔ kȧmȧ aŋ lanɛ.

⁸Ɔwa Kurɔŋ ɔwe tȧrȧ ɛmerȧ-e, ɔ sɔŋ ŋa məseri ma ɔ sɔŋ ŋa ɔYina məsəm, mɔ mɔ po sɔŋ su.

⁹Ɔ bot hɛ ɔgbaskɛ kətɔŋ kȧsu yi ŋaŋ ma ɔ fethər ɛmerȧ yaŋ ka kȧlanɛ.

¹⁰kɔyɛŋ tɛnɛ mə nə mɛm Kurɔŋ, ma nə yema gbaŋ kothe ka talim ta aŋkarande ȧtȧ aŋkas a su yi saŋ sə te gbəli gbanɛ-e?

¹¹Kɛrɛ sə lanɛ kəpa saŋ sə ba kəkisi salata ȧŋboŋa ŋa ɔMarki Yisɔs Krayst mɔ ŋaŋ sɔ.

¹²Ka ŋaŋ bɛ aŋ taŋk, aŋ sua Banabasȧŋ yi Pɔlȧŋ ɛləns mɔ mə aŋ lɔm ta ɛmisali yi mȧtȧy məkabanɛ ama Kuru ɔ po yɔ ka mȧta maŋ kətɔŋ ka tȧbona təlɔm.

¹³Maŋ po gbanthi-e, Yeməsȧŋ ɔ pa, Aŋwɔnt a mi, sua mi nu ɛləns.

¹⁴Simiyɔn ɔ po tɔri su to Kurɔŋ ɔ mɔtha kori tȧbona təlɔm kȧmȧ ɔ wurɔ kətɔŋ ka ŋaŋ afəm ta ȧŋes ŋɔŋ.

¹⁵Ɔwa Aŋnȧbi aŋ ba dim din ta ȧte mɔ mə a gbal kəpa,

¹⁶Kədarəŋ ka mȧtȧy ame i ti kȧl der, I ti kȧl təmər ȧŋseth ŋa Debid aŋa po fumpɔ. I ti kȧl təmər aŋkinthɔ ŋati gbeŋ, Ɔwa i ti təmər ŋi sɔ,

¹⁷Kama aŋfəm aŋa tiyȧ aŋ thɛns ɔMarki, Yi tȧbona təlɔm bɛ ka aŋa a bont ȧŋes a mi,

¹⁸ƆMariki ɔwe mə tɔri mȧtȧy ame bɛ kȧbi ka thəpaŋ, kɔnɔ pa.

¹⁹Tiyȧŋ magbək ma mi mə yi kȧmȧ sə te bȧr ɔbaki ka ŋaŋ aŋa mə lafthɛ ka Kuru kətɔŋ ka tȧbona təlɔm,

²⁰kɛrɛ ta sə gbalər ŋa kȧmȧ aŋ gbapɛ rayifa ra ɛyɛt ɛpath, yi kərəp, yi ɛsɛm a dif kəte loŋ mətir, yi mətir.

²¹kotȧy-e, Mosisȧŋ kȧbi ka thəpaŋ ɔ ba rə kəpet o pet ŋaŋ aŋa mə taməs kɔ, maŋ karaŋ mȧgbal mɔŋ ka ɛseth ɛgbanɛ asabath o sabath.

²²Ka aŋsom, yi aŋbȧki, yi aŋgbanɛ bɛ aŋ nənk ti ɔfinɔ tə kəthith afəm aruni kətɔŋ ka ŋaŋ tə kəsom ro Antiɔk yi Pɔlȧŋ dɛ yi Banabasȧŋ, kaŋ thith Yudasȧŋ ɔwe a bont Basabas, yi Sailasȧŋ, aŋa yi aŋkərbomp kətɔŋ ka aŋwɔnt.

²³kaŋ gbal yɛŋ ka mȧta maŋ, aŋ pa, Aŋsom yi aŋbȧki dɛ yi aŋwɔnt aŋ somra ɛkori ka aŋwɔnt aŋa yi ka tȧbona təlɔm ro Antiɔk, ro Siria, yi ro Silisia.

