Read Ȧŋlemrȧnɛ Ȧfu AŋRomans 5 Bible Online

AŋRomans 5 - Ȧŋlemrȧnɛ Ȧfu bible

AŋRomans 5

¹Tiyȧŋ ma sə po sɔthɔ məmari kətȧŋȧnɛ ka kȧlanɛ-e, sə ba məthɔfəl yi Kurɔŋ salata Yisɔs Krayst ɔMarki kȧsu,

²ka ɔwe sə sɔthɔ roŋ rə kəlanɛ ka ȧŋboŋa ŋa Kuru ro sə təmȧ. Ɔwa ta pə bɔnɛ su salata kagbak ȧmerȧ ka aŋyiki ŋa Kuru.

³Ɔwa pə yi hɛ gbo yaŋ, kɛrɛ sə sel məbɔnɛ ka ɛsɔmpanɛ ɛ su sɔ, ma sə tȧrȧ kəpa kȧsɔmpanɛ kə tə kom kȧmuyu;

⁴ɔwa kȧmuyu kə tə kom kȧtara, yi kȧtara kə tə kom kȧgbak ȧmerȧ.

⁵Ɔwa kȧgbak ȧmerȧ kə tɔns hɛ su pəkasifɛ mabɔthər ma Kuru mə lasər tabuth ta su kətȧŋȧnɛ ka ɔYina məsəm ɔwe ɔ sɔŋ su.

⁶kotȧy-e ma sə te tha ba afɔsɔ-e, ka ȧŋlɔkɔ abeki Krayst ɔ fi ta salata aŋa te bɔthər Kuru.

⁷Ȧtesoma-e pə tə yi naŋ ɔbaki mədɛr ta wuni tə kəfi salata wuni lompi; kɛrɛ sɔthlɔm wuni lɔm ɔ tə mintha hali tə kəfi ta wuni finɔ.

⁸Kɛrɛ Kuru ɔ tɔri mabɔthər mɔŋ ro rɔsu, pəkasifɛ ma sə yi ras afəm ŋa ahakɛ-e, Krayst ɔ fi ta ȧtȧ su.

⁹Tiyȧŋ ma a sɔŋ su məmari ka-ake salata mȧtir mɔŋ-e, pə tha gbethi a tə kisis su kəwur ka rabaŋ ra Kuru salata aŋesəm ŋɔŋ.

¹⁰kotȧy-e bepi ma sə yi ras saŋ atheranɛ-e, a yɔ su sə kȧl manɛ yi Kurɔŋ kətȧŋȧnɛ ka rafi ra ɔWan kɔŋ-e, pə tha gbethi ma sə po thɔŋ kȧl manɛ-e, a tə kisis su salata aŋesəm ŋɔŋ.

¹¹Ɔwa pə thalnɛ hɛ ri gbo-e, kɛrɛ sə sel məbɔnɛ sɔ ka Kuru asabu ŋa ɔMarki kȧsu Yisɔs Kraystȧŋ, ma sə po sɔthɔ kakal manɛ kȧsu kətȧŋȧnɛ do rɔŋɔŋ.

¹²Tiyȧŋ ma ahakɛ aŋ wɔŋ ka ȧdȧru asabu ŋa wuni kin dɛ yi rəfi sɔ-e, asabu ŋa ahakɛ-e; yaŋ rəfi rə rensa wuni o wuni kotȧy-e afəm bɛ aŋ po yɔ ahakɛ.

¹³Ahakɛ aŋ yi ka ȧdȧru yeŋka a sɔŋ ȧŋthɔ, kɛrɛ a gbəli hɛ lɔma wuni ahakɛ ma ȧŋthɔ aŋ te tha yi.

¹⁴Ɔwa kətəp ka Adȧm haŋ ka Mosis rəfi rə gbəka, hali rokɔm ka ŋaŋ aŋa te yɔ ahakɛ ŋa Adȧm. Ɔwa ɔ yi anthunthərȧ ŋa kɔn ɔwe ba kəder.

¹⁵Kɛrɛ ɔgbaskɛ ɔ yi kətɔŋ ka aŋhakɛ ŋa Adȧm yi ȧŋboya ŋa Kuru, kotȧy-e bepi, asabu ŋa aŋhakɛ ŋa wuni kin-e, afəm bɛ aŋ ba tə kəfi-e, pə tha gbethi ȧŋboŋa ŋa Kuru yi ȧŋboya ŋa ȧŋboŋa aŋa mə der salata ɔwuni kin, Yisɔs Kraystȧŋ, aŋ tə thɛrmɛ ka afəm bɛ.

¹⁶Ka ɔgbaskɛ ɔ yi sɔ kətɔŋ ka ȧnɔnth ŋa aŋhakɛ ŋa ɔwuni kin kati yi ȧŋboya. Kotȧy-e anthoŋkas aŋa tȧŋ aŋhakɛ ŋa wuni kin aŋ kȧrȧ mətheri, kɛrɛ ȧŋboya ŋa ȧŋboŋa ŋa Kuru aŋa tȧŋ ɛhakɛ ɛgbȧthi aŋ kȧrȧ məmari.

¹⁷Pəkasifɛ bepi-e, salata aŋhakɛ ŋa wuni kin rəfi rə gbəka asabu ŋa ɔkin-e, pə tha gbethi ŋaŋ aŋa sɔthɔ ȧŋboŋa ȧbana ŋa Kuru dɛ yi ȧŋboya ŋa malompi aŋ tə gbəka ka aŋesəm, asabu ŋa ɔkin Yisɔs Kraystȧŋ.

¹⁸Di kati, ma aŋhakɛ ŋa ukin aŋ kȧrȧ mətheri ka afəm bɛ; yaŋ sɔ mȧlompi ma ukin mə kȧrȧ məmari dɛ yi aŋesəm ka afəm bɛ.

¹⁹kotȧy-e ka asabu ŋa kate sanɛ ka wuni kin agbȧthi aŋ po səkɛ afəm ŋa ahakɛ-e, yaŋ sɔ asabu ŋa kasanɛ ka wuni kin agbȧthi aŋ səkɛ alompi.

²⁰A wɔŋ ȧŋthɔ kȧmȧ ahakɛ aŋ bȧrnɛ. Kɛrɛ ro ahakɛ aŋ bȧrnɛ, aboŋa aŋ bȧr gbo bȧrnɛ;

²¹kȧmȧ mɔ ahakɛ aŋ gbəka salata rəfi, yaŋ sɔ aboŋa aŋ gbəka salata mȧlompi kəkɔ ka aŋesəm thəbana asabu ŋa Yisɔs Krayst ɔMarki kȧsu.