Read Ȧŋlemrȧnɛ Ȧfu Mȧyɔs ma aŋsom 23 Bible Online

Mȧyɔs ma aŋsom 23 - Ȧŋlemrȧnɛ Ȧfu bible

Mȧyɔs ma aŋsom 23

¹Ka Pɔlȧŋ ɔ kəli aŋgbanɛ təŋ, ɔ pa, Aŋwɔnt a mi, i po yi rodi ka Kuru rə ȧmerȧ ȧferȧ haŋ ka ȧŋrey aŋe.

²Ka Ananayas-əŋ, ɔfode ubana ɔ yamari ŋaŋ aŋa təmȧ kɔ rayɛr tə kəgbantha kɔ ro səŋ.

³Ka Pɔlȧŋ ɔ pa ro ŋɔŋ, Kuru ɔ tə gbantha mu, munɔ agbiŋgbiŋ aferər ɔwe. Mə yirȧ tə kəthoŋkas ȧŋpa a mi kətȧŋȧnɛ ka ȧŋthɔ, ka mə kȧl yamari kȧmȧ a gbantha mi mɔ ȧŋthɔ aŋ te pa-i?

⁴Ŋaŋ aŋa təmȧ rayɛr aŋ pa, Mə nal ɔfode ubana ka Kuru-i?

⁵Ka Pɔl ɔ pa, Aŋwɔnt a mi, i tɛ hɛ ti kəpa ufode ubana wɔŋ, kotȧy-e a gbal kəpa, Mə yi hɛ tə kəfɔf ɔləs ta ɔgbəka ka aŋfəm a mu.

⁶Kɛrɛ ma Pɔlȧŋ ɔ nənk kəpa ȧgbȧp ŋin ŋa aŋfəm aŋ yi aSadusi-e, ɔwa ȧgbȧp alɔm aFaresi-e, ɔ ŋata rim lɛɔ ka aŋgbanɛ, ɔ pa, Aŋwɔnt mi, minɛ i yi uFarisi, uwan ka uFarisi. Ta kagbak ȧmerȧ yi kȧyokanɛ ka aŋfi, ta a re thonkas mi.

⁷Ɔwa ma ɔ po pa yaŋ-e, məputhanɛ mə yokanɛ kətɔŋ ka aŋFarisi yi aŋSadusi, ɔwa ȧruniya rə gbayanɛ.

⁸kotȧy-e aŋSadusi aŋ pa, Kayokanɛ kə yi hɛ; kɛrɛ aŋFarisi aŋ gbithanɛ yi bɛ.

⁹Ka ɛsɔnkɔ ɛbana ɛ yokanɛ. Aŋkarmɔkɔ ka ȧŋgbȧp ŋa aŋFarisi aŋ yokanɛ, aŋ gbal aŋ pa, Sə ba hɛ tȧy tələs ka ɔwuni ɔwe. Bepi sɔthlɔm ayina, thalɔm wurɔ ɔ po fɔfȧnɛ kɔ-e, tə ba tai-i?

¹⁰Ɔwa ma məputhanɛ məbana mə po yokanɛ-e ɔkaptin ubana, ma ɔ nesa kəpa aŋ tə pimsanɛ Pɔlȧŋ, ɔ yamari antim kȧmȧ aŋ kɔ kathi kɔ kətɔŋ ka ŋaŋ kȧmȧ aŋ kȧrȧ kɔ ro barak.

¹¹Ɔwa ka rȧtȧtȧk rəlɔm ɔMarki ɔ təmȧ kɔ rayɛr, ɔ pa, Bȧk kəbuth, ȧtesoma-e mɔ mȧ mə po seri ta ȧtȧ mi ro Yerusalɛm-e, ya mə ba sɔ tə kəseri ro Rom.

¹²Ɔwa ma pə sɔk-e, aŋYuda aŋ sekəranɛ rə agbiŋ, aŋ pa aŋ di hɛ, aŋ mun hɛ haŋ aŋ po dif Pɔlȧŋ.

¹³Aŋ yi athasi afəm təgba tərəŋ aŋa sek ɛyaŋfa ɛye.

¹⁴kaŋ der ka aŋkərbomp kətɔŋ ka aŋfode yi aŋbȧki, aŋ pa, Sə po sekəranɛ rə agbiŋ abana tə kəte thȧm koko haŋ sə po dif Pɔlȧŋ.

¹⁵Tiyȧŋ sə yema naŋ yi aŋSanhedrin aŋ kanɛ ɔkaptin ubana kȧmȧ ɔ kȧrȧ kɔ ro rɔnu, pə yi gbo mɔ nə yema bȧsər gbɛlɛŋ ȧŋpa ŋɔŋ ɔfinɔ. Ɔwa saŋ, yeŋka ɔ fat ri-e, sə po bɛnɛnɛ tə kədif kɔ.

