Read Ȧŋlemrȧnɛ Ȧfu Mȧyɔs ma aŋsom 2 Bible Online

Mȧyɔs ma aŋsom 2 - Ȧŋlemrȧnɛ Ȧfu bible

Mȧyɔs ma aŋsom 2

¹Ɔwa ma ȧŋrey ŋa ȧŋPɛntikɔst aŋ bek-e, aŋkarande bɛ aŋ yi rə dim din dɛr rɔkin.

²Ɔwa yawin-əŋ asɔnkɔ aŋ wur ka ȧkȧriyana mɔ aŋsɔnkɔ ŋa afef abȧki, aŋ lasər ȧŋseth ro aŋ yirȧ.

³kaŋ nənk təmer təgbayanɛ tə bȧlȧnɛ mɔ nȧnt, tə rensa ŋa ukin o kin.

⁴Ka ɔYina məsəm ɔ la ŋa bɛ, kaŋ təp kəfɔf tənt tətel mɔ mə ɔYina məsəm ɔ sɔŋ ŋa tə kəfɔf.

⁵Ɔwa aŋYuda aŋ yi ro Yerusalɛm aŋa nesa Kurɔŋ, aŋa wur ka tȧbona sɛŋk roratha ka ȧkuru.

⁶Maŋ təl ɛsɔnkɔ ɛye-e, ȧruniya rə gbanɛ rɔkin, ka pə sɔkanɛ ŋa pəkasifɛ wuni o wuni ɔ təlȧ ŋa aŋ fɔf ka akənt kɔŋ gbeŋ.

⁷Ka pə kɔnthɔfəli ŋa bɛ, aŋ kabanɛ, kaŋ pa, Aŋe mə fɔf-e, aŋe aKalili rəmaŋ thahɔ-i?

⁸To som mə sə təlȧ, ukin o kin ka akənt kȧsu ȧke a komanɛ su-e?

⁹Aparthian-o, aMid-o, aƐlamayt-o, yi aŋa yirȧ ro Mɛsapotemiya, ro Yudiya-o, ro Kapadosiya-o, ro Pɔntɔs-o, yi ro Esiya-o,

¹⁰ro Fərikiya-o, ro Pamfiliya-o, ro Iyipt-o, yi ɛgbap ya ro Libiya ɛyɛ fatər ro Sirini, yi aŋtik aŋa wur ro Rom-o, aYuda yi aŋa səkɛ alanɛ,

¹¹aKrit yi aŋArabiyanȧŋ, saŋ bɛ sə təlȧ ŋa aŋ fɔf ka atənt ta su mȧyɔs məkabanɛ ma Kuru.

¹²Ka pə kɔnthɔfəli ŋa bɛ, pə sɔkanɛ ŋa, ka aŋ pa kətɔŋ ka ŋaŋ, ko tȧy tȧŋ ȧte-e?

¹³Kɛrɛ alɔm aŋ sel ŋa aŋ pa, Aŋfəm aŋe aŋ namra məber məfɛth.

¹⁴Ɔwa Pitaŋ ɔ təmȧ yi antɔfɔt ukin-e ŋata ȧrim rɔŋ, ɔ pa ro rɔŋaŋ, na aŋfəm ŋa ro Yuda yi nia bɛ aŋa yirȧ ro Yerusalɛm, tȧrȧ nu ȧte, ɔwa su nu ɛləns ka ȧsim ta mi.

¹⁵kotȧy-e aŋe aŋ yi hɛ atis, mɔ mə nə nanɛ-e, ȧtesoma-e aŋhawa aŋa bekȧ məsas ka ȧŋrey ŋiəŋ gbo ras.

