Read Ȧŋlemrȧnɛ Ȧfu AŋRomans 11 Bible Online

AŋRomans 11 - Ȧŋlemrȧnɛ Ȧfu bible

AŋRomans 11

¹Tiyȧŋ i yif thɔŋ, Kuru-e ɔ poŋ fitha aŋfəm ŋɔŋ-i? Saki ti. Kotȧy-e minɛ sɔ i yi uIsreɛl ka rȧkomra ra Ebraham, ka ȧŋbɔnshɔ ŋa Bɛnyamin.

²Kuru ɔ tha pɛnsa hɛ aŋfəm ŋɔŋ aŋa ɔ po thith thəpaŋ. Nə tɛ hɛ ȧte mȧgbal məsəm mə pa salata Ilayaŋ ma ɔ nɛmthɛnɛ Kuru kəŋamnɛ aŋIsrɛl-i?

³Ɔ pa, ƆMariki, aŋ po difəth Aŋnȧbi a mu, aŋ po muthi muthi ɛbɛsɛ ɛ mu, ka i tiyȧ, min sɔn, ɔwa aŋ yi ka kȧthɛns aŋesəm a mi sɔ.

⁴Kɛrɛ to Kuru ɔ gbaki kɔ-e? Ɔ pa, I po bɛnɛnɛ afəm aruni ɛwul tȧmthədɛrəŋ aŋa te tha sɔ tawu ka Bel.

⁵Ya pə yi sɔ ka-ake, athȧn kəwur ka ȧŋbona a su aŋ yi, aŋa Kuru ɔ thith kətȧŋȧnɛ ȧŋboŋa ŋɔŋ.

⁶Kɛrɛ bepi pə yi salata aboŋa-e, pə gbəli hɛ sɔ yi salata məyɔs; bepi pə yi yaŋ-e, aboŋa aŋ yi hɛ sɔ aboŋa tə tɛntɛnɛ.

⁷To pə yi thɔŋ-a? Ɔwa Isrɛl aŋ thamrɔ tə kəsɔthɔ ȧtȧ mə aŋ thɛns, ka anthith aŋ po sɔthɔ ti, kɛrɛ aŋlɔm aŋ gbolŋanɛ.

⁸Mɔ mə mȧgbal məsəm mə pa, Kuru ɔ po sɔŋ ŋa ɛmerȧ ɛfi, ɛfɔr ɛyɛ te gbəli nənk, dɛ yi ɛləns ɛyɛ te gbəli təl haŋ ka-ake.

⁹Ka Debid ɔ pa, Ɛmet yaŋ ta ɛ yi ɛsɔkanɛ, ɔwa ta ɛ yi mɔ məgbət, Dɛ yi rəka ara yi dɛr ɔpəth, yi ȧŋrȧm ŋa mȧyɔs maŋ

¹⁰Ta ɛfɔr yaŋ ɛ biyȧ kȧmȧ aŋ te nənk, Ɔwa, yɔ kȧmȧ tamuth taŋ tə nuthnɛ lɔkɔ o lɔkɔ.

¹¹Tiyȧŋ i yif, Kȧpəth ka ŋaŋ kə tə yɔ ŋa aŋ dinɛ thaŋkaŋ-i? Saki ti. Kɛrɛ salata kabunɛ ka ŋaŋ kəkisi kə po bek ka tȧbona təlɔm, tə kəyɔ Isrɛl aŋ ba kətut.

¹²Ɔwa bepi kabunɛ ka ŋaŋ kə sɔŋ rəyola ka ȧdȧru-e yi kagbənkɛ ka ŋaŋ kə yi kabarnɛ ka tȧbona təlɔm-e, pə tha gbethi kəkalɔ ka ŋaŋ kə tə ba ɔfinɔ ɔthasər.

¹³kotȧy-e i fɔfȧnɛ nu na tȧbona təlɔm pəkasifɛ minɛŋ i yi usom ka tȧbona təlɔm, ɔwa i kolo matəma ma mi;

¹⁴kȧmȧ pə gbəli yi rə roŋ o roŋ i gboŋkthas aŋfəm a mi yi kətut, ɔwa kȧmȧ pə yi di kati alɔm aŋ tə kisi.

¹⁵kotȧy-e bepi kafitha ka ŋaŋ kə yi kakal manɛ ka ȧdȧru-e to kakal malanɛ ka ŋaŋ mə kə yi sɔ-e, thambe aŋesəm kəwur ka rəfi-e?

¹⁶Ɔwa bepi a səməs ȧŋgbȧp ȧtɔtɔkɔ ŋa kabo-e, kaboth kəlolok kə tə yi kəsəm; dɛ yi bepi anthəŋk aŋ yi asəm-e, yaŋ mara mȧ mə yi sɔ.

