Read Ȧŋlemrȧnɛ Ȧfu Mȧyɔs ma aŋsom 19 Bible Online

Mȧyɔs ma aŋsom 19 - Ȧŋlemrȧnɛ Ȧfu bible

Mȧyɔs ma aŋsom 19

¹Ka pə re yi ma Apɔlɔsȧŋ ɔ yi ro Kɔrinth-e, Pɔl ɔ thas ka ȧŋthɔf aŋa yi ka kȧmɛrɔ, kɔ der ro Ɛfisɔs, kɔ bəp ri akarande alɔm.

²kɔ pa ro ŋaŋ, Nə po sɔthɔ ɔYina məsəm ma nə lanɛ-i? kaŋ pa ro ŋɔŋ, Sə tha təl hɛ ras bepi ɔYina məsəm ɔ yi-e.

³kɔ pa, Ko ȧbaftisəm a baftays nu-e? kaŋ pa, Ka ȧŋbaftisəm ŋa Yɔn.

⁴Ka Pɔl ɔ pa, Yɔnȧŋ ɔ baftays ȧŋbaftisəm ŋa kathupi, ɔ kanɛ aŋfəm kəpa aŋ yi tə kəlanɛ ɔwe mə der kədarəŋ kɔŋ, kɔnɔ yi Yisɔs Kraystȧŋ.

⁵Maŋ təl ȧte, aŋ yɔ a baftays ŋa ka ȧŋes ŋa Yisɔs Krayst.

⁶Ɔwa ma Pɔl ɔ reŋ ŋa mȧta mɔŋ-e, ɔYina məsəm ɔ thorər ŋa; kaŋ fɔf tənt, aŋ nȧbi.

⁷Ŋa bɛ aŋ yi afəm aruni tɔfɔt ŋarəŋ.

⁸Ka Pɔlȧŋ ɔ wɔŋ ka ȧŋseth agbanɛ, ɔ fɔf rə kəmintha mɔlɔ ma yof ɛsas, ɔ fɔfȧnɛ ɔwa ɔ thɔnthɔ ŋa ta mȧtȧy ma rȧbȧy ra Kuru.

⁹Kɛrɛ ma alɔm aŋ gbolŋanɛ, ɔwa aŋ kasi lanɛ, ɔwa rodi ka ȧruniya aŋ fɔf ɔləs ta aRoŋ-e, ɔ wur ro ŋaŋ, kɔ gbaski aŋkarande, ɔ thəksa ŋa ȧrey o rey ka aŋskul ŋa Tirenɔs.

¹⁰Ka ȧte tə yi mɔlɔ ma təren tərəŋ. Tiyȧŋ ŋa bɛ aŋa yirȧ ro Asia, aŋYuda yi aŋKrik, aŋ po təl ȧrim ra ɔMarki Yisɔs.

¹¹Ka Kuru ɔ yɔ məyɔs məkabanɛ ka mȧta ma Pɔl,

¹²haŋ a kera ɛgbasa yi atotha ka aŋtuy kəwur ka ȧŋdɛr ŋa Pɔl, ɔwa tatu tə gbapɛ ŋa, ɔwa aŋkərəfi aləs aŋ wur ŋa.

¹³kaŋ Yuda alɔm athasəs-thasəs aŋa mə wurɔ akərəfi-e, aŋ mɛm tə kəbontəs ȧŋes ŋa ɔMarki Yisɔs rokɔm ka ŋaŋ aŋa ba akərəfi aləs, kəpa, I yamari nu ka Yisɔs ɔwe Pɔlȧŋ mɔ taməs, tə kəwur.

¹⁴Ka awuth aruni tȧmthədɛrəŋ ŋa Skifa, uYuda, urəbomp kətɔŋ ka aŋfode, aŋ yɔ ȧte.

¹⁵Ka ɔkərəfi uləs ɔ pa, I tȧrȧ Yisɔsȧŋ, ɔwa i tȧrȧ Pɔlȧŋ, kɛrɛ na kanɛ-e?

¹⁶Ka ɔlaŋgba ɔwe ba ɔkərəfi uləs ɔ fumpər ŋa, kɔ tim ŋa, kɔ tham ŋa haŋ aŋ wur ka ȧŋseth ŋati, ŋa atiŋ dɛ yi kəba təsam.

¹⁷AŋYuda dɛ yi aŋKrik bɛ aŋa yirȧ ro Ɛfisɔs, aŋ tȧrȧ ȧte, ka rənes rə wop ŋa bɛ, ɔwa aŋ bondəs ȧŋes ŋa ɔMarki Yisɔs.

¹⁸Ɔwa afəm agbȧthi aŋa po lanɛ-e, aŋ der aŋ gbithanɛ, kaŋ lɔməs mȧyɔs maŋ.

¹⁹Ɔwa afəm agbȧthi aŋa yɔ rəmɛn, aŋ kȧrȧ ȧtȧfȧ ta ŋaŋ dɛr rɔkin, kaŋ thɔy ti ro der kədi ka aŋfəm bɛ; ɔwa aŋ lɔməs amɔlɔ mati, kaŋ fir kəpa mə yi mɔlɔ ma ɛpɔn ɛwul yɛrəŋ.

²⁰Yaŋ ȧrim ra ɔMarki rə bondȧ ɔbana, ɔwa rə sɔthɔ kətham.

²¹Ɔwa kədarəŋ ka mȧtȧy ame-e, Pɔlȧŋ ɔ botəs ka ȧŋmerȧ ŋɔŋ kəpa ɔ tə kɔth ro Masidonia yi ro Akaya, tə kəkɔ ro Yerusalɛm, kɔ pa, Bepi i wur ri-e, tha i nənk ro Rom.

