Read Ȧŋlemrȧnɛ Ȧfu Mȧyɔs ma aŋsom 7 Bible Online

Mȧyɔs ma aŋsom 7 - Ȧŋlemrȧnɛ Ȧfu bible

Mȧyɔs ma aŋsom 7

¹Ka ɔfode ubana ɔ pa, Mȧtȧy ame mə yi tateŋ-i?

²kɔ pa, Awɔnt yi akas, su nu ɛləns. ƆKuru ka ayiki ɔ tɔrinɛ ka ɔkas kȧsu Ebraham ma ɔ yi ro Mesopotemia yeŋka ɔ yirȧ ro Haran,

³kɔ pa ro ŋɔŋ, Wur ka ȧŋthɔf a mu, yi ka aŋfəm a mu, mə der ka ȧŋthɔf aŋa mə i tɔri mu.

⁴kɔ wur ka ȧŋthɔf ŋa aŋKaldiyan, ɔ yirȧ ro Haran; ɔwa ma ɔkas kɔŋ ɔ fi-e, Kuru ɔ tɔŋa kɔ ri, ɔ kȧrȧ kɔ ka ȧŋthɔf aŋe ro naŋ nə yirȧ ka-ake.

⁵kɔ sɔŋ hɛ kɔ ȧgbȧp ri, hali abeki təmər akatək kɔŋ, kɛrɛ ɔ lahiri kəpa ɔ tə sɔŋ kɔ ŋi, yi aŋwuth ŋɔŋ kədarəŋ kɔŋ ma ɔ te tha ba ras wan.

⁶Ka Kuru ɔ fɔf yaŋ kəpa aŋwuth ŋɔŋ aŋ ba kəyi rə rətik rə athɔf ȧtel, ɔwa aŋ tə wop ŋa rətar, aŋ tə thalər ŋa ta təren tɛmɛ tanlɛ.

⁷Ka Kurɔŋ ɔ pa, Ɔwa minɛŋ i ti thonkas ȧŋbona aŋa mə wop ŋa rətar; kədarəŋ kati aŋ tə wur ri, aŋ tə re bȧtho mi ka ɔdɛr ɔwe.

⁸kɔ sɔŋ kɔ aŋlemranɛ ŋa kabirons; ɔwa Ebraham ɔ kom Aysak, ka a birons kɔ ka ȧŋrey aŋa bekȧ tamthərɛsas; ka Aysak ɔ kom Yekɔb-əŋ, ka Yekɔb ɔ kom aŋkas tɔfɔt ŋarəŋ.

⁹Ka aŋkas aŋ ba kətut ta Yosɛf, kaŋ thila kɔ ro Iyipt; kɛrɛ Kuru ɔ yi yi kɔnɔŋȧŋ,

¹⁰kɔ tafi kɔ kəwur ka masibo mɔŋ bɛ, kɔ sɔŋ kɔ kəmar tȧy yi kətemp rodi ka Fero ɔbȧy ka ro Iyipt; ɔwe səki kɔ ugbəka ka ro Iyipt yi ȧŋseth ŋɔŋ bɛ.

¹¹Ɔwa dor rəbana rə wɔŋ ro Iyipt yi ro Kenan bɛ yi kəsɔmpanɛ kəbana. Aŋkas a su aŋ sɔthɔ hɛ kədi.

¹²Kɛrɛ Yekɔb ɔ təl kəpa pəla pə yi ro Iyipt, kɔ som aŋkas ka katɔtɔkɔ.

¹³Ɔwa ka kakɔ ȧke bekȧ marəŋ-e, Yosɛf ɔ tɔrinɛ ka aŋwɔnt ŋɔŋ; ka a tɔri Fero ȧŋbona ŋa Yosɛf.

¹⁴Ka Yosɛf-əŋ ɔ som kətela ɔkas kɔŋ Yekɔb, yi rȧkomra rɔŋ bɛ, afəm təgba təsas tɔfɔt tamath.

