Read Ȧŋlemrȧnɛ Ȧfu AŋRomans 2 Bible Online

AŋRomans 2 - Ȧŋlemrȧnɛ Ȧfu bible

AŋRomans 2

¹Tiyȧŋ munɔ, O wuni kəpet, mə ba hɛ sɔ roŋ bepi mə thonkas wuni lɔm, kotȧy-e ma mə sɔŋ ulɔm mətheri-e, mə sɔnɛ mətheri, pəkasifɛ mə yɔ mɔlɔ min yi ɔlɔm.

²Ɔwa sə tȧrȧ kathoŋkas ka Kuru kə thor ɔlompi rokɔm ka ŋaŋ aŋa mə yɔ mȧtȧy məwunɔŋ.

³Munɔ ɔwe mə sɔŋ ŋa mətheri aŋa mə yɔ mȧtȧy məwunɔŋ, ma munɔ gbeŋ mə yɔ ma sɔ-e, mə nanɛ kəpa mə tə fisə ka kathoŋkas ka Kuru-i?

⁴Thalɔm mə sai rayola ra mathɔth mɔŋ yi ȧŋney dɛ yi kamuyu kɔŋ kəlele-i? Mə tɛ hɛ kəpa mathɔth ma Kuru mȧ mə yɔ mu mə thupi-i?

⁵Kɛrɛ kətaŋ ka kabak ka mu rəfɔr yi kate thupi ka mu-e, mə bȧr gbo rəbaŋ ka ȧŋrey ŋa rəbaŋ, ma kathoŋkas kəlompi ka Kuru kə tɔrinɛ;

⁶ɔwe mə ba kəram wuni o wuni mɔ mȧyɔs mɔŋ mə yi.

⁷Ka ŋaŋ aŋa bȧsər tə kəyɔ təfinɔ rə kəmuyu kȧmȧ aŋ thɛns ayiki yi alambe, yi mȧtȧy ama te ba kəpoŋ thȧnkȧŋ, ɔ tə sɔŋ aŋesəm thəbana,

⁸kɛrɛ ka ŋaŋ aŋa ba kəgbal-e, aŋa te sanɛ ka tateŋ-e, aŋa mə wop gbo mȧkənȧ-e, asɔmpanɛ yi rəbaŋ,

⁹məsibo yi məkɛthanɛ ɛ tə der ka wuni o wuni ɔwe mə yɔ ɔləs, ka ɔtɔtɔkɔ ka ɔYuda, yi ka ɔKrik sɔ,

¹⁰kɛrɛ ayiki, alambe yi məthɔfəl ka wuni o wuni ɔwe mə yɔ ɔlompi, ka ɔtɔtɔkɔ ka ɔYuda, yi ka ɔKrik sɔ.

¹¹kotȧy-e Kuru ɔ ba hɛ agbȧy.

¹²Tiyȧŋ ŋa bɛ aŋa po yɔ ahakɛ kəte ba anthɔ-e, ŋa ba sɔ kədinɛ kəte ba ȧŋthɔ; ɔwa ŋa bɛ aŋa mə yɔ ahakɛ maŋ yi ratha ka anthɔ-e, a tə thonkas ŋa kətaŋ ka ȧŋthɔ.

¹³Ȧtesoma-e pə yi hɛ ŋaŋ aŋa mə təl ȧŋthɔ ŋa mə yi alompi rodi ka Kuru, kɛrɛ ŋaŋ aŋa mə wop ŋi, ŋa ba kəsɔthɔ məmari.

¹⁴Ɔwa tȧbona təlɔm aŋa te ba ȧŋthɔ aŋ yɔ ȧtȧ ȧŋthɔ aŋ yamari kətaŋ ka kȧtemp ka mayi maŋ, ka aŋ səkɛ asiraŋ ka ɛyɛthɛ yaŋ hali maŋ te ba ȧŋthɔ gbeŋ.