²²kɔ som afəm ŋarəŋ aŋa mə mar kɔ, Timɔthi-əŋ yi Irastɔs, ro Masidonia, kɛrɛ kɔn kɔnɔnɛ ɔ yirȧ ras ro Asia.

²³Ȧŋlɔkɔ ŋati asolgbontho abana aŋ yokanɛ ro pet ta aRoŋ,

²⁴kotȧy-e wuni lɔm ri-e, ȧŋes ŋɔŋ ŋȧ yi Dimitriyɔs, ukȧbi ka ȧŋkala ȧferȧ, ɔwe mə bɛmpa ɛburu ɛ məsar ta kabȧtho ka Dayana, ɔwa ɔ kȧrȧ məpanth məgbȧthi ka aŋa mə yɔ rȧtol rati;

²⁵kɔnɔ thoŋkla ŋa dɛr rɔkin, dɛ yi aŋfəm ŋa mapanth min mati, kɔ pa, Pa ŋaŋ, nə tȧrȧ kəpa ka mȧpanth ame rȧ mȧ sə sɔthɔ rȧyola rȧsu.

²⁶Ɔwa nə nənk, nə kȧl təl kəpa pə yi hɛ gbo ro Ɛfisɔs son-e, kɛrɛ pə bun yi ro Asia bɛ, Pɔlȧŋ ɔwe ɔ po thɔnthɔ ɔwa ɔ po lȧfthi afəm agbȧthi, kɔ pa, Turu thahɔ aŋa a bɛmpanɛ məta.

²⁷Tiyȧŋ pə yi hɛ gbo mapanth ma su son ama wɔŋ məlap, kɛrɛ a tə səki ȧŋseth ŋa ɔkuru ubɛra ubana Dayanaŋ, ȧyay ɔwa pə won hɛ a tə thora kɔ ka aŋyiki ŋɔŋ, kɔnɔ ɔwe ŋa bɛ ro Asia yi ȧdȧru məaŋ bȧtho.

²⁸Maŋ təl ȧte-e, aŋ bansȧ kəbansa kəbana, kaŋ sel ɛrɔŋ, aŋ pa, Dayana ɔka aŋƐfisɔs ɔ yi ubana.

²⁹Ka kȧpet bɛ kə la yi məsɔkanɛ, ka aŋfəm aŋ wop Kayɔs yi Aristarkɔs, afəm ŋa ro Masidonia, aŋkos ŋa Pɔl ka ȧŋbiyas, kaŋ kȧrȧ ŋa kəgbukɛŋ ka ɔdɛr ɔwol.

³⁰Ma Pɔlȧŋ ɔ bun wɔŋ tə kəfɔfanɛ aŋfəm-e, aŋkarande aŋ selɔ hɛ ɔ yɔ yi.

³¹Ɔwa afəm abana alɔm ro Asia aŋa yi aŋyathki ŋɔŋ, aŋ som ro ŋɔŋ, aŋ nɛmthɛnɛ kȧmȧ ɔ te wɔŋ kətɔŋ ka aŋfəm.

³²Tiyȧŋ alɔm aŋ woŋa ȧte, alɔm ȧtȧŋ, kotȧy-e ȧruniya rə sɔkanɛ; ɔwa agbȧthi pay aŋ tɛ hɛ ko som aŋ thoŋklanɛ dɛr rɔkin.

³³kaŋ wurɔ Alɛksandər kətɔŋ ka ȧruniya, ka aŋYuda aŋ təmər kɔ kədi. Ka Alɛksandər ɔ ŋata kȧta kɔŋ kȧmȧ aŋ taŋk kȧmȧ ɔ fɔfȧnɛ aŋfəm.

³⁴Kɛrɛ maŋ sɔthnɛ kəpa ɔ yi uYuda-e, ŋa bɛ aŋ woŋa mɔlɔ ma ɛhawa yɛrəŋ kəpa, Dayana ɔka aŋƐfisɔs ɔ yi ubana.

³⁵Ma ɔgbal ka kȧpet ɔ po thɔfələs ȧruniya-e ɔ pa, Naŋ alaŋgba ŋa ro Ɛfisɔs, ko wuni wɔŋ ɔwe te tȧrȧ kəpa kȧpet ka aŋƐfisɔs kə yi ɔbumər ka ȧŋseth ŋa Dayana ubana, yi mȧbȧlȧnɛ ama fumpɔ kəwur ka Yupita-e?

³⁶Tiyȧŋ ma a te gbəli pɛnsa mȧtȧy ame-e, nə yi tə kətaŋk, pə mar hɛ nə yɔ tȧy o tȧy kəte mɔtha nanɛ.

³⁷kotȧy-e nə po kȧrȧ aŋlaŋgba aŋe nɔ; aŋ yi hɛ alukəs ɛyɛt ya ɛseth ɛbȧtho, ɔwa aŋ fɔf hɛ ɔləs ta ɔkuru kȧsu ubɛra.

³⁸Tiyȧŋ bepi Dimitriyɔs yi aŋfəm aŋa yɔna kɔ məpanth-e, aŋ ba apa yi wuni o wuni, ɛbare ɛ kanthɛ, ɔwa aŋbȧy aŋ yi ri. Ta aŋ fȧkəthȧnɛ tətək.

³⁹Kɛrɛ bepi nə yif ta tȧy o tȧy təlɔm-e, a tə gbək ti ka ȧŋbare.

⁴⁰Ȧtesoma-e, tə tɛntɛnɛ a gbəli gbanthir su ta aŋsolgbontho thonɔŋ, maŋ te ba asabu. Ɔwa sə ba hɛ ro sə gbəli kat kɛrɛ ta ti.

⁴¹Ma ɔ po pa ȧte-e, ɔ sakthi aŋgbanɛ.