Read Ȧŋlemrȧnɛ Ȧfu AŋRomans 15 Bible Online

AŋRomans 15 - Ȧŋlemrȧnɛ Ȧfu bible

AŋRomans 15

¹Ɔwa saŋ aŋa yi abȧki mədɛr-e, sə yi tə kəmar mȧrȧnt maŋ aŋa te ba afɔsɔ, pə mar hɛ sə thesisnɛ gbo.

²Ta kin o kin kȧsu ɔ thesis ɔfatanɛ kɔŋ ta ȧtȧ yi təfinɔ tə kətempəs kɔ.

³kotȧy-e hali Kraystȧŋ ɔ thesisnɛ hɛ, kɛrɛ mɔ a gbal kəpa, Tanal ta ŋaŋ aŋa nal mu tə fumpər mi.

⁴Tiyȧŋ tȧy o tȧy ȧtȧ a gbal thəpaŋ-e, a gbal ti salata kathəkəs kȧsu kȧmȧ sə gbəli ba kəgbak ȧmerȧ salata kamuyu yi kȧbɛfəth ka mȧgbal məsəm.

⁵Ɔwa ta ɔKuru ɔwe mə sɔŋ kəmuyu yi kəbɛfəth ɔ sɔŋ nu bɛ ȧmerȧ ŋin mɔ Yisɔs Kraystȧŋ,

⁶kȧmȧ nə yikis ɔKuru ɔKas ka ɔMarki kȧsu Yisɔs Krayst rə ȧmerȧ ŋin yi kəsəŋ kin.

⁷Tiyȧŋ malanɛ ukin yi ulɔm mɔ ayathki, mɔ Krayst sɔ ɔ po malanɛ su kəkɔ ka aŋyiki ŋa Kuru.

⁸kotȧy-e i pa kəpa a yɔ Yisɔs Krayst ȧbɔy ŋa kəbirons salata tȧteŋ ta Kuru, kȧmȧ ɔ lasər ɛlahiri ɛyɛ a sɔŋ ka aŋkas,

⁹dɛ yi kȧmȧ tȧbona təlɔm aŋ gbəli yikis Kuru ta ȧŋney ŋɔŋ, mɔ a gbal kəpa, Tiyȧŋ i ti thɔkəs mu kətɔŋ ka tȧbona təlɔm, I ti lensir ȧŋes a mu.

¹⁰kɔ kȧl pa, Selanɛ nu təbona təlɔm yi aŋfəm ŋɔŋ.

¹¹kɔ pa sɔ, Thɔkəs ɔMarki naŋ təbona təlɔm bɛ, Ɔwa ta aŋfəm bɛ aŋ thɔkəs kɔ.

¹²Ka Aysaya sɔ ɔ pa, Anthəŋk ŋa Yɛsi aŋ tə yokanɛ tə kəgbəka tȧbona təlɔm, Ro rɔŋɔŋ tȧbona təlɔm mə aŋ gbak ɛmerȧ yaŋ.

¹³Kaŋka ɔKuru ka kəgbak ȧmerȧ ɔ lasər nu rə məbɔnɛ yi məthɔfəl salata kȧlanɛ, kȧmȧ mə gbəli la yi kəgbak ȧmerȧ ka aŋfɔsɔ ŋa ɔYina məsəm.

¹⁴Ka minɛ sɔ, aŋwɔnt mi, i lanɛ kəpa naŋ gbeŋ nə la yi məthɔth, dɛ yi kətara bɛ, ɔwa nə gbəli sɔ maŋsanɛ.

¹⁵Kɛrɛ aŋwɔnt mi i po gbalər nu rə kəmintha kȧmȧ i yɔ nu nə kala ɛmerȧ ɛ nu salata ȧŋboŋa aŋa Kuru ɔ sɔŋ mi,

¹⁶kȧmȧ minɛŋ i yi naŋ ȧbɔy ŋa Yisɔs Krayst ka tȧbona təlɔm, tə kəyɔ mapanth ma mapa məfinɔ ma Kuru, kȧmȧ i lȧnki tȧbona təlɔm ka Kuru mɔ asathka təmar malanɛ ȧtȧ ɔYina məsəm ɔ səməs.

