Read Ȧŋlemrȧnɛ Ȧfu AŋRomans 1 Bible Online

AŋRomans 1 - Ȧŋlemrȧnɛ Ȧfu bible

AŋRomans 1

¹Pɔl ȧbɔy ŋa Yisɔs Krayst ɔwe a muti tə kəyi usom, ɔwe a gbaski asabu ŋa mafinɔ ma Kuru,

²ama ɔ lahiri thəpaŋ ka tasəŋ ta Aŋnȧbi ŋɔŋ ka mȧgbal məsəm,

³salata ɔWan kɔŋ Yisɔs Krayst ɔMarki kȧsu, ɔwe yi ka rȧkomra ra Debid ka rawuni kəpet,

⁴kɛrɛ ka ɔYina ka məsəm-e, kȧyokanɛ kɔŋ ka rȧfi kə tɔri kəpa ɔ yi ɔWan ka Kuru tɛntɛnɛ rə afɔsɔ.

⁵Ka ɔwe sə po sɔthɔ aboŋa yi mapanth ma ɔsom tə kəyɔ afəm ŋa tȧbona bɛ aŋ sanɛ rə kəlanɛ salata ȧŋes ŋɔŋ.

⁶Ɔwa kətɔŋ ka ŋaŋ-e, naŋ sɔ nə yi antela ŋa Yisɔs Krayst.

⁷I gbalər ȧŋbɔthər ŋa Kuru bɛ ro Rom aŋa a muti tə kəyi asəm. Aboŋa yi məthɔfəl ɛ yi ro rɔnu kəwur ka Kuru ɔKas kȧsu yi ɔMarki Yisɔs Krayst.

⁸Ka ɔtɔtɔkɔ bɛ i muti ɔKuru kȧmi mɔmɔ ka kȧta ka Yisɔs Krayst ta ȧtȧ nu bɛ pəkasifɛ a lɔməs ta kȧlanɛ ka nu ka ȧdȧru bɛ.

⁹Ȧtesoma-e Kurɔŋ ɔwe i bȧtho yi ȧmerȧ atəteŋ ka mapa məfinɔ ma ɔWan kɔŋ-e, kɔnɔ yi aŋseri a mi kəpa i bontəs nu alɔkɔ o lɔkɔ ka taramnɛ ta mi.

¹⁰I yif, bepi pə gbəli bɛŋȧnɛ-e, i ti der ro rɔnu ka mȧselɔ ma Kuru.

¹¹kotȧy-e i fela tə kənəŋk nu, kȧmȧ i gbəli yer nu aboya alɔm ŋa ɔYina, kȧmȧ nə sɔthɔ kəbaksər.

¹²Pə yi kȧmȧ minɛ yi naŋ sə sɔthɔ kəbɛfəth ukin dɛ yi ulɔm, ka kȧlanɛ kȧsu.

¹³Aŋwɔnt a mi i yema kȧmȧ nə tȧrȧ kəpa i ba ti rə ȧmerȧ alɔkɔ ȧgbȧthi tə kəder ro rɔnu, (kɛrɛ tȧy tə bɛnt mi haŋ thonɔŋ) kȧmȧ i gbəli ba məkomi kətɔŋ ka nu sɔ, mɔ mȧ i ba ka tȧbona təlɔm.

¹⁴I ba agbɛthɛŋ salata aŋKrik yi aŋBarbarian, salata antara yi ante tȧrȧ;

¹⁵tiyȧŋ amɔlɔ ma i gbəli-e, i yema tɔri mapa məfinɔ ma Kuru ka naŋ ro Rom sɔ.

¹⁶kotȧy-e i lap hɛ salata mapa məfinɔ ma Krayst, ȧtesoma-e mə yi aŋfɔsɔ ŋa Kuru tə kəkisis wuni o wuni ɔwe mə lanɛ; ka ɔtɔtɔkɔ ka aŋYuda, yi ka aŋKrik sɔ.

¹⁷kotȧy-e di kati mȧlompi ma Kuru Məsaba mə ŋaybɛ kəwur rə alanɛ kəkɔ ka alanɛ; mɔ mə a gbal kəpa ye, Aŋlompi aŋ tə yi kətaŋ rə alanɛ.

