Read Ȧŋlemrȧnɛ Ȧfu AŋRomans 3 Bible Online

AŋRomans 3 - Ȧŋlemrȧnɛ Ȧfu bible

AŋRomans 3

¹Ko anaŋfa thɔŋ uYuda ɔ ba-e? Thalɔm ko kəthɛksɛ kəbirons kə gbəli ba-e?

²Agbathi gbo rə roŋ o roŋ. Ka ɔtɔtɔkɔ, pəkasifɛ a maŋkər anYuda mȧgbal məsəm ma Kuru.

³To pə yi bepi alɔm aŋ yi hɛ abɔthi lanɛ-e? Kate lanɛ ka ŋaŋ kə tə gbəli yɔ kabɔthi lanɛ ka Kuru kə thamrɔ-i?

⁴Saki ti; yao, ta Kuru ɔ yi təteŋ hali wuni o wuni ɔ yi uyem, mɔ mə a po gbal kəpa, Kama mə sɔthɔ məmari ka mapa ma mu, Dɛ yi mə ŋap ŋaŋ aŋa mə thonkas mu.

⁵Kɛrɛ bepi makənə ma su mə yɔ mȧlompi ma Kuru tə kəbar tɔri gbəraŋ-e, to mə sə gbəli pa-e? Sə gbəli pa Kuru ɔ yi hɛ ulompi ma ɔ thalər wuni-i? (I fɔf mɔ wuni kəpet).

⁶Saki ti. Bepi pə yi yaŋ-e, to Kuru mɔ gbəli rɔk ɛpa ya raru-e?

⁷Bepi pə yi rayem ra mi rə mə yɔ tȧteŋ ta Kuru tə bȧr sɔthɔ yiki-e, ta kɔyɛŋ mɔ thonkas mi mɔ wuni ka ahakɛ-e?

⁸Ɔwa kɔyɛŋ sə te pa, (mɔ mə alɔm aŋa mə fofiya su kəpa sə pa ye), Ta sə yɔ ɔləs kȧmȧ ɔfinɔ ɔ wur-e? Mȧtheri ma aŋfəm ŋati mə tə yi məlompi.

⁹To pə yi thɔŋ-a? Saŋ aYuda sə thasi aŋlɔm-i? Sako; ȧtesoma-e sə po tɔri kəpa aŋYuda yi tȧbona təlɔm, ŋa bɛ aŋ yi roratha ka aŋfɔsɔ ŋa ahakɛ.

¹⁰Mɔ mȧ a po gbal kəpa, Wuni lompi ɔ yi hɛ hali ukin.

¹¹Wuni tȧrȧ tȧy ɔ yi hɛ, Wuni ɔwe thɛns Kuru ɔ yi hɛ.

¹²Ŋa bɛ aŋ po sɔkar, ŋa bɛ aŋ po gbɔgbətha, Hali wuni kin ɔ yi hɛ ɔwe mə yɔ ɔfinɔ.

¹³Ɛbolo yaŋ ɛ yi gbo mɔ təboma təkanthɛ, Ka tȧmer taŋ aŋ fɔf yaŋfa. Mȧkɔn ma ɛlɔfɔth mə yi roratha ka tasəŋ taŋ;

¹⁴Tasəŋ taŋ tə la yi tənal yi sim təroŋkəth.

¹⁵Ȧtȧtək taŋ tə yi təfəŋf tə kəloŋ mətir.

¹⁶Kȧdinɛ yi amɔnɛ kə yi ka asoŋ taŋ,

¹⁷Ȧroŋ da mȧthɔfəl, aŋ la hɛ tȧrȧ ri.

¹⁸Ranes ra Kuru rə yi hɛ rodi ka ɛfɔr yaŋ.

¹⁹Ɔwa sə tȧrȧ kəpa mȧtȧy ama ȧŋthɔ aŋ pa, aŋ fɔfȧnɛ ŋaŋ aŋa yi roratha ka ȧŋthɔ, kȧmȧ a kantha kəsəŋ o kəsəŋ, dɛ yi kȧmȧ ȧdȧru bɛ rə ba mətheri rodi ka Kuru.

²⁰Pəkasifɛ salata mȧyɔs ma ȧŋthɔ wuni o wuni ɔ gbəli hɛ sɔthɔ məmari. Ka kakəli kɔŋ; kotȧy-e ȧŋthɔ aŋ sɔŋ su kȧtȧrȧ ka aŋhakɛ

²¹Kɛrɛ ka-ake mȧlompi ma Kuru mə tɔrinɛ kəgbaskinɛ kəwur ka ȧŋthɔ, ɔwa ȧŋthɔ yi Aŋnȧbi ŋa seri ta mȧlompi mati.

²²Mȧlompi ma Kuru asabu ŋa kȧlanɛ ka Yisɔs Kraystȧŋ mə yi ka ŋa bɛ aŋa mə lanɛ.

²³kotȧy-e ɔgbaskɛ ɔ yi hɛ, ȧtesoma-e afəm bɛ aŋ po yɔ ahakɛ, ɔwa aŋ bun aŋyiki ŋa Kuru,

²⁴kɛrɛ aŋ sɔthɔ məmari məyaŋkaŋ salata ȧŋboŋa ŋɔŋ kətaŋ ka kabani ȧke yi ka Yisɔs Kraystȧŋ.

²⁵kotȧy-e Kuru ɔ təmər kɔ tə kəyi unɛmthɛnɛ salata kȧlanɛ ka mȧtir mɔŋ. Ɔ yɔ ȧte kȧmȧ ɔ tɔri mȧlompi mɔŋ, ȧtesoma-e ka kamuyu kɔŋ ɔ po painɛ ɛhakɛ ɛyɛ aŋ po yɔ,

²⁶tə kətɔri mȧlompi mɔŋ ka ȧŋlɔkɔ aŋe, tə kəyi, kɔn kɔnɔnɛ ɔ yi ulompi, ɔwa ɔ gbəli sɔŋ məlompi sɔ ka kɔn ɔwe mə lanɛ ka Yisɔs.

²⁷Kəkolonɛ, reke kə yi thɔŋ sɔ-a? Kə gbəli hɛ yi. Kɔyɛŋ kə te gbəli yi-e? Ta asabu ŋa mȧyɔs-i? Sako, pə yi ta ȧŋsabu ŋa kȧlanɛ.

²⁸Tiyȧŋ sə gbək kəpa ye, wuni ɔ sɔthɔ məlompi rə kəlanɛ kəte ba mȧyɔs ma ȧŋthɔ.

²⁹Kuru ɔ yi ɔKuru ka aŋYuda gbo son-i? Ɔ yi hɛ sɔ ɔKuru ka tȧbona təlɔm-i? Yao, ɔ yi sɔ ka tȧbona təlɔm.

³⁰Ma sə tȧrȧ ɔKuru kin gbo ɔ yi, kɔnɔ ɔ tə sɔŋ məlompi ka ȧŋbirons salata kȧlanɛ, dɛ yi aŋa te yi abirons sɔ, maŋ tɔri kȧlanɛ kati.

³¹Saŋ sə yɔ kȧlanɛ ake tə kədim anthɔ-i? Saki ti! Sə bȧksər ȧŋthɔ.