Read Ȧŋlemrȧnɛ Ȧfu Mȧyɔs ma aŋsom 6 Bible Online

Mȧyɔs ma aŋsom 6 - Ȧŋlemrȧnɛ Ȧfu bible

Mȧyɔs ma aŋsom 6

¹Ɔwa ka marey mati, ma aŋyirka ŋa aŋkarande aŋ bȧrnɛ-e, aŋYuda aŋa a kom ro Kris aŋ fɔfəthanɛ salata aŋHibru, pəkasifɛ a pəl ȧŋbora ŋaŋ ka mapanth ma kəyerəs ȧrey o rei.

²Ka antɔfɔt ŋarəŋ aŋ tela ȧruniya ra aŋkarande ro rɔŋaŋ, aŋ pa, Pə mar hɛ kəpa saŋ sə tey ȧrim ra Kuru tə kəyɔ mapanth ma ɛthebəl.

³Tiyȧŋ awɔnt, thith nu kətɔŋ ka nu afəm aruni tȧmthədɛrəŋ aŋa ba mes məfinɔ, aŋa la ɔYina məsəm yi kətemp, kȧmȧ sə bot ŋa ka mapanth ame.

⁴Kɛrɛ saŋ sə tə bȧsər ka təramnɛ yi ka kətɔri mapa ma Kuru.

⁵Ka tapa ȧte tə bɔnɛ ȧruniya bɛ, kaŋ thith Stifɛnȧŋ, wuni ulasər ka kəlanɛ yi ka ɔYina məsəm, Filipȧŋ, Prokɔrɔs-əŋ, Nikenɔrȧŋ, Timɔnȧŋ, Parmenasȧŋ yi Nikolasȧŋ, ɔwe a səki ulanɛ ro Antiɔk.

⁶Ɔwa aŋ təmər aŋe rodi ka aŋfəm; maŋ po ramnɛ-e, aŋ reŋ ŋa mȧta maŋ.

⁷Ka ȧrim ra Kuru rə bȧrnɛ, ɔwa aŋyirka ŋa aŋkarande aŋ bȧrnɛ ro Yerusalɛm, ka afode agbȧthi aŋ wop kȧlanɛ.

⁸Ka Stifɛnȧŋ ɔ la aboŋa yi afɔsɔ, ɔ yɔ mȧtȧy məkabanɛ yi ɛmisali kətɔŋ ka aŋfəm.

⁹Kɛrɛ afəm alɔm aŋa yi ka ȧŋseth agbanɛ ŋa aŋLibertin, yi alɔm ro Sirini, yi ro Alɛksandri, yi ro Silisia, yi ro Esiya, aŋ thoŋka yi Stifɛnȧŋ.

¹⁰Kɛrɛ aŋ gbəli hɛ tham kȧtemp kɔŋ dɛ yi aŋyina aŋa mɔ fɔfa.

¹¹kaŋ thɛns afəm sɔy aŋa pa, Sə təlȧ kɔ ɔ fɔf sim tələs ta Mosis yi ta Kuru.

¹²kaŋ pər aŋfəm yi aŋbȧki, yi aŋkarmɔkɔ, kaŋ lɛsa kɔ, aŋ kera kɔ ka aŋSanhedrin,

¹³kaŋ təmər məseri ayem aŋa pa, Ɔlaŋgba ɔwe ɔ tey hɛ kəfɔf sim tələs ta ɔdɛr ɔsəm ɔwe yi ta ȧŋthɔ;

¹⁴kotȧy-e, sə po təlȧ kɔ ɔ pa, Yisɔs ɔwe ro Nasarɛth ɔ tə dim ɔdɛr ɔwe, ɔwa ɔ tə siŋkar matanɛ ama Mosis ɔ tiyȧ su.

¹⁵Ka ŋa bɛ aŋa yirȧ ka aŋSanhedrin aŋ kəli kɔ təŋ, aŋ nənk ader rɔŋ mɔ ader ra ɔmaleka.