¹⁸kotȧy-e rabaŋ ra Kuru rə tɔrinɛ kəwur ka ȧriyana kəŋamnɛ mələs yi məkənə ma afəm a kəpet aŋa mə dim tȧteŋ kətɔŋ ka mȧyɔs maŋ mələs,

¹⁹ma pə yi-e, ȧtȧ aŋ gbəli tȧrȧ ta salata Kuru Məsaba tə yi təgbəraŋ kətɔŋ ka ŋaŋ, kotȧy-e Kuru kɔn kɔnɔnɛ ɔ po tɔri ŋa ti.

²⁰kotȧy-e kȧbi ka ɔtəpɛ wa ȧdȧru mayi mɔŋ ama a te nəŋka rəfɔr ama yi mɔ aŋfɔsɔ ŋɔŋ athəbana dɛ yi rawuni ra kuru rɔŋ-e, a tɔri ma gbafəth salata mapanth ma mȧta mɔŋ. Tiyȧŋ aŋ ba hɛ sɔ ra maŋ aŋ kat kɛrɛ.

²¹Pəkasifɛ hali maŋ po tȧrȧ Kuru-e, aŋ yikis hɛ kɔ mɔ Kurɔŋ, aŋ mɔmɔ hɛ kɔ, kɛrɛ aŋ səkɛ ayay ka ɛnanɛ yaŋ, ɔwa ɛmerȧ yaŋ ɛpəŋk ɛ po biyȧ.

²²Mɔ mə aŋ gbək ɛyonka kəpa ŋa atempi-e, aŋ səkɛ apənk,

²³kaŋ siŋkar aŋyiki ŋa Kuru ɔwe ba hɛ kəfi rə mȧbȧlȧnɛ ma wuni kəpet ɔwe ba tə kəfi, thalɔm rə ɛbȧmp, thalɔm ɛsɛm, thalɔm ɛyɛt ɛwɔrka.

²⁴Tiyȧŋ Kuru ɔ lȧnki ŋa ka mȧnɔkɔ maŋ kȧmȧ aŋ lasər ɛfela ya ɛmerȧ yaŋ haŋ aŋ lapəs madɛr ma ŋaŋ gbeŋ kətɔŋ ka ŋaŋ.

²⁵kotȧy-e aŋ siŋkar tȧteŋ ta Kuru rə rəyem, kaŋ thɔkəs, aŋ bȧtho araka rəbɛmpa pəthas Kɔn ɔwe bɛmpa ri, ɔwe yi uruba thȧnkȧŋ thəbana, Amina.

²⁶Tȧsom Kuru ɔ sɔnd ŋa ka ɛfela ya məlap. Hali aŋbɛra aŋ siŋkar matanɛ mə ŋaŋ,

²⁷ka aŋruni sɔ aŋ tey kətaŋ aŋbɛra ka məlompi, kaŋ felanɛ ukin ka ulɔm. Runi yi runi aŋ yɔ kərəp ukin rə ulɔm, ɔwa aŋ sɔthɔ ȧŋrȧm aŋa yi abeki ta mȧyɔs maŋ ka madɛr maŋ gbeŋ.

²⁸Ɔwa maŋ pɛnsa tə kənanɛ Kuru ka ɛmerȧ yaŋ-e, ɔ sɔnd ŋa ka ɛmerȧ ɛthayoŋ kȧmȧ aŋ yɔ ȧtȧy ȧtȧ te thesa.

²⁹Ŋaŋ-e aŋ po la yi mələs tətəp tətəp, mȧkənȧ-o, kȧtut-o, ȧmerȧ aləs-o, amilɛ-o, kȧdif kəsias-o, kȧgbal dɛ yi kȧtɔns tȧy.

³⁰Ɔwa aŋ yi afəm akɔtha ɛfɔf, agbɛŋa Kuru, abonɛ tȧy, akabanɛ, agbək ɛyonka, atəpi mȧtȧy mələs, ȧthȧnthonɛ ka aŋa kom ŋa,

³¹apənk, abɔth hɛ lanɛ, aba məgbɛŋȧ dɛ yi abȧki rəfɔr.

³²Hali maŋ tȧrȧ ȧŋsiraŋ ŋa Kuru-e, kəpa ŋaŋ aŋa mə yɔ mȧtȧy məwunɔŋ abeki kȧmȧ aŋ fi-e, ŋaŋ, aŋ yɔ hɛ ma gbo gbɛt, kɛrɛ aŋ bȧsər kori kori ŋaŋ aŋa mə yɔ ma sɔ.