Read Ȧŋlemrȧnɛ Ȧfu Mȧyɔs ma aŋsom 5 Bible Online

Mȧyɔs ma aŋsom 5 - Ȧŋlemrȧnɛ Ȧfu bible

Mȧyɔs ma aŋsom 5

¹Kɛrɛ ulaŋgba ulɔm ɔ yi ri, a bont kɔ Ananayas, yi ɔrani kɔŋ Safaira, aŋ thila ȧkay,

²kɔ bɛnɛ ȧgbȧp ŋin ka amɔlɔ mati, ɔrani kɔŋ sɔ ɔ ba dim din, kɔ kȧrȧ ȧgbȧp alɔm, ɔ bot ŋi ka ȧtȧtək ta aŋsom.

³Kɛrɛ Pitaŋ ɔ pa, Ananayas, to som Sethani ɔ lasər ȧŋmerȧ a mu kȧmȧ mə yemsa ɔYina məsəm, kəpa mə bɛnɛ ȧgbȧp ŋin ka amɔlɔ ma aŋkai-e?

⁴Ma mə te tha thila ŋi-e, mun tha ba ŋi, ɔwa ma mə po thila ŋi-e, aŋ yi hɛ ka aŋfɔsɔ a mu-i? To som mə tȧmtȧmnɛ ȧtȧy ȧte ka ȧŋmerȧ a mu-e? Mə yemsa hɛ wuni kəpet kɛrɛ Kurɔŋ.

⁵Ɔwa Ananayas-əŋ, kətəl ȧsim ȧte gbo-e, ɔ fumpɔ, ɔ ternɛ, ka rənes rəbana rə fumpər ŋa bɛ aŋa təl ti.

⁶Ka aŋlaŋgba aŋ yokanɛ, aŋ kumpər kɔ rə kotha, aŋ wurɔ kɔ, kaŋ maŋk kɔ.

⁷Ɔwa mɔlɔ ma ɛhawa ɛsas kədarəŋ kati-e, ɔrani kɔŋ ɔ wɔŋ, ɔ tɛ hɛ ȧtȧ po yɔnɛ.

⁸Ka Pitaŋ ɔ yif kɔ ɔ pa, Kanɛ mi bepi nə thila ȧŋkay ta amɔlɔ məwunɔŋ-i? kɔ lasi ɔ pa, Yao, ta amɔlɔ məwunɔŋ.

⁹Ka Pitaŋ ɔ pa ro ŋɔŋ, kɔyɛŋ nə ba dim din tə kəmɛm ɔYina ka ɔMariki-e? Kəla, ȧtȧtək taŋ aŋa maŋk ɔwos ka mu tə yi ro dare, ɔwa aŋ ba kəkera mu sɔ.

¹⁰Ɔwa ka ɔlɛmp wati ɔbɛra ɔ fumpɔ ka ȧtȧtək tɔŋ, ɔ ternɛ. Ka aŋlaŋgba aŋ wɔŋ aŋ bəp kɔ, ka aŋ kera kɔ, aŋ maŋk kɔ rayɛr ka ɔwos kɔŋ.

¹¹Ka rənes rəbana rə der ka aŋchɔch bɛ dɛ yi ka ŋaŋ bɛ aŋa təl mȧtȧy ame.

¹²Ka ɛmisali ɛgbathi yi mȧtȧy məkabanɛ mə yɔnɛ kətɔŋ ka aŋfəm ka mȧta ma aŋsom; ɔwa ŋa bɛ aŋ yi rə ȧmerȧ ŋin ka aŋgbənthəŋ ŋa Sɔlɔmɔn.

¹³Ɔwa wuni o wuni ka aŋfəm alɔm ɔ mintha hɛ tə kəpantnɛ ŋa, kɛrɛ halisa aŋ yikis ŋa.

¹⁴Ka a bȧr aŋlanɛ agbȧthi ka ɔMarki, tey ta runi-ŋaŋ yi bom-ŋaŋ,

¹⁵haŋ a wurɔ aŋboma ka asoŋ ta rokaŋ, a bot ŋa rə təfənt yi ɛgbatha, kȧmȧ bepi Pitaŋ ɔ thas-e, hali gbo amumpəl ŋɔŋ aŋ tə gbəpər alɔm.

¹⁶Ka runiya rəbana rə der sɔ kəwur ka tapet ȧte gbətɔ ro Yerusalɛm, kaŋ kȧrȧ afəm aŋboma, yi ŋaŋ aŋa ba akərəfi aləs, ka a yenkəs ŋa bɛ.

¹⁷Ka ɔfode ubana ɔ yokanɛ yi ŋaŋ bɛ aŋa yi yi kɔnɔŋ-e, (aŋa yi ka kagbanth ka aŋSadusi), aŋ la kətut,

¹⁸kaŋ wop aŋsom, aŋ bot ŋa ka ȧŋseth ŋa tərəŋka ro a bɛnɛ aŋlɔm.

¹⁹Kɛrɛ wurɔ ka ɔMarki ɔ kanthi tadare ta ȧŋseth ŋa tərəŋka ka tȧtȧk, kɔ wurɔ ŋa, ɔ kanɛ ŋa,

²⁰Kɔ nu nə təmȧ ka ȧŋseth ŋa Kuru, ɔwa kanɛ anfəm mapa bɛ ta aŋesəm aŋe.

²¹Maŋ təl ȧte-e, aŋ wɔŋ ka ȧŋseth ŋa Kuru bəth bəth, aŋ thəksa aŋfəm, kɛrɛ ɔfode ubana ɔ der, ɔwa ŋaŋ aŋa yi yi kɔnɔ aŋ thoŋkla aŋSanhedrin rɔkin, yi aŋbȧki bɛ ŋa aŋwuth ŋa Isrɛl, a som kȧmȧ aŋ kȧrȧ aŋsom.

