Read Ȧŋlemrȧnɛ Ȧfu AŋRomans 7 Bible Online

AŋRomans 7 - Ȧŋlemrȧnɛ Ȧfu bible

AŋRomans 7

¹Pə sɔk hɛ nu aŋwɔnt a mi, (kotȧy-e i fɔfȧnɛ afəm aŋa tȧrȧ ȧŋthɔ), kəpa ȧŋthɔ aŋ gbəli gbo gbəka wuni ma ɔ yi ras ukəli-i?

²Tiyȧŋ ka ȧŋthɔ, ɔwuni bom ubala ɔ yi usekərənɛ ka ɔwos kɔŋ fani ma ɔ yi ukəli, kɛrɛ bepi ɔwos kɔŋ ɔ fi-e, a səli kɔ kəwur ka ȧŋthɔ ŋati.

³Tiyȧŋ bepi ɔ balȧ ka wuni lɔm ma ɔwos kɔŋ ɔ yi ras ukəli-e, a tə bont kɔ ubɛra urəpi; kɛrɛ bepi ɔwos ɔ fi thɔŋ-e, ȧŋthɔ ŋati aŋ ba hɛ sɔ afɔsɔ rokɔm kɔŋ. Hali ɔ kȧl sɔ balȧ rə wuni lɔm-e, ɔ yi hɛ sɔ ubɛra urəpi.

⁴Ɔwa aŋwɔnt a mi, naŋ sɔ nə po fi salata ȧŋthɔ asabu ŋa ȧŋdɛr ŋa Krayst, kȧmȧ nə gbəli balȧ ka ulɔm, pə yi mɔ ka kɔn ɔwe po yokanɛ ka rəfi, kȧmȧ sə wur məkomi ta Kuru Məsaba-əŋ.

⁵kotȧy-e ma sə la yi ka mayi ma su məkur-e, mafela ma su mələs ama ȧŋthɔ aŋ thəmi-e, mȧ mə yɔ malaŋktha ma madɛr ma su mə wur məkomi ta rəfi.

⁶Kɛrɛ ka-ake sə po fisȧ kəwur ka ȧŋthɔ, ma pə yi sə poŋ fi salata aŋa wop su. Tiyȧŋ sə bȧtho rə aŋesəm afu ka ɔYina, pə yi hɛ ka mȧgbal məkur gbo gbɛt.

⁷To mə sə pa thɔŋ ta ti-a? Ȧŋthɔ aŋ yi tȧy tələs-i? Saki ti. Bepi pə yi hɛ naŋ ka anthɔ-e, i gbəli hɛ tȧrȧ naŋ ahakɛ; kotȧy-e bepi ȧŋthɔ aŋ la hɛ naŋ pa, Te ba amilɛ salata ɛyɛt ya wuni lɔm-e, i gbəli hɛ naŋ tȧrȧ to amilɛ aŋ yi.

⁸Kɛrɛ ahakɛ-e, maŋ po gbasi afɔsɔ asabu ŋa aŋyamari, aŋ yɔnɛ məfela tətəp bɛ rokor kȧmi; kotȧy-e bepi ȧŋthɔ aŋ yi hɛ naŋ, ahakɛ aŋ tə po naŋ fi.

⁹Ka ȧŋlɔkɔ ma i te tha tȧrȧ anthɔ-e i yi ukəli, kɛrɛ ma aŋyamari ŋa ȧŋthɔ aŋ bek-e, ka ahakɛ aŋ thəmɛ, ka minɛŋ i fi tɛnɛ.

¹⁰Ka i fir kəpa aŋyamari gbeŋ aŋa yi naŋ tə kəsɔŋ mi aŋesəm, aŋ sɔŋ mi thɔŋ rəfi.

¹¹Ɔwa ahakɛ sɔ-e, maŋ fir ȧŋsabu ŋati ka aŋyamari ŋa anthɔ-e, aŋ tɔns mi, ɔwa di kati rə aŋ dif mi.

¹²Tiyȧŋ ȧŋthɔ aŋ yi asəm, yi aŋyamari aŋ yi asəm, alompi dɛ yi afinɔ.

¹³Ɔwa pə gbəli yi ȧtȧ yi təfinɔ tə səkɛ rəfi ta ȧtȧ mi-i? Saki ti. Kɛrɛ ahakɛ ŋə mə yɔ mi i fi kətaŋ ka ȧtȧ yi təfinɔ, kȧmȧ aŋ tɔrinɛ kəpa pə yi ahakɛ tɛntɛnɛ, kȧmȧ aŋyamari aŋ tɔri ɔləs wa ahakɛ gbafəth.

¹⁴kotȧy-e sə tȧrȧ kəpa ȧŋthɔ aŋ yi asəm kɛrɛ minɛ i yi gbo ka mafela ma ȧŋdɛr, i yi utar ka ahakɛ.

¹⁵Ȧtesoma-e pə sɔk hɛ mi to pə som mə i yɔ ȧtȧ mə i yɔ, kotȧy-e i yɔ hɛ ȧtȧ i yema, kɛrɛ ȧtȧ i gbɛŋa, tȧ mɛ yɔ.

¹⁶Ɔwa bepi i yɔ ȧtȧ i te yema-e, i selɔ kəpa ȧŋthɔ aŋ yi afinɔ,

¹⁷kotȧy-e pə yi hɛ minɛŋ ɔwe mə yɔ ti, kɛrɛ pə yi ahakɛ aŋa yi mi rokor.

¹⁸I tȧrȧ kəpa rokor kȧmi, pə yi mɔ-e, ka ȧŋdɛr a mi, tȧy təfinɔ tə yi hɛ ri; kotȧy-e mȧselɔ mə yi mi tə kəyɔ ɔlompi, kɛrɛ aŋfɔsɔ tə kəyɔ yi aŋ yi hɛ.

¹⁹Ȧtesoma-e i yɔ hɛ tafinɔ ȧtȧ i yema; i yɔ gbo taləs ȧtȧ i te yema.

²⁰Kɛrɛ bepi i yɔ ȧtȧ i te yema-e, pə yi hɛ minɛŋ sɔ ɔwe yɔ ti, pə yi ahakɛ aŋa yi mi rokor.

²¹Tiyȧŋ i fir athɔ aŋ yi ro rɔmi kəpa ye, ma i yema yɔ ɔlompi ahakɛ aŋ bəpər.

²²kotȧy-e ɔ bɔnɛ mi ro ȧmerȧ salata ȧŋthɔ ŋa Kuru.

²³Kɛrɛ i nənk athɔ alɔm ka malaŋktha ma ȧŋdɛr a mi aŋa mə timanɛ ȧŋthɔ ŋa ȧŋmerȧ a mi tə kəgbasi mi mɔ ukɛndɛbira ratha ka ȧŋthɔ ŋa ahakɛ aŋa yi ka malaŋktha ma ȧŋdɛr a mi.

²⁴O minɛŋ i yi wuni mɔnɛ! Kanɛ mə kisis mi ka ȧŋdɛr ŋa rafi aŋe-e?

²⁵I mɔmɔ Kuru, kakisi kə yi ka Yisɔs Krayst ɔMarki kȧsu. Ɔwa ka ȧŋmerȧ a mi i bȧtho ȧŋthɔ ŋa Kuru; kɛrɛ ka ȧŋdɛr a mi i tȧŋ ȧŋthɔ ŋa ahakɛ.