¹⁷Tiyȧŋ i gbəli kolonɛ salata Yisɔs Krayst ka mapanth ma Kuru ama i yɔ,

¹⁸ȧtesoma-e i mintha hɛ fɔf ta tȧy o tȧy thambe ta mȧtȧy ama Krayst ɔ yɔ ka kȧta kȧmi tə kəyɔ tȧbona təlɔm aŋ sanɛ, rə kəfɔf yi kəyɔ,

¹⁹rə kəmisali dɛ yi mȧtȧy məkabanɛ asabu ŋa aŋfɔsɔ ŋa ɔYina məsəm; kȧmȧ kətəp ro Yerusalɛm yi tapet ta rayɛr haŋ kəkɔ ro Ilirikɔm, i po taməs ɔgbenthis mapa məfinɔ ma Krayst.

²⁰Yao i ba afela abaŋ tə kətaməs mapa məfinɔ, pə yi hɛ ro a poŋ thɔŋ bont ȧŋes ŋa Kraystȧŋ, kȧmȧ pə te yi rokɔm ka ɔtəmər wa wuni lɔm;

²¹kɛrɛ mɔ a po gbal kəpa, Ŋaŋ aŋa te tha sɔthɔ aŋkanɛ ta atɔŋ, aŋ tə nənk, Yi ŋaŋ aŋa te tha təl aŋ tə tȧrȧ.

²²Te ba ti ȧtȧy ȧte tə bɛnt mi alɔkɔ alai tə kəder ro rɔnu.

²³Kɛrɛ ka-ake ma i te sɔ ba dɛr ɔlɔm ka ɛbilaŋ ɛye-e, ɔwa ma i po ba afela tə kəder ro rɔnu təren təgbȧthi ȧte,

²⁴i gbak ȧmerȧ tə kənəŋk nu ma mə i thas kəkɔ ro Spen-e, kȧmȧ nə mar mi ka ȧŋbiyas ŋati ma i po yirȧ kətɔŋ ka nu ɔthan.

²⁵Kɛrɛ ka-ake i kɔ ro Yerusalɛm tə kəkera ɛboya ka aŋfəm ŋa Kuru.

²⁶kotȧy-e pə thesanɛ ŋaŋ aŋa yi ro Masidoniya yi Akaya tə kəfak akala salata ȧŋmɔnɛ kətɔŋ ka aŋsəm aŋa yi ro Yerusaləm.

²⁷Yao, pə bɔnɛ ŋa kəyɔ ti yathi kaŋ la ba mɔlɔ ma rəbey do rɔŋaŋ. Kotȧy-e bepi tȧbona təlɔm aŋ po sɔthɔ ȧgbȧp ŋa ɛruba ya ɔYina salata aŋYuda-e, aŋ yi sɔ tə kəmar aŋYuda ka mɛyɛt ma madɛr.

²⁸Te ba ti bepi i po yɔ ȧte-e, ma i po lȧnki ɛboya ɛye ka aŋfəm ŋa Kuru-e, i ti thas ro rɔnu kəkɔ ro Spen.

²⁹Ka i tȧrȧ kəpa bepi i bek ro rɔnu-e, i ti der ulasərnɛ wa aŋruba ŋa Krayst.

³⁰Ɔwa aŋwɔnt a mi, i nɛmthɛnɛ nu salata ɔMarki Yisɔs Krayst yi salata mabɔthər ma ɔYina məsəm, kȧmȧ nə timnɛ yi minɛŋ ka taramnɛ ta nu ka Kuru ta ȧtȧ mi;

³¹kȧmȧ a tafi mi kəwur ka mȧta maŋ aŋa te lanɛ ro Yudia, yi kȧmȧ kamar ȧke i kera ro Yerusalɛm kə gbəli thesis aŋfəm ŋa Kuru.

³²Kama bepi Kuru ɔ selɔ-e, i gbəli der ro rɔnu rə məbɔnɛ, ɔwa i sɔthɔ sɔ kəfothanɛ dɛ yi naŋ.

³³Ta ɔKuru ka məthɔfəl ɔ yi yi naŋ bɛ. Amina.