¹⁵Ka Yekɔb ɔ thor ro Iyipt, kɔ fi ri, kɔnɔ yi aŋkas a su bɛ;

¹⁶ka a kera ŋa ro Sɛkɛm, a bot ŋa ka ȧŋpȧli aŋa Ebraham ɔ wai yi akala ȧferȧ ka aŋwuth ŋa Hamɔ ro Sɛkɛm.

¹⁷Kɛrɛ ma ȧŋlɔkɔ ŋa aŋlahiri aŋ fat-e aŋa Kuru ɔ po gbiŋ ka Ebraham-e, aŋfəm aŋ bȧrnɛ agbȧthi ro Iyipt,

¹⁸haŋ ubȧy ulɔm ɔ yokanɛ ɔwe te tȧrȧ Yosɛf-əŋ.

¹⁹Kɔnɔ kati ɔ yɔ ȧŋbona a su məsɔth, ɔwa ɔ yɔ aŋkas a su ɔləs, ɔ yɔ kȧmȧ aŋ fitha talɛnth taŋ kȧmȧ aŋ te kisi.

²⁰Ka ȧŋlɔkɔ ŋati a kom Mosisȧŋ, ɔwa ɔ yi ubɔthi kəli; ka a masər kɔ yof ɛsas ro seth ka ɔkas kɔŋ.

²¹Ɔwa ma a wurɔ kɔ-e, ɔwan ubɛra ka Fero ɔ gbasi kɔ, kɔ rusəm kɔ mɔ uwan kɔŋ.

²²Ka a thəksa Mosisȧŋ kȧtemp bɛ ka aŋIyipt, kɔ ba afɔsɔ ka ȧsim tɔŋ yi ka mȧyɔs mɔŋ.

²³Kɛrɛ ma ɔ ba təren təgba tərəŋ-e, pə wɔŋ ka ȧŋmerȧ ŋɔŋ tə kəkori aŋwɔnt ŋɔŋ aŋwuth ŋa Isrɛl.

²⁴Ɔwa ma ɔ nənk a yɔ ukin ka ŋaŋ afɔsɔ-e, ɔ tima kɔ, ɔ kala ta ɔwe a yɔ afɔsɔ, kɔ dif ɔIyipt

²⁵kotȧy-e ɔ nanɛ kəpa aŋwɔnt ŋɔŋ aŋ tə tȧrȧ kəpa Kurɔŋ ɔ tə kisis ŋa ka kȧta kɔŋ kɛrɛ aŋ tɛ hɛ ti.

²⁶Ɔwa ka ȧŋrey alɔm ɔ kɔ kori ŋa kɔ bəp ŋa aŋ tə gbal, kɔ maŋ ŋa kȧmȧ aŋ kȧl manɛ, ɔ pa, Afəm a mi, na yi rəwɔnt, kɔyɛŋ mə nə yɔnanɛ ɔləs-e?

²⁷Kɛrɛ kɔnɔ ɔwe yɔ ɔwɔnt ɔləs ɔ nɔt Mosisȧŋ, ɔ pa, Kanɛ bot mu ubȧy yi uthoŋkas rokɔm ka su-e?

²⁸Mə yema dif mi mɔ mȧ mə dif ɔEyipt dis-i?

²⁹Ma Mosisȧŋ ɔ təl ȧsim ȧte-e, ɔ gbukɛ, ɔ kɔ yirȧ rətik ka ȧŋthɔf ŋa Midian, ro ɔ kom awuth aruni ŋarəŋ.

³⁰Ma təren təgba tərəŋ tə lasər-e, umaleka ɔ tɔrinɛ ro rɔŋɔŋ ka aŋwula ŋa kateŋ Saynay, rə nȧnt nə mara rə agbɔfɔŋ.