¹⁷Kɛrɛ bepi a sima mara məlɔm ma aŋleməre, ɔwa munɔ ɔwe mə yi gbo abaktha-e, a gbɛptanɛ mu ri-e, kȧmȧ mə səkɛ uyeranɛ yi ŋaŋ ka ɔbɔthi wa anthəŋk-e,

¹⁸te kolonɛ rokɔm ka mara məlɔm. Kɛrɛ bepi mə kolonɛ-e, te pənɛ kəpa munɔ mə sara hɛ anthəŋk, kɛrɛ anthəŋk ŋə mə sara mu.

¹⁹Mə tə pa, A sima məra kȧmȧ a gbɛptanɛ mi ri.

²⁰Tɛntɛnɛ, kɛrɛ a sim ŋa pəkasifɛ aŋ lanɛ hɛ, ɔwa munɔ mə təmȧ gbo salata kȧlanɛ ka mu. Te ŋatanɛ rə amera-e, kɛrɛ nesa;

²¹kotȧy-e bepi Kuru ɔ kisis hɛ naŋ mara məkomanɛ-e, yɔ kəthɛgbɛ ta thani munɔ sɔ mə kisi hɛ.

²²Tiyȧŋ kəli mathɔth dɛ yi sɔ kabak rəfɔr ka Kurɔŋ; kəbak rəfɔr ro rɔŋaŋ aŋa fumpɔ, kɛrɛ do rɔmu məthɔth, bepi mə bȧsər kɔth ka mathɔth mɔŋ. Bepi pə yi hɛ yaŋ-e, a tə sim mu sɔ.

²³Ɔwa ŋaŋ sɔ, bepi aŋ bȧkər hɛ ka kate lanɛ haŋ-e, a tə gbɛptanɛ ŋa kotȧy-e Kuru ɔ gbəli kȧl gbɛptanɛ ŋa sɔ.

²⁴Ȧtesoma-e bepi a wurɔ mu ka ȧŋbaktha ŋa ro kanth ro a koma mu, ka a gbɛptanɛ mu ka aŋleməre abɔthi-e, pə tha gbethi aŋe aŋa yi mara ma aŋleməre atɛntɛnɛ-e, a tə kȧl wɔŋȧ ŋa ka aŋleməre abɔthi aŋa koma ŋa.

²⁵Aŋwɔnt mi, ta thani nə yi aŋatanɛ rə amera-e, i yema kȧmȧ nə tȧrȧ amurare aŋe kəpa kəgbolŋanɛ kə po derər alɔm ŋa aŋIsrɛl haŋ kalasər ka tȧbona təlɔm kə bek.

²⁶Yaŋ aŋIsrɛl bɛ aŋ tə kisi, mɔ mə a gbal kəpa, ƆKisis ɔ tə wur ro Sayɔn, Ɔwa ɔ tə tɔŋa mələs kəwur ka Yekɔb.

²⁷Ɔwa aŋlemranɛ a mi do rɔŋaŋ, ŋi aŋe, Ka ȧŋlɔkɔ ma i nɔy ɛhakɛ yaŋ.

²⁸Ta salata mapa məfinɔ ma Kuru aŋ yi thɔŋ atheranɛ ŋa Kuru salata nu; kɛrɛ asabu ŋa kathithəs ka Kuru aŋ yi abɔthər salata aŋkas a ŋaŋ.

²⁹kotȧy-e Kuru ɔ ba hɛ kəsiŋkar ɛboya yi kamuti kɔŋ,

³⁰mɔlɔ min mɔ naŋ nə la kasi tə kətəl ȧrim ra Kuru Məsaba; kɛrɛ ka-ake nə po sɔthɔ ȧney asabu ŋa kakasi ka aŋYuda.

³¹Yaŋ sɔ ŋaŋ aŋ po kasi tə kəsanɛ ka ȧrim, kȧmȧ pə gbəli yi, kətȧŋȧnɛ ka ȧŋney aŋa mə a tɔri nu-e, ŋaŋ sɔ aŋ tə sɔthɔ ȧŋney ŋati.

³²Ȧtesoma-e Kuru ɔ po tand afəm bɛ ka ȧŋseth ŋa kəte lanɛ kȧmȧ pə gbəli yi afəm bɛ aŋ tə sɔthɔ ȧney do rɔŋɔŋ.

³³Ko rayola ra kȧtemp yi kȧtȧrȧ ka Kuru rə yi rəbɔlɔŋ ba! Mȧgbəkȧ mɔŋ mə tuy gbɛlɛŋ, ɔwa ȧsoŋ tɔŋ tə yi tətui tȧrȧ!

³⁴Ȧtesoma-e kanɛ la tȧrȧ ȧŋmerȧ ŋa Kuru Məsaba-e? Kanɛ la sɔŋ kɔ ȧmȧŋ-e?

³⁵Thalɔm kanɛ mɔtha sɔŋ kɔ rəka kȧmȧ ɔ gbəli kȧl sɔthɔ ȧŋrȧm ŋati-e?

³⁶kotȧy-e ɛyɛt bɛ ɛ yi kətȧŋȧnɛ dɛ yi kəwur do rɔŋɔŋ, ɔwa ɛ yi ta atɔŋ bɛ; ɔwa ta kɔnɔ yi ayiki ta thȧnkȧŋ thəbana. Amina.