¹⁶Kɛrɛ ȧte tə yi ȧtȧ Yowɛl ɔnȧbi ɔ fɔf,

¹⁷Kurɔŋ ɔ pa, Pə tə yi ka marey mələpsɔ, I ti kus ɔ Yina kȧmi ka afəm bɛ, Ɔwa aŋwuth a nu aruni yi aŋwuth a nu abɛra aŋ tə nȧbi, Ɔwa aŋlaŋgba a nu aŋ tə nənk mənənk, Maȧhem ma nu aŋ tə wɔrəp mərey;

¹⁸Yao ka marey mati i ti kus ɔYina kȧmi ka ɛbɔy ɛ mi aruni, Yi ka ɛbɔy ɛ mi abɛra, ɔwa aŋ tə nȧbi.

¹⁹Ɔwa i ti tɔri mȧtȧy məkabanɛ ka ȧkuru rokɔm, Yi ɛmisali ka ȧŋthɔf roratha; Mətir yi nȧnt yi kimɔ.

²⁰Aret tə tə səkɛ asum dɛ aŋof aŋ tə səkɛ mətir Yeŋka ȧŋrey abana ŋa ɔMarki aŋ bek.

²¹Ɔwa pə tə yi wuni o wuni ɔwe mə tela ka ȧŋes ŋa ɔMarki ɔ tə kisi.

²²Naŋ aŋfəm ŋa ro Isrɛl, təl nu ȧsim ȧte. Yisɔs ɔwe ro Nasarɛth, wuni ɔwe Kuru ɔ po lomi kətɔŋ ka nu rə məyɔs ma afɔsɔ yi mȧtȧy məkabanɛ yi ɛmisali ɛyɛ Kuru ɔ yɔ ka kȧta kɔŋ kətɔŋ ka nu, mɔ naŋ gbeŋ nə po tȧrȧ.

²³Kɔnɔ a lȧnki tand ka mabotəs yi kȧtȧrȧ ka Kuru thəpaŋ, ɔwa naŋ-e, ka mȧta ma afəm ȧthȧnthonɛ, nə tȧŋ kɔ ka akənt kəpəŋkinɛ, nə dif kɔ.

²⁴Ɔwe Kuru ɔ yokas ka rəfi ma ɔ po səli ɔbaŋ wa rəfi, pəkasifɛ pə fɔyɛ tȧy kəpa rafi rə wop kɔ.

²⁵kotȧy-e Debid ɔ pa ta atɔŋ, I nənk ɔMarki ro der kȧmi kədi alɔkɔ bɛ, kotȧy-e ɔ yi ka kȧta kȧmi kədiɔ, Kama a te bora mi.

²⁶Tiyȧŋ ȧŋmerȧ a mi aŋ ba məbɔnɛ, Ɔwa ramer ra mi rə sel məbɔnɛ. Ma pə thas ri-e, ȧŋdɛr a mi aŋ tə yirȧ rə kəgbak ȧmerȧ;

²⁷Pəkasifɛ mə gbəli hɛ tey ɔfəm ɔ mi ro kərəfi, Thalɔm mə gbəli hɛ sɔŋ ɔSəm ka mu tə kənəŋk kȧthey.

²⁸Mə po mi tɔri asoŋ ta aŋesəm. Mə tə yɔ mi i la məbɔnɛ ka kȧbəprȧnɛ ka mu.

²⁹Awɔnt, i gbəli fɔfȧnɛ nu rə kəmintha ta ɔbemba Debid, kəpa ɔ fi, ka a maŋk kɔ, ɔwa kȧboma kɔŋ kə yi ro su haŋ thonɔŋ.

³⁰Tiyȧŋ ma ɔ yi unabi, ɔwa ɔ tȧrȧ Kurɔŋ ɔ po gbiŋ ro rɔŋɔŋ kəpa, ka rȧkomra rɔŋ ɔ tə yis ukin ka kawaŋ ka rȧbȧy.

³¹Ɔwa ma kɔnɔ ɔ nənk ȧte rodi-e, ɔ fɔf ta kȧyokanɛ ka ɔKrayst, kəpa a tey hɛ kɔ ro kərəfi, ɔwa ȧŋdɛr ŋɔŋ aŋ thei hɛ.