¹⁶Kɛrɛ ɔwan uruni ka ɔwɔnt bɛra ka Pɔl ɔ təl ta kasəth ka ŋaŋ, kɔ der ɔ wɔŋ ro barak, ɔ kanɛ Pɔlȧŋ.

¹⁷Ka Pɔl ɔ tela ukin ka aŋkaptin, ɔ pa, Kera ɔlaŋgba ɔwe ka ɔkaptin ubana kotȧy-e ɔ ba apa tə kətɔri kɔ.

¹⁸kɔ gbasi kɔ, ɔ kera kɔ ka ɔkaptin ubana, kɔ pa, Pɔl ɔkɛndɛbira ɔ tela mi ro ŋɔŋ, ɔ nɛmthɛnɛ mi tə kəkera ɔlaŋgba ɔwe ro mu; ɔ ba apa tə kətɔri mu.

¹⁹Ɔwa ɔkaptin ubana ɔ wop kɔ ka kȧta, kaŋ kɔnɛ rayɛr, ɔ yif kɔ sɔy, Ko mə ba tə kətɔri mi-e?

²⁰kɔ pa, AŋYuda aŋ po ba dim din tə kənɛmthɛnɛ mu kȧmȧ mə kȧrȧ Pɔl ka aŋSanhedrin ninaŋ, pə yi mɔ aŋ yema bȧsər yifəth ɔfinɔ ta atɔŋ.

²¹Tiyȧŋ te selɔ ti, kotȧy-e afəm aruni athasi təgba tərəŋ kətɔŋ ka ŋaŋ aŋ səth kɔ, aŋ po sekəranɛ rə agbiŋ kəpa aŋ di hɛ, aŋ mun hɛ haŋ aŋ po dif kɔ. Ɔwa ka-ake aŋ po bɛnɛnɛ, aŋ kar gbo aŋlahiri a mu.

²²Ka ɔkaptin ubana ɔ ter ɔlaŋgba ɔ kɔnɛ, ɔ kanɛ kɔ, Te kanɛ wuni o wuni kəpa mə po tɔri mi mȧtȧy ame.

²³kɔ tela ro ŋɔŋ akaptin ŋarəŋ, ɔ pa, Thoŋkla nu atim tɛmɛ tərəŋ tə kəkɔ ro Sisaria, yi afəm ŋa təsoy təgba təsas tɔfɔt, dɛ yi afəm aŋa ba ɛsor tɛmɛ tərəŋ ka aŋhawa aŋa bekȧ məsas ka tȧtȧk.

²⁴kɔ yamari ŋa sɔ kȧmȧ aŋ kȧrȧ təsɛm kȧmȧ a reŋ Pɔlȧŋ ri, tə kəkera kɔ ɔthɔfəl ka Filiks ɔgbəka.

²⁵kɔ gbal areka ka ȧsim ȧte kəpa,

²⁶Klɔdiɔs Lisias ɔ kori Filiks ɔgbəka.

²⁷AŋYuda aŋ wop ɔlaŋgba ɔwe, aŋ yema dif kɔ ma i thorər ŋa yi antim, ka i kisis kɔ ma i tȧrȧ kəpa ɔ yi uRom.

²⁸Ma i yema tȧrȧ ȧtȧ som aŋ gbanthir kɔ-e, i kera kɔ ka aŋSanhedrin a ŋaŋ,

²⁹ka i fir kəpa a gbanthir kɔ ta ɛpa ya ȧŋthɔ ŋaŋ, kɛrɛ a reŋ hɛ kɔ tȧy ȧtȧ mə yi təbeki tə kədif thalɔm tə kətand kɔ.

³⁰Ɔwa ma a tɔri mi kəpa a po sek yaŋfa ta ɔlaŋgba-e, i somra kɔ ro rɔmu, ɔwa i yamari aŋa gbanthir kɔ kȧmȧ aŋ kanɛ mu ȧtȧy ȧtȧ aŋ gbanthir kɔ-e. Ta məthɔfəl mə yi ro rɔmu.

³¹Ɔwa antim aŋ yɔ mɔ mə a yamari ŋa, kaŋ gbasi Pɔl, aŋ kera kɔ tȧtȧk ro Antipatris.

³²Kɛrɛ ka rabəth rəlɔm aŋ ter aŋfəm ŋa tȧsoy tə kəkɔ yi kɔnɔ, kaŋ kȧlanɛ ro barak.

³³Ɔwa maŋ bek ro Sisaria-e, aŋ tak ȧŋreka ka ɔgbəka, aŋ lȧnki sɔ Pɔl rodi kɔŋ.

³⁴Ma ɔgbəka ɔ po karaŋ ȧŋreka-e, ɔ yif athɔf areke ɔ yi-e; ma ɔ tȧrȧ kəpa ɔ wur ro Silisia-e,

³⁵ɔ pa, I ti təl ȧŋpa a mu bepi aŋa gbanthir mu aŋ der. Kɔ yamari kȧmȧ a bɛnɛ kɔ ka akama ka Hɛrɔd.