Read Ȧŋlemrȧnɛ Ȧfu AŋRomans 13 Bible Online

AŋRomans 13 - Ȧŋlemrȧnɛ Ȧfu bible

AŋRomans 13

¹Ta wuni o wuni ɔ yi usanɛ ka ɛfɔsɔ ɛyɛ yi kɔ rokɔm, kotȧy-e, afɔsɔ o fɔsɔ aŋ yi hɛ thambe aŋ wur ka Kuru; ɔwa ɛfɔsɔ ɛyɛ yi-e, Kuru kɔnɔ bot yi.

²Tiyȧŋ ɔwe mə tim aŋfɔsɔ-e, ɔ tim mabotəs ma Kuru. Ɔwa ŋaŋ aŋa mə tim ma-e, aŋ tə sɔthɔ mətheri.

³kotȧy-e aŋgbəka aŋ yi hɛ aləs ta ŋaŋ aŋa mə yɔ ɔfinɔ, pə thas gbo ta ŋaŋ aŋa mə yɔ ɔləs. Mə yema kȧmȧ mə te nesa ugbəka-i? Ɔwa yɔ ȧtȧ yi təfinɔ, mə tə sɔthɔ ayiki ta ti,

⁴kotȧy-e ɔ yi ȧbɔy ŋa Kuru ta ȧtȧ mu salata mafinɔ. Kɛrɛ bepi mə yɔ ɔləs-e, nesa thɔŋ, ȧtesoma-e ɔ wop hɛ aŋgbathɔ kətiŋ. Kotȧy-e ɔ yi ȧbɔy ŋa Kuru tə kəkala rəbaŋ ka kɔn ɔwe mə yɔ ɔləs.

⁵Tiyȧŋ nə yi tə kəyi asanɛ, pə yi hɛ gbo ta rənes ra kəsɔthɔ kəthalər-e, kɛrɛ kȧmȧ nə ba sɔ ȧmerȧ ȧferȧ.

⁶Ɔwa ta ȧŋsabu aŋe nə ram ɛthaks sɔ; aŋgbəka ŋa yi ɛbɔy ya Kuru tə kəyɔ mapanth ame gbeŋ.

⁷Tiyȧŋ sɔŋ wuni o wuni ara yi arɔŋ; athaks ka ɔwe mar sɔthɔ athaks, ɛfȧk ka ɔwe mar sɔthɔ ɛfȧk. Nesa nu ɔwe nə yi tə kənesa, ɔwa yikis nu ɔwe nə yi tə kəyikis.

⁸Te ba rəbei ka wuni o wuni thambe mabɔthər ma rəwɔnt. Kɔnɔŋ ɔwe ba mȧbɔthər ma rȧwɔnt-e, ɔ po yɔ ȧte ȧŋthɔ ŋa Kuru ȧŋ pa-e.

⁹kotȧy-e ɛthɔ ɛye, Te yɔ kərəp; te dif wuni; te keya; te fela ɛyɛt ya afəm alɔm; te sɔŋ məseri ma rəyem; dɛ yi bepi ɛthɔ ɛlɔm ɛ yi sɔ-e, a lɔm yi bɛ ka ȧrim are, Bɔthər ɔfatanɛ ka mu mɔ mȧ mə bɔthərnɛ.

¹⁰Məbɔthər mə yɔ hɛ ɔləs ka ɔfatanɛ kɔŋ; tiyȧŋ məbɔthər mə yi kagbenthis ka ȧŋthɔ.

¹¹Ɔwa nə tȧrȧ ȧŋlɔkɔ aŋe gbeŋ, kəpa ka-ake ŋə yi ȧŋlɔkɔ tə kəthəmɛ, kotȧy-e kakisis kȧsu kə yi ɔfati thɔŋ pəthas ma sə mɔtha lanɛ.

¹²Ratatak rə yema poŋ, rasɔk rə bek. Maŋ busnɛ nu mȧyɔs ma ȧŋsum, maŋ wɔŋ ɛyɛt ɛtima ya ɔwaŋ.

¹³Maŋ kɔth nu ɔlompi mɔ mȧkɔth ma rəyaŋ, ta pə te yi rə məyi mələs yi kətis, thalɔm rə kərəp yi kətayanɛ, thalɔm rə kəgbal yi kətut.

¹⁴Kɛrɛ wɔnsənɛ nu ɔMarki Yisɔs Krayst, ɔwa te botərnɛ ti rə ȧmerȧ tə kəlasər mafela ma madɛr.