²⁴Ma sə po təl kəpa alɔm aŋa wur ro rɔsu aŋ sɔmpa nu yi sim, aŋ lafthɛ lafthɛ ɛmerȧ ɛ nu, aŋ pa, Tha nə yɔ a birons nu, ɔwa tha nə wop ȧŋthɔ; kɛrɛ saŋ sə sɔŋ hɛ ŋa aŋyamari awunɔŋ.

²⁵Sə nənk ti ɔfinɔ, sə po sɔthɔ ȧmerȧ ŋin tə kəthithəs afəm tə kəsom ŋa ro rɔnu yi Barnabas dɛ yi Pɔl aŋa su abɔthər,

²⁶alaŋgba aŋa po sɔnd ɛŋesəm yaŋ ta ȧŋes ŋa ɔMarki kȧsu Yisɔs Krayst.

²⁷Tiyȧŋ sə som Yudasȧŋ yi Sailas-əŋ; ŋaŋ gbeŋ ka tasəŋ taŋ aŋ tə tɔri nu mȧtȧy ama sə gbal.

²⁸kotȧy-e ɔYina məsəm ɔ nənk ti ɔfinɔ, ɔwa saŋ sɔ, tə kəte reŋ nu kothe o kothe pəthas mȧtȧy məmari ame,

²⁹kəpa nə gbapɛ ɛyɛt ɛyɛ a po wurɔ ta sathka, ɛyɛt ɛbumərnɛ, yi mətir, dɛ yi ɛsɛm aŋe a dif kəte loŋ mətir, yi kərəp. Bepi nə sobinɛ ka mȧtȧy ame-e, pə tə yi nu ɔfinɔ. Maŋ piar nu.

³⁰Ɔwa ŋaŋ, ma a ter ŋa-e, aŋ der ro Antiɔk. Ɔwa maŋ po thoŋkla ȧruniya dɛr rɔkin-e, aŋ laŋklia ŋa ȧŋreka.

³¹Maŋ po karaŋ ŋi-e, aŋ sel məbɔnɛ ta mathɔfəl ama aŋ sɔŋ ŋa.

³²Ka Yudasȧŋ yi Sailas-əŋ, maŋ yi Aŋnȧy sɔ-e, aŋ maŋ aŋwɔnt rə sim təlai, aŋ bȧksər ŋa.

³³Maŋ won ri haŋ-e, aŋwɔnt aŋ ter ŋa rə məthɔfəl tə kəkalanɛ ka ŋaŋ aŋa po som ŋa.

³⁴Kɛrɛ Sailas-əŋ ɔ nənk ti ɔfinɔ tə kətia ri.

³⁵Pɔl yi Barnabas aŋ tiyȧ ro Antiɔk, aŋ thəksa ɔwa aŋ tɔri ȧrim ra ɔMarki, dɛ yi afəm alɔm agbȧthi sɔ.

³⁶Kədarəŋ ka mərey məlɔm-e, Pɔlȧŋ ɔ pa ka Banabasȧŋ, Ka-ake maŋ kȧlanɛ nu rə kəpet o pet ro sə po taməs ȧrim ra ɔMarki kȧmȧ sə kori aŋwɔnt, ɔwa sə kəli to pə yi dɛ yi ŋaŋ.

³⁷Ɔwa Barnabas ɔ yema banɛnɛ sɔ Yɔnȧŋ ɔwe a bont Mark.

³⁸Kɛrɛ Pɔl ɔ nənk hɛ ti ɔfinɔ tə kəba kɔ, kɔnɔ ɔwe po gbapɛ ŋa ro Pamfiliya, ɔwe te kɔ yi ŋaŋ ka mapanth.

³⁹Ka məputhanɛ mə wɔŋ kətɔŋ ka ŋaŋ, haŋ aŋ sakanɛ. Ɔwa Banabasȧŋ ɔ ba Mark-əŋ, kɔ bȧkȧ ka abil, ɔ kɔnɛ ro Saiprɔs.

⁴⁰Kɛrɛ Pɔlȧŋ ɔ thith Sailas-əŋ, kaŋ kɔnɛ, kərarəŋ ka aŋwɔnt aŋ maŋkər ŋa ka ȧŋboŋa ŋa ɔMarki.

⁴¹kɔ thas ro Siria yi ro Silisia bɛ, ɔ bȧksər ɛchɔch.