Read Ȧŋlemrȧnɛ Ȧfu AŋRomans 4 Bible Online

AŋRomans 4 - Ȧŋlemrȧnɛ Ȧfu bible

AŋRomans 4

¹To mə sə pa thɔŋ-a ta Ebraham ɔbemba kȧsu ka rawuni kəpet ka su-e?

²kotȧy-e bepi ɔ sɔthɔ naŋ məmari salata mȧyɔs mɔŋ-e, ɔ ba naŋ rȧ ɔ gbəli kolonɛ, kɛrɛ rodi ka Kuru thahɔ.

³Ko mȧgbal məsəm mə pa-e? Ebraham ɔ lanɛ Kuru, ka a lɔm ti ro rɔŋɔŋ mɔlɔ min rə məlompi.

⁴Ɔwa kɔn ɔwe yɔ məpanth-e, a kəli hɛ ȧŋrȧm ŋɔŋ mɔ aboya, kɛrɛ pə yi mɔ ȧŋrȧm ŋɔŋ gbeŋ.

⁵Ɔwa kɔn ɔwe te yɔ məpanth, kɛrɛ ɔ lanɛ gbo kɔn ɔwe gbəli sɔŋ məmari ka ŋaŋ aŋa te yi alompi, a lɔm kȧlanɛ kɔŋ mɔ məlompi.

⁶Debid sɔ ɔ tɔri aŋruba ŋa ɔwuni ɔwe Kuru ɔ lɔma məlompi kəgbaskinɛ kəwur ka mȧyɔs mɔŋ.

⁷Ɔ pa hɔ, Aruba aŋ yi ka ŋaŋ aŋa a tera makənȧ maŋ, Yi aŋa ba ɛhakɛ ɛgbəpər.

⁸Wuni ka aruba wɔŋ ɔwe ɔMarki mɔ te lɔma kɔ ɛhakɛ yɔŋ.

⁹Aŋruba aŋe aŋ yi gbo ka ȧŋbirons son-i, thalɔm ka aŋa te yi abirons sɔ-i? kotȧy-e sə pa a lɔm kȧlanɛ ka Ebraham tə kəyi naŋ məlompi.

¹⁰Asabu areke mə a lɔm ki-e, yeŋka a birons kɔ-e, thalɔm kədarəŋ kati-e? Ka kȧbirons thahɔ, kɛrɛ ka kate birons.

¹¹kɔ sɔthɔ aŋlomar ŋa kȧbirons tə kətɔri tɛntɛnɛ mȧlompi ka kȧlanɛ ȧke ɔ ba yeŋka a birons kɔ, kȧmȧ ɔ gbəli yi ɔkas ka ŋaŋ bɛ aŋa lanɛ hali ma a te tha birons ŋa, kȧmȧ a gbəli lɔma ŋa məlompi sɔ,

¹²dɛ yi kȧmȧ ɔ gbəli yi ɔkas ka ȧŋbirons-e, pə yi hɛ ŋaŋ aŋa a birons ka madɛr gbo gbɛt, kɛrɛ ŋaŋ aŋa taŋanɛ ɔkas kȧsu Ebraham ka kȧlanɛ ȧke ɔ ba yeŋka a birons kɔ.

¹³kotȧy-e aŋlahiri ŋa Ebraham dɛ yi aŋwuth ŋɔŋ, kəpa aŋ tə səkɛ aŋbȧki ŋa ȧdȧru, aŋ der hɛ kətȧŋȧnɛ ka ȧŋthɔ, kɛrɛ ka mȧlompi ma kȧlanɛ.

¹⁴kotȧy-e bepi ŋaŋ aŋa wop ȧŋthɔ aŋ yi aŋbȧki-e, kȧlanɛ kə səkɛ ayay, yi aŋlahiri aŋ thamrɔ,

¹⁵pəkasifɛ ȧŋthɔ aŋ tə kȧrȧ kathalər ka rȧbaŋ, kɛrɛ ro athɔ aŋ te yi, kələsər ȧŋthɔ kǝ yi hɛ ri.

¹⁶Tiyȧŋ aŋlahiri aŋ təmȧ ka kȧlanɛ kaŋka aŋ gbəli yi salata aboŋa; kȧmȧ aŋlahiri aŋ bȧkər ka aŋwuth bɛ, pə yi hɛ gbo ka ŋaŋ aŋa təmȧ ka ȧŋthɔ, kɛrɛ ka ŋaŋ sɔ aŋa yi ka kȧlanɛ ka Ebraham, kotȧy-e kɔnɔ yi ɔkas kȧsu bɛ,

¹⁷(mɔ mȧgbal məsəm mə pa, I po səki mu ɔkas ka tȧbona təgbȧthi) rodi ka kɔn ɔwe ɔ lanɛ, pə yi mɔ Kuru Məsaba, ɔwe kəlis aŋfi, dɛ yi ɔwe tela ɛyɛt ɛyɛ te tha yi mɔ ɛ yi.

¹⁸Ebraham-əŋ ma ɔ te sɔ ba rə ɔ gbak amera-e, halisa ɔ lanɛ rə kəgbak ȧmerȧ, kȧmȧ ɔ səkɛ ɔkas ka təbona təgbȧthi; mɔ mə ȧsim tə pa, Yaŋ aŋwuth a mu aŋ tə yi.

¹⁹Hali ɔ yema bȧk thɔŋ təren kɛmɛ kin-e, kɔ yi gbo mɔ wuni fi ka andɛr-e, kȧlanɛ kɔŋ kə thamrɔ hɛ, hali mɔ ɔ tȧrȧ sɔ kəpa Sara ɔ po thas ȧŋlɔkɔ tə kəkom.

²⁰Ɔ sikɛ hɛ ti tə kəte lanɛ aŋlahiri ŋa Kurɔŋ, ɔ bȧkər gbo ka kəlanɛ, kɔ sɔŋ Kuru yiki.

²¹Ɔ lanɛ tɛntɛnɛ kəpa ȧtȧ Kuru ɔ po lahiri, ɔ ba afɔsɔ tə kəyɔ.

²²Tiyȧŋ a lɔma kɔ ti tə kəyi mɔ məlompi.

²³Ɔwa a gbal hɛ ti ta atɔŋ gbo son-e, kəpa a lɔma kɔ ti tə kəyi mɔ məlompi,

²⁴kɛrɛ ta ȧtȧ su sɔ. Ɔwa Kuru ɔ tə kəli kȧlanɛ kȧsu mɔlɔ min, bepi sə lanɛ kɔn ɔwe yokas Yisɔs Krayst kȧsu ka aŋfi.

²⁵Ɔwe a sɔnd salata ɛhakɛ ɛ su, ɔwa a yokas kɔ kətɔŋ ka aŋfi kȧmȧ sə gbəli sɔthɔ məmari.