³²Yisɔs ɔwe-əŋ, kɔnɔ Kuru ɔ yokas, ɔwa saŋ bɛ sə yi ti məseri.

³³Tiyȧŋ ma a po ŋata kɔ ka kȧta kədiɔ ka Kuru-e, ɔwa ma ɔ po sɔthɔ ka ɔKas aŋlahiri ŋa ɔYina məsəm-e, ɔ po kus ame, ama nə nənk, ɔwa ama nə təl.

³⁴Ȧtesoma-e Debid ɔ ŋat hɛ ro riyana, kɛrɛ kɔn kɔnɔnɛ ɔ pa, ƆMariki ɔ pa ka ɔMarki kȧmi, Yirȧ ka kȧta kȧmi kədiɔ,

³⁵Haŋ i səki antheranɛ a mu agbeth ŋa ȧtȧtək ta mu.

³⁶Tiyȧŋ ta ȧŋseth ŋa Isrɛl bɛ aŋ tȧrȧ tɛntɛnɛ kəpa, Yisɔs ɔwe gbeŋ, ɔwe nə po tȧŋ ka akənt kəpəŋkinɛ-e, Kuru ɔ po səki kɔ ɔMarki yi ɔKrayst.

³⁷Ɔwa maŋ təl ȧte-e, tə sɔs tabuth taŋ, ka aŋ pa ka Pita yi ka aŋsom alɔm, Awɔnt, to mə sə yɔ-i?

³⁸Ka Pitaŋ ɔ pa ro ŋaŋ, Thupi nu, ɔwa yɔ a baftays nu kin o kin ka ȧŋes ŋa Yisɔs Krayst ta katerɔ ka ɛhakɛ ɛ nu, ɔwa nə tə sɔthɔ ȧŋboya ŋa ɔYina məsəm.

³⁹kotȧy-e aŋlahiri aŋe aŋ yi ta ȧtȧ nu, yi ta aŋwuth a nu yi ta ŋaŋ aŋa yi ɔbɔli poŋ, hali ta ŋaŋ bɛ aŋa ɔMarki ɔKuru kȧsu mɔ tela ro rɔŋɔŋ.

⁴⁰Ɔwa yi sim təlɔm təlai ɔ sɔŋ məseri, kɔ maŋ ŋa, ɔ pa, Kisisnɛ nu ka rȧkomra rəkənȧ are.

⁴¹Ɔwa ŋaŋ bɛ aŋa po malanɛ ȧsim tɔŋ yi məbɔnɛ, a baftays ŋa; ɔwa ka ȧŋrey ŋati aŋa bȧrnɛ aŋkarande aŋ yi afəm ɛwul ɛsas.

⁴²kaŋ bȧsər bȧkər ka mȧtȧy məthəksa ma aŋsom, yi məmanɛ, yi ka kasiməth təbo, yi ka təramnɛ.

⁴³Ka rənes rə wop wuni o wuni; ka mȧtȧy məkabanɛ məgbathi yi ɛmisali ɛ yɔnɛ ka mȧta ma aŋsom.

⁴⁴Ka ŋa bɛ aŋa lanɛ aŋ yi dɛr rɔkin, aŋ ba ɛyɛt bɛ ɔthənanɛ.

⁴⁵kaŋ thila tafus yi ɛyɛt yaŋ, kaŋ yerəsanɛ ka ŋa bɛ mɔ wuni o wuni ɔ paŋ.

⁴⁶kaŋ bȧsər kəyi ka ȧŋseth ŋa Kuru rə ȧmerȧ ŋin ȧrey o rey, aŋ siməth təbo ka ɛseth yaŋ, ɔwa aŋ di yi məbɔnɛ yi rə ȧmerȧ ȧferȧ,

⁴⁷rə kəthɔkəs Kuru. Ka aŋfəm bɛ aŋ tȧrȧ ŋa rəka. Ka ɔMarki ɔ bȧrȧ ŋa ŋaŋ aŋa mə kisi ȧrey o rey.