²²Kɛrɛ ɛbɔy aŋa a som aŋ nənk hɛ ŋa ka ȧŋseth ŋa tərəŋka; kaŋ kȧlanɛ, aŋ kanɛ ti, aŋ pa,

²³Sə bəp ȧŋseth ŋa tərəŋka aŋ kantha fip, ɔwa ȧŋbumər aŋ təmȧ ka tadare, kɛrɛ ma sə po kanthi ŋi, sə bəp hɛ wuni o wuni rokor.

²⁴Ma ɔfode ubana yi ɔwe yi rȧbomp ka ȧŋseth ŋa Kuru yi aŋkərbomp kətɔŋ ka aŋfode aŋ təl tapa ȧte-e, pə sɔkanɛ ŋa bɛ, aŋ soli ta ȧtȧ mə yi kədarəŋ kati.

²⁵Ka ukin ɔ der ɔ kanɛ ŋa, Kəlo, aŋlaŋgba aŋa nə bot ka ȧŋseth ŋa tərəŋka aŋ yi ka ȧŋseth ŋa Kuru, aŋ təmȧ aŋ thəksa aŋfəm.

²⁶Ka ɔkaptin yi ɛbɔy aŋ kɔnɛ, aŋ kȧrȧ ŋa, pə yi hɛ rə afɔsɔ, kotȧy-e aŋ nesa aŋfəm ta thani aŋ ləməs ŋa məsar.

²⁷Maŋ po kȧrȧ ŋa, a təmər ŋa rodi ka aŋSanhedrin. Ka ɔfode ubana ɔ yif ŋa ɔ pa,

²⁸Sə la hɛ maŋ nu kiriŋ kiriŋ kȧmȧ nə te sɔ thəksa ka ȧŋes aŋe-i? Kɛrɛ kəla, nə po lasər Yerusalɛm yi kathəksa ka nu. Nə nanɛ tə kəreŋ su mathɛkɛ ka mȧtir ma ɔlaŋgba ɔwe-e?

²⁹Ka Pitaŋ yi aŋsom aŋ lasi aŋ pa, Sə ba kəwop ȧrim ra Kuru pəthasi ara wuni kəpet.

³⁰ƆKuru ka aŋkas a su ɔ yokas Yisɔsȧŋ, ɔwe naŋ nə dif, kəgbak kɔ rə ŋənt.

³¹Kɔnɔ Kuru ɔ po ŋata ka kȧta kɔŋ kədiɔ tə kəyi uBȧy yi uKisis tə kəsɔŋ Isrɛl kathupi yi kȧlȧprɔ ka ɛhakɛ.

³²Ɔwa saŋ sə yi mȧseri ta mȧtȧy ame; yi ɔYina məsəm sɔ ɔwe Kuru ɔ po sɔŋ ka ŋaŋ aŋa mə wop ȧrim rɔŋ.

³³Maŋ təl ȧte-e, ɛmerȧ yaŋ ɛ ŋat, aŋ fɔf tə kədif ŋa.

³⁴Kɛrɛ ukin ka aŋgbanɛ, uFarisi, ɔ ba ȧŋes Kameliyɛl, ukarmɔkɔ ka ȧŋthɔ, ɔ ba yiki ka aŋfəm bɛ, kɔnɔ ɔ təmȧ, ɔ yamari kȧmȧ aŋ wurɔ aŋsom ras.

³⁵kɔ kanɛ ŋa, Naŋ afəm ŋa Isrɛl, botnɛ nu rə ȧmerȧ ta aŋlaŋgba aŋe, ta ȧtȧ nə yema yɔ ŋa,

³⁶kotȧy-e yeŋka aŋyamana aŋe-e, Thudas ɔ yokanɛ, ɔ kolonɛ kəpa kɔnɔ ɔ yi wuni bana; ɔwa afəm tɛmɛ tanlɛ aŋ gbɛpətənɛ kɔ; ka a dif kɔ, ɔwa a sakthi ŋa aŋa wop ȧrim rɔŋ, kaŋ tiyȧ fu.

³⁷Kədarəŋ ka ɔlaŋgba ɔwe-e, Yudas ka ro Kalili ɔ yokanɛ ka marey ama a gbaləs ames ma aŋfəm, ɔ liŋanɛ afəm agbȧthi ro rɔŋɔŋ; kɔnɔ sɔ ɔ dinɛ, ɔwa ŋaŋ bɛ aŋa wop ȧrim rɔŋ aŋ sakanɛ.

³⁸I kanɛ nu ka-ake, gbapɛ nu aŋlaŋgba aŋe. Ter ŋa kotȧy-e bepi ȧŋmȧŋ aŋe thalɔm mapanth ame mə yi ma afəm-e, mə tə tiyȧ fu;

³⁹kɛrɛ bepi mə yi ma Kuru-e, nə gbəli hɛ dim ma, ta thani a fir kəpa nə tim Kuru gbeŋ.

⁴⁰kaŋ malanɛ ȧrim rɔŋ. Ɔwa maŋ po tela aŋsom-e, aŋ sap ŋa, kaŋ kanɛ ŋa kȧmȧ aŋ te sɔ fɔf ka ȧŋes ŋa Yisɔs, kaŋ ter ŋa.

⁴¹Tiyȧŋ aŋ wur rodi ka aŋSanhedrin, aŋ sel məbɔnɛ ta ma a lɔm ŋa abeki tə kəsɔthɔ məlap ta ȧŋes.

⁴²Ɔwa ȧrey o rey ka ȧŋseth ŋa Kuru yi ka ɛseth yaŋ aŋ tey hɛ kəthəksa yi kətɔri kəpa Yisɔs kɔnɔ yi ɔKrayst.