¹⁵Aŋ tɔri kəpa a po gbal ɛyamari ya ȧŋthɔ ka ɛmerȧ yaŋ, ka ɛsɔŋ yaŋ ɛ seri ta ti, ɔwa ɛnanɛ yaŋ ɛgbaskɛ gbaskɛ ɛ sɔŋ ŋa mətheri thalɔm məmari,

¹⁶ka ȧŋrey aŋa Kuru mɔ thonkas ɛmurare ya afəm ka kȧta ka Yisɔs Krayst, mɔ mə mapa məfinɔ ma Kuru mə pa, ama minɛ i po tɔri nu.

¹⁷Ɔwa mə ba ȧŋes ŋa uYuda, mə sɛlinɛ ka ȧŋthɔ, mə kolonɛ ka Kuru,

¹⁸mə tȧrȧ mȧselɔ mɔŋ, mə gbəli gbɛlɛŋ ȧtȧ tha yi təfinɔ thɔŋ bɛ, ma a po thəksa mu ka ȧŋthɔ.

¹⁹Mə lanɛ kəpa mun munɔnɛ mə yi ukɔtha ka aŋfith, amotha ka ŋaŋ aŋa yi ka ȧŋsum,

²⁰uthəksa ka ante tȧrȧ, ukarmɔkɔ ka aŋfɛth, pəkasifɛ ka ȧŋthɔ mə ba amɔl ŋa kȧtȧrȧ ka tȧteŋ.

²¹Tiyȧŋ munɔ, bepi mə thəksa alɔm-e, mə thəksanɛ hɛ-i? Bepi mə kəwandi kəpa wuni ɔ ba hɛ kəkeya-e, munɔ mə keya hɛ-i?

²²Munɔ mə pa wuni ɔ yi hɛ tə kəyɔ kərəp, munɔ mə yɔ hɛ kərəp-i? Bepi munɔ mə gbɛŋa ɛyɛt ɛbumərnɛ-e, munɔ mə gbasi hɛ ɛyɛt ya ɛseth ro mə a bȧtho ɛyɛt ɛpath-i?

²³Munɔ ɔwe mə kolonɛ ka ȧŋthɔ, mə tə fəŋfərəs Kuru rə kaləsər ka mu anthɔ-i?

²⁴kotȧy-e salata nu a fɔf ȧŋes ŋa Kuru ɔləs kətɔŋ ka tȧbona təlɔm, mɔ mȧ a gbal ti ka mȧgbal məsəm.

²⁵Ɔwa kəbirons kə mar tȧy bepi mə wop ȧŋthɔ, kɛrɛ bepi mə yi uləsər anthɔ-e, kabirons ka mu kə səkɛ mu kəte birons.

²⁶Tiyȧŋ bepi ute birons ɔ bɛnɛ ɛyamari ya anthɔ-e, a ba hɛ kəthunthanɛ kate birons kɔŋ mɔ kəbirons-i?

²⁷Ɔwa kɔn ɔwe yi ute birons ka kakom kɔŋ-e, kɛrɛ ɔ wop ȧŋthɔ, kɔnɔ tha thonkas mu, ɔwe mə ba mȧgbal ma ȧŋthɔ yi kȧbirons, kɛrɛ halisa mə ləsər anthɔ-i?

²⁸kotȧy-e uYuda tɛntɛnɛ ɔ yi hɛ uYuda ka mȧyɔs mɔŋ gbo gbɛt-e, thalɔm kəbirons tɛntɛnɛ kə yi hɛ gbo salata madɛr;

²⁹kɛrɛ ɔ yi uYuda tɛntɛnɛ ɔwe yi uYuda rə ȧmerȧ, yi kəbirons tɛntɛnɛ kə yi ka ȧŋmerȧ dɛ yi ka aŋyina, pə yi hɛ gbo ka mȧgbal son. Kakolo ka wuni wunɔ kə yi hɛ ka afəm, kɛrɛ kə wur ka Kuru.