Read Ȧŋlemrȧnɛ Ȧfu AŋRomans 12 Bible Online

AŋRomans 12 - Ȧŋlemrȧnɛ Ȧfu bible

AŋRomans 12

¹Tiyȧŋ i nɛmthɛnɛ nu, aŋwɔnt mi, ka ȧŋney ŋa Kuru kȧmȧ nə sɔnd madɛr ma nu mɔ sathka təkəli, təsəm dɛ yi təbeki ta Kurɔŋ; tə yi kabȧtho ka nu kəlompi.

²Te taŋanɛ mȧtȧy ma ȧdȧru ȧre, kɛrɛ lafthɛ kȧmȧ ɛmerȧ ɛ nu ɛ səkɛ ɛfu, kȧmȧ nə gbɛlɛŋ mȧselɔ ma Kuru ama yi məfinɔ, məthesa yi məgbenthis.

³kotȧy-e, salata ȧŋboŋa aŋa a sɔŋ mi-e, i pa ka wuni o wuni ɔwe yi kətɔŋ ka nu, ta ɔ te nanɛnɛ pəthas ȧtȧ ɔ yi tə kənanɛ; ta ɔ nanɛ gbo rə ȧmerȧ akəthɛgbɛ, ukin o kin mɔ mȧ Kuru ɔ poŋ thuntha kɔ kȧlanɛ.

⁴kotȧy-e ma sə ba məlaŋktha məlai ka ȧŋdɛr ŋin, yi məlaŋktha bɛ mə te ba məpanth min;

⁵yaŋ sɔ saŋ, hali sə yi sa agbȧthi, sə yi adɛr ŋin rokor ka Krayst, ɔwa kin o kin ɔ yi alaŋktha ŋin ta alɔm.

⁶Ma pə yi ti-e, sə ba ɛboya ɛgbanthɛ kətaŋ ka ȧŋboŋa ma sɔŋ su, pə yi kətaməs mɔ unabi, ta sə yɔ ki mɔlɔ ma kȧlanɛ kȧsu kə yi.

⁷Bepi pə yi kəyɔna alɔm-e, ta sə sɔndnɛ ka kayɔna kati. Ɔwe mə thəksa-e, ya ɔ yɔ sɔ ka kathəksa kɔŋ,

⁸dɛ yi ɔwe mə maŋ afəm-e, ka kȧmȧŋ kɔŋ; ɔwe mə boya-e, ta ɔ yɔ ti rə ȧmerȧ aselɔ; ɔwe mə gbəka-e ta ɔ yɔ ti rə kəbotnɛ ȧmerȧ; ɔwe mə tɔri ȧney-e, ta ɔ yɔ ti rə məbɔnɛ.

⁹Ta mabɔthər ma nu mə yi təteŋ. Gbɛŋa tȧləs, gbapsa təfinɔ.

¹⁰Bɔthərȧnɛ rə mabɔthər ma rəwɔnt. Ta ukin ɔ yikis ulɔm pəthasi kɔn kɔnɔnɛ.

¹¹Te yi ayay ka mapanth, kɛrɛ ba nu ɛmerȧ ɛfey fey rə kəyɔna ɔMarki.

¹²Ba nu məbɔnɛ ka kəgbȧk ȧmerȧ; muyu nu ka kəsɔmpanɛ, bȧsər nu ka kəramnɛ alɔkɔ bɛ.

¹³Bepi aŋfəm ŋa Kuru aŋ paŋ rəka-e, sɔŋ nu tə kəmar ŋa; bȧsər nu kəfantha atik.

¹⁴Ruba ŋaŋ aŋa sɔmpa nu; ruba gbo thɔŋ, te nu raŋka.

¹⁵Sel nu məbɔnɛ yi ŋaŋ aŋa mə sel məbɔnɛ, ɔwa bok dɛ yi ŋaŋ aŋa mə bok.

¹⁶Ba nu dim din ukin yi ulɔm, ɔwa te nu nanɛ mȧtȧy məbana gbo gbɛt, kɛrɛ nanɛ sɔ mȧtȧy məlɔl. Te nu yi abonɛ tȧy rə ȧmerȧ.

¹⁷Tenu kala wuni o wuni tələs ta tələs. Yɔ nu gbo təlompi ka kakəli ka afəm bɛ.

¹⁸Bepi pə gbəli yi-e, mɔlɔ ma nə gbəli bɛ-e, yirȧ nu ka məthɔfəl yi afəm bɛ.

¹⁹Ambɔthər a mi, te nu kala wuni tȧy tələs, kɛrɛ ternɛ rəbaŋ, pəkasifɛ a gbal kəpa, Minɛŋ i ba kəkalɔ; minɛŋ i ba kəram, ɔMarki kɔnɔ pa.

²⁰Tiyȧŋ bepi ɔtheranɛ ka nu ɔ yi udor-e, sɔŋ kɔ da rədi. Bepi rəmun rə wop kɔ-e, yer kɔ ɔ mun, kotȧy-e rə kəyɔ yaŋ nə tə gbompa nəkɛn ka rȧbomp rɔŋ.

²¹Te selɔ tȧy tələs tə tham nu-e, kɛrɛ tham nu tələs rə təfinɔ.