³¹Ma Mosisȧŋ ɔ nənk ŋi-e, ɔ kabanɛ ka kȧnənk kati; ma ɔ fȧtər ri tə kəkəli-e, rim ra ɔMarki rə wur ri,

³²rə pa, Minɛ yi ɔKuru ka aŋkas a mu, ɔKuru ka Ebraham, ɔka Aysak, yi ɔka Yekɔbȧŋ. Ka Mosis ɔ yɛr, ɔ mintha hɛ sɔ kəli.

³³Ka ɔMarki ɔ kanɛ kɔ, Bus ɛkɔftha ka ȧtȧtək ta mu, ȧtesoma-e ɔdɛr ro mə təma-e, athɔf asəm ŋaŋ.

³⁴Tə tɛntɛnɛ i po nənk ȧŋsɔmpanɛ ŋa aŋfəm a mi aŋa yi ro Iyipt, i po təl kalaŋ ka ŋaŋ, ɔwa i po thor tə kəkisis ŋa. Der ka-ake, i ti som mu ro Iyipt.

³⁵ƆMosisȧŋ ɔwe aŋ pɛnsa, maŋ pa, Kanɛ bot mu ubȧy yi uthonkas-e? Kɔnɔ Kuru ɔ som tə kəyi ubȧy yi ukisis ka kȧta ka ɔmaleka ɔwe tɔrinɛ ro ŋɔŋ ka aŋgbɔfɔŋ.

³⁶Kɔnɔ wurɔ ŋa ma ɔ po yɔ məyɔs məkabanɛ yi ɛmisali ɛgbathi ro Iyipt-e, yi ka kȧbȧŋ kəyim, dɛ yi ka aŋwula təren təgba tərəŋ.

³⁷ƆMosis kati kɔnɔ ɔwe, ɔwe pa ka aŋwuth ŋa Isrɛl, Kuru ɔ tə təmər nu unabi kətɔŋ ka aŋwɔnt a nu, mɔ mɔ po təmər mi;

³⁸kɔnɔ ɔwe la yi kətɔŋ ka aŋchɔch ro wula yi ɔmaleka ɔwe fɔfȧnɛ kɔ ka kateŋ Saynay, yi ka aŋkas a su; ɔwe sɔthɔ sim təkəli tə kəsɔŋ su.

³⁹Kɛrɛ aŋkas a su aŋ selɔ hɛ tə kəwop ȧrim rɔŋ, aŋ pɛnsa kɔ kaŋ kȧla ɛmerȧ yaŋ ro Iyipt,

⁴⁰kaŋ pa ka Erɔn, Bɛmpa su turu ȧtȧ mə təmȧ su kədi, kotȧy-e Mosisȧŋ ɔwe ɔwɔ wurɔ su ka ȧŋthɔf ŋa Iyipt-e, sə tɛ hɛ ȧte po yɔ kɔ.

⁴¹Ka marey mati aŋ bɛmpa una ufɛth, kaŋ wurɔ asathka tati, aŋ sel məbɔnɛ ta mapanth ma mȧta maŋ.

⁴²Ka Kuru ɔ gbapɛ ŋa, ɔ ter ŋa ka kabȧtho aŋyamana ŋa ȧkuru, mɔ mə a po gbal ka ȧkȧfȧ ka Aŋnȧbi, o naŋ ka ȧŋseth ŋa Isrɛl, nə po sɔŋ mi ɛsɛm ɛfay Yi sathka ro wula ka təren təgba tərəŋ-i?

⁴³Yao nə gbasi aŋgbafa ŋ Molɔk, Yi akɔs ka ɔkuru ka nu Rɛfan, Ɛyɛt ɛyɛ nə bɛmpa tə kəbatho; Tiyȧŋ i ti kera nu ro Babilɔn lɛŋkɛn.

⁴⁴Aŋkas a su aŋ ba agbafa ŋa məseri ro wula mɔ mə kɔnɔ ɔwe fɔfȧnɛ Mosisȧŋ ɔ bot, kȧmȧ ɔ bɛmpa ŋi mɔ amɔl aŋa ɔ nənk.

⁴⁵Aŋkas a su sɔ yi Yɔsua aŋ wɔŋȧ ki ka ȧŋlɔkɔ a ŋaŋ maŋ wɔŋ tə kənɔi ȧŋthɔf ŋa tȧbona təlɔm, ȧtȧ Kuru ɔ nɔt rodi ka aser ta aŋkas a su, haŋ ka ȧŋlɔkɔ ŋa Debid.

⁴⁶Ɔkati sɔ-e, ɔ sɔthɔ kəmar tȧy ka Kuru, kɔ nɛmthɛnɛ tə kəbɛmpa ɔyira ta ɔKuru ka Yekɔb.

⁴⁷Kɛrɛ Sɔlɔmɔnȧŋ kɔnɔ təməra kɔ aseth;

⁴⁸halisa ɔBɔli rəkɔm bɛ ɔ yirȧ hɛ rə aseth aŋa mə a bɛmpa rə məta; mɔ mə ɔnȧbi ɔ pa,

⁴⁹Ȧkȧriyana kə yi kawaŋ kȧmi ka rəbȧy, Ɔwa ȧŋthɔf aŋ yi aŋgbeth ŋa ȧtȧtək ta mi. ƆMariki ɔ yif, Ko aseth naŋ nə gbəli bɛmpanɛ mi-e? Thalɔm ko yi ɔdɛr wa ɔfothanɛ ɔ mi-e?

⁵⁰Kȧta kȧmi tha bɛmpa ɛyɛt ɛye bɛ-i?

⁵¹Na ba təlim tə kȧnkərȧthi, na aŋbilakoro rə ȧmerȧ yi rə ɛləns, nə pɛnsa ɔYina məsəm alɔkɔ o lɔkɔ. Mɔ mə aŋkas a nu aŋ yɔ, ya naŋ sɔ nə yɔ.

⁵²Unabi ureke ɔ yi ɔwe aŋkas a nu aŋ te sɔmpa-e? Aŋ po difəth ŋa aŋa tɔri thəpaŋ ta kȧder ka ɔLompi ukin; ta ɔwe naŋ nə po səkɛ aŋsɔnd yi adif.

⁵³Naŋ aŋa po sɔthɔ ȧŋthɔ ka kȧta ka amaleka, kɛrɛ nə wop hɛ ŋi.

⁵⁴Ɔwa maŋ təl mȧtȧy ame-e, tabuth taŋ tə tuŋ, kaŋ ŋandanɛ kɔ ɛsek.

⁵⁵Kɛrɛ kɔnɔ ma ɔ yi ula yi ɔYina məsəm-e, ɔ lakthɛ təŋ ka ȧkuru, kɔ nənk aŋyiki ŋa Kuru, ɔwa Yisɔsȧŋ ɔ təmȧ ka kȧta kədiɔ ka Kuru Məsaba,

⁵⁶kɔ pa, Kəla i nənk ȧkȧriyana kə kanthɛ, ɔwa ɔWan ka wuni ɔ təmȧ ka kȧta kədiɔ ka Kuru Məsaba.

⁵⁷Kɛrɛ aŋ woŋa rə rim rəbɔli rəkɔm, aŋ sunt ɛləns yaŋ, kaŋ fumpər kɔ yawin-əŋ.

⁵⁸kaŋ wurɔ kɔ ka kȧpet, aŋ ləməs kɔ məsar. Ɔwa maseri aŋ bot ȧsuma taŋ ka ȧtȧtək ta ulaŋgba a bont Sɔl.

⁵⁹kaŋ ləməs Stifɛn-əŋ məsar, mɔ mɔ ramnɛ, ɔ pa, Mariki Yisɔs malanɛ aŋyina a mi.

⁶⁰kɔ sɔ təwu, ɔ wurɔ rim rəbɔli rəkɔm, ɔ pa, Mariki, te botȧ ŋa aŋhakɛ aŋe. Ma ɔ pa ȧte-e ɔ kɔ rə mərey.